MATEO 28
28
Jesús causarishcami
(Mr 16.1-8; Lc 24.1-12; Jn 20.1-10)
1Samana punlla cayandij, semana callari punlla pacarigrijpimi, Magdalamanta María, caishuj Mariapish pambashca jutcuta ricugrircacuna. 2Chaipica ñapish allpaca jatunta chujchurcallami. Jatun Diospaj shuj angelpishmi jahua pachamanta uriyamurca. Paica utcuman c'uchuyashpami rumita anchuchishpa, chai jahuapi tiyarirca. 3Paica relampa achij nij shinami ricurirca. Churashcapish rasu shina yurajllami carca. 4Chai angelta manchashpami, soldadocunaca chujchushpa, huañushca shina tucurcacuna. 5Ashtahuanpish angelca, chai huarmicunamanca: “Cancunaca ama manchaichijchu. Chacatashca cashca Jesusta mashcacujtaca, ñucaca yachanimi. 6Paica mana caipichu. Pai nishca shinallatajmi causarirca. Mandaj Jesusta maipi churashca cashcapi ricuj shamuichij. 7Paica, huañushcacunapaj chaupimanta causarishcami nishpa paipaj yachacujcunaman huillagrichij. Cancunapaj ñaupa, Galileaman chayangapajmi paica ña rin. Chaipimi paitaca ricunguichij. Caitaca cancunaman huillanimi” nircami.
8Chai huarmicunaca, jutcumanta llujshishpaca manchaihuan cashpapish, achcata cushicushpami, paipaj yachacujcunaman huillangapaj callpashpa rircacuna. 9Yachacujcunaman paicuna huillanaman ricujpica Jesusca:
–¡Allillachu canguichij!– nishpa ñapish ricurijpica, chai huarmicunaca Jesuspajman c'uchuyashpa, paipaj chaquita ugllarishpami adorarcacuna.
10Chaimi Jesusca:
–Ama manchaichijchu. Ñuca huauquicuna Galileaman richun, richij huillagrichij. Chaipimi ñucataca ricungacuna– nirca.
Soldadocunaca curacunata pushajcunaman imalla tucushcata huillashcami
11Huarmicuna ñanta ricujpirajmi, soldadocunamanta maijancunaca Jerusalenman rishpa, curacunata mandajcunaman tucui imalla tucushcata huillarcacuna. 12Chai curacunaca, cunaj yuyajcunahuan tandanacushpa yuyarinacushca q'uipaca, soldadocunaman achca cullquita cushpami: 13“Cancunaca: “Paipaj yachacujcunami, ñucanchij dormicujpi tuta shamushpa shuhuashcacuna” ninguichij. 14Mandaj Pilato caita yachajpica, cancunata ama imata nichun, ñucanchij paihuan rimashunllami” nircacunami.
15Soldadocuna cullquita japishpaca, paicuna yachachishca shinallatajmi nircacuna. Chaimi judiocunapurapica, cunan punllacunacama Jesustaca shuhuashcami nishpa parlancuna.
Tucuimanta yalli jatun ruranata Jesús mingashcami
(Mr 16.14-18; Lc 24.36-49; Jn 20.19-23)
16Jesuspaj chunga shuj yachacujcunaca, pai mandashca shinallatajmi Galileapi tiyaj urcuman rircacuna. 17Maijancuna: Paichu manachu pai nishpa yuyacujpipish Jesusta chaipi ricujcunaca adorarcacunami. 18Chaipi Jesús paicunapajman c'uchuyashpaca: “Jahua pachapi, cai pachapipish tucuita mandanataca ñucamanmi curca. 19Chaimanta tucui cai pachata richij, ñuca yachacujcunata ruraichij. Paicunataca Yayapaj, Churipaj, jucha illaj Espiritupaj shutipi bautizaichij. 20Cancunata ñuca tucui imalla mandashcacunata paicunapish rurachun yachachinguichij. Cai pacha tucuringacamami, tucui punllacuna ñucaca cancunahuan casha” nircami. Chashna cachun.
Currently Selected:
MATEO 28: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.