ÉXODO 1
1
Israelcuna Egiptopi jatun llaquicunata apashcami
1Israel Jacobpaj churicuna paihuan Egiptoman yaicujcunapaj cada familiapaj yayapaj shuticunaca caicunami: 2Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad, Aser shuticunami carca. 5Jacobpaj churicunamanta mirarishcacunaca canchis chungami carca. Joseca ñami Egiptopi carca.
6Josepish, tucui paipaj huauquicunapish, tucui paihuan huiñai shujtaj runacunapish ñami huañurcacuna. 7Israelcunaca mirarishpa yallitaj achcacuna tucushpami, Egiptopica jundarircacuna. C'ari c'aricunapishmi tucurcacuna.
8Chai punllacunami Egiptopica, Joseta mana rijsij shuj mushuj jatun mandaj yaicurca. Paimi pai mandacun gentecunataca: 9“Riquichij, israelcunaca ñucanchijta yalli achcacunamari, ñucanchijta yalli c'ari c'aricunapishmari. 10Ñucanchijca paicuna ama ashtahuan mirarichunca yachajcunamari cana canchij. Ñucanchijta p'iñajcunahuan jatun macanacui tiyajpica, paicunapish chaicunahuan tucushpa ñucanchijhuan macanacushpa mishashpaca, cai llajtamanta llujshishpa ringallatajmari” nirca.
11Chashna nishpaca, israelcunata yallitaj llaquichishpa trabajachichunmi millai mandajcunata churarcacuna. Chaicunaca Pitón, Ramesés pueblocunatami faraonpaj imallacunata huaquichinapaj cachun shayachichishpa trabajachircacuna. 12Chashna yallitaj llaquichijpipish israelcuna ashtahuan, ashtahuan mirarijpimi, egipciocunaca israelcunataca achcata mancharcacuna.
13Egipciocunaca israelcunataca yallitaj llaquichishpami trabajachircacuna. 14Paicunataca lodota rurachishpa ladrillocunata rurachishpa, allpapi sinchita trabajachishpa, shujtaj imata ruranacunapipish yallitaj llaquichishpa trabajachishpami mana maita causaipajta rurarcacuna. 15Egipto llajtata jatun mandajca, hebrea huarmicunata ricuj partera Sifra, Fúa huarmicunatapish cashnami nirca:
16–Hebrea huarmicuna huachacujpi paicunapajman rishpaca chai huahua c'ari cashcata, huarmi cashcata alli ricushpa, c'ari huahua cajpica huañuchinguichij, huarmi huahua cajpica causachun saquinguichij– nircami.
17Partera huarmicunaca Taita Diosta manchashcamantami, Egipto llajtata jatun mandaj mandashca shina mana rurashpa c'ari huahuacuna cajpipish mana huañuchishpa saquircallacuna. 18Chaimi Egiptota jatun mandajca, partera huarmicunata cayachishpa paicunataca:
–¿Ima nishpataj ñuca mandashcata mana cazushpa c'ari huahuacunataca, mana huañuchishpa saquircanguichijlla?– nishpa tapurca.
19Partera huarmicunaca faraontaca:
–Hebrea huarmicunaca mana egipcia huarmicuna shinachu. Ashtahuanpish paicunaca alli sinchi huarmicuna cashcamanta, partera manaraj paicunapajman chayajpimari huachanllacuna– nircacunami.
20Partera huarmicunata Taita Dios allita rurachijpimi, israelcunaca yallitaj mirarishpa c'ari c'ari tucurcacuna. 21Chai partera huarmicunaca Taita Diosta manchaj cajpimi, Taita Diosca paicunapaj familiacunataca ashtahuan mirachirca. 22Faraonca pai mandacun gentecunataca: “Israelcunapaj c'ari huahua huacharijpica, tucuicunata jatun yacupi shitaichij. Huarmi huahua huacharijpica causachun saquinguichijlla” nishpami mandarca.
Currently Selected:
ÉXODO 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.