ROMANOS 2
2
Taita Diosca ima shina rurashcata ricuchishpatajmi llaquichinga
1Chaimanta canca, pi cashpapish shujtajta juchachishpaca, canpish juchachicushca shinallataj ruraj cashcamantaca, ñucaca allimi cani mana ni tucunguichu. Cambaj llaquipajllatajmi chashna juchachingui. 2Ashtahuanpish chashna millaita rurashpa catijcunataca, mana llullapi nishca shinataj ima shina rurashcata ricuchishpa Taita Dios llaquichina cashcataca yachanchijmi. 3Canpish chashna rurajcunata juchachishpa, chai shinallataj millaita ruraj cashpaca ¿Ima shina rurashcata ricuchishpa Taita Dios llaquichinamantaca miticushami yuyanguichu? 4¿Paica alli canata, mana utca p'iñarij canata, millaita rurajpipish mana utca llaquichij canata achcata charij cashcatachu yanganchingui? Mana cashpaca, paica paipaj alli cashcahuan cutirinaman pushacushcatachu mana yachashca shina tucungui. 5Ashtahuanpish cambaj rumiyashca, mana cutirisha nij shungumantami, Taita Dios p'iñarishpa ima shina rurashcatataj ricuchishpa llaquichina punllapaj cambajllataj huaquichicungui. 6Chaipimi paica cada quiquin ima shina rurashca shinallataj caicunata cunga: 7Taita Dios allicunata cuj cashcata yachashpa, chaita shuyashpa allicunata rurajman, huiñai causaita charishcamanta allita rurajtaca huiñaita paihuan causachunmi saquinga. 8Ashtahuanpish mana llullata mana cazushpa c'ariyajcunata, millaita ruranallata cazujcunataca Taita Diosca jatunta p'iñarishpami llaquichinga. 9Millaita rurajcunataca, puntaca judiocunata, griegocunatapish tucuicunatami jatun llaqui, jatun manchaipish japinga. 10Ashtahuanpish tucui allita rurajcunamanca, puntaca judiocunaman, griegocunamanpish sumaj canata, alli nishca canata, sumaj causaitapishmi cunga. 11Taita Diospajca pita ñahuita ricushpalla alli ninaca mana tiyanchu.
12Mandashcata mana charishcamanta tucui juchallijcunaca, Mandashcapi nishca shina ricuchishpa mana llaquichishca cashpapish chingaringacunami. Shinallataj Mandashcata charishpapish juchallijcunaca, Mandashcapi nishca shinallatajmi ricuchishpa llaquichishca cangacuna. 13Mandashcata uyajcunallaca, Taita Diospaj ñaupajpica cashcata rurajmi cangui nishcaca mana cai tucuncunachu. Ashtahuanpish Mandashcapi nishcata cazujcunami cashcata rurajcunami canguichij nishca cai tucuncuna. 14Mandashcata mana charij mana judiocunaca, Mandashca rurachun nishcataca paicunallapitaj tiyajpimi rurancuna. Paicunaca Mandashcata mana charishpapish paicunallatajmi Mandashca libroca tucun. 15Chaimi Mandashca rurangui nishcaca, paicunapaj shungupi quillcashca cashcata ricuchincuna. Paicunapaj yuyaillatajmi yuyachishpa ima shina cashcata ricuchishpa juchachin, mana cashpaca allimi nin. 16Chaicunataca imalla rurashcata Taita Dios ricuchishpa llaquichina punllapica, alli huillaipi huillashca shinallatajmi, pacalla rurashcacunataca tucuicunapajta Jesucristota ricuchichinga.
Judiocunapish Mandashcapish
17Canca judiomi cani, Mandashcahuanmi cani, Taita Dioshuanpish allimi cani nishpami jatun tucungui. 18Taita Diospaj munaitapish rijsinguimi, Mandashcamanta yachachishca cashcamantaca, allicunallata agllanatapish yachanguimi. 19Mana ricujcunata pushajtajmi cani, amsapi cajcunata achijyachijpishmi cani, 20mana yachajcunata yachachij, huahuacuna shinata yachachijmi cani. Ima shina yachanatapish, mana llullatapish Mandashcapimi charini niricunguimi. 21Canca shujtajta yachachicushpaca ¿manachu canllataj yachachiricungui? Canca mana shuhuanachu nishpa yachachishca jahuachu ¿shuhuangui? 22Canca mana huainayanachu nishca jahuachu ¿huainayangui? Canca rurashcalla dioscunata p'iñashca jahuachu ¿chai huasicunamanta chai dioscunata shuhuangui? 23Canca Mandashcapi jatun tucucushca jahuachu ¿Mandashcata p'aquishpa Taita Diosta pingachingui? 24Cashnami quillcashca tiyacun: “Cancunamantami Taita Diospaj shutitaca, mana judiocunapurapica p'iñashpa c'amincuna” ninmi.
25Mandashcata pajtachijpajca, circuncisionta rurashcapish allitajmari. Ashtahuanpish Mandashcata p'aquij cashpaca, canca mana circuncisionta rurachishca shinallatajmi cangui. 26Chaimanta circuncisionta mana rurashca cashpapish, Mandashcapi pajtachingui nishcata pajtachijpica ¿manachu circuncisionta rurashca shinallataj canga? 27Aichapi circuncisionta mana rurashca cashpapish, Mandashcata allitaj pajtachijca, canca Quillcashca Mandashcata charishpapish, circuncisionta rurashca cashpapish, Mandashcata p'aquijpica, pairajmi cantaca mana allichu cangui nishpa llaquichinga. 28Ñahui ricuillapi judioca, mana judiotajchu. Aichallapi circuncisionta rurashcapish, mana rurashca shinallatajmi. 29Ashtahuanpish shungumantataj judiomi, judiotajca, circuncisiontapish shungupimi rurachishca. Chaitaca Espiritumi ruran, mana quillcashca Mandashcachu ruran. Chashna cajtaca mana runacunachu alli nin, ashtahuanpish Taita Diosmi alli nin.
Currently Selected:
ROMANOS 2: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.