Pʉɔ-Lɔ́mɑ 13
13
NɛzúꞋ ntsu-pɑsɑ́Ꞌŋɡɔŋ
1Ɛ́ sɛ́ ḿbíkŋɛ ŋɡɔ mbɑ wɛ́tɛ́ ŋu lɑ́ tsɛtsɛt pʉʉ zúꞋ ntsu-pʉɔ pi pɔ́p sɑ́Ꞌnɛ ŋɡɔŋ, mbíꞋŋɡɔ nɛsɑ́Ꞌ ŋɡɔŋ fú pɔ mbɔ̌ Sɛ́. Sɛ́ kɑ zɑ́pnɛ pɑsɑ́Ꞌŋɡɔŋ pi pɔ́p ɡú. 2Pɔ́Ꞌɔ lɑ́, ḿbɔ́ yi ŋu lɑɑ ńtʉʉ tú mbɔ̌ pɑsɑ́Ꞌŋɡɔŋ, mbɔ ɑ lɔk ńdʉꞋ pɔ yúu mi Sɛ́ kɑ zɑ́pnɛ. Yîyɑ́ ntɛ́ pʉɔ pɔ́Ꞌɔ, ńdɔk ɛ́shɔtnɛ ɛ́fúŋ ntsɑŋ ńníꞋ tú pɔ́p. 3Pɑɡɛ nu sʉ́Ꞌnɛ kɑ́ ɡẅɛɛ nɛpɔ́k pɑsɑ́Ꞌŋɡɔŋ pɔ́, pɑɡɛ nu kɛpɔŋ ɡẅɛɛnɛ nɛpɔ́k wɔ́p. Ɔ lɑɑ ŋ́kɛ́ mbɔɔ kɔŋ nɛpɔ́k pɑsɑ́Ꞌŋɡɔŋ pɔ́, ɔ ɡɛ nu sʉ́Ꞌnɛ, pɔ́p ɡɑ́ pɑ́Ꞌlɑ́ mbɔ̌ ɡu. 4MbíꞋŋɡɔ pɔ́p fɑꞋ pɔ fɑꞋ-Sɛ́ ẅi ɑ ɡʉ ńtsʉ́ʉnɛ wú nɛɡɛ nu sʉ́Ꞌnɛ. Lɑ́, ɔ kɛ ɛ́fɑɑnɛ nu mbɔ ɔ ńnɑ́ŋ ḿbɔ́k wɔ́p, mbíꞋŋɡɔ mɛtʉʉ mi Sɛ́ ɡɑ́nɛ mbɔ̌ pɔ́p, ɑ kɑ́ pɔ́ ŋ́ɡɑ́ níinɛ pɔ́. Pɔ́p lɔk nɛníꞋ ŋɡʉ̈ɔ́Ꞌ tú-ŋu ẅí ɑ fɑɑnɛ́nɛ nu, ńdɔk ɛ́fɑꞋ fɑꞋ-Sɛ́, ḿbɛn ńdɔk ńnyɛt ŋɡɔ Sɛ́ zɑ́ŋ lɔ́ŋ nǔu ɡɑŋmɛfɑɑnɛ. 5Ɛ́ yúu mi ɛ́ ɡɛnɛ lɑ ɛ́ pɔ́ ḿbíkŋɛ nɛkɔk mbʉʉ ŋ́ɡɑ́ sɛ́ mbi pɑsɑ́Ꞌŋɡɔŋ. Pɛ́ kɑ́ ɡɑ́ ɛ́ pɔ́ pɔ ndɑꞋ nɛlɔk ḿbɔ́k ŋɡɔ Sɛ́ ɡʉ ńzɑ́ŋ lɔ́ŋ pɔ́, ɛ́ pɛn ḿbɔ́, mbíꞋŋɡɔ tʉ́m yɛkŋɛ sɛ́ ḿbíkŋɛ ŋɡɔ pɛkŋɛ ɡɛ pɔ́Ꞌɔ. 6Ɛ́ yúu mi ɛ́ pɛnnɛ ŋ́ɡɛ lɑ pʉʉ mɑꞋ ntsup-ŋɡɔŋ, mbíꞋŋɡɔ Sɛ́ kɑ zɑ́pnɛ pɑfɑꞋ yîyɑ́ fɑꞋ, pɑ́Ꞌ pɔ́p ɡʉ ńtsuŋ ńniitɛ ɛ́fɑꞋ fɑꞋ yɔ́p. 7Pɔ́Ꞌɔ lɑ́, ɛ́ ɡʉ nǔu pɑsɑ́Ꞌŋɡɔŋ, pʉʉ ɡɑ́ yúu mi ɛ́ sɛ́ ḿbíkŋɛ ŋɡɔ pʉʉ ɡɑ́ mbɔ̌ mbɑ wɛ́tɛ́ ŋu lɑ́ mbɔ̌ wɛ́. Ɛ́ lɑɑ ḿbɔ́ ntsup-ŋɡɔŋ, pʉʉ ɡɑ́ mbɔ̌ ŋu ẅí ɑ cẅɛ́ɛnɛ ntsup-ŋɡɔŋ, ḿbɔ́ ŋkɑ́p yi nɛpʉ́ʉ sɛ́ ḿbíkŋɛ mbɔ̌ pʉʉ nǔu yɛcɔ́ nu, pʉʉ ɡɑ́ mbɔ̌ ŋu ẅí ɑ cẅɛ́ɛnɛ. Pʉʉ zúꞋ ntsu-ŋu ẅí ɛ́ sɛ́ ḿbíkŋɛ ŋɡɔ pɛ́ zúꞋ ntsu wɛ́, ŋ́ɡɑ́ mɛkuꞋ ŋu ẅí ɛ́ sɛ́ ḿbíkŋɛ ŋɡɔ pɛ́ ɡɑ́ mɛkuꞋ mɛ́.
Nɛkɔŋ pʉɔtsʉʉ
8Kɔɔ ŋu wʉʉ ɡẅɛɛ yɛcɔ́ nzɔ́ ndɛꞋ tɛ ndíꞋ ndɑꞋ nɛkɔŋ ŋu, ɛ́ nzɔ́ yi pɔ́ɔpɛ́mɑ́ ɡẅɛɛnɛ nɛtɔŋɛ tsɛtsɛt pɔ́p mbíꞋŋɡɔ ŋu lɑɑ ŋ́kɔŋ pɛcɔ́ pʉɔ, mbɔ ɑ lɔk ŋ́kúꞋlɛ nɛpʉ́ʉ-Sɛ́ tsʉʉ. 9Pʉʉ zɛɛ ńjí nɛpʉ́ʉ ni ɛ́ cúnɛ ŋɡɔ: «Kɔɔ ɡɛ ɡɑp. Kɔɔ jẅí ŋu. Kɔɔ jʉ̈ɔ. Kɔɔ tík mík nǔu yúu-ŋu». Lɔk ŋ́kút mɛtú mɔnɛ mbʉ́ʉ tɛ mbɑ mɛcɔ́ pɔ́ ŋɡɔ: «Kɔŋ mɔ́ɔmɑ́ wu ŋumɛsɔŋ pɑ́Ꞌ ɔ kɔŋnɛ túmbʉʉ yú». 10Ŋu lɑɑ ḿbɔ́ ŋ́kɔŋ mɔ́ɔmɑ́ wɛ ŋumɛsɔŋ, mbɔ ɑ kɑ́ pɔ́ ńdɔk ŋ́ɡɛ yɛcɔ́ nu kɛpɔŋ nǔu ŋɡɑŋ pɔ́, ɑ lɔk pɔ́Ꞌɔ, ŋ́kúꞋlɛ nɛpʉ́ʉ-Sɛ́ tsʉʉ.
Nɛnɑ́ŋ ḿbɔ́ ńzẅíꞋlɛ Kɛlístɔ zẅíꞋlɛ́nɛ
11Pʉʉ sɑ́Ꞌ tʉʉ, ŋ́ɡɛ mîmɑ́ mɛnu mbíꞋŋɡɔ pʉʉ sɛ́ ńjí kɛm njí yi pɛkŋɛ nǔu. Yɔ ŋkɑ́ yi ɛ́ píkŋɛ́nɛ ŋɡɔ pʉʉ jʉɔmɛ. MbíꞋŋɡɔ ɛ́ ŋkɔ̂ɔnɛ, mbɔ ŋkɑ́ yi Sɛ́ ɡʉ ŋ́ɡɛ pɛkŋɛ luk, ɛ́ pɑ́ɑtɛ mɔ́, ńdɛɛ pɑ́Ꞌ ɛ́ kɑ pɔ́nɛ ŋkɑ́ yi pɛkŋɛ kɑ pɛ́t ńzɛ nɛzɑ́p tʉ́m nǔu Sɛ́. 12ZɑꞋ tsuŋ mɔ́ ńdɛɛ, njí pɔ́ mɔ́ ŋ́kiɛ. Pɔ́Ꞌɔ lɑ́, pɛkŋɛ mɛꞋ mɛfɑꞋ mi pɛ́ fɑꞋnɛ pɔ tsɛt nzɛ́nzʉ́ʉ, pɛkŋɛ tíi yúu-ntsɔ yi ɛ́ tʉ́ʉnɛ nǔu zʉꞋ kyɛꞌ, ńdɔk ńdʉ̈ɔ́Ꞌ ntsɔ. 13Pɛkŋɛ ɡẅɛɛ tsẅɛ́ sʉ́Ꞌnɛ nǔu pɑ́Ꞌ ɛ́ sɛ́ ḿbíkŋɛ ŋɡɔ pɛ́ ɡẅɛɛ pɔ́Ꞌɔ, ŋkɑ́ yi zʉꞋ sɛ́ ɛ́fúk, ḿbɑ́ɑ nɛkwɛ́t yúu kɛ nɛ́ nɔ́ mɛluꞋ pɔ́ nɛ́ ɡɛɡʉʉ, ḿbɑ́ɑ nɛ́ puutɛ mbɑ wɔ̌ lɑ́ pɛkŋɛ pɛpɔ́p nɔɔ nɔɔnɛ, ḿbɑ́ɑ yúu mi sʉ́ʉ ɡʉ kɔ́ wɛkŋɛ nǔu, ḿbɑ́ɑ nɛtɑ́k mɛfɛꞋ, ḿbɑ́ɑ kɛ́ɡʉ̈ɔꞋ. 14Pʉʉ tíi nɛpɔ́ wɛ fí ẅi Yɛ́su Kɛlístɔ Tsɑpʉɔ wɛkŋɛ ɡɑ́nɛ ḿmɑꞋ. Kɔɔ pʉʉ pɛn ńnɑ́ŋ ŋ́kwɑŋɛ nu nǔu mɛyúu kɛpɔŋ mi mbɑp-mbʉʉ yʉʉ tsʉ́ʉnɛ́nɛ wʉ́ʉ pʉʉ tsɑ́ɑ nɛɡɑ́ mbɔ̌ wɛ́.
Currently Selected:
Pʉɔ-Lɔ́mɑ 13: JGO
Highlight
Share
Compare
Copy
Want to have your highlights saved across all your devices? Sign up or sign in
CABTAL, 2017
