JUECES 1
1
Judapaj, Simeonpaj aillucuna Adoni-bezecta prezu japishcami
1Israelcunaca paicunata pushaj Josué huañushca q'uipami, Mandaj Diostaca: “Cananeocunahuanca ¿maijan aillutaj punta macanacugrina canchij?” nishpa tapurcacuna.
2Chaimi Mandaj Diosca: “Judá ailluraj macanacugrichun. Chai allpataca paicunapaj maquipimi churani” nirca.
3Judá ailluca paicunapaj huauqui Simeón aillutaca: “Ñucanchij japina cashca allpata quichungapajca ishqui tucushpa, cananeocunahuan macanacugrishun. Chai q'uipaca cancuna japina cashca allpata quichungapajpish, ishqui tucushpallataj macanacugrishunllami” nijpimi Simeonpaj ailluca Judapaj ailluhuan rirca.
4Judá aillu macanacunaman chashna huichiyajpica, Mandaj Diosca cananeocunata, ferezeocunataca paicunapaj maquipimi churarca. Chaimi paicunataca Bezec pueblopi, 10.000 runacunata huañuchircacuna. 5Adoni-bezectapish Bezec pueblopi japishpami paihuanpish macanacushpa cananeocunatapish, ferezeocunatapish misharcacuna. 6Adoni-bezectaca, miticushpa callpacujta catishpa japishpami maquicunamantapish, chaquicunamantapish mama dedocunata p'itircacuna.
7Adoni-bezecca cashnami nirca: “Ñaupaca ñucamari canchis chunga jatun mandajcunata paicunapaj maquicunamantapish, chaquicunamantapish mama dedocunata p'itichircani. Paicunaca ñuca micucushpa urmachishcallatami meza ucumanta japishpa micujcuna carca. Ñuca imashinami paicunata llaquichircani, chai shinallatajmari ñucatapish Diosca llaquichin” nircami. Chai q'uipaca paitaca Jerusalenman apajpimi chaipi huañurca.
Judá ailluca Jerusalenta, Hebronta japishcami
8Judapaj ailluca, Jerusalenpi causajcunapajman rishpa mishashpaca tucuita japishpa, tucuicunata espadahuan huañuchishpami, chai pueblotapish tucuita rupachircacuna. 9Chai q'uipaca, Judapaj ailluca urcucunapi, Neguev pambacunapi, pambajlla llajtacunapi causaj cananeocunahuan macanamanmi uriyarcacuna. 10Judapaj ailluca, Hebronpi causaj cananeocunahuanpishmi macanacunaman rirca. Chai pueblopi causajcunata mandaj Sesai, Ahimán, Talmai runacunatapishmi huañuchircacuna. Chai puebloca ñaupaca, Quiriat-arba shutimi carca.
Otonielca macanacuita mishashcamanta paipaj huarmi cachun Acsa shuti huarmita chasquishcami
(Jos 15.15-19)
11Chaimantaca Judapaj ailluca, Debirpi causajcunahuan macanacunamanmi rirca. Chai puebloca ñaupaca, Quiriat-sefer shutimi carca. 12Chaipimi Caleb runaca: “Maijanpish Quiriat-seferpi causajcunahuan macanacushpa mishajmanca, Acsa shuti ñuca ushushitami paipaj huarmi cachun cusha” nirca.
13Chai macanacuipica Calebpaj q'uipa huauqui Cenazpaj churi Otonielmi misharca. Chaimi Calebca, Acsa shuti paipaj ushushita Otonielmanca paipaj huarmi cachun curca. 14Otonielca paipaj huarmi paihuan ña rigrijpimi, tarpuna allpacunata cambaj yayata mañai nishpa yachachirca. Acsa huarmi burromanta uricujpimi, paipaj yaya Calebca:
–¿Imatataj ningui?– nishpa tapurca.
15Chaimi paica:
–Ñucami cantaca shuj mañanata mañasha nini. Neguev pambapica allpacunataca ñami curcangui. Cunanca pugyu yacuyuj allpacunatapish cuhuayari– nijpimi, Calebca jahuamanpish ucumanpish pugyu yacuyuj allpacunata curca.
Judapaj, Benjaminpaj aillucuna allpacunata ashtahuan japishcami
16Moisespaj suegro ceneopaj huahua huahuacunaca palmera yuracuna tiyan pueblomantami, Judapi tiyaj shitashca pambaman Judapaj ailluhuan huichi rircacuna. Chai pambaca, Arad shuti pueblo c'uchullapi caj Neguev shuti pambapimi carca. Paicunaca chaipi causajcunahuanmi causarcacuna.
17Judapaj ailluca paipaj huauqui Simeonpaj ailluhuan rishpami, Sefat pueblopi causaj cananeocunahuan macanacushpa mishashpaca, pueblotapish tucui chingachishpa, chai pueblotaca Horma shutita shutichircacuna. 18Judapaj ailluca Gaza, Ascalón, Ecrón pueblocunataca chai muyundij llajtacunandijmi japircacuna. 19Judapaj ailluca, Mandaj Dios paicunahuan cajpimi, urcucunapi causajcunataca llujshichishpa cacharcacuna. Ashtahuanpish pambacunapi causajcunaca, fierro carrocunata charijcuna cajpimi paicunataca mana llujshichishpa cachai tucurcacuna. 20Calebmanca Moisés nishca shinallataj Hebrón pueblotami curcacuna. Paica Anacpaj quimsa churicunatami chai llajtamanta llujshichishpa cacharca. 21Benjaminpaj ailluca, Jerusalenpi causaj jebuseocunataca mana llujshichishpa cacharcacunachu. Jebuseocunaca Benjaminpaj ailluhuanmi Jerusalenpi cunancama causacuncuna.
Josepaj aillu Bet-el pueblota japishcami
22Josepaj aillupish Bet-elpi causajcunahuan macanacungapajmi huichiyarcacuna. Mandaj Diosca paicunahuanmi carca. 23Josepaj ailluca Bet-elpica purij shinalla ricujcunatami churarca. Chai puebloca ñaupamanca, Luz shutimi carca. 24Purij shinalla ricujcunaca chai pueblomanta llujshicuj shuj runahuan tupashpaca: “Cai puebloman yaicunata ricuchihuai. Can ricuchijpica cantaca mana huañuchishunchu” nircacunami.
25Chai runa chai puebloman maita yaicunata ricuchijpimi, paicunaca chai pueblopi causajcunataca tucuicunata espadacunahuan huañuchircacuna. Chai runallatami paipaj huasi ucupurandij llujshishpa richun saquircacuna. 26Chai runaca heteocunapaj llajtaman rishpami, shujtaj pueblota shayachirca. Chai pueblotaca Luz shutitami shutichirca, cunancama chai shutillatajmi.
Manasespaj, Efrainpaj aillucuna allpacunata ashtahuan japishcami
27Manasespaj aillupish Bet-seán, Taanac, Dor, Ibleam, Meguido pueblocunapi causajcunata, chai muyundij llajtacunapi causajcunatapish mana llujshichishpa cacharcacunachu. Chaimantami chaipi causaj cananeocunaca chaillapitaj causashpa catircacuna. 28Israelcunaca ashtahuan c'ari c'ari tucushpa ña tucuita paicuna mandashpami cananeocunataca yallitaj paicunapajta trabajachishpa causarcacuna. Ashtahuanpish paicunataca mana llujshichishpa cacharcacunachu.
29Efrainpaj aillupish, Gezerpi causaj cananeocunataca, mana llujshichishpa cacharcacunachu. Ashtahuanpish cananeocunataca, paicunahuan causachun saquircallami.
Caishuj aillucunapish allpacunata ashtahuan japishcami
30Zabulonpaj aillupish Quitrón, Naalal pueblocunapi causaj cananeocunataca, mana llujshichishpa cacharcacunachu. Ashtahuanpish cananeocunaca Zabulón aillupajta yallitaj trabajashpa paicunapaj chaupillapitajmi causarcacuna.
31Aserpaj aillupish Aco, Sidón, Ahlab, Aczib, Helba, Afec, Rehobpi causaj cananeocunataca mana llujshichishpa cacharcacunachu. 32Aserpaj ailluca cananeocunata mana llujshichishpa cachashpami, chaipi causaj cashca cananeocunallahuantaj causarcacuna.
33Neftalipaj aillupish Bet-semespi causajcunata, Bet-anatpi causajcunatapish mana llujshichishpa cacharcacunachu. Paicunapish chai llajtapi causaj cashca cananeocunallahuantajmi causarcacuna. Bet-semespi causaj, Bet-anatpi causaj cashca cananeocunaca Neftalí aillupajta yallitaj trabajashpallami causarcacuna.
34Amorreocunaca, Danpaj aillutaca pambajlla llajtacunaman uriyachun mana saquishpami, urcucunaman catircacuna. 35Chashnami amorreocunaca Heres urcupi, Ajalón, Saalbim pueblocunapi causashpa catircallacuna. Josepaj ailluca ña c'ari c'ari tucushpami, amorreocunataca paicunapajta yallitaj trabajachishpa causarcacuna.
36Amorreocunapaj lindeca Acrabim huichimantaca, Sela pueblomanta jahuacamami carca.
Currently Selected:
JUECES 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.