MIQUEAS 1
1
Samariamantapish Jerusalenmantapish huacashcamanta
1Judá llajtataca, jatun mandaj Jotampish, Acazpish, Ezequiaspishmi mandarca. Chai punllacunallatajmi Mandaj Diosca, Moreset pueblomanta caj Miqueastaca Samaria pueblotapish, Jerusalén pueblotapish imata rurana cashcata ricuchishpa huillachirca.
2Tucui cai pachapi causajcunapish, caipi imalla tiyajcunapish caita alli uyahuaichij. Mandaj Jatun Diosca, paipajlla huasimanta cancunata llaquichina cashcataca ricuchishca cachun. 3Riquichij, Mandaj Diosca pai causacun huasimanta uriyashpaca, cai llajtapi tiyaj urcucuna jahuatami purishpa shamunga. 4Cai urcucunaca, pai purijpica yacuyangami. Pugru pambacunapish chaupirishpami, ninapi cera yacuyaj shina, urita callpacuj yacu shina callpanga. 5Israelcuna mana cazushpa millaita rurashcamantami, chashnaca tucunga. Jacobpaj huahuacunaca, ¿ima millaitataj rurashcari? Samaria pueblopimari chashna rurancuna. Judá llajtapi causajcuna, rurashcalla dioscunata adorana altarcunaca ¿maipitagari? ¡Jerusalenpimari!
6“Chashna millaita rurachishcamantaca, Samaria pueblotaca rumi montonllatami saquisha, uvata tarpuna allpatami rurasha. Pircashca rumicunatapish pugru pambaman caita chaita shitashpami, callari rumicunatapish tucuita llujshichisha. 7Paicunapaj rurashcalla dioscunatapish p'aquishpa, ñutushami. Imalla japishcacunatapish ninapimi tucuita rupachisha. Chashnami paicunapaj dioscunataca tucuita chingachisha. Huainayaj huarmicunamantami imacunatapish japircacuna. Chai, japishcacunaca huainayaj huarmicunapajllamantajmi tigranga” nircami.
8Chai tucui llaquicunamantaca, llaquinayajtami huacasha. Shinallataj churanapish illajlla lluchullami purisha. Chacalcuna shinapish, avestruzcuna shinapishmi llaquinayajta huacasha. 9Samaria pueblopi causajcunapaj carachaca, manchanayajta nanachijmari. Chai ungüica Judá llajtacamami chayarca, ñuca llajtapuracuna causacun Jerusalén pueblomanpishmi chayarca. 10Chai llaquicunataca, Gat pueblopi causajcunamanca ama huillanguichijchu, ama huacanguichijchu. Chai tucui llaquihuan huañucushpaca, Bet-le-afra llajtapi tiyaj ñutu allpapi singuringuichijlla. 11Safir pueblopi causajcunalla, pinganayaj lluchulla ñaupashpa richijlla. Zaanán pueblopi causajcunaca manamari llujshincunachu. Bet-esel pueblopi causajcunaca llaqui tucushpa huacacushpaca, ña mana ayudangachu. 12Marot pueblopi causajcunaca alli causanallatami yallitaj munarcacuna. Chaimantami Mandaj Diosca, Jerusalén pueblocama llaquicunataca cachashca carca. 13Laquis pueblopi causajcunalla, cancunapish Israel llajtapi causajcuna shinallatajmi Diosta c'ariyarcanguichij. Siónpi causajcunatapish Diosta c'ariyanataca, cancunami callarichircanguichij. Chaimanta cunanca cancunapaj carretacunataca, alli callpaj caballocunapi huatachishpa aisachichijlla. 14Chaimanta cancunaca, Moreset-gat pueblopi causajcunamanca, camaricunatami cuna canguichij. Aczib puebloca, Israel llajtata jatun mandajcunata umajmi tucunga.
15Maresa pueblopi causajcunalla, cancuna causacun pueblotaca shujtajcunami japingacuna. Paicuna shamujpica alli nishca israelcunaca, Adulam pueblopimi miticugringacuna. 16Judá llajtalla, cambaj c'uyashca huahuacunamantaca uma ajchata ruturiyari. Águila shina lluchulla uma tucuyari. Canpi causajcunataca, shujtaj llajtamanmi prezu apangacuna.
Currently Selected:
MIQUEAS 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.