ŊwɑꞋnɛ-Gɑŋntúu Yɛ́su Kɛlístɔ 14
14
Pɔ̂l pɔ́p Pɑnɛpɑ́ɑshi Ikɔnyɔm
1Pɔ̂l pɔ́p Pɑnɛpɑ́ɑshi pɛtsʉʉ kúu Ikɔnyɔm, mɛnu pɛn ńdɛɛtɛ pɔ ndʉ́ŋndʉŋ pɑ́Ꞌ ɛ́ kɑ lɛɛtɛ́nɛ Antíyɔshɛ. Pɔ́p ɡʉ ndɑ́-cúꞋlɛ-pɑyúdɑ ɛ́sẅíi nu-Yɛ́su. Lɑ́ nɛzɑ́ɑ pɑyúdɑ, tɛ mbɑ pʉɔ pí pɔ́p kɑ́ pɔ́ pɑyúdɑ pɔ́ pɛ́m nu yɛ́. 2Lɑ́ pɛcɔ́ pɑyúdɑ lʉꞋ nɛpɛ́m, ńdẅɑklɛ pʉɔ pí pɔ́p kɑ́ pɔ́ pɑyúdɑ pɔ́, pɔ́p zɛ nɛlíŋɛ pɔ́ɔpɛ́mɑ́ kɛpɔŋ. 3Tɛ ŋ́ɡɛ pɔ ŋɡɔ́ku lɑ́, Pɔ̂l pɔ́p Pɑnɛpɑ́ɑshi zɛ ńnɑ́ŋ Ikɔnyɔm, ńtík pɔ Tsɑpʉɔ mbi, ḿbɔ́ ńdɛɛ lɛɛnɛ ńcú mbɔ̌ pʉɔ ŋɡɔ Tsɑpʉɔ kɔŋ wɔ́p. Tsɑpʉɔ pɛn ḿbɔ́ ńdɛɛ nǔu mɛnu mɑ̌ɑmɑɑnɛ nɛ́ ŋkʉꞋnɛ mɛnu mi ɑ lɔknɛ wɔ́p ŋ́ɡɛ, ńnyɛt ŋɡɔ nu yí pɔ́p cúnɛ nǔu pɑ́Ꞌ Yɛ́su kɑ ɡɑ́nɛ fu níinɛ-pʉɔ, ɛ́ nɛ́nẅín. 4Pʉɔ pí pɔ́p tʉ́sɔŋ sɑ́ɑnɛ, ŋ́ɡɑptɛ nji yɛ́pɑ́. Tɑ́Ꞌ nji cʉ́ɔ nzʉʉ-pɑyúdɑ. Yɛcɔ́ cʉ́ɔ nzʉʉ-pɑpɛ́m Yɛ́su. 5Pɑyúdɑ mbɑ pʉɔ pí pɔ́p kɑ́ pɔ́ pɑyúdɑ pɔ́, pɔ́p pɛkɛ́m-lɑ́Ꞌ pɔ́p, zɑ́p ŋɡɔ pɔ́p ɡʉ ńdɔk mɛtʉʉ ŋ́kúu nǔu, ńtɛ́m ɡɑŋntúu-Yɛ́su-ɛ̂pɑ́ nɛ́ mɛŋɡɔꞋ ńjẅí. 6Pɔ́p pɛ́t ŋ́kwɑŋɛ kwɑŋɛ́nɛ, Pɔ̂l pɔ́p Pɑnɛ́pɑ́ɑshi piitɛ ńzúꞋ, ŋ́ɡɔ́ɔ ŋ́kɛ́ ŋ́kʉɔ ŋ́ɡʉ nɛ́ tsɛt pɑk-ŋɡɔŋ-Likɑwɔni, ŋ́kúu zúꞋu ŋ́ɡʉ tʉ́sɔŋ-Listɛlɛ pɔ́p Ndɛlbɛ, tɛ mbɑ tsɛt mɛcɔ́ mɛtʉ́sɔŋ mí ɛ́ shʉ́ zúꞋu, 7ńnɛn ḿbɔ́ ńcẅi pɔ Ŋkʉʉ Sʉ́Ꞌnɛ ẅi Sɛ́ kɑ kɑꞋnɛ.
Pɔ̂l pɔ́p Pɑnɛpɑ́ɑshi tʉ́sɔŋ-Listɛlɛ
8Ɛ́ ḿbɔ́ tʉ́sɔŋ-Listɛlɛ, wɛcɔ́ ŋɡɑŋkẅíꞋlɛ pɔ́ zúꞋu. Mbɔ pɛ́ kɑ ɡɔ́ ḿbí wɛ́ ɑ pɔ́ pɔ kʉ̈ɔ́. Mbɔ ɑ ŋ́kɑɑ mɔ kɑ́ nɛn. 9A pɔ́ yɛcɔ́ lɛ́Ꞌ, ḿbɔ́ ńzẅíꞋlɛ sẅiŋɛ yí Pɔ̂l ḿbɔ́ ńcú. Pɔ̂l tík mík nǔu wɛ́, ńjʉ́ɔ ɑ pɔ́ ńzɑ́p tʉ́m nǔu Sɛ́ tɛ ḿbɔ́ yi ɛ́ lɑɑ ḿbɔ́ Sɛ́ ɡɛ ɑ fíitɛ. 10Pɔ̂l lɔk ŋɡi tɛnnɛ ńcú mbɔ̌ wɛ́ ŋɡɔ: «Lɔ sɛ́, ńdɔk mɛku mú ńtʉ́ʉ tʉ́ʉnɛ.» ŊɡɑŋkẅíꞋlɛ ɛ̂wɑ́ zúꞋ, ŋ́ɡúꞋ sɛ́ ŋɡɔ ɡúp, ńzɛ nɛnɛn. 11Lɑ́Ꞌ jʉ́ɔ yúu mi Pɔ̂l ɡɛnɛ, ńdɔk sẅiŋɛ-Likɑwɔni ńcú ŋɡɔ: «Pʉɔ pɑ́ mɛsɛ́ ɛ́ shɔtnɛnɛ ńtsʉ́Ꞌ pɑ́Ꞌ pʉɔmɛsɔŋ, tɛ ńcúŋ ḿbɔ́ tsɛtsɛt pɛkŋɛ lɑɑ!» 12Ḿbɛn ńcú ŋɡɔ Pɑnɛpɑ́ɑshi sɛ́ Zɛ́us. Pɔ̂l pɔ́ sɛ́ ẅi pɛ́ fúŋnɛ ŋɡɔ Hɛlmɛs, ńcú pɔ́Ꞌɔ mbíꞋŋɡɔ Pɔ̂l kɑ pɔ́nɛ ńcú nu#14.12 Ɛ́ ḿbɔ́ lɑ́Ꞌ pʉɔ-Ŋɡɛlɛ́k, Zɛ́wus pɔ́ fɔɔ mɛsɛ́, Hɛlmɛs pɔ́ mɑ́ntúu wɔ́p ẅí ɑ cẅinɛ mɛŋkʉʉ mɔ́p. ŋkɑ́ tsʉʉ. 13Pɛ́ kɑ pɔ́ ńdɛɛ nǔu yɛcɔ́ ndɑ́-nɔŋpɔꞋ yɔp lɑ́ ŋ́kúu tʉ́sɔŋ, ɛ́ pɔ́ yi sɛ́-Zɛ́us. Ŋu ẅí ɑ nɔŋpɔꞋ tsɛt yîyɑ́ ndɑ́-nɔŋpɔꞋ, ɡʉ ŋ́ɡẅɛɛ pɛfɔŋ, ńdɔk fɛlɛ́wɑɑ ńniitɛ ŋ́kẅii wɔ́p, ńdɔk ńtɔ́ tsundɑ́-sɛ́ ɛ̂wɑ́. Pɔ́p pɛ́ lɑ́Ꞌ cúꞋlɛ, ńdɔɔ nɛɡwɑt pɛfɔŋ ɛ̂pɑ́ ńdɔk ńnɔŋ pɔꞋ mbi Pɔ̂l pɔ́p Pɑnɛpɑ́ɑshi. 14Pɔ́p zúꞋ yɔ nu, ɛ́sɑtɛ mɛndẅí mɔ́p ńdɔk ḿbɔ́ ńdʉꞋ, ńnɑ́ɑtɛ ŋ́kúu tsɛtsɛt lɑ́Ꞌ ŋ́ɡíɛt nɛ́ tʉʉ ńcú ŋɡɔ: 15«Pɛsúu pɛk, pʉʉ lɔɔ nɛɡɛ kʉ̈ɔ́ pɑ́Ꞌɑ? Pɛk kɛ́ ḿbɔ́ pɔ pʉɔmɛsɔŋ pɑ́Ꞌ pʉʉ! Pɛk tɔ́ pɔ nɛcẅi Ŋkʉʉ Sʉ́Ꞌnɛ ẅi Sɛ́ kɑ kɑꞋnɛ mbɔ̌ pʉʉ, ɛ́ pɔ́ ŋɡɔ pʉʉ mɛꞋ mɛsɛ́ mʉ́ʉ mi ɛ́ kɑ́ kuꞋ yɛcɔ́ yúu pɔ́, ɛ́shɔtnɛ ńtɔ́ ŋ́kẅɛ́ɛtɛ Sɛ́ ẅi ɑ ntʉʉ. Jʉ́ kɑ ɡɛnɛ nɛpʉ́ pɔ́p tsɛ́tsɑ́Ꞌ, mbɑ ŋki Mi, tɛ mbɑ yúu tsʉʉ yí ɛ́ tsɛtú. 16A ḿbɔ́ ŋkɑ́mbi, ńnɑ́ túu nɛ́ túu nǔu mɛzuŋ mɛzuŋ, pɔ́p nɛn nǔu mɛsɛ̂ndúŋ mi pɔ́p kɔŋnɛ. 17Lɑ́, Sɛ́ kɛ ḿbɔɔ nɑ́ kɛ́ lɔk mɛfɑꞋ sʉ́Ꞌnɛ mɛ́ ńnyɛt wɔ́p ŋɡɔ ɑ ɡú pɔ́, ḿbɔ́ ɛ́fú tʉ́nɛ́pú ńtúu mbʉŋ mbɔ̌ pɔ́p, ŋ́ɡɛ yúu zɛ́m, pɔ́p lɑk nǔu ŋkɑ́ yi ɛ́ sɛ́ ḿbíkŋɛ. A lɔk ŋ́ɡɛ pɔ́p ɡẅɛɛ yúu pɛjʉ́ tɛ tʉ́m yɔ́p pɔŋ, ḿbɛn ńnɑ́ŋ ńtsɑ́ɑtɛ tsɑ́ɑtɛnɛ.» 18Pɔ́p kɑ zúꞋ yɔ sẅiŋɛ, Pɔ̂l pɔ́p Pɑnɛpɑ́ɑshi lɑ́Ꞌ ńjʉ́ɔ ŋɡʉ̈ɔ́Ꞌ nzʉʉ pɔ́p tɛꞋ, tɛ lɑ́Ꞌ pɔ́tnɛ ńnɑ́ŋ. Lɑ mbɔɔ kii ńnɔŋ pɔꞋ mbi pɔ́p pɔ́.
19Mbɑ pɔ́Ꞌɔ, pɛcɔ́ pɑyúdɑ ɡɔ́ɔ ŋ́ɡɛ ɛ́fú Antíyɔshɛ ẅí ɛ́ mbʉʉ Pisidîi, pɛcɔ́ fú tʉsɔŋ-Ikɔníyum, pɔ́p puu ńtɔ́ shɔt lɑ́Ꞌ tɛ pɔ́p tsʉ́Ꞌ ḿbɔ́ pɔ nǔu yɔp nzʉʉ. Pɔ́p pɛ́ pɔ́p lɔk mɛŋɡɔꞋ ńtɛ́mtɛ Pɔ̂l, tɛ ḿbɔ́ ŋ́kwɑŋɛ pɔ ŋɡɔ ɑ pfú, ɛ́shuŋ wɛ́ ńdɔk ɛ́fú tʉ́sɔŋ, ŋ́ɡʉ ḿmɛꞋ. 20Pɑpɛ́m nu-Yɛ́su tʉ̈ɔ́Ꞌlɛ Pɔ̂l ńníꞋ sɔŋ, ɑ lɔ sɛ́, pɔ́p pɛ́ pɔ́p pɛn nɛ́ tsɛt tʉ́sɔŋ. Njí ɡɛ ŋ́kiɛ, pɔ́p Pɑnɛpɑ́ɑshi ńcẅɛt ńcʉ́ɔ sɛ̂ndúŋ nɛɡʉ nɛ́ tʉ́sɔŋ-Ndɛlbɛ.
Pɔ̂l pɔ́p Pɑnɛpɑ́ɑshi pɛn Antíyɔshɛ wɛ Siliyɑ
21Pɔ̂l pɔ́p Pɑnɛpɑ́ɑshi kúu Ndɛlbɛ, ńcẅi Ŋkʉʉ Sʉ́Ꞌnɛ ẅi Sɛ́ kɑ kɑꞋnɛ, tɛ pʉɔ tɛ ńzɑ́ɑ tsʉ́Ꞌ pʉɔ-Kɛlístɔ. Pɔ́p fú zúꞋu, ḿbɛn ḿbɛn Listɛlɛ pɔ́p Ikɔnyɔm, ŋ́ɡʉ ɡʉnɛ tɛ ŋ́kúu Antíyɔshɛ ẅi ɛ́ mbʉʉ Pisidîi, 22ńnɛn ńtɔ́ɔtɛ tʉ́m-pʉɔ-Kɛlístɔ ŋɡɔ kɔɔ pɔ́p kɑ́ɑ nǔu nɛzɑ́p tʉ́m nǔu Yɛ́su, ḿbɔ́ ńcú mbɔ̌ pɔ́p ŋɡɔ: «Ɛ́ sɛ́ ḿbíkŋɛ ŋɡɔ pɛkŋɛ lɛɛ tsɛt ŋɡʉ̈ɔ́Ꞌ tɛ ńzɑ́ɑ lɑ ńjʉ́ pii-nɛfɔɔ-Sɛ́.» 23Tsɛt mɛtʉ́sɔŋ mɔ, zʉꞋ cúlɛ-pʉɔ-Kɛlístɔ zúꞋu pɔ́p tsɔ́Ꞌ pʉɔ pí pɔ́p ɡʉ ńcẅɛ́ɛ mbi tsɛt yîyɑ́ cúlɛ-pʉɔ-Kɛlístɔ. Tɛ ɛ́ kuꞋ, pɔ́p kɔŋ kɔŋnɛ, ńdʉꞋ yúu pɛjʉ́, ńcɛꞋlɛ Tsɑpʉɔ Sɛ́, ŋ́ɡɔ́ɔ ŋ́kɛ́ fɛ́ɛ wɔ́p mbɔ̌ Tsɑpʉɔ ẅi pɔ́p pɛ́mnɛ nu yɛ́.
24Pɔ̂l pɔ́p Pɑnɛpɑ́ɑshi ɡɛ ɛ́fú nǔu pɑk-ŋɡɔŋ-Pisidi, ńjɛ́Ꞌ ŋ́ɡʉ tɛ ŋ́kúu nǔu yɛ Pɑnfílî, 25ŋ́kúu tʉ́sɔŋ-Pɛljɛ, ɛ́sẅíi nu-Sɛ́. Tɛ ɛ́ kuꞋ pɔ́p cúŋ nɛ́ tʉ́sɔŋ-Atɑlíyɑ, 26ɛ́fú zúꞋu ŋ́kúu tsɛt wɛcɔ́ mɑ́mɑ́ kɑnúꞋ, yi ɛ́ ɡʉ nɛ́ Antíyɔshɛ. Antíyɔshɛ pɔ́ zʉꞋ yí pɛ́ kɑ fúnɛ zúꞋu, fɛ́ɛ wɔ́p mbɔ̌ Sɛ́ ŋɡɔ ɑ cẅɛ́lɛ́ wɔ́p, lɑ́ pɔ́p nɛn ɛ́fɑꞋ fɑꞋ yi ɛ́ mɛnɛ lɑɑ. 27Pɔ́p ɡʉ tɛ ŋ́kúu zúꞋu, ńcúꞋlɛ nɔɔ-pʉɔ-Kɛlístɔ tsʉʉ, ḿbɛ́ɛtɛ mbɑ kʉ̈ɔ́ lɑ́ yi Sɛ́ lɛɛnɛ nǔu pɔ́p ŋ́ɡɛ, ɛ́sẅíi wɔ́p. Nɛzɑ́ɑ mɛnu pɔ́p ḿbɔ́ ńcú pɑ́Ꞌ Sɛ́ kɑ ɡɑ́nɛ shʉ́ mbɔ̌ pʉɔ pí pɔ́p kɑ́ pɔ́ pɑyúdɑ pɔ́ nɛzɑ́p tʉ́m nǔu Yɛ́su. 28Pɔ́p pɛ́ pʉɔ-Kɛlístɔ zɛ ńnɑ́ŋ zúꞋu.
Currently Selected:
ŊwɑꞋnɛ-Gɑŋntúu Yɛ́su Kɛlístɔ 14: JGO
Highlight
Share
Compare
Copy
Want to have your highlights saved across all your devices? Sign up or sign in
CABTAL, 2017
