2 Kɔlɛ̂ŋtɛ Mɛtú-nu
Mɛtú-nu
Yɔ yɛcɔ́ ŋwɑꞋnɛ yi Pɔ̂l kɑ pɛnnɛ ŋ́ɡɑ́ mbɔ̌ pʉɔ-Kɔlɛ̂ŋntɛ. A kɑ cú tsɛt nduŋmbi ŋwɑꞋnɛ yɛ́ ŋɡɔ ɑ kɑ pɔ́ ńtsɑ́ɑ nɛɡʉ ńjʉ́ɔ wɔ́p. A kɑ pɛn ńcú ŋɡɔ pɔ́p mɑꞋ ntsup, pɛ́ túu Yɛlúsɑlɛm mbɔ̌ pɑpɛ́m Sɛ́. A kɑ cú ŋɡɔ kwɑꞋ jʉ́ ŋ́ɡʉnɛ ńcẅɛ́ɛ yîyɑ́ ntsup. Lɑ́ jʉ́ ŋ́kɑɑnɛ ɡʉ ńcẅɛ́ɛ pɔ́. Yɔ pɑ́Ꞌ ɛ́ kɑ lɛɛnɛ. Ɛ́ kɑ ɡɔ́ ḿbɔ́ mbɔ Timɔtɛ̂ɛ zɑ́p nɛɡʉ Yɛlúsɑlɛm. Ŋ́kúu sɛ̂ndúŋ ńzúꞋ pɑ́Ꞌ mɑt-pʉɔ-Kɛlístɔ zúꞋu ḿbɛ́k pɔ́Ꞌɔ. A kɑ zúꞋ ŋɡɔ pɛcɔ́ pɑyúdɑ kɑ ɡʉ Yɛlúsɑlɛm ńcú nu ndɛꞋ nǔu yinɛ Pɔ̂l kɑ cúnɛ. Ŋɡɔ pɔ́p kɑ cú zúꞋu ŋɡɔ Pɔ̂l kɑ́ pɔ́ kwɑꞋ tɑ́Ꞌ ŋɡɑŋtúu-Kɛlístɔ pɔ́. Timɔtɛ̂ɛ zúꞋ pɔ́Ꞌɔ ḿbɛn nzʉʉ ńcú mbɔ̌ Pɔ̂l. Ɛ́ lɛɛ pɔ́Ꞌɔ, Pɔ̂l túu ŋwɑꞋnɛ ŋ́ɡɑ́ mbɔ̌ pɔ́p ńdɔk ńcú yúu mi ɛ́ ɡɛnɛ lɑ kwɑꞋ jʉ́ pɔɔnɛ tɔ́ ńjʉ́ɔ wɔ́p pɔ́. Ḿbɛn ńcú ŋɡɔ jʉ́ Pɔ̂l yɛ́ ŋɡɑŋtúu ɡúu, lɑ́ ŋ́ɡẅɛɛ yɛ́ ntɛ́ nɛzíꞋ pʉɔ. Yɛ́tɛ ɡɛnɛ lɑ pɛ́ pɑɑ wɛ́. Ḿbɛn ńcú ŋɡɔ pɔ́p kɛ ḿbɔ́ ɛ́sɑ́Ꞌ pɔ tʉʉ nɛcẅɛ́ɛ ntsup lɔk ńcẅɛ́lɛ́ pɑpɛ́m Sɛ́ pi pɔ́p Yɛlúsɑlɛm. Ḿbɛn ńcú ŋɡɔ ɑ ŋ́ɡʉ Yɛlúsɑlɛm ńcú nu mbɔ̌ pʉɔ pi pɔ́p kɑ́ kɛ́ ḿmɛꞋ nu kɛpɔŋ pɔ́. Pɔ̂l kɑ ɡɔ́ ńtsuŋ ńcú ŋɡɔ ɑ kwɑꞋ ŋɡɑŋtúu mbíꞋ ŋɡɔ ɑ kɑ pɔ́ ńdɔɔ nɛɡɛ pʉɔ jí Ŋkʉʉ Sʉ́Ꞌnɛ, ḿbɛn ńjí ŋɡɔ Yɛ́su Kɛlístɔ mɔ́ɔ-Sɛ́. Ɛ́ tsɛt ŋwɑꞋnɛ yɔ Pɔ̂l:
1. Pɔ̂l cɛꞋlɛ wɔ́p, ŋ́ɡɑ́ pɑ́Ꞌlɑ́ mbɔ̌ Sɛ́ (1.1-11)
2. FɑꞋ-ŋɡɑŋtúu tsɛtsɛt pɑpɛ́m Sɛ́ (1.12–2.17)
3. Nɛkɔŋ ŋu pɑ́Ꞌ Kɛlístɔ kɑ kɔŋnɛ wɛ́k pɔ́Ꞌɔ (3.1–7.16)
4. Nɛcẅɛ́lɛ pɛpúŋ (8.1–9.15)
5. Pɔ̂l tsuŋ ńcú ŋɡɔ ɑ kwɑꞋ ŋɡɑŋtúu (10.1–13.10)
6. Ndẅiknzʉʉ cɛꞋlɛ. (13.11-13)
Currently Selected:
2 Kɔlɛ̂ŋtɛ Mɛtú-nu: JGO
Highlight
Copy
Compare
Share
Want to have your highlights saved across all your devices? Sign up or sign in
CABTAL, 2017