Mɛnu ɛ́ ńdɑ́Ꞌ ńcẅɛt 2
2
Ŋkʉʉ ẅi ɛ́ ɡʉnɛ mbɔ̌ cúꞋlɛ-pʉɔ-Kɛlístɔ yi ɛ́ tʉ́sɔŋ-Ɛ́fɛ̂zɛ
1Ŋ ŋwɑꞋnɛ mɛnu mɔnɛ, ńtúu ŋ́ɡɑ́ mbɔ̌ Cʉ̈ɔꞋ-Sɛ́ ẅi ɑ líŋɛ́nɛ cúꞋlɛ-pʉɔ-Kɛlístɔ yi ɛ́ tʉ́sɔŋ-Ɛ́fɛ̂zɛ. Ŋwɑꞌnɛ ŋɡɔ: Ŋu ẅí ɑ ɡẅɛɛnɛ pɛcʉ̈ɔ́Ꞌ-sɑŋ sɑɑmbɑ́ nǔu lɑ́ɑpɔ́ yɛ́ yi tʉʉ lɑ́, jʉ́ ẅi ɑ ɡɔ ńnɛn, mɛkyɛꞋ sɑɑmbɑ́ mi pɛ́ kɑ lɔknɛ tʉ́n-ŋɡɔ̂l ńniitɛ ɛ́ tʉ̈ɔ́Ꞌlɛ wɛ́ ńníꞋ sɔŋ lɑ́, ɑ sɛ́ ńcú ŋɡɔ: 2Mɔ sɛ́ ńjí mɛfɑꞋ mʉ́ʉ, ḿbɔ́ ńjí wʉʉ nɛkiɛ ziꞋnɛ, ńjí pɑ́Ꞌ pʉʉ sɑ́Ꞌnɛ tʉʉ pɔ́Ꞌɔ, ńjí pɑ́Ꞌ pʉʉ kɑ́ kɔŋ nɛpɔ́ yi pʉʉ pɛ́ pʉɔ pi pɔ́p ɡẅɛɛnɛ shíshí tʉ́m ńtɛmtɛ ku pɔ́, ḿbɔ́ ńjí pɑ́Ꞌ pʉʉ kɑ kɛ́ ŋ́kwɑꞋlɛ pʉɔ pi pɔ́p cúnɛ ŋɡɔ pɔ́p ɡɑŋntúu-Yɛ́su lɑ́ ḿbɔ́ pɔ pɑɡwɑtŋkúu, tɛ ńjí ŋɡɔ pɔ́p pɔ́ pɔ ɡɑŋcɔtnu. 3Pʉʉ sɛ́ ɛ́sɑ́Ꞌ tʉʉ. Pʉʉ kɑ jʉ́ɔ ŋɡʉ̈ɔ́Ꞌ ntɛ́ wɑ́ɑ, ŋ́kɛ́ ḿbɔɔ kɑ́ɑ. 4Lɑ́, ŋ kɛ́ ḿbɔ́ ńdɑ́Ꞌ wʉ́ʉ ntɛ́ nu yi pʉʉ kɑ́ pɛ́t ŋ́kɔŋ wɑ́ɑ pɑ́Ꞌ pʉʉ kɑ piitɛ́nɛ ḿbɔ́ ŋ́kɔŋ wɑ́ɑ pɔ́Ꞌɔ pɔ́. 5Pʉʉ kɛ́ ŋ́kẅíitɛ zʉꞋ yí pʉʉ kɑ tʉ́ʉnɛ zúꞋu lɑ ḿvu sɛ́, ŋ́kúpmɛ mɑt wʉʉ ḿbɛn ɛ́fɑꞋ mɛfɑꞋ mí pʉʉ kɑ pɔ́ ɛ́fɑꞋ. Tɛ ɛ́ pɔɔ pɔ́Ꞌɔ pɔ́, mbɔ n dɑɑ ŋ́ɡɔ ńtɔ́, pʉʉ pɛ́t pɔ kɛ́ kúpmɛ mɑt, mbɔ ŋ ɡʉ ńtíi yʉʉ kyɛꞌ, ŋ́kúpmɛ zʉꞋ yɛ́. 6Lɑ́ yúu mi mɔ sɛ́ ńjʉ́ɔ ŋɡɔ pʉʉ nǔu ḿbɔ́ ŋ́ɡɛ sʉ́Ꞌnɛ, ɛ́ pɑ́Ꞌ mɛfɑꞋ-pʉɔ nǔu nɔɔ yi pɛ́ fúŋnɛ ŋɡɔ Nikɔlɑyidɛ ɛ́ pɔ́ ḿbʉ́k wʉ́ʉ ndʉ́ŋndʉŋ pɑ́Ꞌ ɛ́ pʉ́knɛ wɑ́ɑ ɡúu.
7Ŋu lɑɑ ŋ́ɡẅɛɛ mɛtúutɛ, ɑ zúꞋ nu yí Zẅikŋɛ-Sɛ́ sɛ́ ńcú mbɔ̌ mɛcúꞋlɛ-pʉɔ-Kɛlístɔ lɑɑ. Mɔ ŋ́ɡɛ ŋ́ɡɑ́ ntɑ́ɑ ẅi ɛ́ fúnɛ nǔu tʉ́ yi ɛ́ ɡɛnɛ pɛ́ pɔ́ ɡú, mbɔ̌ ŋu ẅí ɑ lʉ̈ɔ́Ꞌnɛ ntsɔ tɛ ńdɛɛ nu kɛpɔŋ, ɑ jʉ́. Yîyɑ́ tʉ́ pɔ́ tsɛt ŋkɑ́Ꞌ-Sɛ́.
Ŋkʉʉ ẅi ɛ́ ɡʉnɛ mbɔ̌ cúꞋlɛ-pʉɔ-Kɛlístɔ yi ɛ́ tʉ́sɔŋ-Smilnɛ
8Ŋ ŋwɑꞌnɛ mɛnu mɔnɛ, ńtúu ŋ́ɡɑ́ mbɔ̌ Cʉ̈ɔꞋ-Sɛ́ ẅi ɑ líŋɛ́nɛ cúꞋlɛ-pʉɔ-Kɛlístɔ yi ɛ́ tʉ́sɔŋ-Smilnɛ. Ŋwɑꞌnɛ ŋɡɔ: Ŋu ẅí ɑ nduŋmbi, ḿbɔ́ ndẅiknzʉʉ, ŋu ẅí ɑ kɑ pfúnɛ ḿbɛn fú lɑ́Ꞌ-pɛpfú, ɑ sɛ́ ńcú ŋɡɔ: 9Mɔ sɛ́ ńjí ŋɡʉ̈ɔ́Ꞌ yʉʉ, ḿbɔ́ ńjí ŋɡɔ pʉʉ pɔ́ pɔ pɛpúŋ, lɑ́ ŋ́kɛ́ ḿbɔ́ nǔu nɛjí Sɛ́ ḿbɔ́ ɡɑŋyúu. Mɔ, m bɛn ḿbɔ́ ńjí ŋɡɔ pʉɔ pí pɔ́p cúnɛ ŋɡɔ pɔ́p pɑyúdɑ, lɑ́ ŋ́kɛ́ ńdɔk pɔ ntsu ńcú, pɔ́p sɛ́ ŋ́kẅíi lík yʉ́ʉ kɛpɔŋ. Pɔ́p pɔ́ pɔ pʉɔ-cúꞋlɛ-Sɑ́ttɑ. 10Ɛ́ nɛ́nẅín ŋɡɔ pʉʉ ɡʉ ńjʉ́ɔ ŋɡʉ̈ɔ́Ꞌ, lɑ́, kɔɔ pʉʉ kɛ́ ḿbɔ́k. Pʉʉ jí ŋɡɔ Sɑ́ttɑ ɡʉ ḿmɑꞋ pɛcɔ́ pʉɔ pʉ́ʉ ndɑ́tsɑ́ŋ nɛlɔk ŋ́kwɑꞋlɛ wʉ́ʉ ńjʉ́ɔ. Pʉʉ jʉ́ɔ ŋɡʉ̈ɔ́Ꞌ jʉ́ɔnɛ nǔu lɛ́Ꞌ lɑ́Ꞌ nɛɡɛ́m. Pʉʉ kɛ́ ńjí pɔ ndɑꞋ wɑ́ɑ, tɛ mbɑ pɑ́Ꞌ pɛ́ lɑɑ ḿbɔ́ ńjẅítɛ wʉ́ʉ ntɛ́ pɔ́Ꞌɔ. Mɔ, ŋ ɡʉ ńdɑ́Ꞌ ńtɔꞋ ŋɡúꞋ yʉʉ, ɛ́ pɔ́ pɑ́Ꞌ pʉʉ ɡʉ ńdɑ́Ꞌ ḿbɔ́ pɔ ɡú.
11Ŋu lɑɑ ŋ́ɡẅɛɛ mɛtúutɛ, nɛlɔk ńzúꞋ nu, ɑ zúꞋ nu yi Zẅikŋɛ-Sɛ́ sɛ́ ńcú mbɔ̌ mɛcúꞋlɛ-pʉɔ-Kɛlístɔ lɑɑ. Ŋu ẅí ɑ lʉ̈ɔ́Ꞌnɛ ntsɔ tɛ ńdɛɛ nu kɛpɔŋ, nɛpfú nǔu mbɑ́ɑtɛ yɛ́pɑ́ kɛ́ lɑ́Ꞌ ŋ́ɡẅɛɛ wɛ́ pɔ́.
Ŋkʉʉ ẅí ɛ́ ɡʉnɛ mbɔ̌ cúꞋlɛ-pʉɔ-Kɛlístɔ yi ɛ́ tʉ́sɔŋ-Pɛlŋɡɑmɛ
12Ŋ ŋwɑꞌnɛ mɛnu mɔnɛ, ńtúu ŋ́ɡɑ́ mbɔ̌ Cʉ̈ɔꞋ-Sɛ́ ẅi ɑ líŋɛ́nɛ cúꞋlɛ-pʉɔ-Kɛlístɔ yi ɛ́ tʉ́sɔŋ-Pɛlŋɡɑmɛ. Ŋwɑꞌnɛ ŋɡɔ: Ŋu ẅi ɑ ɡẅɛɛnɛ níi-ntsɔ yɑ́ yi ɛ́ shẅítnɛ́nɛ, ḿbɛn ḿbɔ́ mɛɡʉ́ŋ mɛmbɑ́ lɑ́, ɑ sɛ́ ńcú ŋɡɔ: 13Mɔ sɛ́ ńjí zʉꞋ yi pʉʉ nɑ́ŋnɛ zúꞋu. KɔꞋ-nɛfɔɔ-Sɑ́ttɑ tʉ́ʉ zúꞋu lɑ́, ŋ kɛ́ ḿbɔ́ ńjí ŋɡɔ pʉʉ tsuŋ ńcʉŋɛ pɔ nǔu mɔ. Pʉʉ ŋkɑɑ mɔ́ nɑ́ nɛzɑ́p tʉ́m nǔu mɔ pɔ́, tɛ mbɑ nǔu mɛlɛ́Ꞌ mi pɛ́ kɑ jẅínɛ Aŋntipɑs lɑ́Ꞌ pʉʉ, nǔu zʉꞋ yi Sɑ́ttɑ nɑ́ŋnɛ zúꞋu. Aŋntipɑs kɑ pɔ́ ŋu ńcú yɛ́ pɔ ndɑꞋ nu yi ɑ jínɛ nǔu mɔ. 14Lɑ́, ŋ kɛ́ ŋ́ɡẅɛɛ yɛcɔ́ yúu mi mɔ sɛ́ ńdɑ́Ꞌ wʉ́ʉ nǔu. Pɛcɔ́ pʉɔ njɛ́Ꞌ pʉʉ ḿbɔ́ ńzɑ́p tʉ́m nǔu ndɔktɛlɛ-Mbɑlɑm. Pɛ́ lɑ́Ꞌ Mbɑlɑm wɑ́ ẅí ɑ kɑ sẅíinɛ Mbɑlɑk, pɑ́Ꞌ Mbɑlɑk ɡʉ ńdʉꞋ ɡwɑk, pɑíslɑyɛ̂l vu nǔu. A kɑ tsʉ́ʉnɛ wɔ́p pɔ́p kwɛ́t pfuꞋ-mbɑp yi pɛ́ lɔknɛ ḿmɑꞋ mɛsɛ́, mbɛ́ɛnɛ pɔ́p pɑŋɡɛ́ tsɛtsɛt pɔ́p pɛn ḿbuutɛ mbɑ wɔ̌ lɑ́ pɔ́p pɛpɔ́p nɔɔ nɔɔnɛ. 15Pɛcɔ́ pʉɔ pɛn ḿbɔ́ njɛ́Ꞌ pʉʉ ɡúu pi pɔ́p sɛ́ ńzúꞋ ndɔktɛlɛ-pʉɔ pi pɔ́p tsɛt nɔɔ yi pɛ́ fúŋnɛ ŋɡɔ Nikɔlɑyidɛ. 16Pʉʉ kɛ́ ŋ́kúpmɛ mɑt wʉ́ʉ, tɛ ɛ́ pɔɔ pɔ́Ꞌɔ pɔ́, mbɔ ntí kɛ́ ɡɛ ɛ́sɑk lɑ n tɔ́ lɑ́Ꞌ pʉʉ pɔ́, ńtɔ́ ńdɔk níi-ntsɔ yi ɛ́ cẅɛtnɛ ntsu mɔ, ḿmɑꞋ wɔ́p nɛ́ ntsɔ.
17Ŋu lɑɑ ŋ́ɡẅɛɛ mɛtúutɛ, nɛlɔk ńzúꞋ nu, ɑ zúꞋ nu yi Zẅikŋɛ-Sɛ́ sɛ́ ńcú mbɔ̌ mɛcúꞋlɛ-pʉɔ-Kɛlístɔ lɑɑ. Ŋ ɡʉ ńdɑ́Ꞌ ŋ́ɡɑ́ mɑ̂ɑnɛ#2.17 Mɑ̂ɑnɛ: Ɛ́ yúujʉ́ yi Sɛ́ kɑ ɡɑ́nɛ ŋkɔ̂ŋtɛ mbɔ̌ pʉɔ-Islɑɛ̂l. ẅí ɛ́ lʉɔmɛ́nɛ, mbɑ fúfú ŋɡɔꞋ, mbɔ̌ ŋu ẅí ɑ lʉ̈ɔ́Ꞌnɛ ntsɔ tɛ ńdɛɛ nu kɛpɔŋ, mbɔ pɛ́ ŋwɑꞋnɛ lík fí nǔu ŋ́ɡɔꞋ ɛ̂yɑ́, ɛ́ pɔ́ yi wɛcɔ́ ŋu kɑ́ jí tɛ ndíꞋ ndɑꞋ ŋu ẅí pɛ́ ɡɑ́nɛ ŋ́ɡɔꞋ ɛ̂yɑ́ mbɔ̌ wɛ́.
Ŋkʉʉ ẅi ɛ́ ɡʉnɛ mbɔ̌ cúꞋlɛ-pʉɔ-Kɛlístɔ yi ɛ́ tʉ́sɔŋ-Tyɑtîi
18Ŋ ŋwɑꞌnɛ mɛnu mɔnɛ, ńtúu ŋ́ɡɑ́ mbɔ̌ Cʉ̈ɔꞋ-Sɛ́ ẅi ɑ líŋɛ́nɛ cúꞋlɛ-pʉɔ-Kɛlístɔ yi ɛ́ tʉ́sɔŋ-Tyɑtîi. Ŋwɑꞌnɛ ŋɡɔ: mɔ́ɔ-Sɛ́ ẅi mík mɛ́ kyɛꞋnɛ zʉꞋ pɑ́Ꞌ lʉ́m-múk lɑ́, mɛku mɛ́ pɔ́ pɑ́Ꞌ tʉ́n Mbɛlɔŋzɛ lɑ́, ɑ sɛ́ ńcú ŋɡɔ: 19Mɔ sɛ́ ńjí mɛfɑꞋ mʉ́ʉ, ḿbɔ́ ńjí pɑ́Ꞌ pʉʉ ɡẅɛɛnɛ ŋkɔŋɛ tsɛtsɛt pʉʉ pɔ́Ꞌɔ, ḿbɔ́ ńjí pɑ́Ꞌ pʉʉ zɑ́pnɛ tʉ́m nǔu mɔ pɔ́Ꞌɔ, ḿbɔ́ ńjí pɑ́Ꞌ pʉʉ kíɛnɛ ziꞋnɛ, ḿbɔ́ ńjí pɑ́Ꞌ pʉʉ sɑ́Ꞌnɛ tʉʉ pɔ́Ꞌɔ, ḿbɔ́ ńjí ŋɡɔ mɛfɑꞋ mi pʉʉ ŋkɔ̂ɔnɛ ḿbɔ́ ɛ́fɑꞋ zɑ́ɑ ńtsɑ mɛ́ ŋkɑ́mbi. 20Lɑ́, ŋ kɛ́ ḿbɔ́ ńdɑ́Ꞌ wʉ́ʉ, mbíꞋŋɡɔ Jizɑbɛl nɛjɔ́ŋ pʉʉ, pʉʉ pɛ́m pɛ́mnɛ. Mɑŋɡɛ́ ɛ̂wɑ́ sɛ́ ɛ́sẅíi pʉɔ ŋɡɔ ɑ cẅi Ŋkʉʉ ẅí ɛ́ fúnɛ mbɔ̌ Sɛ́, ńdɔk pɔ́Ꞌɔ, ɛ́fúklɛ ɡɑŋfɑꞋ pɑ́ɑ, ḿbɔ́ ńzíꞋ wɔ́p pɑ́Ꞌ mbɛ́ɛnɛ pɔ́p pɑŋɡɛ́ tsɛtsɛt pɔ́p lɑɑ ŋ́kẅɛ́ɛtɛ mbɑ wɔ̌ lɑ́ pɔ́p pɛpɔ́p nɔɔ nɔɔnɛ, mbɑ nɛkwɛ́t pfuꞋ-mbɑp yi pɛ́ lɔknɛ ḿmɑꞋ mɛsɛ́. 21Ŋ kɑ nɑ́Ꞌ ḿbɔ́ ńzẅíꞋlɛ zẅíꞋlɛ́nɛ ŋɡɔ ɑ kúpmɛ mɑt wɛ. Lɑ́, ɑ pɔɔ ḿbɔ́ ŋ́kɔŋ nɛkúpmɛ mɑt-mpfuꞋ ɛ̂wɑ́ pɔ́. 22Ŋ kɛ́ ḿbɔ́ pɑ́Ꞌɑ, ŋ ɡʉ ńtsʉ́ʉ wɛ́ ḿmɑꞋ kúu, ɑ jʉ́ɔ ŋɡʉ̈ɔ́Ꞌ tɛꞋ. Ŋ ɡʉ ḿbɛn ŋ́ɡɛ pʉɔ pi pɔ́p pɛpɔ́p ɡɛnɛ nu-ɡɑp jʉ́ɔ ŋɡʉ̈ɔ́Ꞌ tɛꞋ. Pɔ́p ɡʉ ńjʉ́ɔ, pɑ́Ꞌ pɔ́p lɑɑ ḿbɔɔ kúpmɛ mɑt wɔp, ńcẅɛt nǔu ntɛ́ mɛfɑꞋ mi pɔ́p pɛpɔ́p kɑ pɔ́nɛ nǔu pɔ́. 23Ŋ ɡʉ ńjẅítɛ mbɔ́ŋkʉ̈ɔ́ pɛ́. Ɛ́ lɛɛ pɔ́Ꞌɔ, mɛcúꞋlɛ-pʉɔ-Kɛlístɔ tsʉʉ jí ŋɡɔ mɔ ŋu ẅí ɑ jínɛ kwɑŋɛ-pʉɔmɛsɔŋ, ḿbɛn ńjí mbɑ yúu mi pɔ́p sɛ́ ńtsɑ́ɑ. Ŋ ɡʉ ŋ́ɡɛ ɛ́fú pɔ nǔu yúu mi mbɑ wɔ̌ lɑ́ ɡɛnɛ, lɑ ńjí pɑ́Ꞌ ŋ ɡʉ ŋ́ɡɛ nǔu ŋɡɑŋ.
24Ŋ ɡʉ ńcú nu ŋkɔ̂ɔnɛ mbɔ̌ pʉʉ pɛcɔ́ pʉɔ tsɛt cúꞋlɛ-pʉɔ-Kɛlístɔ yi ɛ́ tʉ́sɔŋ-Tyɑtîi, pʉʉ pí pʉʉ kɑ́ pɔ́ ḿbɛ́m ndɔktɛlɛ pîpɑ́ pʉɔ pɔ́, ŋ́kɛ́ ḿbɔɔ pɔ́ ńdɔɔ nɛjí yúu mi pɔ́p fúŋnɛ ŋɡɔ kwɑꞋ nu nɛ́nẅín yi Sɑ́ttɑ kɑ ɡɛnɛ pɔ́p jí pɔ́. Ɛ sẅíi wʉ́ʉ ŋɡɔ: Mɔ ŋ́ɡʉ ńzɑ́p yɛcɔ́ piꞋ yɛ́ ndɛꞋ tú pʉʉ pɔ́. 25Mɔ sɛ́ ḿbíkŋɛ pɔ ndɑꞋ ŋɡɔ, yúu mi pʉʉ ɡẅɛɛnɛ, pʉʉ niitɛ ŋ́ɡẅɛɛ sʉ́Ꞌnɛ tɛ ŋ́kúu ŋkɑ́ yi ŋ ɡʉ ŋ́ɡɛ ńtɔ́. 26Ɛ́ ɡʉ nǔu ŋu ẅí ɑ ɡʉ ŋ́ɡɛ ńdʉ̈ɔ́Ꞌ ntsɔ tɛ ńdɛɛ nu kɛpɔŋ, ɑ ŋu ẅí ɑ ɡʉ ŋ́ɡɛ ŋ́kɛ́ ḿbɔ́ ŋ́ɡɛ pɔ yúu mi ŋ kɑ cúnɛ ŋɡɔ pɛ́ pɔ́ ŋ́ɡɛ, ɛ́ nɛɡɛ pɔ pɔ́Ꞌɔ, tɛ ŋ́kúu ndẅiknzʉʉ lɛ́Ꞌ, mbɔ mɔ, ŋ ɡʉ ńdɑ́Ꞌ ŋ́ɡɑ́ mɛtʉʉ mbɔ̌ wɛ́, ɑ lɔk ɛ́sɑ́Ꞌ pɑkɛ́jí Sɛ́. 27Ŋɡɑŋ ɡʉ ńdɑ́Ꞌ ńdɔk ntẅí-tʉ́n, ɛ́sɑ́Ꞌ wɔ́p, ńtswɑ́ɑ wɔ́p ńnẅiꞋlɛ pɑ́Ꞌ ɛ́ lɑɑ ḿbɔ́ pɛ́ ŋẅiꞋlɛ mɛkʉŋ-tsɑ́Ꞌ pɔ́Ꞌɔ. Ŋ ɡʉ ńdɑ́Ꞌ ŋ́ɡɑ́ mɛtʉʉ mbɔ̌ ŋɡɑŋ pɑ́Ꞌ Tɑ̌ɑ mɔ kɑ ɡɑ́nɛ mɛtʉʉ mbɔ̌ mɔ ɡúu, 28ḿbɛn ŋ́ɡɑ́ cʉ̈ɔ́Ꞌ-sɑŋ-ŋkɔ́Ꞌnjí, njí ɡɔ́ɔ ŋ́kiɛ mbɔ̌ ŋɡɑŋ.
29Ŋu lɑɑ ŋ́ɡẅɛɛ mɛtúutɛ, nɛlɔk ńzúꞋ nu, ɑ zúꞋ nu yí Zẅikŋɛ-Sɛ́ sɛ́ ńcú mbɔ̌ mɛcúꞋlɛ-pʉɔ-Kɛlístɔ lɑɑ.
Currently Selected:
Mɛnu ɛ́ ńdɑ́Ꞌ ńcẅɛt 2: JGO
Highlight
Share
Compare
Copy
Want to have your highlights saved across all your devices? Sign up or sign in
CABTAL, 2017
