ŊwɑꞋnɛ-Gɑŋntúu Yɛ́su Kɛlístɔ 8
8
Sɔ̂l sɛ́ ńzɑ́Ꞌ ku-pʉɔ-Kɛlístɔ kɛpɔŋ
1Ɛ́ kɑ fú lɛ́Ꞌ ɛ̂yɑ́, pɛ́ zɛ nɛnyɛt nɔɔ-pɑpɛ́m Yɛ́su nɛ́ ŋɡʉ̈ɔ́Ꞌ Yɛlúsɑlɛm tɛꞋ. Pɔ́p kʉɔ, ɛ́sɑt zʉꞋ nǔu shʉ́ Judɛ̂ pɔ́p Sɑmɑlîi tɛ ɛ́ tsʉ́Ꞌ pɔ ndɑꞋ ɡɑŋntúu-Yɛ́su Yɛlúsɑlɛm. 2Ɛ́ kɑ ɡɔ́ ḿbɔ́, mbɔ pɛcɔ́ pʉɔ pí pɔ́p ɡɛnɛ mɛkuꞋ-Sɛ́ kɑ níꞋ pfú-Ɛtiyɛ̂n tsɛt nɛshi, ḿbɛn ńdɑɑ nɛvú nɛ́ tɛꞋ. 3Sɔ̂l pɔ́ ɛ́sɑ́Ꞌ yɛ́ tʉʉ pɔ nɛpík cúꞋlɛ-pɑpɛ́m Yɛ́su, ḿbɔ́ ŋ́kúu mɛndɑ́ mɛndɑ́ ńdɔɔ pɑpɛ́m Yɛ́su, ŋ́ɡẅɛɛ mbɛ́ɛnɛ pɔ́p pɑŋɡɛ́, ɛ́shuŋ wɔ́p ŋ́ɡɑ́ pɛ́ mɑꞋ wɔ́p ndɑ́tsɑ́ŋ.
Filîp sẅíi nu-Sɛ́ Sɑmɑlîi
4Pɑpɛ́m Yɛ́su pi pɔ́p kɑ sɑtnɛ zʉꞋ, ɡʉ zʉꞋ tsʉʉ tsɛt lɑ́Ꞌ, ńnɛn ńcẅi Ŋkʉʉ Sʉ́Ꞌnɛ ẅi Sɛ́ kɑ kɑꞋnɛ. 5Filîp ɡʉ tsɛt yɛcɔ́ tʉ́sɔŋ-Sɑmɑlîi, ŋ́kúu zúꞋu, ɛ́sɑ́Ꞌ nu-Nzɑ́Ꞌŋkʉ. 6Lɑ́Ꞌ kɑ pɔ́ ńtsuŋ ńzẅíꞋlɛ sẅiŋɛ yi ɛ́ kɑ pɔ́ ńcẅɛt ntsu-Fílîp. MbíꞋŋɡɔ pɔ́p kɑ pɔ́ ńzúꞋ pɛ́ kẅíi mɛnu mɑ̌ɑmɑɑnɛ mi ɑ m̄bɔ́ ŋ́ɡɛ, ḿbɛn ḿbɔ́ ńjʉ́ɔ mɛcɔ́ nɛ́ mík. 7Pʉɔ tɛ ńzɑ́ɑ pi mɛzẅikŋɛ kɛpɔŋ kɑ pɔ́ ḿbúunɛ wɔ́p kɑ pɔ́ ɛ́fíitɛ. Mɛzẅikŋɛ kɛpɔŋ ɡɔ́ ḿbɔ́ ɛ́fú nǔu pɔ́p ńcẅɛt ŋ́ɡíɛt nɛ́ tʉʉ. GɑŋkẅíꞋlɛ pɔ́p ɡɑŋpʉ̈ɔ́Ꞌtɛ mɛku tɛ ńzɑ́ɑ kɑ pɔ́ ɛ́fíitɛ yɔ́p. 8Pɛ́ pɔ́ tsɛt yîyɑ́ tʉ́sɔŋ, ńtsʉ́Ꞌ ńtsɑ́ɑtɛ tsɑ́ɑtɛ́nɛ tɛꞋ.
9Wɛcɔ́ ŋu pɔ́ tʉ́sɔŋ-Sɑmɑlîi ɛ̂wɑ́, lík yɛ́ pɔ́ ŋɡɔ Símɔ̂ŋ. Yɛ́ fɑꞋ pɔ́ nɛɡɛ nɛkɑŋ. Pʉɔ-Sɑmɑlîi pɔ́ ńdíŋɛ wɛ́ ḿmɑɑ mɑɑnɛ. A pɔ́ ŋɡɔ ɑ mɑ́mɑ́ ŋu, 10Pʉɔ tsʉʉ tɛ ɛ́fú nǔu ŋɡwɑsuu ŋ́ɡʉ ŋ́kúu nǔu pɛlwɛn pʉɔ pɔ́ ńcʉŋɛ nzʉʉ yɛ́ ńcú ŋɡɔ: «Ŋu wɔ ŋu ẅí pɛ́ fúŋnɛ ŋɡɔ mɑ́mɑ́ mɛtʉʉ sɛ́.» 11Pɔ́p kɑ pɔ́ ńtsuŋ ńcʉŋɛ nǔu sẅiŋɛ yɛ́, mbíꞋŋɡɔ tɛ ɛ́fú tɛ lɛ́Ꞌ, ɑ pɔ́ ńdɔk nɛkɑŋ ŋ́ɡɛ mɛnu mi ɛ́ tsuŋnɛ ŋ́kʉꞋnɛ pʉɔ kʉꞋnɛ́nɛ. 12Lɑ́ ŋkɑ́ Filîp kɑ tɔ́nɛ yɛ́, ḿbɔ́ ńcẅi Ŋkʉʉ Sʉ́Ꞌnɛ-Yɛ́su Kɛlístɔ, ḿbɔ́ ŋ́kyɛ́Ꞌtɛ pɑ́Ꞌ nɛfɔɔ-Sɛ́ pɔ́nɛ. Pʉɔ tɛ ńzɑ́ɑ, mbɛ́ɛnɛ pɔ́p pɑŋɡɛ́ zẅíꞋlɛ sẅiŋɛ yɛ́, ḿbɛ́m, ŋ́ɡɛ pɛ́ nuꞋ wɔ́p ŋki. 13Mbɑ Símɔ̂ŋ ɛ̂wɑ́ zúꞋ, ḿbɛ́m yɛ́, pɛ́ nuꞋ wɛ́ ŋki. A pɔɔ pɛn ɛ́fú nɛjɔ́ŋ Filîp ŋ́kẅɛ́Ꞌlɛ pɔ́, ḿbɔ́ ńjʉ́ɔ mɛnu mɑ̌ɑmɑɑnɛ pɔ́p ŋkʉꞋnɛ nu yi Sɛ́ lɛɛnɛ nǔu Filîp ŋ́ɡɛ ɛ́ kʉꞋnɛ wɛ́ tɛꞋ.
14Gɑŋntúu-Yɛ́su ɡɛ ńnɑ́ŋ Yɛlúsɑlɛm, ńzúꞋ pɑ́Ꞌ pʉɔ-Sɑmɑlîi pɛ́mnɛ sẅíŋɛ-Sɛ́, ńtúu Pyɛ̂ pɔ́p Jɑ̂ŋ mbɔ̌ pɔ́p. 15Pɔ́p ɡʉ ŋ́kúu zúꞋu, ńcɛꞋlɛ Sɛ́ nǔu tú-pîpɑ́ pʉɔ-Sɑmɑlîi nɛlɔk ŋ́ɡɛ ŋɡɔ Sɛ́ níꞋ Zẅikŋɛ yɛ́ nǔu pɔ́p, 16mbíꞋŋɡɔ Zẅikŋɛ-Sɛ́ kɑ pɛ́t kɛ́ kúu nǔu sɑ̌ɑ tɑ́Ꞌ ŋu wɔp. Pɛ́ kɑ nuꞋ wɔ́p tsɛt ŋki pɔ ndɑꞋ nǔu lík-Tsɑpʉɔ Yɛ́su. 17Pyɛ̂ pɔ́p Jɑ̂ŋ zɑ́p mbɔ́ tú pɔ́p, Zẅikŋɛ Lɛ́ɛnɛ́nɛ ɡɔ́ɔ ŋ́kɛ́ ŋ́kúu nǔu pɔ́p.
18Símɔ̂ŋ jʉ́ɔ pɑ́Ꞌ ŋɡɑŋntúu-Yɛ́su sɛ́ ńzɑ́p mbɔ́ tú-pʉɔ, Zẅikŋɛ Lɛ́ɛnɛ́nɛ kúu nǔu pɔ́p, ḿbʉ́ wɔ́p nɛ́ ŋkɑ́p, 19ŋ́ɡɔ ḿbʉ́ ńcú ŋɡɔ: «Pʉʉ ɡɛ ŋ kuꞋ yɑ́ɑ pɑ́Ꞌ m bɔ́ ńzɑ́p mbɔ́ tú-ŋu, Zẅikŋɛ-Sɛ́ kúu nǔu ŋɡɑŋ.» 20Lɑ́ Pyɛ̂ cú mbɔ̌ wɛ́ ŋɡɔ: «Tɛ pʉʉ ŋkɑ́p yu yîyɑ́ lɑkŋɛ, mbíꞋŋɡɔ ɔ pɑꞋnɛ ŋ́kwɑŋɛ ŋɡɔ ɛ́ lɑɑ ḿbɔ́ ɔ lɔk ŋkɑ́p ńzúu yúu mi Sɛ́ ɡɑ́nɛ mbɔ̌ pʉɔ níinɛ. 21Ɔ kɑ́ pɔ́ ŋu ẅí ɛ́ lɑɑ ḿbɔ́ pɛkŋɛ tɛmtɛ nu pɔ́. Mɛnu mi pɛ́ ɡɛnɛ zɑꞋnɛ, ɔ nu nǔu kɑ́ ɡẅɛɛ, mbíꞋŋɡɔ tʉ́m yú mbi Sɛ́, mbɔɔ tʉ́ʉ ndʉ́ŋndʉŋ pɔ́. 22Kɛ́ ŋ́kúpmɛ kwɑŋɛ kɛpɔŋ yi ɛ́ tʉ́m yú lɑ́, ńcɛꞋlɛ Tsɑpʉɔ kɛ mbɔ ɑ likŋɛ, ŋ́ɡɑ́ mbɔ̌ wu nǔu pɑ́Ꞌ ɔ zɛɛnɛ ŋ́kwɑŋɛ pɑ́Ꞌɑ lɑ́. 23Mɔ sɛ́ ńjʉ́ɔ ŋɡɔ kɛ́ɡʉ̈ɔꞋ kɑ cɔp wú ḿbʉ́ʉpɛ tʉ́m yú. Ɔ tsʉ́Ꞌ ŋkwɑɑ-nu kɛpɔŋ.» 24Símɔ̂ŋ tsɔ́Ꞌ ŋɡɔ: «KwɑꞋ pʉʉ cɛꞋlɛ́nɛ Tsɑpʉɔ nǔu tú yɑ́ɑ. Ɛ́ lɛɛ pɔ́Ꞌɔ, nu yí pʉʉ cúnɛ pɔɔ ɡɛ yúu nǔu mɔ pɔ́.»
25Gɑŋntúu-Yɛ́su ɛ̂pɑ́ pɛ́pɑ́ lɔk nɛsɑ́Ꞌ sẅiŋɛ-Tsɑpʉɔ Sɑmɑlîi ɛ̂wɑ́ ŋ́ɡɛ pɛ́ jí ŋu ẅí Yɛ́su jʉ́, ḿbɛn nzʉʉ nɛ́ Yɛlúsɑlɛm, ńnɛn sɛ̂ndúŋ ńcẅi Ŋkʉʉ Sʉ́Ꞌnɛ tsɛt mɛcɔ́ mɛlɑ́Ꞌ-pɑsɑmɑlîi.
Ŋu-Ɛ́tíyɔ́pîi zɑ́b tʉ́m yɛ́ nǔu Yɛ́su
26Wɛcɔ́ cʉ̈ɔ́Ꞌ-Tsɑpʉɔ ɡɛ ńtɔ́, ńcú mbɔ̌ Filîp ŋɡɔ: «Lɔ sɛ́ ńdɔk shʉ́ ntsʉ́ʉ ŋ́ɡʉ, ńcúŋ nǔu sɛ̂ndúŋ ẅi ɛ́ fúnɛ Yɛlúsɑlɛm ŋ́ɡʉ nɛ́ Ŋɡɑzɑ. Pɛ́ kɑ́ pɔ́ fɛ́Ꞌnɛ ńdɛɛ zúꞋu pɔ́.» 27Filîp ɡɔ́ɔ ńdɔ sɛ́, ńcʉ́ɔ sɛ̂ndúŋ, ńnɛn tɛ ńcẅɛt nǔu wɛcɔ́ ŋu-Ɛ́tíyɔ́pîi, ɑ pɔ́ ŋu, mbɔ pɛ́ kɑ shɔ́ wɛ́, mbɔ ɑ kɑ ɡʉ Yɛlúsɑlɛm ŋ́ɡúꞋlɛ Sɛ́. A m̄bɔ́ ŋutlɑ́Ꞌ-túmbʉ́ʉ, lɑ́Ꞌ-mɑŋɡɛ́ ẅi ɑ kɑ pɔ́ ɛ́sɑ́Ꞌ Ɛ́tíyɔ́pîi. Lík-nɛfɔɔ-mɑŋɡɛ́ ɛ̂wɑ́ pɔ́ ŋɡɔ Kɑŋndɑs. Ŋu-Ɛ́tíyɔ́pîi ɛ̂wɑ́ kɑ pɔ́nɛ ḿbyɛ́p ntɑŋ-fɔɔ. 28A kɑ pɔ́ ɛ́fú Yɛlúsɑlɛm ḿbɛn, ńnɑ́ŋ tsɛt kɑ́lɛ́k, ḿbɔ́ ɛ́fúŋ ŋwɑꞋnɛ-Ŋɡɛ́mndʉ̈ɔ́Ꞌ-Sɛ́ Ɛsɑ̌yɑ. 29Zẅikŋɛ-Sɛ́ cú mbɔ̌ Filîp ŋɡɔ: «Nɑ́ɑnɛ kɑ́lɛ́k ẅí.» 30Filîp nɑ́ɑnɛ kɑ́lɛ́k tɛ ŋ́kẅɛ́ɛtɛ, ńzúꞋ ŋu-Ɛ́tíyɔ́pîi ɛ̂wɑ́ pɔ́ ɛ́fúŋ ŋwɑꞋnɛ-Ŋɡɛ́mndʉ̈ɔ́Ꞌ-Sɛ́ Ɛsɑ̌yɑ. Filîp píkŋɛ wɛ́ ŋɡɔ: «Tɛ ɔ fúŋ pɑ́Ꞌɑ tɛ ḿbɔ́ ńzúꞋ yúu mi pɛ́ lɔknɛ ńcú?» 31A tsɔ́Ꞌ ŋɡɔ: «Ɛ́ lɑɑ ḿbɔ́ ŋ ɡɛ ŋɡɔ́ku lɑ ńzúꞋ kɛ́ pɔ́ yi ŋu kyɛ́Ꞌtɛ ɛ́sẅíi wɑ́ɑ?» Ŋ́ɡɔ́ɔ ŋ́kɛ́ ɛ́fúŋ Filîp ŋɡɔ ɑ kɔ́Ꞌ ńtɔ́ ńnɑ́ŋ nɛjɔ́ŋ yɛ́ tsɛt kɑ́lɛ́k. 32Ɛ́ ɡɔ́ ḿbɔ́, mbɔ zʉꞋ-ŋwɑꞋnɛ yí ɑ ḿbɔ́ ɛ́fúŋ ɛ́ yi ɛ́ cúnɛ ŋɡɔ:
«Pɛ́ kɑ pɔ́ ńdɔk wɛ́ ŋ́ɡʉ, ɑ pɔɔ kẅɑ́k,
ńnɛn yɛ́ pɔ pɑ́Ꞌ njinjɔ ẅi pɛ́ lɔknɛ wɛ́ ŋ́ɡʉ nɛɡwɑt,
ńnɑꞋ pɔ pɑ́Ꞌ mɔ́ɔ-njinjɔ ẅi pɛ́ sɛ́ ŋ́kɔ́ɔ mɛnuk mɛ́.
33Pɛ́ kɑ tɛ́m sʉ́ʉ tú yɛ́, ńzɑ́Ꞌ yɛ ntsɑŋ kɛpɔŋ.
Ḿbɔ́ pɛ́ kɛ ḿbɛn ŋ́kẅíitɛ njẅɛt yɛ́, ɛ́fú ɡɔ́
pɑ́Ꞌ pɛ́ kɑ zɑ́Ꞌ wɛ́ zɑ́Ꞌnɛ ńjẅí.»
34Ŋu-Ɛ́tíyɔ́pîi ɛ̂wɑ́ píkŋɛ Filîp ŋɡɔ: «Sɛ́sẅíi, ɡɔ́ɔ ŋ́kyɛ́Ꞌtɛ sẅiŋɛ yɔ. Ŋɡɛ́mndʉ̈ɔ́Ꞌ-Sɛ́ cú nu pɑ́Ꞌɑ nǔu wɔ̌? A cú pɔ nǔu túmbʉʉ yɛ́ kɛ nǔu yɛ wɛcɔ́ ŋu ndɛꞋ?» 35Filîp ɡɔ́ ńcú nu nɛlɔk ńcẅi Ŋkʉʉ Sʉ́Ꞌnɛ nǔu Yɛ́su, ńzɛ pɔ kwɑꞋ nǔu yɔ zʉꞋ-ŋwɑꞋnɛ ɛ̂yɑ́. 36Pɔ́pmɛ́ kɑ pɛ́t ńnɛn nɛnnɛ, ńcẅɛt nǔu yɛcɔ́ zʉꞋ, ŋki pɔ́ zúꞋu. Ŋu-Ɛ́tíyɔ́pîi ɛ̂wɑ́ cú mbɔ̌ Filîp ŋɡɔ: «Ŋki pʉ́ɔlɑ́, ɛ́ lɑɑ ḿbɔ́ kʉ̈ɔ́ kíꞋ tɛ pɛ́ pɔɔ wɑ́ɑ ŋki nuꞋ?» 37[Filîp pʉ̈ɔt ŋɡɔ: «Ɔ lɑɑ ńzɑ́p tʉ́m yú nǔu Yɛ́su Kɛlístɔ, mbɔ yɛcɔ́ yúu kɛ́ kíꞋ wú pɔ́.» Ŋu-Ɛ́tíyɔ́pîi wɑ́ tsɔ́Ꞌ ŋɡɔ: «M bɛ́m ŋɡɔ Yɛ́su Kɛlístɔ mɔ́ɔ-Sɛ́.»] 38Ŋ́ɡɔ́ɔ ńcú, pɛ́ ɡɛ kɑ́lɛ́k tʉ́ʉ. Pɔ́p Filîp tɛmtɛ ḿpfúu, ńcúŋ, ŋ́kúu ŋki. Filîp ɡɔ́ɔ ŋ́kɛ́ ńnuꞋ wɛ́ ŋki. 39Pɔ́p kɑ pɔ́ tɛ ɛ́fú ŋki ńcẅɛt, Zẅikŋɛ-Tsɑpʉɔ lɔk Filîp ŋ́ɡʉ tɛ ŋu-Ɛ́tíyɔ́pîi pɔɔ pɛn ńjʉ́ɔ wɛ́ pɔ́, ŋ́kɛ́ ŋ́ɡɔ ḿbɛn ńcʉ́ɔ sɛ̂ndúŋ, ńnɛn ńtsɑ́ɑtɛ tsɑ́ɑtɛ́nɛ. 40Ɛ́ ɡʉ nǔu Filîp, ɑ ɡɔ́ ńjʉ́ɔ, ḿbɔ́ tʉ́sɔŋ-Azɔ́d, ɛ́fú zúꞋu, ŋ́ɡɔ ŋ́kúu tʉ́sɔŋ-Sɛ́zɑlɛ̂, ńnɛn ńcẅi Ŋkʉʉ Sʉ́Ꞌnɛ tsɛt mɛtʉ́sɔŋ tsʉʉ mi ɑ lɛɛnɛ zúꞋu.
Currently Selected:
ŊwɑꞋnɛ-Gɑŋntúu Yɛ́su Kɛlístɔ 8: JGO
Highlight
Share
Compare
Copy
Want to have your highlights saved across all your devices? Sign up or sign in
CABTAL, 2017
