APOCALIPSIS 1
1
Imalla tucuna cashcata Jesucristo ricuchishcami
1Diosca ñalla imalla tucunata paipajta rurajcunaman ricuchingapajmi, chai ricuchinataca Jesucristoman curca. Chaitaca Jesucristoca paipaj angelta cachashpami paipajta ruraj Juanman huillachirca. 2Dios imalla nishcatapish Jesucristo huillashcatapish, tucui imalla ricushcatapish Juanca alli huillajmi. 3Chai huillashca pajtana punllacunaca ñallami chayamucun. Imalla tucuna cashcata quillcashcata rezajpish, uyajcunapish chaipi imalla nishcata cazujcunapish cushichishcami canga.
Canchis pueblocunapi tandanacushca crijcunata allillachu canguichij nishcami
4Ñucaca Juanmi cani. Asia llajtapi caj canchis pueblopi tandanacushca crijcunamanmi quillcani: Diosca cunanpish, sarunpish shamunapaj cajpish paillatajmi. Paipaj jatun tiyarina ñaupajpi caj canchis espiritupaj mana c'uyaipajta c'uyashcapish sumaj causaita cushcapish cancunahuan cachun. 5Chaitaca ima shina cashcatataj huillaj Jesucristopish cuchun. Paica huañushcacunapaj chaupimanta punta causarijmi, cai pachapi jatun mandajcunatapish jatun mandajmi. Paica ñucanchijta c'uyashpami, paipaj yahuarhuan ñucanchij juchacunata maillarca. 6Chashna rurashpami ñucanchijtaca jatun mandajcunata, curacunata paipaj Yaya Diospajta rurachun rurarca. Chaimanta Jesucristoca tucuita rurai tucuj canapipish, jatunyachishca canapipish huiñai huiñaita cashca cachun. Chashna cachun.
7Uyaichij, Cristoca p'uyupimi shamucun.
Paitaca tucuicunami ricungacuna.
Paita lanzahuan tujsijcunapish ricungacunami.
Paita ricushpaca, cai pachapi tucui causajcunami jatunta huacangacuna.
Ari, chashnatajmi canga.
8“Ñucami callari A, tucuri Z shina, callarichijpish, tucurichijpish cani” ninmi Jatun Diosca. Paica cunanpish, sarunpish, shamuna cajpish Tucuita Rurai Tucujpish paillatajmi.
Muscuipi shina Runa aichayujta ricushcami
9Ñucaca, cancuna shinallataj llaquita apacuj, cancunapaj huauqui Juanmi cani. Dios mandacunpipish cancunahuanmi cani. Jesucristo shinallatajmi alli shunguhuan llaquita apacuni. Diospaj shimita huillashcamanta, Jesucristota ima shina cashcatataj huillashcamantapishmi ñucaca cai jatun yacu chaupipi tiyaj Patmos llajtapi churashca cani. 10Mandaj Jesuspaj punllapimi ñucataca tucuipi Diospaj Espiritulla pushacurca. Chaipimi, ñuca huashanijpica trompetapi tocaj shina sinchita rimashca, 11cashna uyarirca: “Ñucaca callari A, tucuri Z shinami, callarichijpish, tucurichijpish cani. Can imallata ricushcataca shuj libropi quillcashpa, Asiapi caj: Éfeso, Esmirna, Pérgamo, Tiatira, Sardis, Filadelfia, Laodicea canchis pueblocunapi tandanacushca crijcunaman cachai” nircami.
12Chaita uyashpaca, pi ñucata chashna nicujta ricungapaj tigrarishpaca, curi canchis candelerocunatami ricurcani. 13Chai chaupipica, Runa Aichayujman rijchaj, chaquicama churanata churashca, curi tajalita tajalishcami carca. 14Paipaj umapish ajchacunapish, yurajlla millma shina, rasu shina lamyacujmi carca. Paipaj ñahuicunapish, lunyacuj nina shinami carca. 15Paipaj chaquicunapish, hornopi bronceta rupachishpa llambujllata rurashca shina achij nicujmi carca. Pai rimashcapish, achca yacu huajiacuj shinami carca. 16Paipaj alli lado maquipica, canchis luzerocunatami charicurca. Paipaj shimimantaca ishqui filoyuj puntasapa espadami llujshicurca. Paipaj ñahuipish inti punllapi inti lamyacuj shinami carca.
17Paita ricushpaca, paipaj ñaupajpimi huañushca shina urmarcani. Chaipimi paipaj alli maquita ñuca jahuapi churashpaca, cashna nirca: Ama manchaichu. Ñucami callarichijpish, tucurichijpish cani, 18cunan causacujca huañurcanimi. Ashtahuanpish cunanca huiñai huiñaitami causacuni. Chashnatajmari cani. Huañuipajpish, Hadespajpish llavecunataca ñucami charicuni. 19Can imallata ña ricushcata, cunan imalla cajtapish, q'uipata imalla tucuna cashcata ricushcatapish quillcai. 20Ñuca alli lado maquipi canchis lucerocunata charicujta, canchis curi candelerocunata can ricushpa mana entendi tucushcapish cashnami: Canchis luzerocunaca, canchis llajtacunapi caj tandanacushca crijcunapaj angelcunami. Canchis candelerocunata ricushcaca, canchis pueblocunapi tandanacushca crijcunami.
Currently Selected:
APOCALIPSIS 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.