ŊwɑꞋnɛ-Gɑŋntúu Yɛ́su Kɛlístɔ 22
22
1«Pɔ́ɔpɛ́mɑ́ pɑ́ɑ, pɛtɑ́t pɑ́ɑ, pʉʉ zẅíꞋlɛ. Ŋ ɡʉ ḿbɛ́ɛtɛ ntsu wɑ́ɑ.» 2Pɑyúdɑ zúꞋ pɑ́Ꞌ ɑ sɛ́ ńdɔk pɔ kwɑꞋ sẅíŋɛ-Ɛbɛlʉ̂ ńcú nu, ŋ́kẅiꞋ ńnɑꞋ. Pɔ̂l cú ŋɡɔ: 3«Mɔ mɔ́ɔ-Yúdɑ. Pɛ́ pí wɑ́ɑ tʉ́sɔŋ-Tɑ́lsɔ, tsɛt ŋɡɔŋ-Silisî. Lɑ́ mbɔ ŋ kɑ ɡúꞋ pɔ Yɛlúsɑlɛm wɔ; lɑ́ Ŋɡɑmɑlíyɛ̂l#22.3 Ŋɡɑmɑlíyɛ̂l wɛcɔ́ tɑ́Ꞌ nǔu pʉɔ-Lɑbi, pɔ́p pɔ́ pɛ́cícɑ pinɛ pɛ́ kɑ pɔ́ ŋ́ɡɑ́ mɛkuꞋ mɔ́p tɛꞋ, nǔu ŋkɑ́ pɛ́ Pɔ̂l. Ŋɡɑmɑlíyɛ̂l ŋu nǔu nɔɔ-pɑfɑlísɑy. (Gɑŋntúu-Yɛ́su 5.34). pɔ́nɛ cícɑ wɑɑ. A kɑ ŋ́kẅiꞋ niitɛ ńzíꞋ wɑ́ɑ nɛ́ nɛpʉ́ʉ-pɛmɑ́ŋɡɑpnjẅɛt pɛk. Mɔ ḿbɔ́ ŋ́kúꞋlɛ nu-Sɛ́ kɛ́ kɑ́ɑ pɔ pɑ́Ꞌ pʉʉ pɛtsʉʉ ɡɛnɛ lɔ́Ꞌnɛ lɑ́. 4Ŋ kɑ pɔ́ ńtsɔ́Ꞌ ku pɑnɛn nǔu sɛ̂ndúŋ-Yɛ́su kɛpɔŋ. Ŋ́ɡɛ pɛ́ ɡẅɛɛ mbɛ́ɛnɛ pɔ́p pɑŋɡɛ́ ḿmɑꞋ ndɑ́tsɑ́ŋ, tɛ mbɑ pɑ́Ꞌ pɛ́ lɑɑ ḿbɔ́ pɛ́ tɔ́ zúꞋu ńjẅí wɔ́p jẅínɛ. 5Tɑ́tndɑ́-pɑnɔŋpɔꞋ, mbɑ cúꞋlɛ-pɑsɑ́Ꞌ lɑ́Ꞌ yɔ, sɛ́ ńjí ŋɡɔ nu yi n cúnɛ ɛ́ nɛ́nẅín. Pɔ́p kɑ zɛɛnɛ ŋ́ɡɑ́ mɛŋwɑꞋnɛ ńdɔk ńtúu wɑ́ɑ ŋɡɔ ŋ ɡʉ ńnyɛt mbɔ̌ pɔ́ɔpɛ́mɑ́ pɛkŋɛ pɑyúdɑ pi pɔ́p tsɛt tʉ́sɔŋ-Ndɑ́mɑ́s. Ɛ́ pɔ́ ŋɡɔ ŋ ɡẅɛɛ pʉɔ-Kɛlístɔ, ńdɔk wɔ́p ḿbɛn nzʉʉ nɛ́ Yɛlúsɑlɛm, nɛpɔ́ yi pɛ́ ɡʉ ŋ́ɡɛ pɔ́p jʉ́ɔ ŋɡʉ̈ɔ́Ꞌ.»
Pɔ̂l sɛ́ ńdɛꞋlɛ pɑ́Ꞌ Tsɑpʉɔ kɑ fúŋnɛ wɛ́ nǔu fɑꞋ
(ŊwɑꞋnɛ-Gɑŋntúu Yɛ́su Kɛlístɔ 9.1-19; 26.12-19)
6«N cʉ́ɔ sɛ̂ndúŋ, ŋ́ɡʉ tɛ ńtsʉ́Ꞌ nɛkúu Ndɑmɑs, ɛ́ pɔ́ kwɑꞋ nɛnɛm. Yɛcɔ́ yúu ɡɔ́ɔ ɛ́fú tʉ́nɛ́pú, ŋ́kyɛꞋ wɑ́ɑ tɛꞋ. 7M vu sɛ́, ŋ́ɡɔ́ɔ ńzúꞋ ŋɡi-ŋu cú mbɔ̌ mɔ ŋɡɔ: “Sɔ̂l, Sɔ̂l, ɔ tsɔ́Ꞌ ku yɑ́ɑ kɛpɔŋ mɛlɑ́Ꞌ kʉ̈ɔ́?” 8M bíkŋɛ ŋɡɔ ɑ ɡu wɔ̌ Ndɛ? Tsɑpʉɔ pʉ̈ɔt ŋɡɔ: “Mɔ Yɛ́su, mɔ́ɔ-Nɑ̌zɑlɛt. Ɔ tsɔ́Ꞌ pɑꞋnɛ pɔ ku yɑ́ɑ kɛpɔŋ.” 9Pʉɔ pinɛ pɛk pɛpɔ́p kɑ pɔ́ ńnɛn jʉ́ɔ pɑ́Ꞌ yúu kyɛꞋnɛ zʉꞋ lɑ́, ŋ́kɛ́ ḿbɔɔ zúꞋ ŋɡi-ŋu ẅi ɑ cúnɛ nu mbɔ̌ mɔ pɔ́. 10M bíkŋɛ wɛ́ ŋɡɔ: “Tsɑpʉɔ, ŋ ɡɛ ŋɡɔ́ku?” Tsɑpʉɔ ńtsɔ́Ꞌ mbɔ̌ mɔ ŋɡɔ: “Lɔ sɛ́, ŋ́ɡʉ Ndɑmɑs. Ɔ ɡʉ ŋ́kúu zúꞋu lɑ́ pɛ́ sẅíi wú mbɑ kʉ̈ɔ́ lɑ́ yi ɛ́ sɛ́ ḿbíkŋɛ ŋɡɔ ɔ ɡɛ.” 11Ŋ kɑ ɡɔ́ ḿbɔ́, mbɔ yúu puu ŋ́kyɛ́Ꞌ mík mɑ́ɑ tɛ ɛ fʉ. Pʉɔ pi pɛk pɛpɔ́p kɑ pɔ́ ńnɛn ɡɔ́ɔ ŋ́kɛ́ ŋ́ɡẅɛɛ pɔ́ yɑ́ɑ, ńcɑklɛ wɑ́ɑ tʉ́sɔŋ-Ndɑ́mɑ́s.
12Ŋ́kúu zúꞋu, wɛcɔ́ ŋu pɔ́ zúꞋu. Pɛ́ fúŋ wɛ́ ŋɡɔ Anɑníyɑs. A pɔ́ ŋu ŋ́ɡɛ mɛkuꞋ-Sɛ́ ḿbɛn ńnɛn pɑ́Ꞌ nɛpʉ́ʉ nɛkŋɛ sɛ́ ḿbíkŋɛ. Pɑyúdɑ pi pɔ́p ńtswɛ́nɛ tʉ́sɔŋ-Ndɑ́mɑ́s tɛ ḿmik wɔ́p pɔ́ ŋ́kẅíi lík yɛ́ pɔ sʉ́Ꞌnɛ. 13Anɑníyɑs tɔ́ tɛ ŋ́kúu nɛjɔ́ŋ mɔ, ńcú mbɔ̌ mɔ ŋɡɔ: “Mɔ́ɔmɑ́ mɔ Sɔ̂l, pɛn ńzɛ nɛjʉ́ɔ zʉꞋ.” Ŋ ɡɔ́ɔ ńtʉ́ʉ pɔ ŋkɑ́ yîyɑ́, mík mɑ́ɑ ŋíɛꞋnɛ tɛ n tsuŋ ńjʉ́ɔ Anɑníyɑs. 14A pɛn ńcú ŋɡɔ: Sɛ́ pɛmɑ́ŋɡɑpnjẅɛt pɛkŋɛ ɡɔ́ɔ ńzɑ́Ꞌ njí ńtsɔ́Ꞌ wú, nɛ́ lɔk wú ŋ́ɡɛ ŋu ẅi ɑ ɡʉ ńjí yúu mi ɑ kɑ ńzɑ́pnɛ nɛɡɛ, mbɑ nɛɡɛ ɔ jʉ́ɔ ŋu ẅi ɑ ndʉ́ŋndʉŋ zɛ́nɛjʉ́, mbɑ nɛzúꞋ ŋɡi-ẅîwɑ́ ŋu. 15Ɔ zɛɛ ńtʉ́ʉ pɑ́Ꞌɑ, ŋ́ɡẅɛɛ nɛɡʉ zʉꞋ tsʉʉ ndǔ tsɛ́tsɑ́Ꞌ, ɛ́sẅíi pʉɔ nɛ́ nu yi ɔ jínɛ nǔu ŋu ndʉ́ŋndʉŋ ɛ̂wɑ́, yi ɔ jʉ́ɔnɛ, mbɑ yi ɔ zúꞋnɛ. 16Ɔ ŋkɔ̂ɔnɛ ḿbɛ́t ńzẅíꞋlɛ kʉ̈ɔ́. Lɔ sɛ́ ńtɔ́ pɛ́ lɔk lík yɛ́ ńnuꞋ wú ŋki, ńdɔk ɛ́suk mɛnu kɛpɔŋ mú.»
Pɔ̂l sɛ́ ḿbɛ́ɛtɛ pɑ́Ꞌ pɛ́ kɑ túunɛ wɛ́ mbɔ̌ pʉɔ pi pɔ́p kɑ́ pɔ́ pɑyúdɑ pɔ́
17«M bɑ́ɑtɛ ḿbɛn Yɛlúsɑlɛm, ḿbɔ́ yɛcɔ́ lɛ́Ꞌ ḿbɔ́ tɛtɑ́ɑ-ZʉꞋ-nɔŋpɔꞋ ḿbɔ́ ńcɛꞋlɛ Sɛ́, Tsɑpʉɔ ŋíɛꞋ mík mɑ́ɑ. 18N jʉ́ɔ wɛ́, ɑ cú mbɔ̌ mɔ ŋɡɔ: “Fɛ́Ꞌnɛ ɛ́fú Yɛlúsɑlɛm wɔ ŋ́ɡʉ, mbíꞋŋɡɔ pʉɔ pi pɔ́p tswɛ́nɛ zúꞋu kɛ́ ɡɛ ḿbɛ́m nu yi ɔ ɡʉ ɛ́sẅíi wɔ́p ntɛ́ wɑ́ɑ pɔ́.” 19N tsɔ́Ꞌ ŋɡɔ: “Tsɑpʉɔ, pɔ́p sɛ́ ńjí sʉ́Ꞌnɛ pɑ́Ꞌ ŋ kɑ pɔ́ ŋ́kɑ́t tsɛt mɛndɑ́-cúꞋlɛ mɔ́p ŋ́ɡẅɛɛ pʉɔ pi pɔ́p zɑ́pnɛ tʉ́m nǔu ɡu, ńníꞋ wɔ́p ndɑ́tsɑ́ŋ, ḿbɛn ŋ́ɡɛ pɛ́ lɔk ŋɡwɑɑ ńtswɑ́ɑ wɔ́p. 20Pɛ́ kɑ ɡɔ́ ńtswɛt mɛci Ɛtiyɛ̂n mbɔ ɑ kɑ pɔ́ ɛ́sẅíi pʉɔ nɛ́ nu yi ɑ jínɛ nǔu ɡu, m bɔ́ yɑ́ɑ sɛ́. Pɛk pʉɔ pi pɔ́p kɑ jẅínɛ wɛ́ kɑ pɔ́ tɑ́Ꞌ ntsu; lɑ́ pɔ́p pɔ́ ńtɛ́mtɛ wɛ́ nɛ́ mɛŋɡɔꞋ ńjẅí, m bɔ́ ḿbyɛ́p mɛndẅí mɔ́p.” 21Lɑ́ Tsɑpʉɔ ńcú mbɔ̌ mɔ ŋɡɔ: Lu, n túu wú pɑ́Ꞌɑ ŋɡɑ sɛsɑ, tsɛtsɛt pʉɔ ntɛ́ nɛ́ ntɛ́ pi pɔ́p kɑ́ pɔ́ pɑyúdɑ pɔ́.»
Pɔ̂l cú ŋɡɔ ɑ mɔ́ɔ-lɑ́Ꞌ-Pɑlɔ́mɑ
22Pɑyúdɑ pi pɔ́p kɑ zẅíꞋlɛnɛ nu yi Pɔ̂l sɛ́ ńcú, tɛ ńzúꞋ ɑ cú pɑ́Ꞌ ɑ cúnɛ lɑɑ, kɑ ɡɔ́ɔ ŋ́kɑꞋ ŋɡi yɔ́p, ŋ́ɡɑ́ tʉ́ ńcú ŋɡɔ: «Pɛ́ ɡwɛ́tnɛ ŋu wɑ́. A kɑ́ ɡẅɛɛ nɛpɔ́ ɡú pɔ́, 23ŋ́ɡɛ pɑ́Ꞌɑ, ḿbɔ́ ńdítɛ ŋɡuŋ, ḿbɔ́ ɛ́sɑ mɛndẅí mɔ́p, ŋ́ŋwɑt pɛ́pɛ́p ḿmɑꞋ tʉ́.» 24Tɑ́tndɑ́-pɛtɑ́tndɑ́-ntsɔ-Lɔ́mɑ ɡɔ́ɔ ŋ́kɛ́ ńcú ŋɡɔ pɛ́ lɔk wɛ́ ḿbɛn tsɛt mɑ́mɑ́ ŋkɑ́Ꞌ-pɑlʉ̈ɔ́Ꞌ ntsɔ, ńdɔk ŋɡwɑɑ ńniitɛ ńtswɑ́ɑ wɛ́, ńtsʉ́ʉnɛ wɛ́ ɑ cú yúu mi lɑ́Ꞌ kuŋnɛ wɛ́ nǔu. 25Ńdɔk wɛ́ ŋ́ɡʉ pɔ́Ꞌɔ, pɛ́ zɛ nɛkút Pɔ̂l pɑ́Ꞌ pɛ́ ɡʉ ńtswɑ́ɑ wɛ́. A cú mbɔ̌ tɑ́tndɑ́-ntsɔ ẅi ɑ zúꞋu ŋɡɔ: «Pɛ́ ɡʉ ńdíŋɛ líŋɛ́nɛ pʉʉ tswɑ́ɑ mɔ́ɔ-lɑ́Ꞌ-Pɑlɔ́mɑ kɛ́ pɔ́ yi pɛ́ zɛɛ sǐi ŋ́ŋɑk wɛ́ pɔ́ ɔɔ? Wɔ̌ cúnɛ pɔ́Ꞌɔ?» 26A zúꞋ ḿvukŋɛ, ŋ́kʉɔ ŋ́ɡʉ ńjʉ́ɔ Tɑ́tndɑ́-wɔ́p, ńcú mbɔ̌ wɛ́ ŋɡɔ: «Ɔ ɡʉ ŋ́ɡɛ ŋɡɔ́ku? Ŋu mbɛ́ɛnɛ wɑ́ mɔ́ɔ-lɑ́Ꞌ-Pɑlɔ́mɑ» 27Tɑ́tndɑ́-wɔ́p zúꞋ yɛ́, ńtɔ́ tɛ ŋ́kúu nɛjɔ́ŋ Pɔ̂l, ḿbíkŋɛ ŋɡɔ: «Sẅíi wɑ́ɑ, pɛ́ cú ŋɡɔ ɔ mɔ́ɔ-lɑ́Ꞌ-Lɔ́mɑ ɔɔ?» Pɔ̂l pʉ̈ɔt ŋɡɔ: «Ɔ́ɔŋ.» 28Tɑ́tndɑ́-pɛtɑ́tndɑ́-ntsɔ cú mbɔ̌ wɛ́ ŋɡɔ: «Mɔ, pɛ́ kɑ lɑ́Ꞌ ŋ́ɡɔ ḿbɛ́m ŋɡɔ n tsʉ́Ꞌ mɔ́ɔ-lɑ́Ꞌ-Lɔ́mɑ m bʉ́pɛ ŋkɑ́p nǔu tɛ ɛ́ pɔɔ kʉ̈ɔ́k.» Lɑ́ Pɔ̂l pʉ̈ɔt yɛ́ mbɔ̌ wɛ́ ŋɡɔ: «Ɛ̌ɛ! Ɛ́ ɡʉ nǔu mɔ, mbɔ pɛ́ kɑ pí wɑ́ɑ m bɔ́ pɔ mɔ́ɔ-lɑ́Ꞌ-Lɔ́mɑ.» 29Pʉɔ pi pɔ́p lɑ́Ꞌnɛ ńtʉ́ʉ nɛtswɑ́ɑ Pɔ̂l, nɛlɔk ŋ́ɡɛ ɑ cú nu, fú nɛjɔ́ŋ wɛ́ ŋ́kʉɔ. Tɑ́tndɑ́-pɛtɑ́tndɑ́-ntsɔ jí ŋɡɔ ɑ lɑ́Ꞌ ɛ́fɑɑnɛ nɛɡɛ pɛ́ kút mɔ́ɔ-lɑ́Ꞌ-Lɔ́mɑ nɛ́ mɛcɛ̂n, tʉ́ʉ ńtsʉ́Ꞌ ḿbɔ́k pɔ́knɛ.
Pɔ̂l tʉ́ʉ mbi pɑsɑ́Ꞌlɑ́Ꞌ-pɑyúdɑ
30Njí ɡɛ ŋ́kiɛ, Tɑ́tndɑ́-pɛtɑ́tndɑ́-ntsɔ lɔɔ nɛtsuŋ ńniitɛ ńjí yúu mi pɑyúdɑ kɑ ɡɔ́ ɛ́fɛn Pɔ̂l, ɛ́fɛn ntɛ́ yɛ́tɛ́, ńcú pɛ́ kíɛꞋ mɛcɛ̂n nǔu wɛ́, ḿbɛn ńcú pɛ́ fúŋ pɛtɑ́tndɑ́-pɑnɔŋpɔꞋ pɔ́p pɛcɔ́ pɑŋɑkntsɑŋ-pɑyúdɑ, ŋ́ɡɛ pɛ́ lɔk Pɔ̂l ńcúŋ ńtɔ́ ńtík wɛ́ mbi pɔ́p.
Currently Selected:
ŊwɑꞋnɛ-Gɑŋntúu Yɛ́su Kɛlístɔ 22: JGO
Highlight
Share
Compare
Copy
Want to have your highlights saved across all your devices? Sign up or sign in
CABTAL, 2017
