ŊwɑꞋnɛ-Gɑŋntúu Yɛ́su Kɛlístɔ 18
18
Pɔ̂l tʉ́sɔŋ-Kɔlɛŋntɛ
1Yɔ nu lɛɛ, Pɔ̂l fú tʉ́sɔŋ-Atɛ̂n ŋ́ɡʉ nɛ́ tʉ́sɔŋ-Kɔlɛŋntɛ, 2ŋ́ɡʉ tɛ ŋ́kúu zúꞋu, ńjʉ́ɔ wɛcɔ́ ŋu-Yúdɑ ẅi pɛ́ fúŋnɛ wɛ́ ŋɡɔ Akilɑs. Mbɔ pɛ́ kɑ pí wɛ́ tsɛt pɑk-ŋɡɔŋ-Pɔ̂ŋ. Pɔ́p nzwɛ́ wɛ Pɛlɛsîl pɛ́t lɑ́ ńtɔ́, ɛ́fú nɛ́ ŋɡɔŋ-Itɑlî. Mbɔ Kɑ́sɑ Kɛlɔ̂dɛ kɑ cú ŋɡɔ pɑyúdɑ tsʉʉ fú tʉ́sɔŋ-Lɔ́mɑ ŋ́ɡʉ. Pɔ̂l ɡʉ ŋ́ɡwɑ́ wɔ́p. 3Pɑ́Ꞌ pɔ́p pɛ́ pɔ́p kɑ pɔ́ ɛ́fɑꞋ pɔ tɑ́Ꞌ ntɛ́ fɑꞋ, ɛ́ pɔ́ ńniitɛ mɛntɑp lɑ́, Pɔ̂l tsʉ́Ꞌ ńtswɛ́ pɔ njɛ́Ꞌ pɔ́p, pɔ́p pɛ́ pɔ́p tɛmtɛ ɛ́fɑꞋ. 4Ŋɡɔŋ lɛ́Ꞌnji-pɑyúdɑ, Pɔ̂l ɡʉ ndɑ́-cúꞋlɛ pɔ́p, ńdɔɔ shʉ́ nɛsẅíi pɑyúdɑ pɔ́p pɑŋɡɛlɛ́k nɛ́ nu tɛ pɔ́p zúꞋ nu-Yɛ́su.
5Sílɑs pɔ́p Timɔtɛ̂ɛ ɡɛ ḿbɔ́ tɛ ɛ́fú pɑk-ŋɡɔŋ-Mɑsɛ́ndwɑn ńtɔ́, Pɔ̂l tsʉ́Ꞌ ńníꞋ tú yɛ́ pɔ ndɑꞋ nɛsẅíi nu-Sɛ́, ḿbɔ́ ńniitɛ ŋ́kyɛ́Ꞌtɛ, ɛ́sẅíi pɑyúdɑ ŋɡɔ Yɛ́su pɔ́nɛ Nzɑ́Ꞌŋkʉ ẅi pɔ́p tswɛ́nɛ ḿbyɛ́p. 6Lɑ́ pɑyúdɑ tɛn pɔ ndʉꞋ, ńzɔɔtɛ Pɔ̂l. A ɡɔ́ɔ ńtsʉ́Ꞌ ḿbúꞋ pɔ pɛ́pɛ́p nǔu mɛndẅí mɛ́, ńcú mbɔ̌ pɔ́p ŋɡɔ mɛci mɔ́p lɑɑ ńtswɛtnɛ tú pɔ́p, mbɔ yɛ́ nu kɑ́ pɔ́ nǔu pɔ́. Ŋɡɔ ɑ fú ŋkɔ̂ɔnɛ, ńtsʉ́Ꞌ ɛ́sẅíi nu-Sɛ́ pɔ mbɔ̌ pʉɔ pinɛ pɔ́p kɑ́ pɔ́ pɑyúdɑ pɔ́. 7Pɔ̂l cú pɔ́Ꞌɔ, ɛ́fú ndɑ́-cúꞋlɛ ńcẅɛt, ŋ́ɡʉ nɛ́ njɛ́Ꞌ wɛcɔ́ ŋu, pɛ́ fúŋnɛ wɛ́ ŋɡɔ Tutius Jẅistẅis. A pɔ́ ŋu, mbɔ ɑ kɑ zɑ́p tʉ́m yɛ́ nǔu Sɛ́ wɛk. Ndɑ́ yɛ ɡɔ́ɔ ḿbɔ́ pɔ mbʉʉ ndɑ́-cúꞋlɛ-pɑyúdɑ. 8Kɛlíspus ẅi ɑ ndʉ́m tsɛt ndɑ́-cúꞋlɛ-pɑyúdɑ pɔ́p njẅɛtndɑ́ yɛ tsʉʉ ɡɛ ńzɑ́p tʉ́m yɔ́p nǔu Tsɑpʉɔ. Pɛ́ nuꞋ wɔ́p ŋki. Pʉɔ-Kɔlɛŋntɛ tɛ ńzɑ́ɑ zúꞋ sẅíŋɛ-Pɔ̂l ḿbɛ́m yɔ́p nɛpɔ́ pʉɔ-Kɛlístɔ. Pɛ́ nuꞋ wɔ́p ɡúu ŋki.
9Ɛ́ pɔ́ yɛcɔ́ nɛtúꞋ, Tsɑpʉɔ cú ńníɛꞋ mík-Pɔ̂l ńcú mbɔ̌ wɛ́ tsɛt njʉɔ ŋɡɔ: «Pɑ́ɑ nɛcʉɔꞋ! Sẅíi nu yɑ́ɑ sẅíinɛ, kɔɔ nɑ́Ꞌ, 10mbíꞋŋɡɔ pûu nɛnnɛ. Wɛcɔ́ ŋu kɑ́ kuꞋ nɛɡẅɛɛ wú tɛ ŋ́ɡɛ nu kɛpɔŋ nǔu ɡu pɔ́. N cú pɑ́Ꞌɑ, mbíꞌŋɡɔ pʉɔ pi pɔ́p pɑ́ɑ, tʉ́sɔŋ zɑꞋnɛ tɛ ńzɑ́ɑ.» 11Pɔ̂l tswɛ́ Kɔlɛ̂ŋntɛ tɑ́Ꞌ ŋɡuꞋ nɛ́ pɛsɑŋ pɛ́nɛ́túkú, ḿbɔ́ ńzíꞋ pʉɔ nɛ́ nu-Sɛ́.
12Ɛ́ ɡɔ́ ḿbɔ́ yɛcɔ́ ŋkɑ́, Ŋɡɑlíyɔn tsʉ́Ꞌnɛ ŋɡɔ́mnɑɑ nǔu pɑk-ŋɡɔŋ-Pɑlɔ́mɑ yi pɛ́ fúŋnɛ ŋɡɔ Akɑ̂y. Pɑyúdɑ nɑ́ŋ tɛ ńdɔ sɛ́ nzʉʉ Pɔ̂l, ŋ́ɡẅɛɛ wɛ́ ńdɔk ŋ́ɡʉ zʉꞋ yi pɛ́ ŋɑknɛ ntsɑŋ zúꞋu, ɛ́fɛn wɛ́, 13ńcú ŋɡɔ: «Ŋu wɔ sɛ́ ńníꞋ mɛtʉʉ pʉɔ ŋɡɔ pɔ́p ɡúꞋlɛ Sɛ́ nǔu ntɛ́ yi nɛpʉ́ʉ nɛkŋɛ kɑ́ pɔ́ ŋ́kɔŋ pɔ́.» 14Pɔ̂l zúꞋ tɛ ḿbɔ́ ńdɔɔ nɛpʉ̈ɔt, Ŋɡɑlíyɔn ɡɔ́ɔ ńzɑ́Ꞌ, ńcú mbɔ̌ pɑyúdɑ ŋɡɔ: «Pɑyúdɑ ɛ́ ḿbɔ́ pɛ́Ꞌɛ ḿbɔ́ nu nɛjẅí ŋu kɛ pɔ yɛcɔ́ mɑ́mɑ́ nu kɛpɔŋ yi ŋu ɡɛnɛ ɔɔ, mbɔ ŋ ŋɑk nu yʉ́ʉ. 15Lɑ́ pɑ́Ꞌ pʉʉ kɛ́ ɛ́shɔtnɛ pɔ tsɛtsɛt pʉʉ, ńzɔŋ nu pɔ nǔu mɛsẅíŋɛ, pɔ́p mɛlík mbɑ nɛpʉ́ʉ ni ɛ́ pɔ́ pɔ nʉ́ʉ lɑ́, ɛ́ líŋɛ pɔ wʉ́ʉ. Ŋ kɑ pɔ́ ŋ́kɔŋ nɛŋɑk yîyɑ́ ntɛ́ mɛtsɑŋ pɔ́!» 16Ŋɡɑlíyɔn cú pɔ́Ꞌɔ, ɛ́fú zʉꞋ yi pɛ́ ŋɑknɛ ntsɑŋ zúꞋu, ńzuŋ wɔ́p. 17Nu tsɑ wɔ́p pɔ́p pɛ́tsʉʉ tsʉ́Ꞌ ŋ́ɡẅɛɛ Sɔstɛ̂n ẅi ɑ ndʉ́m tsɛt ndɑ́-cúꞋlɛ pɔ́p, ńzɛ pɔ zʉꞋ yi pɛ́ ŋɑknɛ ntsɑŋ zúꞋu nɛtswɑ́ɑ wɛ́. Ŋɡɑlíyɔn pɔɔ tsɔ́p.
Pɔ̂l pɛn nzʉʉ nɛ́ Antíyɔshɛ wɛ Siliyɑ
18Pɔ̂l nɑ́Ꞌ ḿbɛn ńzɛ ńnɑ́ŋ Kɔlɛ̂ŋntɛ. Lɑ́ ńdɛɛmɛ pɔ́ɔpɛ́mɑ́, ŋ́ɡʉ Sɛnkɛ́lɛ́ pɑ́Ꞌ ɑ ɡʉ ŋ́kúu mɑ́mɑ́ kɑnúꞋ ŋ́ɡʉ nɛ́ Siliyɑ. Pɔ̂l pɔ́p Pɛlɛsîl ŋ́ɡɛ Akilɑs ɡʉnɛ. Pɔ̂l ɡɔ́ ŋ́kúu kɑnúꞋ, ŋ́kɔ́ɔ tú yɛ́ ńdɔk ńcú ŋɡɔ ɑ ɡɛ yúu mi ɑ kɑ kɑꞋnɛ mbɔ̌ Sɛ́ tɛ ńdẅiklɛ. 19Pɔ́p ɡʉ tɛ ŋ́kúu Ɛ́fɛ̂zɛ ńcẅɛt tsɛt kɑnúꞋ, Pɔ̂l nɑ́ Pɛlɛsɛkɑ pɔ́p Akilɑs, ŋ́ɡʉ ŋ́kúu ndɑ́-cúꞋlɛ-pɑyúdɑ, nɛsẅíi pɑyúdɑ nɛ́ nu-Tsɑpʉɔ. 20Pɔ́p píkŋɛ wɛ́ ŋɡɔ pɔ́p pɛ́ pɔ́p nɑ́Ꞌ ńzɛɛ ńnɑ́ŋ. Lɑ́ ɑ pɔɔ pɛ́m. 21Lɑ́ ŋ́ɡɔ ńdɛɛmɛ wɔ́p ńcú mbɔ̌ pɔ́p ŋɡɔ: «Sɛ́ lɑɑ ḿbɛ́m, mbɔ mɔ ńtɑ́ɑ lɑ́ ḿbɛn ńtɔ́ njɛ́Ꞌ pʉʉ.» A cú pɑ́Ꞌɑ, ŋ́ɡɔ́ɔ ŋ́kɛ́ ŋ́ɡʉ ŋ́kúu kɑnúꞋ, ɛ́fú Ɛ́fɛ̂zɛ ŋ́ɡʉ. 22KɑnúꞋ ɡɛ ŋ́kúu Sɛ́zɑlɛ̂ Pɔ̂l pfúu ḿbʉʉ nɛ́ Yɛlúsɑlɛm, ńcɛꞋlɛ cúlɛ-pʉɔ-Kɛlístɔ lɑ́ ḿbɛn ɛ́fú zúꞋu ŋ́ɡʉ nɛ́ Antíyɔshɛ, 23ŋ́kúu Antíyɔshɛ, ńnɑ́Ꞌ ńzɛɛ ńnɑ́ŋ lɑ́ ŋ́ɡʉ, ńjɛ́Ꞌ wɛ́ pɑk-ŋɡɔŋ-Ŋɡɑlɑ̂t pɔ́p Filíjîi, ńnɛn ńníꞋ mɛtʉʉ pʉɔ-Kɛlístɔ.
Apɔlɔ́s zíꞋ pʉɔ nɛ́ nu-Sɛ́ tʉ́sɔŋ-Ɛ́fɛ̂zɛ mbɑ Kɔlɛ̂ŋntɛ
24Wɛcɔ́ ŋu-Yúdɑ ẅí pɛ́ kɑ pínɛ wɛ́ Alɛkzɑŋndɛlîi, pɛ́ fúŋ wɛ́ ŋɡɔ Apɔlɔ́s tɔ́ Ɛ́fɛ̂zɛ, ḿbɔ́ ŋu ńcú nu ɛ́ ńcẅɛt, ḿbɛn ńjí ŋwɑꞋnɛ-Sɛ́ sʉ́Ꞌnɛ. 25Mbɔ pɛ́ kɑ zíꞋ wɛ́ nɛ́ nu ŋ́ɡɑ́ nǔu sɛ̂ndúŋ-Tsɑpʉɔ Yɛ́su. A pɔ́ ńníꞋ tú kwɑꞋ sʉ́Ꞌnɛ ɛ́sẅíi yîyɑ́ nu ḿbɛn ńzíꞋ pʉɔ nɛ́ nu-Yɛ́su pɔ ndʉ́ŋndʉŋ pɑ́Ꞌ ɛ́ pɔ́nɛ. Lɑ́ ŋ́ɡʉ nǔu nu cẅɛ́ɛ ŋki, ɑ jí yɛ́ pɔ pɑ́Ꞌ Jɑ̂ŋ kɑ pɔ́ ńnuꞋ pʉɔ ŋki. 26A cú nu-Sɛ́ ndɑ́-cúꞋlɛ-pɑyúdɑ, ɛ́sɑ́ɑnɛ sɑ́ɑnɛ́nɛ. Pɛlɛsîl pɔ́p Akilɑs zúꞋ sẅiŋɛ yɛ́ ńdɔk wɛ́ ŋ́ɡʉ, ńniitɛ ńdɛꞋlɛ wɛ́ nɛ́ nu ŋ́ɡɑ́ nǔu sɛ̂ndúŋ-Tsɑpʉɔ. 27Apɔlɔ́s ɡɛ ḿbɔ́ ńtsɑ́ɑ nɛfú Ɛ́fɛ̂zɛ ŋ́ɡʉ nǔu pɑk-ŋɡɔŋ-Akɑ́y#18.27 Tʉ́sɔŋ-Kɔlɛŋntɛ tsɛt pɑk-ŋɡɔŋ-Akɑy., pɔ́ɔpɛ́mɑ́ zúꞋ ńníꞋ mɛtʉʉ mɛ́, ŋ́ŋwɑꞋnɛ ŋwɑꞋnɛ ŋ́ɡɑ́ mbɔ̌ wɛ́, nɛpɔ́ yi ɑ ɡʉ ŋ́kúu zúꞋu, ŋ́ɡɑ́ mbɔ̌ pʉɔ-Kɛlístɔ pi pɔ́p zúꞋu pɔ́p kúkŋɛ wɛ́ sʉ́Ꞌnɛ. A ɡʉ tɛ ŋ́kúu zúꞋu, ńcẅɛ́lɛ́ pʉɔ-Kɛlístɔ pɑ́ꞋtɛꞋ, mbíꞋŋɡɔ Sɛ́ kɑ pɔ́ ńtɔ́ɔtɛ wɛ́, 28pɔ́p pɛ́ pɑyúdɑ zɛɛ ńtʉ́ʉ mbi lɑ́Ꞌ, ńzɔŋ nu ŋ́ɡɑ́ nǔu Yɛ́su. A pɔ́ ńdɔk nu yi ɛ́ fúnɛ tsɛt ŋwɑꞋnɛ-Sɛ́ ńniitɛ nnyɛt ŋɡɔ Yɛ́su pɔ́nɛ Nzɑ́Ꞌŋkʉ ẅi Sɛ́ kɑ kɑꞋnɛ, ḿbɔ́ ńdɔk yɛ sẅiŋɛ ńjɔ́Ꞌ ntsu-pɑyúdɑ.
Currently Selected:
ŊwɑꞋnɛ-Gɑŋntúu Yɛ́su Kɛlístɔ 18: JGO
Highlight
Share
Compare
Copy
Want to have your highlights saved across all your devices? Sign up or sign in
CABTAL, 2017
