MIQUEAS 2
2
Huajchacunata llaquichijcuna ima tucuna cashcamanta
1Millaita rurajcunaca camapi siricushpapish, millaita ruranallatami yuyancuna. Cayandijtaca paicuna yuyashca shinatajmi rurancuna. Mandanata paicunapaj maquipi charicushcamantami, chashna rurancuna. ¡Aij paicunaca imachari tucungacuna! 2Shujpaj charishca allpataca munashcamantami, quichuncuna. Huasicunatapish munashcamantami chaitataj japincuna. Shuj runata p'iñashpaca, paipaj familiatapish, tucui imalla charishcacunandijmi llaquichincuna. 3Chashna llaquichijcunataca, Mandaj Diosca cashnami nin: “Ñucapish cancuna millaita rurashcamantaca llaquichishami. Cancunaca chai llaquicunamantaca, shujllapish manataj quishpiringuichijchu. Ña mana ashtahuan jatun tucushpa puringuichijchu. Chai punllaca jatun llaquimi canga” ninmi. 4Cancuna llaquita apacui punllapica yuyachij shimicunahuanmi, yupashpa yupashpa cashna huacangacuna: “Tucuicunamari llaquichishca canchij. Mandaj Diosmari caipi causajcunataca ashallata rurashca. Ñucanchij allpacunatapish quichushpamari, shujtajcunaman chaupishpa cushca” ningacunami. 5Chashna llaqui tucujpica, Mandaj Diospaj tandanacuipica sorteashpa allpacunata chaupinaca mana tiyangachu.
Miqueasta shujtajcuna rimashcamanta
6Huillajcunatapish: “Ama imata huillaichijchu. Ama chashna huillaichijchu, ima pingai tucunaca mana tiyangachu” nincunami. 7Jacobpaj huahua huahuacuna, cancunaca: “Mandaj Diospaj Espirituca ¿huañushcachu imatagari? ¿Paitajchu cashna llaquicunataca cachan imatagari? ¿Ñucanchij rimashcacunaca alli causacuj runataca manachu allita ruran imatagari?” ninguichijmi. 8Sarunman ñuca agllashcacunallatajmi, cunanca ñucata p'iñashpa llaquichingapaj jatarishcacuna. Macanacuj soldadocuna shinami, p'iñarishpa ñanta rijcunatapish jahua churanata quichurcanguichij. 9Ñuca llajtapura huarmicunatapish, paicuna causana sumaj huasimantami llujshichishpa cacharcanguichij. Paicunapaj huahuacunatapish, ñucata huiñaita alabanatami quichurcanguichij. 10Caipica mapahuan junda cashcamantaca, mana samarinachu canguichij. Caimantaca jatarishpa richijlla. 11Maijanpish llullachij espirituhuan cashpaca: “Ñucaca vinopish, sidrapish mana tucuringachu nishpami huillaj shamuni” ningami. Chaimi cai llajtapi causaj runacunapaj huillajca canga.
Diosca pai agllashcacunata quishpichishami nishcamanta
12“Jacobpaj huahua huahuacunalla, cancunataca tucuimantami tandachisha. Tucui saquirishca israelcunatami tandachisha. Paicunataca Bosra pueblopi tiyaj oveja canllata shinami tandachisha. Achca runacuna cashcamantami, achca ovejacuna q'uihuapi micushpa salaj nicuj shina uyaringacuna. 13Paicunata ñaupashpa ñanta pascajca huichiyangami. Ñanta pascashpaca, pungutami llujshingacuna. Paicunata jatun mandajca ñaupashpami ringa. Tucuicunata ñaupashpa rijca, Mandaj Diosmi canga”.
Currently Selected:
MIQUEAS 2: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.