ŊwɑꞋnɛ-Gɑŋntúu Yɛ́su Kɛlístɔ 10
10
Kɔ̂lnɛ́ɛ fúŋ Pyɛ̂ njɛ́Ꞌ yɛ́
1Wɛcɔ́ ŋu pɔ́ tʉ́sɔŋ-Sɛ́zɑlɛ̂, lík yɛ́ pɔ́ ŋɡɔ Kɔ̂lnɛ́ɛ, ɑ pɔ́ wɛcɔ́ tɑ́Ꞌ tɑ́tndɑ́-pɑlʉ̈ɔ́Ꞌntsɔ-pɑlɔ́mɑ ḿbɔ́ ɛ́sɑ́Ꞌ pʉɔ ŋkʉ. Pɛ́ fúŋ yîyɑ́ nɔɔ ŋɡɔ nɔɔ yɛ́ Itɑ́lîi. 2A pɔ́ ŋu, pɔ́p njẅɛt yɛ́ tsʉʉ ɡɛ mɛkuꞋ Sɛ́, ḿbɔ́ ńzúꞋ ntsu wɛ́. A pɛn ńcẅɛ́lɛ́ pɑyúdɑ pi pɔ́p pɛpúŋ tɛ ɛ́ zɑ́ɑ zɑ́ɑnɛ, ńnɑ́ŋ ńcɛꞋlɛ Sɛ́ ŋkɑ́ tsʉʉ. 3Ɛ́ pɔ́ yɛcɔ́ lɛ́Ꞌ, nǔu yúu nɛm yɛ́tɑ́t mbɔ́tnjí, Sɛ́ ŋíɛꞋ mík mɛ́. A jʉ́ɔ wɛcɔ́ Cʉ̈ɔꞋ-Sɛ́ tɔ́ ńtsɛ́t wɛ́ ndɑ́, ɛ́fúŋ wɛ́ ŋɡɔ: «Kɔ̂lnɛ́ɛ!» 4A pʉꞋ tú yɛ́, ńdíŋɛ Cʉ̈ɔꞋ-Sɛ́, ḿbɔ́ ḿbɔ́k, ńcú mbɔ̌ wɛ́ ŋɡɔ: «Ɛ́ kʉ̈ɔ́ Tsɑpʉɔ?» Cʉ̈ɔꞋ-Sɛ́ tsɔ́Ꞌ mbɔ̌ wɛ́ ŋɡɔ: «Sɛ́ zúꞋ pɑ́Ꞌ ɔ júknɛ ńcɛꞋlɛ wɛ́, ḿbɛn ńjʉ́ɔ mbɑ yúu mi ɔ sɛ́ ŋ́ɡɛ nǔu pɛpúŋ ńdɔk ńcẅɛ́lɛ́ wɔ́p. Sɛ́ kɑ́ likŋɛ wú pɔ́. 5Ŋkɔ̂ɔnɛ lɑ́, túu pʉɔ pɔ́p ɡʉ Jɔp, ńdɔɔ wɛcɔ́ ŋu ẅí pɛ́ fúŋnɛ wɛ́ ŋɡɔ Símɔ̂ŋ. Yɛcɔ́ lík yɛ́ pɛn ḿbɔ́ ŋɡɔ Pyɛ̂. 6A nɑ́ŋ ndɑ́ wɛcɔ́ ŋu. Yɛ́ lík pɛn ḿbɔ́ ŋɡɔ Símɔ̂ŋ. ŊɡɑŋfɑꞋ nǔu mɛŋɡup-mɛyúumɛku, yɛ́ ndɑ́ pɔ́ mbʉʉ ŋki.» 7Cʉ̈ɔꞋ-Sɛ́ cú nu mbɔ̌ wɛ́ tɛ ŋ́ɡʉ, Kɔ̂lnɛ́ɛ tsʉ́Ꞌ ɛ́fúŋ ɡɑŋfɑꞋ pɛ́ pɛ́pɑ́, ŋ́ɡɛ tɑ́Ꞌ ndʉ̈ɔ́Ꞌntsɔ. A pɔ́ ẅi pɔ́pmɛ́ zɛɛ ńtswɛ́. A pɛn ḿbɔ́ ŋu ŋ́ɡɛ yɛ́ mɛkuꞋ-Sɛ́. 8Kɔ̂lnɛ́ɛ fúŋ wɔ́p pɔ́Ꞌɔ, ḿbɛ́ɛtɛ mbɑ kʉ̈ɔ́ lɑ́ yi ɛ́ lɛɛnɛ, ɛ́sẅíi wɔ́p, lɑ ńtúu wɔ́p Jɔp.
Sɛ́ ŋíɛꞋ mík-Pyɛ̂, ɑ jʉ́ɔ yɛcɔ́ nu
9Njí ɡɛ ŋ́kiɛ, pɔ́p pɛ́t ḿbɔ́ pɔ sɛ̂ndúŋ, ɛ́ pɔ́ yúu ntʉʉ nɛm, tɛ mbɔ pɔ́p ɡʉ tɛ ńtsʉ́Ꞌ nɛkúu tʉ́sɔŋ-Jɔp. Ɛ́ ɡɔ́ ḿbɔ́, mbɔ Pyɛ̂ kɔ́Ꞌ nǔu zʉꞋ yí ɛ́ ntsɔꞋndɑ́, ḿbɔ́ pɔ pɑ́Ꞌ tɛtɑ́ɑ lɑ́ nɛcɛꞋlɛ Sɛ́. 10Njí zɛ nɛzɑ́ŋ wɛ́, ɑ tsɑ́ɑ nɛjʉ́ yúu. Pɛ́ ɡɔ́ ḿbɔ́ ńniitɛ yúu mi ɑ ɡʉ ńjʉ́, Sɛ́ níɛꞋ mík mɛ́ ɑ jʉ́ɔ yɛcɔ́ yúu mi ɛ́ fúnɛ mbɔ̌ Sɛ́, 11ńjʉ́ɔ ntsu-tʉ́nɛ́pú tsɔ́Ꞌnɛ ńtʉ́ʉ, yɛcɔ́ yúu fú zúꞋu ńcúŋ, ḿbɔ́ ńtɔ́ nɛ́ sɛ́, ḿbɔ́ pɑ́Ꞌ mɑ́mɑ́ pɔ́-ndẅí yi pɛ́ ɡẅɛɛnɛ nǔu mɛlẅí mɛ́nɛ́kwɑ lɑ́. 12Ntɛ́ nɛ́ ntɛ́ mɛyúumɛku pɔ́ tsɛtú. Mɛnɑɑ mɛku mɛ́nɛ́kwɑ, mɛyúumɛku mi pɔ́p shuŋnɛ nɛpɛm nɔ́p pɔ sɛ́, ŋ́ɡɛ pɛshʉ́ŋ.#10.12 ŊwɑꞋnɛ-Lɛvitík kɛm 11, cú mɛyúu mɛku mi Sɛ́ kɑ kwɛ́tnɛ mbɑp yɔp, ńcú pi ḿbɔ́ pɛ́ kwɛ́t. Nɛzɑ́ɑ mɛyúu mɛku mi Pyɛ̂ kɑ jʉ́ɔnɛ m̄bɔ́ mi Sɛ́ kɑ kwɛ́tnɛ mbɑp yɔp, pɔ́Ꞌɔ, ḿbɔ́ ŋu-Yúdɑ pɔɔ zẅíꞋ. Mɛnɑɑ mi mbɔ pɛ́ kwɛ́t, mi ɛ́ ḿbɔ́nɛ tsɛt yɔ mɑ́mɑ́ pɔ́-ndẅí ɛ́ kɑ ɡɔ́ ḿbɔ́, mbɔ ɛ́ tsʉ́Ꞌ yúu-Sɛ́ tɛ mbɔ pɛ́ pɔɔ kwɛ́t, mbíꞌŋɡɔ pɛ́ tɛmtɛ wɔ́p mi zẅikŋɛ-Sɛ́ pɔ́p tsɛt tɑ́Ꞌ yúu. 13Ŋɡi ŋu cú mbɔ̌ wɛ́ ŋɡɔ: «Pyɛ̂, lɔ sɛ́, ńjẅí ŋ́kwɛ́t.» 14Pyɛ̂ pʉ̈ɔt ŋɡɔ: «Ŋɡɑŋ mbɑ̌ɑ Tsɑpʉɔ. Mɔ ŋkɑɑ mɔ́ zɛɛ ńjʉ́ yúu pʉ́ʉnɛ pɔ́, ḿbɛn ŋ́kɛ́ ḿbɔɔ kwɛ́t yúu-lɔ́Ꞌ pɔ́.» 15Pyɛ̂ pɛn ńzúꞋ ŋɡi ɛ̂yɑ́ nǔu mbɑ́ɑtɛ yɛ́pɑ́, ɛ́ cú mbɔ̌ wɛ́ ŋɡɔ: «Yúu lɑɑ ḿbɔ́ tɛ Sɛ́ cẅɛɛtɛ lɔ́Ꞌ nǔu, kɔɔ pɛn ńji nji nǔu.» 16A kɛ ńzúꞋ pɔ pɔ́Ꞌɔ, tɛ ɛ́ pɔ́ ŋkɑ́ yɛ́tɑ́t. Pɛ́ ɡɔ́ɔ ńdɔk yîyɑ́ yúu ḿbɛn nɛ́ tʉ́nɛ́pú.
17Pyɛ̂ tsʉ́Ꞌ ŋ́kwɑŋɛ ɛ́ tsɑ wɛ́. A pɔ́ ḿbíkŋɛ ŋɡɔ: «Yúu mi ɛ fúnɛ nɛjʉ́ɔ, ɛ́ pɑ́Ꞌɑ ńdɔk ńcú ŋɡɔ kʉ̈ɔ́?» Ɛ́ ɡɔ́ ḿbɔ́, mbɔ pʉɔ pinɛ Kɔ̂lnɛ́ɛ lɑ́Ꞌnɛ ńtúu wɔ́p, pɔ́ ŋ́kɑ́t ḿbíkŋɛ ŋɡɔ: «ndɑ́-Simɔ̂ŋ ɡɔ́?» Lɑ́ ḿbɔ́ ŋkɑ́ ɛ̂yɑ́ ńtsʉ́Ꞌ ḿbɔ́ pɔ ntsundɑ́, 18ɛ́fúŋ ḿbíkŋɛ ŋɡɔ: «Símɔ̂ŋ ẅi pɛ́ pɛnnɛ ɛ́fúŋ wɛ́ ŋɡɔ Pyɛ̂ lɑ́ tswɛ́ zɑꞋnɛ?» 19Ɛ́ ɡɔ́ ḿbɔ́ Pyɛ̂ kɛ ḿbɛ́t ŋ́kwɑŋɛ pɔ nu yí ɑ jʉ́ɔnɛ. Zẅikŋɛ-Sɛ́ sẅíi wɛ́ ŋɡɔ: «Pʉɔ pɛtɑ́t zɑꞋnɛ ḿbɔ́ ńdɔɔ wú. 20Lɔ sɛ́, ńcúŋ pʉʉ pɔ́p ɡʉ. Kɔɔ zɔŋ mbíꞌŋɡɔ mɔ túunɛ wɔ́p.» 21Pyɛ̂ ńcúŋ ŋ́kẅɛ́ɛtɛ pʉɔ ɛ̂pɑ́, ńcú mbɔ̌ pɔ́p ŋɡɔ: «Pʉʉ sɛ́ ńdɔɔ ŋu! A mɔ. Pʉʉ tɔ́ mɛlɑ́Ꞌ kʉ̈ɔ́?» 22Pʉɔ ɛ̂pɑ́ cú mbɔ̌ wɛ́ ŋɡɔ: «Kɔ̂lnɛ́ɛ túunɛ wɛk, ḿbɔ́ wɛcɔ́ tɑ́tndɑ́ntsɔ-Pɑlɔ́mɑ, ḿbɔ́ ɛ́sɑ́Ꞌ pʉɔ ŋkʉ. A ŋu ndʉ́ŋndʉŋ, ḿbɔ́k Sɛ́. Pɑyúdɑ pɛtsʉʉ kẅíi lík yɛ́ pɔ sʉ́Ꞌnɛ. Tɑ́Ꞌ Cʉ̈ɔꞋ-Sɛ́ kɑ tɔ́ ńcú mbɔ̌ wɛ́ ŋɡɔ: “Túu pɛ́ ɡʉ ɛ́fúŋ Pyɛ̂, ɑ tɔ́ ndɑ́ wu, ɔ zẅíꞋlɛ nu yí ɑ ɡʉ ɛ́sẅíi wú.”» 23Pyɛ̂ ɡɛ pɔ́p kúu ndɑ́, pɔ́p pɛpɔ́p lɛ́.
Pyɛ̂ ɡʉ ndɑ́-Kɔ̂lnɛ́ɛ
Njí ɡɛ ŋ́kiɛ, Pyɛ̂ pɔ́p pʉɔ pɑ́ pɛtɑ́t cʉ́ɔ sɛ̂ndúŋ. Pɛcɔ́ ntɑ́Ꞌpʉɔ tsɛtsɛt pɔ́ɔpɛ́mɑ́ pɛ́ tʉ́sɔŋ-Jɔp ɡʉ ńcɑklɛ wɔ́p. 24Yîyɑ́ lɛ́Ꞌ lɛɛ, pɔ́p ɡɔ́ ŋ́kúu tʉ́sɔŋ-Sɛ́zɑlɛ̂, mbɔ Kɔ̂lnɛ́ɛ ńdɑ́Ꞌmɔ́ ńcúꞋlɛ njẅɛtndɑ́ yɛ́ tɛ mbɑ pɛsúu nɛpɛ pɛ́ ńdɔk ńzẅíꞋlɛ́ Pyɛ̂. 25Pyɛ̂ tɔ́ tɛ ḿbɔ́ ŋ́kúu ndɑ́, Kɔ̂lnɛ́ɛ tɔ́ ńzɑ́Ꞌ wɛ́, ńnɔɔ mɛku yɛ́, ŋ́ɡɛ mɛkuꞋ mɛ́. 26Lɑ́ Pyɛ̂ pʉꞋ wɛ́, ńcú ŋɡɔ: «Lɔ sɛ́, mɔ yɑ́ɑ pɔ ŋumɛsɔŋ pɑ́Ꞌ ɡu.» 27Ńcú pɔ́Ꞌɔ, pɔ́pmɛ́ ɡɔ́ ḿbɔ́ ńnɛn ŋ́ɡʉ nɛ́ ndɑ́, ńnɛn ḿbɔ́ ɛ́sẅíŋɛ. Ńtɔ́k ŋ́kúu ndɑ́, Pyɛ̂ jʉ́ɔ mbɔ pʉɔ cúꞋlɛ ndɑ́ tɛ ńzɑ́ɑ zɑ́ɑnɛ. 28A cú mbɔ̌ pɔ́p ŋɡɔ: «Pʉʉ sɛ́ ńjí yʉ́ʉ ŋɡɔ nɛpʉ́ʉ-pɑyúdɑ tɔꞋ ŋu wɔp nɛpɔ́ súu-ŋu ẅi ɑ kɑ́ pɔ́ ŋu-Yúdɑ pɔ́. Tɛ ḿbʉ́ʉ mbɑ wɛ́ nɛkúu ndɑ́ yɛ́. Lɑ́, Sɛ́ kɑ nyɛt wɑ́ɑ nɛ́ yɛcɔ́ yúu. A kɑ nyɛt wɑ́ɑ ŋɡɔ ŋ kɑ́ ɡẅɛɛ nɛkʉ́ʉnɛ wɛcɔ́ ŋu ŋɡɔ ɑ kɑ́ pɔ́ ŋu-Sɛ́ pɔ́ ńdɔk ńcú ŋɡɔ ɑ ɡẅɛɛ lɔ́Ꞌ mbi Sɛ́ pɔ́. 29Ɛ́ yúu mi ɛ́ ɡɛnɛ, ŋ ɡɔ́ɔ ńdɔ sɛ́ kɛ́ zɔŋ, pɑ́Ꞌ pʉʉ túunɛ ɛ́fúŋ wɑ́ɑ. Ŋkɔ̂ɔnɛ lɑ́, pʉʉ ɡɛ n jí yúu mi pʉʉ fúŋnɛ wɑ́ɑ zɑꞋnɛ ntɛ́ yɛ́tɛ́.»
30Kɔ̂lnɛ́ɛ tsɔ́Ꞌ mbɔ̌ Pyɛ̂ ŋɡɔ: «Ɛ́ ŋkɔ̂ɔnɛ ḿbɔ́ lɛ́Ꞌ pɛ́nɛ́kwɑ, pɑ́Ꞌ ɛ́ ḿbɔ́nɛ nǔu nɛm yɛ́tɑ́t mbɔ́tnjí pɑ́Ꞌ ŋkɔ̂ɔnɛ lɑɑnɛ, m bɔ́ ndɑ́ mɔ ḿbɔ́ ńcɛꞋlɛ Sɛ́, ŋ́ɡɔ ńjʉ́ɔ wɛcɔ́ ŋu vukŋɛ vukŋɛnɛ ńcẅɛt ńtʉ́ʉ mbi mɔ, ḿmɑꞋ mɛndẅí ɛ́ pɔ́ ŋ́ŋwɑŋɛ ŋwɑŋɛ́nɛ, 31ńcú mbɔ̌ mɔ ŋɡɔ: Kɔ̂lnɛ́ɛ, Sɛ́ zúꞋ ńcɛꞋlɛ yú. A kɑ́ likŋɛ yúu mi ɔ ɡɑ́nɛ mbɔ̌ pɛpúŋ ńdɔk ńcẅɛ́lɛ́ wɔ́p lɑ́ pɔ́. 32Túu pʉɔ, pɔ́p ɡʉ Jɔp, ŋ́ɡɛ Símɔ̂ŋ ẅi pɛ́ pɛnnɛ ɛ́fúŋ wɛ́ ŋɡɔ Pyɛ̂ tɔ́. A tswɛ́ ndɑ́-Simɔ̂ŋ ẅí yɛ́ fɑꞋ nɛniitɛ mɛŋɡup-mɛyúumɛku, ndɑ́ ɛ̂yɑ́ pɔ́ mbʉʉ ŋki kɛ́ ndẅiklɛ. 33A kɑ cú pɔ́Ꞌɔ, ŋ ɡɔ́ɔ ńtúu pʉɔ nɛlɔɔ wú. Ɔ ɡɛ sʉ́Ꞌnɛ pɑ́Ꞌ ɔ tɔ́nɛ lɑ́. Ɛ́ ŋkɔ̂ɔnɛ pɑ́Ꞌɑ, pɛkŋɛ pɛtsʉʉ tʉ́ʉ mbi Sɛ́. Pɛk tʉ́ʉ pɑ́Ꞌɑ, mbɔ pɛk niitɛ mbʉʉ yɛk nɛzúꞋ nu yí Tsɑpʉɔ Sɛ́ níꞋnɛ mbɔ̌ ɡu ŋɡɔ ɔ sẅíi wɛk.»
Pyɛ̂ sɛ́ ńcú nu ndɑ́-Kɔ̂lnɛ́ɛ
34Pyɛ̂ ɡɔ́ɔ ŋ́kɛ́ ńcú ŋɡɔ: «Mɔ ŋkɔ̂ɔnɛ pɑ́Ꞌɑ, mbɔ ŋ ɡɔ́ɔ mɔ ŋ́kɛ́ ńjʉ́ɔ kwɑꞋ nɛ́nẅín, ŋɡɔ Sɛ́ kɑ́ tíitɛ pʉɔmɛsɔŋ pɔ́.» 35Ŋu lɑɑ ŋ́ɡɛ mɛkuꞋ-Sɛ́, ḿbɛn ŋ́ɡɛ yúu mi ɛ́ ndʉ́ŋndʉŋ mbi Sɛ́, ḿbɔ́ pɔ ŋu yɛ́tɛ́ ŋɡɔŋ ɔɔ, mbɔ nu yɛ́ ɡʉ ḿbɔŋ Sɛ́ pɔŋnɛ. 36Sɛ́ kɑ túu sẅiŋɛ yɛ́ mbɔ̌ pɔ́ɔ-Íslɑyɛ̂l. Ɛ́ pɔ́ Ŋkʉʉ Sʉ́Ꞌnɛ, ńcú nu nǔu mbɔ́tnɛ yí pɛ́ lɛɛnɛ nǔu Yɛ́su Kɛlístɔ ẅí ɑ Tsɑpʉɔ-pʉɔ tsʉʉ ŋ́ɡẅɛɛ. 37Wɔ Ŋkʉʉ ẅîwɑ́ kɑ pɑ́ɑtɛ́nɛ nǔu ẅi Jɑ̂ŋ kɑ ɡɔ́ nuꞋ pʉɔ ŋki, ḿbɔ́ ɛ́sɑ́Ꞌ. Pʉʉ sɛ́ ńjí ŋɡɔ yɔ nu kɑ zɛ Ŋɡɑlilɛɛ, ḿbɛn ŋ́ɡʉ ɛ́sɑt zʉꞋ tsɛt Judɛ̂ tsʉʉ. 38Pʉʉ pɛn ḿbɔ́ ńjí ŋɡɔ Sɛ́ kɑ ɡɑ́ mɛtʉʉ-Zẅikŋɛ Lɛ́ɛnɛ́nɛ mbɔ̌ Yɛ́su mɔ́ɔ-Nɑ̌zɑlɛt ńdɔk pɔ́Ꞌɔ, ńcɔꞋ wɛ́ ḿbɛn ḿbɔ́ ńtʉ̈ɔ́Ꞌlɛ wɛ́. A ɡʉ zʉꞋ tsʉʉ, ḿbɔ́ ŋ́ɡɛ mɛnu sʉ́Ꞌnɛ, ḿbɔ́ ńcẅɛ́ɛ pʉɔ tsʉʉ pí pɔ́p ḿbɔ́nɛ ɡɑŋtsɑ́ŋ nǔu mbɔ́-Sɑ́ttɑ mbíꞋŋɡɔ Sɛ́ kɑ pɔ́ nɛ́ jʉ́. 39Pɛk wɔ tʉ́ʉ pɑꞋnɛ mbɔ pɛk kɑ lɔk mík mɛ́k ńjʉ́ɔ mbɑ kʉ̈ɔ́ lɑ́ yi ɑ kɑ ɡɛnɛ tsɛt lɑ́Ꞌ-pɑyúdɑ mbɑ Yɛlúsɑlɛm. Pɛ́ kɑ ɡɔ́ ńjẅí wɛ́, ŋ́kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ. 40Lɑ́, ɛ́ kɑ pɔ́ nǔu mbɑ́ɑtɛ lɛ́Ꞌ pɛtɑ́t, Sɛ́ zẅíimɛ wɛ́ nǔu nɛvú, ŋ́ɡɛ ɑ cẅɛt ńnyɛt mbʉʉ yɛ. 41A ŋkɑɑ nyɛt mbɔ̌ lɑ́Ꞌ tsʉʉ pɔ́, ɑ kɑ nyɛt pɔ mbɔ̌ pɛk pɑjʉ́njʉ́ɔ pi Sɛ́ kɑ piitɛ́nɛ ńtsɔ́Ꞌ. A kɑ zẅíimɛ nǔu nɛvú pɔ́Ꞌɔ, pɛk pɛ́pɔ́p jʉ́ yúu ḿbɛn ńnɔ́. 42A kɑ pɛn ńtúu wɛ́k ŋɡɔ pɛk ɡʉ ɛ́sɑ́Ꞌ Ŋkʉʉ Sʉ́Ꞌnɛ ẅi Sɛ́ kɑ kɑꞋnɛ mbɔ̌ lɑ́Ꞌ, ŋ́ɡɛ pɔ́p jí ŋɡɔ jʉ́ Yɛ́su kwɑꞋ ŋu ẅí Sɛ́ kɑ tsɔ́Ꞌnɛ ŋɡɔ ɑ zɑ́Ꞌ ntsɑŋ-pʉɔ ntʉʉ pɔ́p pɛpfú sɛ́. 43Jʉ́ zɛɛnɛ ḿbɔ́ ŋu ẅí pɛŋɡɛ́mndʉ̈ɔ́Ꞌ-Sɛ́ pɛtsʉʉ kɑ pɔ́ ńdɛꞋlɛ, pɑ́Ꞌ pɔ́p kɑ pɔ́ ńcú ŋɡɔ mbɑ wɔ̌ lɑ́ ẅi ɑ zɑ́pnɛ tʉ́m yɛ́ nǔu Yɛ́su, Sɛ́ ɡʉ ńdikŋɛ mɛnu kɛpɔŋ-ŋɡɑŋ ŋ́ɡɑ́ mbɔ̌ wɛ́, ntɛ́ wɛ́.
Sɛ́ túu Zẅikŋɛ Lɛ́ɛnɛ́nɛ, ŋ́ɡɑ́ mbɔ̌ pʉɔ pí pɔ́p kɑ́ pɔ́ pɑyúdɑ pɔ́
44Pyɛ̂ pɛ́t ńcú nu cúnɛ, Zẅikŋɛ Lɛ́ɛnɛ́nɛ ńcúŋ, ŋ́kúu nǔu ŋɡɔŋ pʉɔ pɛtsʉʉ pi pɔ́p sɛ́ ńzẅíꞋlɛ nu yí ɑ sɛ́ ńcú. 45Yɛ́su pɔ́p pɑpɛ́m pi pɔ́p lɑ́Ꞌnɛ ńtɔ́ ńcɑklɛ Pyɛ̂, pɔ́p m̄bɔ́ pɑyúdɑ. Pɔ́p jʉ́ɔ yɔ nu ɛ́ kʉꞋnɛ wɔ́p tɛꞋ, pɑ́Ꞌ Sɛ́ ɡɑ́nɛ Zẅikŋɛ Lɛ́ɛnɛ́nɛ mbɔ̌ pʉɔ pí pɔ́p kɑ́ pɔ́ pɑyúdɑ pɔ́ pɔ pɑ́Ꞌ ɑ kɑ pɔ́ ŋ́ɡɑ́ mbɔ̌ pɔ́p ɡúu! 46Pɔ́p zɛɛ ḿbɛn ḿbɔ́ ńzúꞋ pɔ́p pɔ́ ńdɔk sẅiŋɛ pɔ́p ŋkɑɑ mɔ́ zíꞋ ŋ́ɡɑ́ nɛɡúꞋ mbɔ̌ Sɛ́. Pyɛ̂ jʉ́ɔ pɔ́Ꞌɔ, ńtsʉ́Ꞌ ńcú pɔ ŋɡɔ: 47«Ŋkɔ̂ɔnɛ yi pɔ́p ńdɑ́Ꞌmɔ́ ńcẅɛ́ɛ Zẅikŋɛ Lɛ́ɛnɛ́nɛ pɑ́Ꞌ pɛk lɑ́, ɛ́ ńdɑɑ ḿbɔ́ ŋu pɛn ńtɔꞋ nɛnuꞋ wɔ́p ŋki kɛ kʉ̈ɔ́?» 48Ńcú pɔ́Ꞌɔ, ńcú ŋɡɔ pɛ́ nuꞋ wɔ́p ŋki nǔu lík-Yɛ́su Kɛlístɔ. Ŋ́ɡɛ pɔ́Ꞌɔ, Pɔ́p pɛ́tsʉʉ ɡɛ ḿbíkŋɛ wɛ́ ŋɡɔ pɔ́p pɛpɔ́p pɛn ńnɑ́Ꞌ ńnɑ́ŋ mɛcɔ́ mbɔ mɛlɛ́Ꞌ.
Currently Selected:
ŊwɑꞋnɛ-Gɑŋntúu Yɛ́su Kɛlístɔ 10: JGO
Highlight
Share
Compare
Copy
Want to have your highlights saved across all your devices? Sign up or sign in
CABTAL, 2017
