Ɛyf 13

Ɛ́ chok Balnabas ghene Sool è lɛm ndun se ɛyfɛl nə Feyine

1Nè lu ɛ kenone ghel ɛbeemene kɛ́ Antioke nɛ ghele ntum nə Feyine lu, nɛ̀ ndintese, ka Balnabas, nɛ̀ Simeon wɛ ɛ́ toŋten sɛy ge wel əbfinsen, nɛ̀ Lusius wɛ́ Silen, nɛ̀ Manaen wɛ ɛ́ nè liyen ghene Goveno Helod gese nɛ̀ Sool. 2Naa se lu əbliy əblee, ghene se kokse Feyin, bame əbfua-əbyíɛ́ne, Keyioy Kelanene suuy se ghene ge: Ghɛn lɛm Balnabas ghene Sool ndun é ghene ndu è yɛ nɛɛy ɛyfɛl yɛ mɛ nè choken ghene ge ɛ́ yɛ fɛl. 3Ghene bam əbfua-əbyíɛ́ne, è jem, è lɛm ɛghoo ɛ Balnabas ghene Sool əbtuu è me tinse ghene.

Kenəə kɛ ke nè ganen ɛ Siblus

4Keyioy Kelanene nè tum Balnabas ghene Sool ghene chio è ndu ɛ Seleusia è lii kenək, è diaŋ ɛ ɛylake Siblus. 5Ghene ndu è chin ɛ ntɛke Salamis è se fekte kenəə ə Feyin ɛ ngayse ɛyjem nə ghele Juuse. Joon Mak nè lu ghene ghene, giamten ghene.

6Ghene ghan ketume ten kejim è chin ɛ Bafos ghaa ghene nè yɛnen wel ɛyfiɛŋ ɛyfuu əblee nɛ ɛ́ toŋte ge Baa-Jesus, wele Juus nɛ əb nè lɛɛsen ghel ge yi lu wele ntum nə Feyine. 7Əb nè fɛle se Goveno Selgius Boolus wɛ əb saken Sayblus nɛ gese lu wele ketuu kebanene. Goveno nɛy loo è jaŋ Balnabas ghene Sool bek ge əb nè kɛŋe se yio kenəə ə Feyin. 8Ghene gwiy, wel ɛyfiɛŋ ɛyfuu vi wɛ ɛyghel ə wene luun ɛ əblame Gleek ge Elimas me se yole ghene, nɛɛye ge ghàà Goveno fo ɛytem ə wen se Jesus. 9Keyioy Kelanene lun se ɛytem nə Sool wɛ ɛ́ nè toŋten sɛy ge: Bool, əb soo ɛyshiɛ Elymas əbghun è suuy ge: 10Wɛ̀ lu wán ə Satan. Wɛ̀ bane əbnəə əbjuŋe əbjim, lɛɛse ghel, nɛɛye əbnəə əbbee. Lòó wɛ̀ jia yî yal se yɛ fiɛk əbluuy wɛ əb luun ɛ kenəə ə Feyin ge yɛ lu əbbuam-a? 11Yɛn-a, Feyine mak ngɛk se wɛ̀ é wɛ̀ jia bo yɛn əblik se keleŋ əbliy.

Kɛn se əbliy kefaa chite ɛshiɛ wen ka mbàkse dì, əblike fin wen finen, əb me se ghàà əblik kɛŋe wel wɛ əb ghal keghoo ə wen è yɛ dine jii se wen. 12Goveno yɛn kenəə kɛ ke ganen, è fo ɛytem se Jesus. Əbchio nè lô yum wen kum əbnəə wɛ Bool nè dinten kum Jesus.

Bool fekte kenəə ə Feyin ɛ Antioke wɛ̂ ɛylake Bisidia

13Bool ghene ghele ngoo nə wene me lii se kenək ɛ Bafos è diaŋ se Belga ɛylake Bamfilia. Joon Mak vəse ghene fo è kase fiile se Jolesalem. 14Ghene loo se Belga è chia è ndu è chin ɛ ntɛke Antiok wɛ̂ ɛylake Bisidia. Nɛy se lu ɛ kechii ɛybam, ghene ndu è lii ɛ ngay ɛyjem è diom. 15Ɛ́ jaŋ ɛysak ə Moses, è gese jaŋ kɛ́ ghele ntum nə Feyine è mɛyse, ghel ghɛ ɛ́ nè saken ngay ɛyjem yɛ ten tum wel se ghene suuye ge: Ghone-nyii, loo lu nɛ ghɛn ki giɛ ə ntef se ghele, ghɛn fo.

16Bool teem ɛ ɛyyio è chil ghene nɛ̀ keghoo è suuy ge:

Ghele Islaele, nɛ̀ ghɛn ghɛ ghel əbtum ghɛ ɛ́ koksen Feyin, ghɛn yióté. 17Feyin Fɛ ghele Islaele koksen nè chok ɛbaa ɛbaa ə ghɛsen è nɛɛy ghene kuy ɛ əbliy wɛ ghene nè chiin ɛylake Ejibt. Əb naa fəyse ghene se ɛylak fo nɛ̀ əbtaawe ə wen əbtaa. 18Feyine nè lô kul ɛytem è se toknen nɛ̀ ghene se ngukse ka əmkɛɛk ɛ əbkwak əbyume. 19Əb naa nyok telak saamba ɛ Kanaan, è fo ntiɛ ə ghen se ghel ə wene ka əbtik.

20Əbnəə nɛ̂ vin əbjim nè liɛ kelik se nguk ka ɛyviɛ ɛykɛɛk nɛ̀ nguk əmmtan. Se ɛybame ten, əb se foo ghɛ́ ɛysake ge ɛ́ yɛ sake ghene se chin se əbliy nə Samuel wɛ wele ntum nə Feyine. 21Ghene naa lon əbfon, Feyine fo Sool wɛ wán ə Kish wɛ wel ɛykfəə nə Benjamin, əb sák ghene se nguk əmmkɛɛk. 22Feyine naa səkse wen, è kokse David se ghene əbfon. Əb nè lômen suŋnen kum David ge: “Mɛ yɛnmen ge David wɛ wán ə Jesse lu ɛynkii wel wɛ mɛ koŋen, əb nɛ̂y yɛ nɛɛye əbnəə əbjim wɛ mɛ koŋen.” 23Nè lu ɛykfəə nə əbfon wɛ David ghaa Feyine nè tinsen Mboyse ghele Islael wɛ Jesus ka əb nè kaken. 24Nɛ Jesus geese gwiy lu nɛ Joon nè se fekte se ghele Islael ge ghene kubsen tetem ə ghen é yi fó moo se ghene. 25Joon naa loo mɛyse ɛyfɛl ə wen è bif se ghele ge: Ghɛne kwaate ge mɛ lu ndɛ? Mɛ báà se lu wel wɛ ghɛne chiyten vi. Yɛn-a, əb bo gwiye ɛ mɛ ɛybam dî nɛ mɛ wiy kekwɛnten se yayte guose ɛvəə nə wen.

26Ghone-nyii, ghɛ ghel ɛykfəə nə Ablahame gese nɛ̀ ghel əbtum ghii ghɛ ɛ́ koksen Feyin, Feyine nè tinse sakghɛ vin wɛ kum ɛyboy se ghɛsen. 27Ghele Jolesaleme, nɛ̀ ghel ghɛ ɛ́ saken ghene nè báà keele Jesus, è se jaŋe əbnəə wɛ ghele ntum nə Feyine nè nyaken keele wiy sɛy, əbnəə wɛ̂ jaŋen kechii ɛybam kejim. Ghene naa sak wen è suuy ge ɛ́ yúy wen, kenəə kɛ ghele ntum nə Feyine nè nyaken kum wen me kwɛn. 28Chèmè lu ka ɛ́ nè báà yɛn kejas kɛ yuy wen se ten, ghene ko suuy se Bailɛt ge əb chiase ɛysak ɛ́ yúy wen. 29Nɛy se lu ka ghene nè nɛɛyenmen əbnəə əbjim wɛ ɛ́ nyaken ɛ ŋwaale-Feyin kum wen, ɛ́ me səkse wen se kentam è vi se ɛysɛy. 30Dî Feyine kase lose wen se ɛykuo, 31əb din ngeŋ ə wen se əbchii se ɛydio se ghel ghɛ ghene ghene nè lòòn ɛ Galilee è kok se Jolesalem. Lu ghene ghel ghɛ ɛ́ nè yɛnen əbnəə ten è se fekte se ghel ə ghɛsen ɛ leenen.

32Ghɛse me se gwiye nɛ̀ sakghɛ əbjuŋ nɛ̂ vin se ghɛn ge kenəə kɛ Feyine nè kaken se ɛbaa ɛbaa ə ghɛsen, 33lu nɛ əb nɛɛymen se ghɛsen ghɛ ghon ə ghen. Ke kwɛn ka Feyine nè losen Jesus se ɛykuo. Ɛ́ nè nyak ɛ ŋwaale Salm nchəəy sebaa ge:

“Wɛ̀ lu wán ə wom

mɛ shi Ba ə viɛ lan.”

34Kɛn ka Feyine nè losen wen se ɛykuo, nɛ əb jia bo yî kuo əb nè suuy ge:

“Ke lu se əbluuy nɛ mɛ náà fo mbose ɛylanen se wɛ̀

yɛ mɛ nè kaken David so.”

35Ko lu ka əb suuyen ɛ kelik kelee ɛ ŋwaale Salm ge:

“Wɛ̀ jia náà vəse wel ɛyfɛl nə wɛ̀ əbjuŋ é əb foy ɛ ɛysɛy.”

36Kɛ́ Davide lu nɛ əb nè nɛɛy ɛyfɛl ə Feyin ɛ wene ntem, è kuo, ɛ́ gvəəme wen ɛ ɛbaa ɛbaa wen ɛybee, ɛygvən ə wene foy. 37Dî nɛ vidi wɛ Feyine nè losen se ɛykuo nè báà foy.

38Ghone-nyii, ghɛn keele ge lu bek əbtaawe ɛyfɛl nə Jesus wɛ ghɛse fekten se ghɛn kum ɛylɛyse mbeese. 39Ghɛn keele sɛy ge, wel fo ɛytem se Jesus fene əb boymen se wen ə mbee sɛ nè lòó tesak ə Mosese jia boyse wen se ten. 40Ke me se lu ge ghɛn toknen fɛ kenəə kɛ ɛ́ nyaken ɛ ŋwaale nə ghɛ́ ntum nə Feyine gan se ghɛn. Ɛ́ nyak fo ge:

41“Yɛn-a, ghɛn ghɛ ɛ́ chiɛyen kenəə ə Feyin,

ghɛne náà yɛ lu nɛ̀ əbchíò əbyúméné, kuokee

bek ge mɛ nɛ̂y nɛɛy əbnəə ɛ ghɛn əmchii

wɛ ghɛne jia yi beeme

koŋ yɛ lu nɛ ɛ́ suuy se ghɛn.”

42Bool ghene Balnabas nɛy loo fəy se ngay ɛyjem fo, ɛ́ beŋte ghene ge ghene nɛ̂y kase gwiy se nkumse ɛ kechii ɛybam è gese fekte kum əbnəə ten. 43Ghele loo giabsen se ngay ɛyjem ghele Juuse nɛ̀ ghel ghɛ ɛ́ benlen benlen se ghele Juus se nduu ɛ Bool ghene Balnabas ɛybam naa se ɛydio. Ghe Bool me se tefe ghene ge ghene fó ɛytem se Feyine è yɛ tiy kɛn ɛ əbnəə wɛ Feyine bosen ghene so.

44Nɛy se lu ɛ kechii ɛybam fɛy ndio ghele ghɛ́ ntɛk foo fəy se gwiy se yiote kenəə ə Feyin. 45Ghele Juuse yɛn ngose wel dì, è me se ghɛke Bool ghene Balnabas, bo beeme wiy kenəə kɛ Bool suuyen gese tɛyle wen. 46Bool ghene Balnabas me fise ɛ dɛɛne ge: Ke nè lu ɛ shii ge ɛ́ kɛɛte è fekte kenəə ə Feyin nɛ lu se ghɛn. Ka ghɛn tunsenmen, è liɛ ngeŋ ə sɛn ge ghɛne báà se lu kekwɛnten se naa se kiile ɛychii yɛ ɛy jia yî mɛy, ghɛse yɛ́ fekte ɛ leenen se əbtume. 47Bay nè chiase ɛysak se ghɛs ge:

“Mɛ lɛmmen ghɛn ge kekaaken se əbtume

ge ghɛne náà nɛɛy é ketuu ntiɛ kejime kiile ɛyboy.”

48Ghel əbtume yio kii nɛ̂ kine, è se saŋlee, bensen giɛse Feyin. Ghel ghɛ Feyine nè chokenmen ge ɛ́ náà kiile ɛychii yɛ ɛy jia yî mɛy me fo ɛytem se Feyine.

49Kenəə ə Feyine me saanken ɛ ntaam fo naa ɛyjim. 50Dî ghele Juuse bɛyse əbkiy ɛtaa ghɛ ɛ́ nè nɛɛyen kenəə kɛ Feyine koŋen, ghene chɛɛ sɛ ntɛk foo, ɛ́ se nəkse Bool ghene Balnabas, è jum ghene se ghene ntɛk. 51Ghe Bool me tɛte kebvəl se ghene ɛvəə ka əbchəyte mbee yɛ ghel ghii nɛɛyen se ghene è lòò è ndu se Ikonium. 52Ghel ɛbeemene se saŋle naa se ŋaŋ nɛ Keyioy Kelanene lun ɛ ghene tetem.

Currently Selected:

Ɛyf 13: oku

Highlight

Copy

Compare