ROMANOS 1
1
Allillachu canguichij nishcami
1Jesucristopajta ruraj, apóstol cachun cayashca, Taita Diospaj alli huillaita huillachun ch'icanchishca Pablomi cani. 2Chaitaca paipaj profetacunaman jucha illaj Quillcacunata quillcachishpami, ñaupaman cusha nirca. 3Chai alli huillaica Taita Diospaj Churi, ñucanchijta Mandaj Jesucristomantami huillan. Paica aichamantaca, Davidpaj huahua huahuamantami carca. 4Huañushcacunapaj chaupimanta pai causarishcamantami, jucha illajta ruraj Espíritu huillashca shinaca, poderyuj Diospaj Churi cashcata ricuchishca.
5Paimantami mana c'uyaipajta c'uyaj canata, apóstol canatapish chasquircanchij. Chaimanta paipaj shutita c'uyashpami, tucui mama llajtacuna Jesucristota crichun huillacunchij. 6Cancunapish Jesucristopi crijcunaca pai agllashcacunapura cachun cayashcacunami canguichij. 7Romapi tucui cajcuna, Dios c'uyashpa jucha illaj cachun cayashcacuna: Ñucanchij Dios Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninimi.
Pabloca Romamanmi risha nishca
8Tucuimanta yallica cancuna crishca, tucui cai pachapi huasha huasha uyaricushcamantami, Jesucristomanta ñuca Taita Diostaca pagui nicunilla. 9Paipaj Churipaj alli huillaita huillashpa, tucui ñuca yuyaihuan servicushca Taita Diosmi mana shaicushpa, cancunamanta paita ñuca mañacushcataca yachan. 10Cunantajca ima shinapish Taita Diospaj munai cajpica, cancunapajman alli shamungapajmi mañacunilla. 11Espíritu cushca rurai tucunacunata cancunaman huillangapajmi cancunapajman rina yuyailla cani. Cancuna sinchiyashca cachunmi chai yuyailla cani. 12Cancunapish ñucapish crishcata caishujmanta chaishujmanta yuyaita cunacushpa cushicungapajmi shamunata munani.
13Huauquicuna, tauca cutin cancunapajman risha nicujpipish, imapish jarcajpi, caicama mana shamushcata yachachunmi munani. Caishuj mana judiocunapurapi charishca shinallataj, cancunapurapipish alli rurashcataca grano p'ucushcata shina charingapajmi shamusha nicuni. 14Griegocunaman, mana griegocunamanpish, yachaisapacunaman, imata mana yachajcunamanpish debimi cani. 15Chaimantami ñucaca Romapi caj cancunamanpish, alli huillaita huillanaihuan cashpa utca shamusha nini.
Alli huillaica quishpichi tucujmi
16Ñucaca alli huillaimantaca mana pingarinichu. Alli huillaica tucuita rurai tucuj Diosmanta cashcamantami, puntaca judiocunata, griegocunatapish maijanpish crijpica, tucuicunata quishpichin. 17Taita Diosca crijllapi justificaj cashcatami alli huillaica ricuchin. Crishcallapi catichun. Cashnami quillcashca tiyacun: “Crijpi justificashcamantami causanga” ninmi.
Tucuicunami juchayuj
18Taita Diosta mana manchashpa, manapish rurana cashcata rurajcunaca, paicunapaj mana allita rurashcahuanmi mana llullatapish jarcancuna. Paicunata Taita Dios p'iñarishpa llaquichinaca, jahua pachamantami ricurin. 19Taita Diosmanta yachaipajllacunatapish, Taita Diosllataj ricuchijpimi rijsincuna. 20Mana ricuipaj Taita Dios tiyashcataca, pai rurashcacunata ricushpa yachanallami. Huiñaipaj poderyujtaca, cai pachata rurashca punllamanta ricushpa, yuyaita japinallami. Chaimanta mana yachashcanchijchu nishpa pi mana ni tucuncunachu. 21Taita Diosta chashna rijsishpapish, Taita Diosta jatunyachina shinatajca mana jatunyachircacunachu, mana pagui nircacunallapishchu. Chaipaj randica, paicunapaj yuyaicunapipish yangallatami yuyarircacuna. Chaimantami paicunapaj rumi shungucunapish amsayachishca carca. 22Yachaisapacunami canchij yuyashpapish, ch'ahuancunami tucurcacuna. 23Chaimi mana huañuj Taita Diostaca, huañujlla runacunaman, pajarocunaman, chuscu chaquiyujcunaman, huijsahuan llucajcunaman rijchajta rurashpa adorarcacuna.
24Chaimantami Taita Diosca, paicunapaj shungu munashca shina aicha munaicunata rurachun mapapi saquirca. Chaimi caishuj chaishuj, paicunapaj cuerpocunallatataj pinganayajta rurashpa llaquichirinacurcacuna. 25Taita Diostaj cajta adoranapaj randica, manapish dioscunatami adorarcacuna. Tucuita callarichij Taita Dios, paillata tucuicuna huiñaita adorashca cana Taita Diosta adoranapaj randica, Taita Dios rurashcacunallatami adorarcacuna. Chashna cachun.
26Chashna mana allicuna cajpimi, Taita Diosca paicunataca pinganayaj millai munaicunapi saquirca. Chaimi paicunapaj huarmicunapish huarmi canata saquishpa, paicunapurallataj mana rurana cashca millaita rurarcacuna. 27Shinallatajmi c'aricunapish huarmihuan ruranata saquishpa, caishuj chaishuj millaita ruranaihuan huañucurcacuna. Chashna cashpami c'aripurallataj pinganayaj, manapish rurana cashcata rurashcamantaca paicunapaj aichallapitaj llaquita apanataca chasquincuna.
28Paicunallataj Taita Diosmantaca imata mana yachashun nijpimi, manapish rurana cashcata rurachun Taita Diosca paicunapaj ch'ahuanyashca yuyaillapitaj saquirca. 29Paicunaca cashcata mana ruraj canahuan, huainayanahuan, shujtajcunata llaquichinahuan, quiquinpajlla charina munaihuan, millaita ruranahuan jundacunami. Chaimi shujtajpaj charishcata munancuna, huañuchincuna, macanacuncuna, umancuna, shujtajcunata llaquichincuna. 30Huashalla parlajcuna, yangamanta juchachijcuna, Taita Diosta p'iñajcuna, yanganchishpa c'amijcuna, jatun tucushcacuna, yanga jatun tucujcuna, millaita ruranata yuyarinacujcuna, yaya mamatapish mana cazujcunami. 31Ch'ahuancuna, mana pajtachijcuna, c'uyai illajllacuna, mana alli tucusha nijcuna, llaquij cana illajcunapishmi. 32Chaicunaca, Taita Diosca ima shina rurashcata ricuchishpa llaquichina cashcatapish yachashca jahua millaita rurajcunami. Chaicunata rurana yuyailla rurashpa causajcunaca huañunapajtaj nishcacunami. Chaicunaca mana millaita ruranllacunachu, ashtahuanpish millaita rurana yuyailla rurajcunahuan cushicujcunami.
Currently Selected:
ROMANOS 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.