Lumà 7
7
Ghəa ghəla nî zə eghùe a deē kùu ndùw kəlàŋ
1Waazə̂ ghaŋa gho, ghɛ̀ kwo nû lâŋ kò. À lǒ mò ghɛ̀ məghaa nù enyəa lâŋ kə̀ ki ko kədaʼa a zəŋò ghùw an nə̀gha zəla ghùw ù te naām lo â tuw ko a? 2Zə̀ lò e ghee wizən wəla ù ki num ki alebɔɔm lo ko ghee num ù wə̄n abugho num nāam lô dzə â tuw ko; mò à kuuwn lò enyəa num ù te m kpuw, lâŋ kə te kə ŋ kôom gěen yo wìzən ù te ghè num ù wə̄n u te. 3Abugho wìzən ù te ti nî nduw wìnû ù lì mò num ù sʉesʉ wən naam lǒ â tuw ko, à fi lo enyəa a ki aletɔŋɔ wìzən ù te enyəa à lò nùuŋ kə wîzən. Abugho e kuuwn lô enyəa num ù sʉesʉ u te kpuw nû, à fi lo enyəa wìzən ù te n sə̀ nùghù an làŋ kə te ko. Mò ù ndùw nì ko num ù nùghù, e te e yo dzə e nûŋlò.
4Waazə̂ ghaŋa gho, à lò sugho ghəa è mɔʼɔ zo â ghɛ̀, ghɛ̀ êzəŋ e lo tò ghî a kpuuwn gho abugho e bugho alo kəlàŋ am vʉ zəla Kə̀lestò fə̀ kpuw ghè zò. Sɛ̀ êzəŋ e ndzə̂əm lo ghî a ghûw wəla ghe fə̀ zôm nughù kɔʼ alo evʉ̄, tò sɛ̀ è lo ghî ghəla mughù e ghee e fughuu kɔʼso mò â Zə̀ kò. 5Tɔŋlo enyəa nəgha zəla sɛ̀ mò naam mughu mughù e mbī zo, a ŋ ki mmbuuw aleghəəŋ ghəa a biigh gho, mò à soʼn kɔʼɔ kəlâŋ enyəa a e fəghaan ghəəŋ ghəa à biigh a te gho. Sɛ̀ m fwaʼà fughuu ndùw â vʉ zo. 6Yia kuuwn bugho ezəŋ, ghe n sɛ̀ am fàŋà kə kəlàŋ zê zə̀ghà, sɛ̀ èzəŋ e lo tò ghî à kpuuwn gho â fəgha kəla kə mò ki tsəgha daʼa ko a zəŋò ghɛ̀. Sə̀ kôom fwàʼà yo aŋghəa làŋ kə deē, sò kǔuwn mughu mùghù è fughu zəla Zuʼ tə̀ Zɔlɔ tə fughuu.
Lâŋ kə̀ dêe fùghu bo e ghûw
7 #
Ksm 20:17; Lwa 5:21 A yia fɛ èzəŋ kə̂aa èndughō? À sò lo enyəa lâŋ kə̀ lo ebō ŋkāa? Ɛ̂ŋgaŋ, à dɔ̀m yò dzə̂ èzə̀. Zəa e kuuwn lô enyəa abugho à mò buw â làŋ kò mùgho mò sô ŋ kele yò fəgha kəla bo e lo ghè kò. Mùgho mò so Ŋ̀ kele dzə̂ yò enyəa sə à səa à lo ebo, abugho lâŋ kə̌ fə̀ taʼ kə̀ dzâa tsughu enyəa, “Kà â sə gho e səa am fʉgha u aghì.” 8À kuuwn lò ko enyəa, lâŋ kə fughuu dzì â bo zo aleghəŋlo enyəa mùghò è səa â sə gho. Dèe êzə̀ abugho à mò buw â lâŋ kò, to bo e mò kì yo daʼa kə̀ li ko. 9Ghuūghùe waŋā, mùgho fə̀ mughu tsəgha mò Ŋ̀ kwo yo lâŋ kò, a m bùghò lâŋ kə Kəzə̀ kə̀ ndûw bugho, bo e fi dê sə̀ wò sùghò nù ghue wo, mùghò ŋ kuuwn lǒ tò m kpuw dòʼò nù. 10Lâŋ kə Kəzə̀ kə̀ mɔʼɔ̄ kəla ghe fə̀ dzɛ̂ enyəa kə nîi wò èmùghù, â ŋ kuuwn lò â mùghò to kə nîi wò èvʉ. 11#Dzs 3:13Tɔŋlo enyəa lâŋ kə Kəzə̀ kə fə̀ fughu tsughu dzì â bo zo enyəa e nɔɔ̄ fughu mugho, zə ŋ ghəəŋ ko êzə̀ wì maʼà tsughu mugho.
12À fi lo enyəa lâŋ kə̀ lo fəgha kəla kə zɔlɔ̄. Lâŋ kə Kəzə̀ chia kə zɔlɔ, lò tsəghatsəgha, dzɔ̀ɔ sùghò. 13À sò yia fi lo enyəa fəgha kə̀ dzûŋ kə̀ mò koōm ni wo mugho â vʉ zo a ŋkāa? Ɛ̂ŋgaŋ dzə, à fə̀ lo ebo e fə̀ nî wô vʉ zo a zəŋò mùghò a m bàm e kəlàŋ, mò à lò fəgha kə dzɔɔ̄ ko, aleghəŋlo enyəa Ŋ̀ kele fəgha kəla bo e biso lo ghè kò, to lâŋ kə Kəzə̀ kə̀ e lo aledèe fughuu wô enyəa bo e ŋge lo fɛ̀ɛn kə kəfəgha.
Də̀m kəla kə lo aŋ ghùe e sɛ̀
14Sɛ̀ kwo nû enyəa lâŋ kə̀ lo fəgha kə ushʉghà, yìa Ŋ̀ kuuwn lo ghùw nsɔ̌ɔŋnchùw ghe fêe fughu nduw â bo zo to kəkɔ̀. 15#Gàl 5:17 M̀ buʼu zǔuwkɛlɛ yo ghəa ghaŋa à gho, nu Ŋ̀ ghəəŋ yo ghəa zəla M̀ bughoo mùghò n ləghaa aleghəəŋ ghè zo, mùghò ŋ kuuwn ghəəŋ ghəla M̀ bɛ̂ buʼ. 16Abugho e lo enyəa Ŋ̀ ghə̂əŋ ghəa ghəla M̀ bɛ̂ buʼ, à fi lo enyəa mùghò m boo enyəa lâŋ kə̀ lo fəgha kə̀ dzûŋ kò. 17À fi lo enyəa à kòom yò dzə̂ mugho ù mɔ̀ʼɔ ù te Ŋ̀ ghəə̄ŋ ghəa a te gho, à lò bo zəla e lo am fə̂ŋ zaŋa e ghəŋlo enyəa mùgho e ghəəŋ ghəa a te gho. 18Ŋ̀ kwo nû enyəa ghəa e dzûŋ e li yo dzə̂ am fə̂ŋ zaŋa, tɔɔŋ mùghò tǒ ghùw wə nsɔ̌ɔŋnchùw. Nù Ŋ̀ ki nû moʼnlò e te zo aleghə̂əŋ ghəa e dzûŋ zò, mùghò ŋ kuuw yò aleghə̂əŋ ghəa e te zo. 19Tɔŋlo enyəa Ŋ̀ ghəəŋ dzə̀ yò ghəa a dzûŋ ghə̀là M̀ bugho mùghò n ləghaa aleghəəŋ ghè ghò. Mùgho ŋ kuuwn ghə̂əŋ bo zəla Ǹ ləghaa yo aleghəŋlo. 20Abugho Ŋ̀ kuuwn ghəə̄ŋ ghəa ghəla Ǹ ləghaa dzə̂ yo aleghəŋlo, à kòom nǎam yo dzə mugho ù mɔ̀ʼɔ u te Ŋ̀ ghəə̄ŋ ghəa a te gho, à lo bo zəla e lo am fə̀ŋ zaŋa e ghəŋlo enyəa mùghò è ghəəŋ ghəa a te.
21À ndòʼ lǒ tò ghəa è foʼō naaŋ zo enyəa abugho M̀ moʼn tsughu aleghəəŋ ghəa è dzûŋ zò, à m bughòo kô ghəa è biigh zo. 22Ǹ ləghaa làŋ kə̀la à fughu wo Zə̀ kò am fə̂ŋ zaŋa e dzə̀m. 23Yìa à sò kuūwn lô ko enyəa lâŋ kə̀ nughù kə̀ lo nû kə zughù kaāŋ tsəgha a zəŋò mùghò ghèe kəla Ŋ̀ gaʼ fə̀ŋ zaŋa a te, mo lâŋ kə te kə ghəəŋ nù yìa Ǹ doʼn ndûw kɔ̂ kô â bo zo. 24Ghî fə faan fo enyə tò mugho, à ndà lò ndugho ù lo lô alebəghaasə mugho aŋ gwən e ughùe zaŋa zəla e ki alekpuw a? 25Zɔ̀ɔŋ kə̀ lo â Zə̀ kò, kəla kə lo alebəghaasə mugho a m bàm e Yɛso Kə̀lestò Mughùbè ù sɛ̀! À fi lo enyəa mùghò am moʼn zaŋa, M̀ fughuu nu kɔʼso mò â làŋ kə Kəzə̀ kò. À m bùghò Ǹ lo an ghùe waŋa mùghò m bwîi nduw an daʼa kə ebō.
