Mɑ́lɛ́kúshi Mɛtú-nu
Mɛtú-nu
Pɛ́ kwɑŋɛ ŋɡɔ Mɑ́lɛ́kúshi pɔ́nɛ nduŋmbi ŋu wí ɑ kɑ ŋwɑꞋnɛ́nɛ Ŋkʉʉ Sʉ́Ꞌnɛ tsɛt ŋwɑꞋnɛ. Lɑ́ ɑ kɛ́ mbɔɔ ŋu nǔu ɡɑŋku-Yɛ́su Kɛlístɔ tsɔ̌ppɑ́ nɛ́ nɛɡɛ́m pɔ́, lɑ́ pɔ́p Pyɛ̂ ŋ́ɡɛ Jɑ̂ŋ kɛ́nɛ ɛ́fɑꞋ. Pɛ́ kwɑŋɛ ŋɡɔ Pyɛ̂ kɑ pɛ́ɛtɛ mɛnu mi Yɛ́su kɑ ɡɛnɛ mbɑ mi ɑ kɑ cúnɛ tɛ ɛ́ zɑ́ɑ ɛ́sẅíi wɛ́. Ɛ́ mɛnu ɛ̂mɑ́ mi Mɑ́lɛ́kúshi kɑ ŋwɑꞋnɛ́nɛ tsɛt ŋwɑꞋnɛ yɛ́. Mɑ́lɛ́kúshi kɑ tsuŋ ḿbɔ́ ŋ́ŋwɑꞋnɛ ŋwɑꞋnɛ yɛ́ ŋ́ɡɑ́ pɔ mbɔ̌ pʉɔ pi pɔ́p kɑ́ pɔ́ Pɑyúdɑ pɔ́. Ŋduŋmbi nu yi ɑ cúnɛ tsɛt ŋwɑꞋnɛ yɛ́ pɔ́ ŋɡɔ Yɛ́su mɔ́ɔ-Sɛ́. Lɑ́ ńnyɛt ŋɡɔ Yɛ́su ŋ́kɑɑ ḿbɔ́ ŋ́kɔŋ ŋɡɔ pɛ́ fɛ́Ꞌnɛ ńjí pɔ́. Ɛ́ pɔ́ mɛcɔ́ mɛŋkɑ́ Yɛ́su fúŋ lík yɛ́ ŋɡɔ «Mɔ́ɔ-ŋu». Nu nɛvú nɛ́ mbɑ pɑ́Ꞌ ɑ kɑ zẅíimɛ́nɛ nǔu nɛvú kɑ nyɛtnɛ ŋɡɔ ɑ kwɑꞋ mɔ́ɔ-Sɛ́. Mɑ́lɛ́kúshi cú ŋɡɔ ɛ́ kɑ pɔ́ ŋkɑ́ yi Yɛ́su kɑ pfúnɛ, wɛcɔ́ tɑ́tndɑ́-pɑlʉ̈ɔ́Ꞌntsɔ-Pɑlɔ́mɑ jʉ́ɔ yúu mi ɛ́ kɑ lɛɛnɛ tɛ ńcú ŋɡɔ: «Ŋu wɔ kwɑꞋ mɔ́ɔ-Sɛ́» [Mɑ́lɛ́kúshi kɑ piitɛ ŋ́ŋwɑꞋnɛ pɑ́Ꞌ Jɑ̂ŋ Bɑptíshi kɑ tɔ́nɛ ńniitɛ ndúŋ-Yɛ́su; ŋ́ŋwɑꞋnɛ mbɑ pɑ́Ꞌ ɑ kɑ cẅɛ́ɛnɛ ŋki mbɔ̌ Jɑ̂ŋ, sɑ́ttɑ pɛn ŋ́kwɑꞋnɛ wɛ́ (pɑk 1.1-13). Mɑ́lɛ́kúshi pɛn ńnyɛt pɑ́Ꞌ mɛtʉʉ-Yɛ́su pɔ́nɛ, ɑ kɑ lɔk pɔ mɛtʉʉ ɛ̂mɑ́ lɑ ńdɔk ɛ́fúŋ pʉɔ pi ɑ zíꞋnɛ wɔ́p, ńdɔk pɔ mɛ́tɛ́ lɑ ŋ́ɡɛ ɡɑŋɡɔɔ fíitɛ, ńdɔk pɔ mɛtʉʉ ɛ̂mɑ́ lɑ ńzuŋ mɛzẅikŋɛ kɛpɔŋ, ńdɔk pɔ mɛ́tɛ́ lɑ ńdikŋɛ mɛnu kɛpɔŋ-pʉɔ (pɑk 1.14–8.30). Ɛ́ lɛɛ pɔ́ꞌɔ, Mɑ́lɛ́kúshi zɛ nɛsẅíi pʉɔ ŋɡɔ ɑ ɡʉ ŋ́ɡʉ Yɛlúsɑlɛm, ŋɡɔ ɑ ɡʉ ŋ́kúu zúꞋu ńjʉ́ɔ ŋɡʉ̈ɔ́Ꞌ tɛ ḿpfú, lɑ́ ŋ́kɛ́ ḿbɛn ńzẅíimɛ nǔu nɛvú. Pɔ́p pɔɔ zúꞋ nu yi ɑ cúnɛ pɔ́ (pɑk 8.31–10.52) Mɑ́lɛ́kúshi pɛn ńdɛꞋlɛ pɑ́Ꞌ Yɛ́su kɑ kúunɛ Yɛlúsɑlɛm, ŋ́kẅiꞋ ńnyɛt mɛtʉʉ mɛ́, nɔɔ-lɑ́Ꞌ pɔ́ ŋ́ɡúꞋlɛ wɛ́ tɛꞋ, lɑ́ pɑsɑ́Ꞌlɑ́Ꞌ-Pɑyúdɑ pɔ́ ḿbɑɑ wɛ́ pɑɑnɛ. Mɑ́lɛ́kúshi lɛꞋlɛ ndẅiknzʉʉ nɛzíꞋ pʉɔ (pɑk 11-13) Ŋɡɔ ŋ́kút mɛtú tsʉʉ, Mɑ́lɛ́kúshi cú nu nǔu ŋɡʉ̈ɔ́Ꞌ-Yɛ́su nǔu tʉ́ mbɑ́ŋtɛ pɑ́ŋtɛ́nɛ, mbɑ pɑ́Ꞌ ɑ kɑ zẅíimɛ́nɛ nǔu nɛvú (pɑk 14-16).]
Currently Selected:
Mɑ́lɛ́kúshi Mɛtú-nu: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017