Mɛnu ɛ́ ńdɑ́Ꞌ ńcẅɛt 10
10
1M bɛn ńjʉ́ɔ wɛcɔ́ Cʉ̈ɔꞋ-Sɛ́ ẅi ɑ ɡẅɛɛnɛ mɛtʉʉ, ɑ pɔ́ ɛ́fú tʉ́nɛ́pú ḿpfúu, yɛcɔ́ ntɛ́ mɛlɑ́ɑ pɔɔ mbʉʉ yɛ pɑ́Ꞌ ndẅí pɔɔ mbʉʉ-ŋu lɑ́. Ŋkɔŋ-ŋɡɛ́mnɔ́ zɛmɛ tú yɛ́. Shʉ́ wɛ́ pɔ́ pɑ́Ꞌ lík-nɛm lɑ́. Mɛntɑ́ɑ mɛ́ pɔ́ mɑꞋ mɛlʉ́m-múk mi ɛ́ pʉꞋnɛ́nɛ ńtʉ́ʉ tʉ́ʉnɛ lɑ́. 2A kɑ ɡẅɛɛ wɛcɔ́ mɔ́ɔ mɔ́ŋwɑꞋnɛ mbɔ́ wɛ́, ɛ́ ḿbɔ́ yi fiinɛ, ńtɑɑ ku yɛ́ yi tʉʉ ńtík ndǔ ŋki kɛ́ nɛpɑt, ńtík yi ŋkẅɛpmɛ ndǔ tsɛ́tsɑ́Ꞌ, 3ŋ́kíi nɛ́ ŋɡi tɛnnɛ pɑ́Ꞌ púꞋntʉʉ ẅí ɑ sɛ́ ńtsuꞋ lɑ́, ŋ́kíi pɔ́Ꞌɔ, pɛ́ zúꞋ nɛpú kwɛnɛ ŋkɑ́ sɑɑmbɑ́. 4Nɛpú kɑ kwɛnɛ ŋkɑ́ sɑɑmbɑ́ pɔ́Ꞌɔ, lɑ́ m bɔ́ ńdɔɔ nɛŋwɑꞋnɛ yúu mi nɛpú cúnɛ, ńzúꞋ ŋɡi-ŋu fú nɛpú ńcú mbɔ̌ mɔ ŋɡɔ: Lʉɔ nu yí nɛpú kwɛnɛ́nɛ ŋkɑ́ sɑɑmbɑ́ ńcú. Kɔɔ ŋwɑꞋnɛ.
5Cʉ̈ɔꞋ-Sɛ́ ẅi n jʉ́ɔnɛ wɛ́ ɑ tʉ́ʉ ńtík ku yɛ́ ndǔ ŋki kɛ́ nɛpɑt, yɛcɔ́ pɔ́ ndǔ tsɛ́tsɑ́Ꞌ lɑ́, ɑ kɑꞋ pɔ́ yɛ́ yi tʉʉ ŋ́ɡɑ́ tʉ́ ḿbɔ́ ŋ́kɑɑ, 6ńdɔk lík-ŋu ẅí ɑ pɔ́ pɔ ɡú nǔu mɛŋɡuꞋ mɛŋɡuꞋ, jʉ́ ẅi ɑ kɑ niitɛ́nɛ nɛpú mbɑ kʉ̈ɔ́ lɑ́ yi ɛ́ tsɛtú, jʉ́ ẅi ɑ kɑ niitɛ́nɛ tsɛ́tsɑ́Ꞌ mbɑ kʉ̈ɔ́ lɑ́ yi ɛ́ ndǔ, jʉ́ ẅí ɑ kɑ niitɛ́nɛ ŋki kɛ́ nɛpɑt mbɑ kʉ̈ɔ́ lɑ́ yi ɛ́ tsɛtú, ŋ́kɑɑ, ńcú ŋɡɔ yɛcɔ́ nɛpɛn ńzẅíꞋlɛ kɑ́ pɛ́t ḿbɔ́ ɡú pɔ́. 7Lɑ́, ɛ́ ɡʉ ŋ́ɡɛ ḿbɔ́ ŋkɑ́ yi Cʉ̈ɔꞋ-Sɛ́ wɛ mbɑ́ɑtɛ sɑɑmbɑ́ zɛnɛ nɛtɔŋ yɛ́ ntɑŋ, yúu mi Sɛ́ kɑ zɑ́pnɛ, ɛ́ pɔ́ yi lʉɔmɛ́nɛ, ɛ́ puutɛ ndʉ́ŋndʉŋ pɑ́Ꞌ ɑ kɑ zɑ́Ꞌnɛ njí ńcú mbɔ̌ pɛŋɡɛ́mndʉ̈ɔ́Ꞌ pɛ́ pɑfɑꞋ mbɔ̌ wɛ́.
8Ńcú pɔ́Ꞌɔ, ŋɡi-ŋu wí n dɑ́Ꞌnɛ ńzɛɛ ńzúꞋ ɛ́ fú tʉ́nɛ́pú ńcú nu lɑ́, ɛ́ pɛn ńcú mbɔ̌ mɔ yɛcɔ́ ŋkɑ́ ŋɡɔ: «Gʉ, fú mbɔ̌ Cʉ̈ɔꞋ-Sɛ́ ẅi ɑ tʉ́ʉnɛ ńtík ku ndǔ ŋki kɛ́ nɛpɑt, yɛcɔ́ pɔ́ ndǔ tsɛ́tsɑ́Ꞌ lɑ́, ńcẅɛ́ɛ mɔ́ɔ» mɔ́ŋwɑꞋnɛ yi pɛ́ fiinɛ lɑ́. 9Ŋ ɡʉ nɛjɔ́ŋ Cʉ̈ɔꞋ-Sɛ́ ɛ̂wɑ́, ḿbúꞋ mbɔ́ mbɔ̌ wɛ́ ŋɡɔ ɑ ɡɑ́ mɔ́ɔ mɔ́ŋwɑꞋnɛ ɛ̂wɑ́ mbɔ̌ mɔ. A cú mbɔ̌ mɔ ŋɡɔ: «Kɔ kwɛ́t. Ɛ́ ɡʉ ŋ́kɛ́ ŋ́kúu nɛpɛm ɡu ńdẅi lẅinɛ, lɑ́, ɛ́ kɛ ḿbɔ́ ntsu ɡu ńdʉʉ pɑ́Ꞌ nɛlʉʉ-ŋwɑ́Ꞌ.» 10Ɛ fú mbɔ̌ Cʉ̈ɔꞋ-Sɛ́, ńcẅɛ́ɛ mɔ́ɔ mɔ́ŋwɑꞋnɛ ɛ̂wɑ́, ŋ́kwɛ́t. Ɛ́ pɔ́ ntsu mɔ ńdʉʉ pɑ́Ꞌ ŋwɑ́Ꞌ lɑ́. Tɛ m bɔ́ tɛ mi, ɛ́ kúu nɛpɛm mɔ ńtsʉ́Ꞌ ńdẅi lẅinɛ. 11Pɛ́ pɑ́ɑtɛ ńcú mbɔ̌ mɔ ŋɡɔ: «Ɛ́ sɛ́ ḿbíkŋɛ ŋɡɔ ɔ pɛn ŋ́ɡʉ ɛ́sɑ́Ꞌ Ŋkʉʉ-Sɛ́ mbɔ̌ pʉɔ ntɛ́ nɛ́ ntɛ́, mbɔ̌ ŋɡɔŋ nɛ́ ŋɡɔŋ, mbɔ̌ pʉɔ pí pɔ́p sẅiŋɛ́nɛ mɛsẅíŋɛ mɛntɛ́ mɛntɛ́, mbɑ mbɔ̌ pɛfɔɔ tɛ ńzɑ́ɑ.»
Currently Selected:
Mɛnu ɛ́ ńdɑ́Ꞌ ńcẅɛt 10: JGO
Highlight
Share
Compare
Copy
Want to have your highlights saved across all your devices? Sign up or sign in
CABTAL, 2017
