Luk 6:27-49
Luk 6:27-49 OKU
Mɛ me se suuy se ghɛn ghɛ ɛ́ yion mɛ ge: Ghɛn yɛ koŋe ghele əbbaanese nə ghɛn. Nɛɛye njuŋ se ghel ghɛ ɛ́ banen ghɛn; jeme ge Feyine bose ghii dii ghɛ ɛ́ tenen kak se ghɛn, gese jeme se ghii dii ghɛ ɛ́ nyablen nɛ̀ ghɛn. Loo lu wele tɛl wɛ̀ ɛ kegiɛk, wɛ̀ bense kelee é əb mɛyse tɛl. Wele chok ndəyse kenton nə wɛ̀, wɛ̀ vəse sɛ məme əb mɛyse è chok. Lon naa ndɛ kefaa se wɛ̀, wɛ̀ fo, wele cheme liɛ naa ghɛ ə viɛ ghàà wɛ̀ kase bif. Ghɛn yɛ nɛɛye kenəə se ghele nɛ lu kɛ ghɛne koŋen ge ghene yɛ nɛɛy se ghɛn. Ghɛn lɛ koŋe kɛn ghel ghɛ ɛ́ koŋen ghɛn, ɛ́ yɛ bente ghɛn se ghɛ? Chèmè lu ghele mbeese fene ghene ko koŋe ghel ghɛ ɛ́ koŋen ghene. Ghɛn lòò è yɛ nɛɛye njuŋ kɛn se ghel ghɛ ɛ́ nɛɛyen njuŋ se ghɛn, ɛ́ yɛ bente ghɛn se ghɛ? Chèmè lu ghele mbee fene ghene ko nɛɛy sɛy dì. Nɛ loo lu ghɛne yɛ foose kɛn se ghii dii ghɛ ghɛne kwaaten ge ɛ́ nɛ̂y kase seese, ɛ́ yɛ bente ghɛn se ghɛ? Chèmè lu ghele mbee fene ghene ko foose se ghele mbee ɛlee, kɛŋe ge ghene nɛ̂y kase seese ɛyghɛl. Kɛ́ titiye lu ge: Ghɛn yɛ koŋe ghele əbbaanese nə ghɛn, nɛɛy njuŋ se ghene, foose se ghene kiye wiy kefaa ɛybam, é əbmakte əbghakene nɛ̂y yɛ lu wɛne, é ghɛn gese yɛ lu ghon ə Feyin wɛ əb ngaŋten bek ge, əb nɛɛy njuŋ se ghii dii ghɛ ɛ́ kiin nchiinen setaa gese ŋwɛye. Ghɛn yɛ ki ɛykoosen ɛysen se ghele kɛn ka ba ə wen kiin. Ghàà ghɛn yɛ sake ghel, é Feyine jia náà sak ghɛn. Ghàà ghɛn yɛ ghame ghel, é Feyine jia náà gham ghɛn. Ghɛn yɛ lɛyse əbjas ə ghel é Feyine náà lɛyse wɛn wee. Ghɛn yɛ foo se ghele é Feyine náà fo sɛ̂y se ghɛn. Əb loo fo se ghɛn é əb fek kejuŋ è siyse, è yikte ke lun è yɛ səyte, əb kase se ghɛn ə əbbuam. Əbfek wɛ wɛ̀ feken kefaa so se geese fo se wel lu əbghene wɛ Feyine náà fek kiɛ so è fise. Jesus me maa ngan yin se ghene ge: Lɛ lòó kenfefe din jii se kenfef kelee-a? Əb lɛ mom di é ghene jia fɛyke se ɛybee ghel ɛjim-a? Wan-ɛyfɛl lòó əb jia chia ba-ɛyfɛl nə wen, dî nɛ naa ndɛ wɛ əb lootemen yiɛke, se shi kɛn ka ba-ɛyfɛl nə wen. Lu bek ghɛ wɛ wɛ̀ kiyen ɛykfəke fekak yɛ ɛy luun ɛ wan-no ə viɛ ɛyshiɛ, dî yɛne wiy kefuŋ kɛ ke luun ɛ yíɛ́? Lòó wɛ̀ suuy lɛɛy se wan-no ə viɛ ge: Wan-no ə wom, mɛ fəyse ɛykfəke fekak se wɛ̀ ɛyshiɛ, cheme yɛne wiy kefuŋ kɛ ke luun ɛ yiɛ. Wel əbbuam, chia mbiy è fəyse kefuŋe fekak kɛ ke luun ɛ wɛ̀ ɛyshiɛ é wɛ̀ me loote yɛn ɛykfəke fekak yɛ ɛy luun ɛ wan-no viɛ ɛyshiɛ, è fəyse. Lòó fekak fejuŋe jia koóm əmtam əmbee, ghɛɛ-ghɛɛ ka fekak febee loo fe jia koóm əmtam əmjuŋ. Ɛ́ keele fekak se ɛynkii əmtam mɛ fe koom. Lòó ɛ́ jia koy ɛybiy ɛ fekake əbjuŋ, nɛ lòó ɛ́ jia koy fenyak əbteŋe nduy. Wele loo lu Wel əbjuŋ ɛytem ə wene lun nɛ̀ əbnəə əbjuŋe, əb yɛ suuy əbnəə əbjuŋe, loo lu wel əbbee, ɛytem ə wene lun nɛ̀ mbee, əb yɛ suuye əbnəə əbbee, kenəə kɛ ke fəyen ɛ wel əbchio lu kɛ ke lunen ɛ wen ɛytem. Jesus gese bif ge: Lu bek ghɛ wɛ ghɛne toŋten mɛ ge: Báàba, Báàba; dî nɛɛy wiy kenəə kɛ mɛ suuyen se ghɛn? Naa ndɛ wɛ əb gwiyen se mɛ, è yio giɛ som, è yɛ nɛɛy ka mɛ suuyen lu nɛ mɛ din se ghɛn jii yɛ əb luun ɛ ten: Əb lu ka wel wɛ əb nè loo bàklè ndaa, è tim ketiɛ ten è chin ɛyghok. Ɛyghuu nɛy gwiy, jio luun è fəy è shikse ndaa ten, ɛy jia fɛy bek ka ɛ́ nè looten bàklè. Dî nɛ wel wɛ əb yion, nɛɛyen wiy lu ka wel wɛ əb nè baklen ndaa ə wen ɛ kegvəmte əmntiɛ. Ɛyghuu nɛy gwiy, jio lun è fəy è shikse ndaa ten ɛy fɛy kekfvəme tene se bɛme ge.