2 Kɔlɛ̂ŋtɛ 9
9
Sɛ́ níꞋ mbɔ́tnɛ nǔu ŋu ẅí ɑ lɔknɛ tʉ́m sʉ́Ꞌnɛ ŋ́ɡɑ́ yúu
1Ɛ́ ɡʉ nǔu yúu lɔk ńcẅɛ́lɛ pɔ́ɔpɛ́mɑ́ pi pɔ́p Yɛlúsɑlɛm, mbɔ n jʉ́ɔ ŋɡɔ ɛ́ kɑ́ pɔ́ ḿbíkŋɛ ŋɡɔ m bɛn ḿbɔ́ ŋ́ŋwɑꞋnɛ yúu nǔu ŋwɑꞋnɛ́nɛ pɔ́. 2MbíꞋŋɡɔ mɔ sɛ́ ńjí ŋɡɔ pʉʉ ɡẅɛɛ pɔŋtʉ́m nǔu yɔ nu, lɑ́ mbɔ ŋ kɑ lɔk nu yʉ́ʉ ŋ́kɑꞋmɛ mbi pʉɔ-Kɛlístɔ pi pɔ́p Mɑsɛndwɑn. Ŋ kɑ sẅíi wɔ́p ŋɡɔ pʉɔ-Kɛlístɔ pi pɔ́p nǔu pɑk-ŋɡɔŋ-Akɑ̂y, tʉ́ʉ nɛɡɑ́ yúu tɛ ɛ́fú ŋɡuꞋlɑɑ. Wʉʉ nɛzɑŋɛ mbʉʉ ŋ́ɡɑ́ yúu kɑ ɡɛ nɛzɑ́ɑ pʉɔ nǔu pɔ́p ɡẅɛɛ pɔŋtʉ́m nɛɡɑ́ yɔ́p yúu. 3Lɑ́, n túu pɔ́ɔpɛ́mɑ́ pɑꞋnɛ, nɛpɔ́ yi luk yi pɛk kɑ lɔknɛ nu yʉ́ʉ ŋ́kɑꞋmɛ nǔu yɔ nu kɛ́ lɛɛ fɛ̌ɛ pɔ́. Mɔ sɛ́ ńtsɑ́ɑ ŋɡɔ pʉʉ tsuŋ ńtʉ́ʉ nɛɡɑ́ pɑ́Ꞌ ŋ kɑ sẅíinɛ pʉɔ, 4mbíꞋŋɡɔ pɛkŋɛ pɛcɔ́ pʉɔ-Mɑsɛndwɑn lɑɑ ńtɔ́, ŋ́kɛ́ mbɔɔ jʉ́ɔ pʉʉ tʉ́ʉ nɛɡɑ́ yúu pɔ́, mbɔ nɛpɔ́ ẅi pɛk kɑ lɛꞋlɛ́nɛ yúu mi pʉʉ tʉ́ʉ nɛɡɛ, tɛ pɛk pɔɔ ḿmʉꞌlɛ, ɡʉ shɔtnɛ ŋ́ɡɛ sʉ́ʉ kɔ́ wɛ́k. Yʉ́ʉ pɛn ńdɛɛ yɛ́k. 5Yúu mi ɛ́ kɑ ɡɛnɛ n jʉ́ɔ ŋɡɔ ɛ́ sɛ́ ḿbíkŋɛ ŋɡɔ ḿbúꞋ mbɔ́ mbɔ̌ pɔ́ɔpɛ́mɑ́ pɑ́ɑ, pɔ́p piitɛ lɑ́Ꞌ pʉʉ lɑ́ pɛk ńtɑ́ɑ ńtɔ́, ḿbiitɛ pɔ́Ꞌɔ, nɛcúꞋlɛ yʉ́ʉ yúu mi pʉʉ kɑ lɑ́Ꞌnɛ ŋ́kɑꞋ nɛlɔk tʉ́m sʉ́Ꞌnɛ ŋ́ɡɑ́, ńjí ŋɡɔ ŋ ɡʉ ŋ́ɡɔ́ ńtɔ́, ɛ́ pɔ́ tɑ́Ꞌ zʉꞋ. Pɛ́ jʉ́ɔ ŋɡɔ ɛ́ kwɑꞋ yúu pɔŋtʉ́m, tɛ ɛ́ kɑ́ pɔ́ yúu mi pʉʉ ɡɑ́nɛ pɛ́ pɔ́ ɛ́fyɛ́t wʉ́ʉ fyɛ́tnɛ pɔ́.
6Pʉʉ jí ŋɡɔ ŋu lɑɑ ḿbi yúu ɛ́ pɔɔ zɑ́ɑ, mbɔ ɑ ɡʉ ńdɑ́Ꞌ ŋkɑ́ nɛlɑk yúu, ɑ lɑk ɛ́ pɔɔ zɑ́ɑ, ḿbi ɛ́ zɑ́ɑ, mbɔ ɛ́ ɡʉ ńdɑ́Ꞌ ŋkɑ́ nɛlɑk yúu, ɑ lɑk ɛ́ zɑ́ɑ. 7Pɔ́Ꞌɔ lɑ́, ɛ́ pɔŋ ŋɡɔ mbɑ wɔ̌ lɑ́ ɡɑ́ yúu pɔ pɑ́Ꞌ ɑ ŋ́kwɑŋɛnɛ tsɛt tʉ́m yɛ́, ŋ́ɡɑ́ kɛ́ ńzɑ́ŋ lɔ́ŋ, kɛ́ pɔ́ yi pɛ́ fyɛ́t wɛ́ fyɛ́tnɛ, mbíꞋŋɡɔ Sɛ́ kɔŋ ŋu ẅí ɑ lɔk tsɑ́ɑtɛ ŋ́ɡɑ́ yúu. 8Sɛ́ pɛn ŋ́kuꞋ pɑ́Ꞌ ḿbɔ́ ɑ ɡɑ́ yúu sʉ́Ꞌnɛ mɛntɛ́ mɛntɛ́ mbɔ̌ pʉʉ, nɛpɔ́ yi pʉʉ ɡʉ ḿbɔ́ ŋkɑ́ tsʉʉ ŋ́ɡẅɛɛ yúu mi ɛ́ sɛ́ ḿbíkŋɛ mbɔ̌ pʉʉ, tɛ ḿbɛn ŋ́ɡẅɛɛ mbɑ mi ḿbɔ́ pʉʉ lɔk ɛ́fɑꞋ mɛfɑꞋ sʉ́Ꞌnɛ nji nji.
9Ɛ́ pɔ́ pɑ́Ꞌ pɛ́ kɑ ŋwɑꞋnɛnɛ tsɛt ŋwɑꞋnɛ-Sɛ́ ŋɡɔ:
Ŋɡɑpyúu sʉ́Ꞌnɛ mbɔ̌ pɛpúŋ,
Pɔŋtʉ́m yɛ́ lɔ́ɔ ḿmɛ pɔ́.
10Sɛ́ ẅí ɑ ɡɑ́nɛ mbiyúu mbɔ̌ ŋu ẅí ɑ pinɛ, ŋ́ɡɑ́ yúu pɛjʉ́ ɑ ŋ́kwɛ́t, ɑ ɡʉ ŋ́ɡɛ ŋ́kɛ́ ḿbɔ́ kẅiꞋ yúu pʉ́ʉ kẅiꞋnɛ, ɛ́ ɡɛ sɑ́ɑ, nɛpɔ́ yi pʉʉ ɡʉ ńdɔk pɔŋtʉ́m ŋ́kẅiꞋ ŋ́ɡɑ́ yúu mbɔ̌ pʉɔ. 11Ɛ́ ɡʉ ńdɛɛ pɔ́Ꞌɔ, pʉʉ ɡẅɛɛ yúu nɛlɔk ɛ́fɑꞋ mɛfɑꞋ-pɔŋtʉ́m ntɛ́ nɛ́ ntɛ́, ɛ́ lɛɛ pɔ́Ꞌɔ, pʉɔ tɛ ńzɑ́ɑ ɡɑ́ pɑ́Ꞌlɑ́ mbɔ̌ Sɛ́ tɛꞋ, nǔu nu yúu mi pʉʉ ɡɑ́nɛ pɛk ɡɑptɛ mbɔ̌ pɔ́p. 12Pʉʉ zɛɛ ńjí ŋɡɔ yɔ ntsup yi pʉʉ mɑꞋnɛ ɛ́ kɛ́ ɡɛ pʉɔ-Kɛlístɔ pi pɔ́p Yɛlúsɑlɛm pɔ́p ɡẅɛɛ yúu mi ɛ́ jɑ́knɛ mbɔ̌ pɔ́p ndɑꞋ pɔ́, ɛ́ ɡʉ ḿbɛn ŋ́ɡɛ pʉɔ kẅiꞋ ŋ́ɡɑ́ pɑ́Ꞌlɑ́ mbɔ̌ Sɛ́ tɛꞋ. 13Pɔ́p ɡʉ ńjí ndɛn yɔ fɑꞋ, ŋ́ɡúꞋlɛ Sɛ́ nǔu pɑ́Ꞌ pʉʉ sɛ́ ńtík ku nǔu nu yi Ŋkʉʉ Sʉ́Ꞌnɛ-Kɛlístɔ sɛ́ ńcú. Pɔ́p ɡʉ ḿbɛn ŋ́ɡúꞋlɛ Sɛ́ nǔu pɑ́Ꞌ pʉʉ lɔknɛ pɔŋtʉ́m, ŋ́ɡɑ́ yúu mbɔ̌ pɔ́p tɛ mbɑ pɛcɔ́ pʉɔ. 14Nu yʉ́ʉ ɡʉ ŋ́kúu tʉ́m pɔ́p, pɔ́p nɑ́ŋ ḿbɔ́ ńcɛꞋlɛ Sɛ́ nǔu tú yʉ́ʉ, mbíꞋŋɡɔ pɔ́p jʉ́ɔ ŋɡɔ ɑ ɡɑ́ fuꞋ níinɛ yʉ́ʉ, pʉʉ ɡẅɛɛ tʉ́m sʉ́Ꞌnɛ tɛꞋ, lɑ́ mbɔ́ ńcẅɛ́lɛ pʉɔ pɑ́Ꞌɑ. 15Pɔ́Ꞌɔ lɑ́, ɛ́ pɔŋ ŋɡɔ pɛkŋɛ ɡɑ́ pɑ́Ꞌlɑ́ mbɔ̌ Sɛ́, nǔu fuꞋ níinɛ kɛ́ fʉꞋ yi ɑ kɑ ɡɑ́nɛ mbɔ̌ pɛkŋɛ.
Currently Selected:
2 Kɔlɛ̂ŋtɛ 9: JGO
Highlight
Copy
Compare
Share
Want to have your highlights saved across all your devices? Sign up or sign in
CABTAL, 2017
