1 Kɔlɛ̂ŋtɛ 9
9
Pɔ̂l nɑ́ pii-ŋɡɑŋntúu-Yɛ́su nɛlɔk ŋ́ɡɛ Ŋkʉʉ Sʉ́Ꞌnɛ sɑt zʉꞋ
1Mɔ pɑ́Ꞌɑ mbɔ m bɔɔ ɡɛ yúu nǔu ntɛ́ yi mɔ sɛ́ ńjí pɔ́ kíi? Ŋ kɑ́ pɔ́ ŋɡɑŋntúu-Yɛ́su pɔ́ ɔɔ? Mɔ ŋkɑɑ jʉ́ɔ yɑ́ɑ Tsɑpʉɔ wɛkŋɛ Yɛ́su pɔ́ ɔɔ? Pʉʉ ŋkɑɑ ɡɔ́ ńjí Tsɑpʉɔ, ɛ́fú pɔ nǔu fɑꞋ yi ɛ fɑꞋnɛ mbɔ̌ wɛ́ pɔ́ ɔɔ? 2Pɛcɔ́ pʉɔ lɑɑ ḿbɔ́ ńdʉꞋ ŋɡɔ ŋ kɑ́ pɔ́ ŋɡɑŋntúu-Yɛ́su pɔ́, mbɔ ɛ́ ɡʉ nǔu pʉʉ m bɔ́ wɛ́tɛ́. Pɑ́Ꞌ pʉʉ lɑtnɛ mbʉʉ nǔu Tsɑpʉɔ lɑ́, pʉʉ lɔk pɔ́Ꞌɔ, ḿbɔ́ lii yi ɛ́ lɛ́Ꞌlɛ́nɛ ŋɡɔ mɔ ŋɡɑŋntúu-Yɛ́su Kɛlístɔ.
3Pʉʉ zúꞋ nu yi ŋ ɡʉ ńcú nɛlɔk ńcẅɛ́ɛ tú yɑ́ɑ mbɔ̌ pʉɔ pi pɔ́p tɔ́nɛ lɔ́Ꞌ nǔu yɔ ntɛ́ nɛlɔk ɛ́fɑꞋ. 4Pɛk kɑ́ ɡẅɛɛ yɛ́k nɛcẅɛ́ɛ yúu ŋ́kwɛ́t, ḿbɛn ńnɔ́ mbíꞋ fɑꞋ yɛ́k pɔ́ kíi? 5Mbɑ wɛ́tɛ́ ŋu lɑ́ nǔu pɛk kɑ́ ɡẅɛɛ yɛ́ nɛɡɔ́ ńnɛn, pɔ́p wɛcɔ́ mɔ́ɔmɑ́ wɛkŋɛ ŋu-Kɛlístɔ wɛ mɑŋɡɛ́, ɑ pɔ́ nzwɛ́ wɛ pɔ́ kíi? Ɛ́ kɑ́ pɔ́ pɑ́Ꞌ Kɛfɑs, nɛ́ pɛcɔ́ ɡɑŋntúu, mbɑ pɔ́ɔpɛ́mɑ́-Tsɑpʉɔ ɡɛnɛ pɔɔ? 6Kɛ ɛ́ pɔ́ pɔ ŋɡɔ pɛk Pɑnɛpɑ́ɑshi zɛ́nɛ pɛk ɡẅɛɛnɛ nɛlɔɔ lɑ ńjʉ́ ɔɔ? 7Pʉʉ kɑ zúꞋ ɡɔ́ ŋu pɔ́ ndʉ̈ɔ́Ꞌntsɔ, ɛ́shɔtnɛ ŋ́kwɛ́t pɔ pɑɑ yɛ́? Kɛ ńjʉ́ɔ ɡɔ́ ŋu pi tʉ́ zɛ́mnɛ, ḿbɔɔ jʉ́ ntɑ́ɑ nǔu pɔ́ ɔɔ? Kɛ ńjʉ́ɔ ɡɔ́ ŋu pɔ́ ńtsiinɛ pɛfɔŋ, mbɔɔ ńnɑ́ŋ ŋ́kíɛ mbʉ́ʉ-nɑꞋɑ́ ńnɔ́ pɔ́ ɔɔ?
8Líkcɔ́ pʉʉ cú ŋɡɔ m bɛ́ɛ fʉꞋ pɔ nǔu mɛnu mi ɛ́ sɛ́ ńdɛɛtɛ pɔ tsɛtsɛt pʉɔmɛsɔŋ. Nɛpʉ́ʉ -Mɔ̌sɛ̂ɛ kɑ́ pɛn ńcú yɛ́ pɔ pɔ́Ꞌɔ pɔ kɛ? 9Pɛ́ kɑ ŋwɑꞋnɛ tsɛt nɛpʉ́ʉ -Mɔ̌sɛ̂ɛ ŋɡɔ: «Kɔɔ kút ntsu fɔŋ ẅi ɔ sɛ́ ńdɔk wɛ́ ḿbúꞋ mɛsɑŋntsʉ́ʉ». Tɛ Sɛ́ lɔk pɔ́Ꞌɔ, ńtsɑ́ɑ pɔ mɛjʉ́ŋ fɔŋ?
10A ŋkɑɑ pɔ́ ńcú pɑ́Ꞌɑ mbíꞋ pɔ wɛkŋɛ pɔ́ ɔɔ? Ŋ kwɑŋɛ ŋɡɔ ɑ cú mbíꞋ pɔ wɛkŋɛ. Pɛ́ kɑ ŋwɑꞋnɛ yɔ nu, mbíꞋ pɔ wɛkŋɛ, ɛ́ zɛɛ ḿbɔ́ ḿbíkŋɛ ŋɡɔ nzʉ́Ꞌnɑŋ, pɔ́p ndɑkyúu, zẅíꞋlɛ yɔ́p yúu nǔu yúu mi ɛ́ ɡʉ ńcẅɛt ŋkɑ́Ꞌ. 11Pɛk kɑ pi mbiyúu mi ɛ́ fúnɛ mbɔ̌ Sɛ́ tsɛtsɛt pʉʉ. Pɛk lɑɑ ḿbɔ́ pɑ́Ꞌɑ ŋ́ɡʉ nǔu yúu pʉ́ʉ, ŋ́ɡẅɛɛ yɛcɔ́ pɑ́Ꞌ pʉɔ pi pɔ́p fúnɛ ŋkɑ́Ꞌ lɑk yúu lɑ́, mbɔ pɛk lɔk ŋ́ɡɔ́ɔ ńjʉ́ pii yʉ́ʉ tɛ ɛ́ lɛɛ lɛɛnɛ kii? 12Ɛ́ lɑɑ ḿbɔ́ yi pɛcɔ́ pʉɔ sɛ́ ńcẅɛ́ɛ yúu mbɔ̌ pʉʉ, mbɔ pɛk zɛɛnɛ mbɔɔ ɡẅɛɛ nɛpiitɛ ńcẅɛ́ɛ pɔ́ ɔɔ?
Tɛ mbɑ pɔ́Ꞌɔ, pɛk ŋkɑɑ kɛ́ ńcẅɛ́ɛ pɔ́. Tɛ ńtsʉ́Ꞌ pɔ́Ꞌɔ, mbɔ pɛk sɛ́ ɛ́sʉk nǔu mbɑ kʉ̈ɔ́ lɑ́ sʉknɛ, ḿbɔ́k nɛɡɛ yúu mi ɛ́ ɡʉ ńtɔꞋ pʉɔ nɛzúꞋ Ŋkʉʉ Sʉ́Ꞌnɛ-Kɛlístɔ. 13Pʉʉ kɑ́ pɔ́ ńjí ŋɡɔ ndɑ́-nɔŋpɔꞋ zẅiknɛ-pʉɔ pi pɔ́p fɑꞋnɛ tsɛtú pɔ́ kii? Ḿbɛn mbɔɔ jí ŋɡɔ pʉɔ pi pɔ́p nɔŋnɛ pɔꞋ zʉꞋ yi pɛ́ nɔŋnɛ pɔꞋ-Sɛ́ zúꞋu, ɡẅɛɛ yɔ́p yúu nǔu yúu pɔꞋ yi pɛ́ lɔknɛ ńtɔ́ mbi Sɛ́ pɔ́ kii? 14Ɛ́ ndʉ́ŋndʉŋ pɑ́Ꞌ Tsɑpʉɔ kɑ zɑ́pnɛ ŋɡɔ pʉɔ pi pɔ́p sɛ́ ńcẅi Ŋkʉʉ Sʉ́Ꞌnɛ, pɔ́p ɡʉ ḿbɔ́ ńjʉ́ yúu mi ɛ́ fúnɛ nǔu fɑꞋ-nɛcẅi Ŋkʉʉ Sʉ́Ꞌnɛ.
15Ɛ́ lɔk ḿbɔ́ ŋɡɔ ŋ kɑ ɡẅɛɛ nɛpíkŋɛ yúu mbɔ̌ pʉʉ, lɑ́ mɔ ŋkɑɑ mɔ́ kɑ́ píkŋɛ pɔ́. Ŋ kɑ́ pɔ́ ŋ́ŋwɑꞋnɛ pɑ́Ꞌɑ ńdɔk ḿbíkŋɛ ŋɡɔ pɛ́ ɡɑ́ yúu mbɔ̌ mɔ pɔ́. Ɛ́ tsʉ́Ꞌ yi m bɛ́m ŋu ɡɛ n nɑ́ yɔ nu yi n dɔknɛ ńtsɑ́ɑtɛ, m pfú. 16Ɛ́ mbɔ̌ mɔ, nɛcẅi Ŋkʉʉ Sʉ́Ꞌnɛ, pɔɔ pɔ́ pɔ yɛcɔ́ yúu nɛlɔk ŋ́ŋɑ́Ꞌtɛ pɔ́. Ɛ́ pɔ́ pɔ yúu mi ŋ kɛ́ ŋ́ɡẅɛɛ pɔ nɛɡɛ. N dɑɑ ńdʉꞋ nɛcẅi Ŋkʉʉ Sʉ́Ꞌnɛ, mbɔ n tíi ndɔɔ. 17Ɛ́ kɑ pɔ́ pɛ́Ꞌnɛ mɔ kɑŋnɛ yɔ fɑꞋ, mbɔ ŋ ɡẅɛɛ nɛzẅíꞋlɛ tsɔ́ꞋfɑꞋ. Lɑ́, pɑ́Ꞌ ɛ́ fɑꞋ yi ŋ kɛ́ ŋ́ɡẅɛɛ pɔ nɛfɑꞋ lɑ́, ɛ́ mbɔ̌ mɔ ḿbɔ́ pɔ piꞋ yi ŋ kɛ́ ŋ́ɡẅɛɛ pɔ nɛtíi. 18Yɑ́ɑ tsɔ́ꞋfɑꞋ pɑ́Ꞌɑ ḿbɔ́ kʉ̈ɔ́? Ɛ́ pɔ́ pɔ mɔ nɛcẅi Ŋkʉʉ Sʉ́Ꞌnɛ pɔ́ kɛ́ kɑ́ yúu, pɔ́ kɛ́ píkŋɛ yúu mi ŋ ɡẅɛɛnɛ nɛlɔk pɑ́Ꞌ mɔ ŋu ẅi ɑ cẅinɛ Ŋkʉʉ Sʉ́Ꞌnɛ lɑ́ ɡẅɛɛ nɛpíkŋɛ.
19Pɑ́Ꞌ n cúnɛ lɑ́, ŋ ɡẅɛɛ nɛɡɛ kʉ̈ɔ́ lɑ́ nǔu ntɛ́ yi n jínɛ, lɑ́ ŋ kɑ pɛ́m ŋkwɑɑ-pʉɔ tsʉʉ, ńjí ŋɡɔ ŋ ɡʉ ńdɔk pɔ́Ꞌɔ, ŋ́ɡɛ pʉɔ tɛ ńzɑ́ɑ tsʉ́Ꞌ pʉɔ-Kɛlístɔ. 20Mɔ ŋkɑ́ yi mɔ sɛ́ ɛ́fɑꞋ tsɛtsɛt pɑyúdɑ, n nɑ́ŋ pɑ́Ꞌ ŋu-Yúdɑ lɑ́, ńjí ŋɡɔ ŋ ɡʉ ńdɔk pɔ́Ꞌɔ, ŋ́ɡɛ pɑyúdɑ tsʉ́Ꞌ pʉɔ-Kɛlístɔ. Ḿbɔ́ ŋkɑ́ yi mɔ tsɛtsɛt pʉɔ pi nɛpʉ́ʉ-Mɔ̌sɛ̂ɛ sɛ́ ɛ́sɑ́Ꞌ wɔ́p, n nɑ́ŋ pɑ́Ꞌ ŋu ẅí nɛpʉ́ʉ sɛ́ ɛ́sɑ́Ꞌ wɛ́ lɑ́, ńjí ŋɡɔ ŋ ɡʉ ńdɔk pɔ́Ꞌɔ, ŋ́ɡɛ pʉɔ pi nɛpʉ́ʉ sɛ́ ɛ́sɑ́Ꞌ wɔ́p tsʉ́Ꞌ pʉɔ-Kɛlístɔ, ńnɑ́ŋ pɔ́Ꞌɔ, lɑ́ nɛpʉ́ʉ-Mɔ̌sɛ̂ɛ kɛ́ mbɔɔ ɛ́sɑ́Ꞌ wɑ́ɑ pɔ́. 21Mɔ ŋkɑ́ yi mɔ sɛ́ ɛ́fɑꞋ tsɛtsɛt pʉɔ pi nɛpʉ́ʉ-Mɔ̌sɛ̂ɛ kɑ́ pɔ́ ɛ́sɑ́Ꞌ wɔ́p pɔ́, n nɑ́ŋ pɑ́Ꞌ ŋu ẅí nɛpʉ́ʉ kɑ́ pɔ́ ɛ́sɑ́Ꞌ wɛ́ pɔ́ lɑ́, ńjí ŋɡɔ ŋ ɡʉ ńdɔk pɔ́Ꞌɔ, ŋ́ɡɛ pʉɔ pi nɛpʉ́ʉ kɑ́ pɔ́ ɛ́sɑ́Ꞌ wɔ́p pɔ́, ńtsʉ́Ꞌ pʉɔ-Kɛlístɔ, ńnɑ́ŋ pɔ́Ꞌɔ, ɛ́ pɔɔ lɔk ńcú pɔ ŋɡɔ nɛpʉ́ʉ-Sɛ́ kɑ́ pɔ́ ɛ́sɑ́Ꞌ wɑ́ɑ pɔ́ pɔ́, ɛ́ pɔ́ ɛ́sɑ́Ꞌ wɑ́ɑ sɑ́Ꞌnɛ, mbíꞋŋɡɔ n nɑ́ŋ pɔ nǔu pɑ́Ꞌ nɛpʉ́ʉ-Kɛlístɔ sɛ́ ḿbíkŋɛ. 22Mɔ ŋkɑ́ yi mɔ sɛ́ ɛ́fɑꞋ tsɛtsɛt pʉɔ pi pɔ́p pɛ́t ḿbɔ́t pɔ́tnɛ nǔu nɛzɑ́p tʉ́m nǔu Kɛlístɔ, ńnɑ́ŋ pɑ́Ꞌ ŋu ẅí ɑ pɛ́t ḿbɔ́t yɛ́ pɔ́tnɛ lɑ́, ńjí ŋɡɔ ŋ ɡʉ ńdɔk pɔ́Ꞌɔ, ŋ́ɡɛ pɔ́p tsʉ́Ꞌ kwɑꞋ pʉɔ-Kɛlístɔ. Ŋu lɑɑ ḿbɔ́ pɔ ŋɡɔ́ku ɔɔ, ḿbɔ́ pɔ ŋɡɔ́ku ɔɔ, n tsʉ́Ꞌ pɑ́Ꞌ jʉ́, ńjí ŋɡɔ ŋ ɡʉ ńdɔk pɔ́Ꞌɔ, ŋ́ɡɛ nǔu ntɛ́ yi ḿbɔ́ ɑ luk. 23Ŋ ɡɛ yîyɑ́ ŋɡɔŋ nu tsʉʉ pɔ pɑ́Ꞌ Ŋkʉʉ Sʉ́Ꞌnɛ ɡʉ ɛ́sɑt zʉꞋ, mbɑ pɑ́Ꞌ mɔ sɛ́ ńzẅíꞋlɛ yɑ́ɑ yúu sʉ́Ꞌnɛ yi ɛ́ fúnɛ nǔu Ŋkʉʉ Sʉ́Ꞌnɛ lɑ́.
24Pʉʉ sɛ́ ńjí yʉ́ʉ ŋɡɔ ɛ́ ɡʉ zʉꞋ yi pɛ́ kʉɔnɛ ndʉ́ɔlɛ́ zúꞋu, pɑkʉɔ ndʉ́ɔlɛ́ kʉ̈ɔ́ pɔ pɛtsʉʉ, lɑ́ tɑ́Ꞌ ŋu wɛ́mɔ́Ꞌ nǔu pɔ́p tíinɛ yúu mi pɛ́ zɑ́pnɛ. Mbɑ wɔ̌ lɑ́ nǔu pʉʉ kʉ̈ɔ́ nǔu ntɛ́ yi ɑ ɡʉ ńtíi yúu mi pɛ́ zɑ́pnɛ. 25Pɑɡɛ mɛtɑ́ɑmɛ mi nu mɛtʉʉ nǔu, pɔ́p lʉꞋ mɛyúu tɛꞋ, ńjí pɑ́Ꞌ pɔ́p ɡʉ ŋ́ɡẅɛɛ mbʉʉ yɔp pɔ́Ꞌɔ, ńdɔk ńtsɑ́ɑ pɑ́Ꞌ pɛ́ ɡʉ ńdɑ́Ꞌ ńtɔꞋ ŋɡúꞋ#9.25 Ɛ́ kɑ pɔ́ mbɔ̌ pɔ́p, yɔp ŋɡúꞋ pɔ́ pɔ mɛtsɑŋ nɛɡíi mi pɛ́ zʉ́ʉnɛ pɑ́Ꞌ Nɛkɑ́t lɑ́, ńtɔꞋ tú-ŋu. yɔp. Yîyɑ́ ŋɡúꞋ pɔ́ yi ɛ́ ɡʉ ńdɑ́Ꞌ ḿbʉ́ʉpɛ. Lɑ́ ŋ́ɡʉ nǔu pɛkŋɛ, pɛkŋɛ ɡɔ́ ŋ́ɡɛ pɔ́Ꞌɔ, ńtsɑ́ɑ ŋɡúꞋ yi ɛ́ kɛ́ lɑ́Ꞌ pʉ́ʉpɛ pɔ́. 26Ɛ́ yúu mi ɛ́ ɡɛnɛ m bɔ́ pɑ́Ꞌɑ ḿbɔ́ ŋ́kʉɔ ndʉ́ɔlɛ́. Lɑ́ ḿbɔ́ ŋ́kʉɔ, mík mɑ́ɑ tʉ́ʉ nǔu yúu mi n dʉŋtɛ́nɛ. M bɛn ḿbɔ́ pɑ́Ꞌɑ ḿbɔ́ ŋu ẅi ɑ sɛ́ ńtẅínɛ ŋkɔt lɑ́, lɑ́ ŋ́kɛ́ mbɔɔ ḿmɑꞋ pɔ́ ńtsɛm zʉꞋ-níinɛ pɔ́. 27Mɔ sɛ́ ŋ́ɡẅɛɛ mbʉʉ yɑɑ pɑ́ꞋtɛꞋ, ŋ́kúꞋlɛ tɛ ńjí yúu mi ŋ ɡɛnɛ, ḿbɔ́k nɛcẅi Ŋkʉʉ Sʉ́Ꞌnɛ mbɔ̌ pʉɔ, pɛ́ pɛn ŋ́ɡɛ ḿbɑꞋnɛ wɑ́ɑ ŋ́ɡɑ́ nzʉʉ.
Currently Selected:
1 Kɔlɛ̂ŋtɛ 9: JGO
Highlight
Copy
Compare
Share
Want to have your highlights saved across all your devices? Sign up or sign in
CABTAL, 2017
