NÚMEROS 36
36
Quiquin aillupuralla cazarachun mandashcami
1Joseca Manasespaj yayami carca. Manasesca Maquirpaj yayami carca. Maquirca Galaadpaj yayami carca. Chai Galaadpaj familiacunamanta mirarishcacunata mandajcunami Moisespaj, israelcunata mandajcunapaj ñaupajman shamushpa, 2cashna nircacuna:
–Mandaj Diosca, ñucanchij amo quiquintami ñucanchij israelcunaman allpata ñucanchijpaj cachun sorteashpa cuchun mandarca. Mandaj Diosca ñucanchij amo quiquinllatatajmi ñucanchij huauqui Zelofehad japina cashca allpatapish paipaj ushushicunaman cuchun mandarca. 3Ashtahuanpish chai huarmicuna caishuj Israel aillupuracunapi cajhuan cazarajpica, ñucanchij yayacunamanta chai huarmicuna japishca allpacunataca caishuj aillu israelcunamari quichushpa mirachinga. Chashna rurajpica ñucanchij yayamanta japishca allpacunaca ashallamari tucunga. 4Ashtahuanpish ñucanchij israelcunapurapi allpacunata ñaupaman charicujllamantaj tigrachina huata chayajpicarin, chai huarmicuna japishca allpaca paicunapaj cusacunapaj japishca allpahuanmari shuj cutin paicunapajtaj tucunga. Chaipica ñucanchij ñaupa yayacunapaj aillucunamanta japishca allpaca ashtahuanmari p'ichillayashpa catinga– nircacunami.
5Chaimi, Moisesca Mandaj Dios ima shinalla mandashca shina israelcunata cashna mandarca:
–Josepaj ailluca allillatatajmi nin. 6Mandaj Diosca Zelofehadpaj ushushicunataca cashnami mandan: Paicunaca paicuna munashcahuan cazarachunlla. Ashtahuanca paicunapaj yayapaj aillupurallataj cachun. 7Israelcuna japishca allpacunaca ama aillun, aillunta pasachunmi chashna rurana canguichij. Israelcunaca paicunapaj yayacunamanta japishca allpataca shujtaj aillumanca mana cushpami cada aillu charirana can. 8Israelcunapurapi maijan huarmi paicunapaj yayacunamanta allpata japishca cashpaca, paicunapaj aillumanta mirarishca familiamanta cajhuan cazarachun. Chashnami paicunapaj yayamanta japishca allpataca paicuna quiquinpaj cachun charirangacuna. 9Chashna rurajpimi israelcunapaj allpaca maquin, maquinta caishujpaj chaishujpaj ailluman mana pasanga. Ashtahuanpish chashnami israelcunaca cada aillu paicunapaj quiquin allpataca ricurashpa charirangacuna– nircami.
10Shina nijpica Zelofehadpaj ushushicunaca, Mandaj Dios Moisesta mandashca shinallatajmi rurarcacuna. 11Zelofehad runapaj Maala, Tirsa, Hogla, Milca, Noa shuti ushushicunaca paicunapaj yayapaj huauquicunapaj churicunallahuantajmi cazararcacuna. 12Zelofehadpaj ushushicuna Josepaj churi Manasespaj familiamanta mirarishcapuracunallapitaj cazarajpimi, paicunapaj yayamanta japishca allpaca paicunapaj yayapaj aillupurallapitaj saquirirca.
13Cai mandashcacunaca israelcunata Moisés mandachun Mandaj Dios cushca mandashcami. Chaitaca Jericó ch'imbapurapi caj Jordán yacu c'uchupi caj Moab pambapimi curca.
Currently Selected:
NÚMEROS 36: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.