1 Kɔlɛ́ntɛ 2
2
Gɛnɔ́gɔ́ gá Cɔ́mɔ gá Yésu Kilítu mɔ́ɔnyɔ bá mbaá gilénée naá kolósi
1Bolimóní, naá bámɛ boayá, gɔ́ɔgɔ ndɔ́mɔ́ úléelú naá bɛɛnyɔ́ɔ, bó do báá na goíyime gá go gálagala ɛ́na na nciŋí, gɔ́ɔ ndɔ́mɔ́ úléelú go go nco dúmenye nnindíi ya Asaŋa. 2Ndɛ́ kanɛ go fúmbe go nyó oyana boóma búncodío, aáŋa caá Yésu Kilítu, goana Yésu Kilítu mɔ́ɔnyɔ bá mbaá gilénée naá kolósi. 3Gɔ́ɔ ndɔ́mɔ́ bɛ́ɛ́mbáalú naá kadɛ́gadɛ́ɛ yɛnyɔ́, kanɛ magɛ́nda, tagadana na bofoá#2.3 O bana, go eninye na Meŋ 18.9.. 4Gɛnɔ́gɔ́ gá Cɔ́mɔ gɛ́ɛgɛ mmbaá lɔmɔ́ nnyó oyanɛna, bó do mbáa lɛ na dogálɔ dá nciŋí go go fúmbe go nyó bɔŋɔbɔŋɔ, kanɛ́, bó mbaá lɛ go go dúfie daŋɛ́daŋɛ bogaaga bá Gimmúmpúu gá Giliíli. 5Nɔ́ɔnɔ mbɔ́gɔ́ ya gioliminyo gɛ́nyɔ́ ɛ dɛ bɛ́ɛ́mbá suméelú naá nciŋí ya batɔ, kanɛ́, naá bogaaga bá Asaŋa.
Nciŋí ya Asaŋa
6Moatɛ́, bó lɔ́mɔ́ nciŋí yɛ́ kúunenyemú go bakɛlɛ́tɛnɛ báaba bá báá ná manɛ́ go gónɛna; bó do báá nciŋí ya batɔ bá cí yɛ́ɛyɛ, ɛ́na ya mefuŋe má cí yɛ́ɛyɛ, báaba bá ná fúemú. 7Kúunenyemú nciŋí ya Asaŋa yɛ́ɛyɛ ɛ gá lɔ́mɔ́ nnindíi, ɔsɛ́gɔ́ɔlú go batɔ bá cí. Asaŋa a mba dóáná go yɛ gedie, otóotoɛ yá go gedie cí goŋaá dɛ dáŋaba nigúmi nɛ́hɛ́. 8Mefuŋe má cí yɛ́ɛyɛ má lɛ́ kanɛ go yɛ lɛnca, goakɛ́, aáŋa bá mba yɛ lɛncá, gásɛ́ bá lɛ́ kanɛ go gilene Daadáa ugúmigumi naá kolósi. 9Aŋa bó lɔ́mɔ́ ɔ́ŋɔ́ɔlú naá kálata ya Asaŋa goŋaá: Asaŋa a mba gedíe go busío bá batɔ báaba bá mo maamanamɔ́, boóma bɔ́ɔbɔ niíso nɛ́ lɔ́mɔ́ kanɛ go ɛ́na, udúu kanɛ go ɔ́bɔ, bɔ́ɔbɔ odɛ́má yá mɔtɔ yó gá báasamɔ́ yó do bééníŋínyée#2.9 Go ɛ́na Iseyíi 64.3; 52.15.. 10Gɔ́ɔ, Asaŋa a mbaá có bó lincíe gá Gimmúmpúu gá Giliíli, goŋaá Gimmúmpúu gá Giliíli i íyimene buimée, akɛ́ findímíi sá Asaŋa. 11Akɛ́ mɔtɔ a dɛ báá ba go íyime bɔ́ɔbɔ bó lɔ́mɔ́ naá gadɛ́ɛ gá sɔ́gɔ́ mɔtɔ, goana odɛ́má yá onyɔ moánɛ. Caŋa mmue, bɔ́ɔbɔ bó lɔ́mɔ́ naá Asaŋa, mɔtɔ a dɛ báá ba go bó íyime aáŋa caá Giliíli ba Asaŋa. 12Bɛɛcɔ́ɔ, dɛ lɛ́ kanɛ go bɛa mbééníŋínyí yá batɔ bá cí yɛ́ɛyɛ, kanɛ́ dɛ mbaá bɛáa Giliíli mɔ́ɔnyɔ u úlenemú naá Asaŋa, go goŋaá dɛ lɛncana pááná sɛ́ɛsɛ a có boogomú na sɛ́. 13Dɛ dɛ gálágáláa moóma moánɛ go kúunye ya batɔ bá cí, kanɛ́ go kúunye ya Giliíli. Nɔ́ɔ gɔ́ɔ dɛ falonamɔ́ bɛmammana bá moóma má Asaŋa na dogálɔ dɔ́ɔdɔ Giliíli a có fáananamɔ́. 14Mɔtɔ a dɛ báá ba go oliminyo bɔ́ɔbɔ bó úlenemú naá Giliíli ba Asaŋa go nciŋí yɛhɛ́ ya moatɛ́ moatɛ. Gɛ́hɛ́, bɔ́ɔbɔ bó lɛ́ goana buegu, a dɛ bósó ba go bó lɛnca, goakɛ́ go Giliíli ba Asaŋa gɔ́ɔ bá lɛncanamɔ́ moóma mɔ́ɔmɔ. 15Kanɛ́ mɔtɔ mɔ́ɔnyɔ a lɔ́mɔ́ na Giliíli ba Asaŋa, a lɛncana buimée; mɔ́ɔ moatɛ́, mɔtɔ a dɛ bósó ba go mo lɛnca. 16Bó lɛ́ ɔ́ŋɔ́ɔlú naá Kálata ya Asaŋa goŋaá: Ánɛ́ɛ kanɛ́ i íyimenemú mbééníŋínyí ya Daadáa o? Ánɛ́ɛ a lɔ́mɔ́ ba go mo fáa ɛsɔ́mɔ#2.16 Iseyíi 40.13. o? Bɛɛcɔ́ɔ dɛ bɛanana mbééníŋínyí ya Kilítusu.
Currently Selected:
1 Kɔlɛ́ntɛ 2: YAS
Highlight
Copy
Compare
Share
Want to have your highlights saved across all your devices? Sign up or sign in
