MATEO 26
26
Jesusta huañuchingapaj yuyarishcami
(Mr 14.1-2; Lc 22.1-2; Jn 11.45-53)
1Cai tucuita huillashca q'uipami Jesusca, paipaj yachacujcunataca: 2“Pascua fiestapajca, ishqui punllalla illashcataca yachanguichijmi. Chaipimi Runa Aichayujtaca, chacatachun entreganga” nircami.
3Chai punllallatajmi curacunata mandajcuna, mandashcacunata quillcajcuna, israelcunapaj cunaj yuyajcunapish, curacunata jatun mandaj Caifás curapaj huasi canllapi tandanacurcacuna. 4Chaipimi Jesustaca ima shinapish umashpa, japishpa huañuchinata yuyarinacurcacuna. 5Ashtahuanpish paicunaca:
–Cai fiesta punllacunapica ama japishunchijchu, ñataj gentecuna bullashpa ñucanchijtaraj imatapish ninman– nircacunami.
Betaniapi Jesús cajpi mishquiman ashnacujta umapi tallishcami
(Mr 14.3-9; Jn 12.1-8)
6Betaniapica, lepra ungüihuan cashca Simonpaj huasipi Jesús cajpimi, 7shuj huarmica, alabastro botellapi achca valij mishquijllata ashnacujta apashpa c'uchuyamushpa, mezapi Jesús tiyacujpi, paipaj umapi tallirca. 8Yachacujcuna chaita ricushpaca p'iñarishpami:
–¿Ima nishpajtaj caitaca yanga tallin? 9Chaitaca, achca cullquipi c'atushpa, huajchacunaman cushpachari alli canman carca– nircacuna.
10Chaita Jesús yachashpaca:
–¿Ima nishpataj cai huarmitaca chashna rimanguichij? Paica, ñucapajca allitamari ruran. 11Huajchacunaca mana illangachu. Ashtahuanpish ñucaca, ña mana cancunahuan causacushallachu. 12Pambanapaj ñuca cuerpo allichishca cachunmi mishquijllata ashnacujtaca cai huarmica ñucapi tallishca. 13Tucui cai pachapica, maipipish cai alli huillaita huillacushpaca, cai huarmi imata rurashcatapishmi huillangacuna. Chaipica allitamari rurashca nishpami yuyaringacuna. Chashnatajmi canga– nircami.
Judas Iscariote Jesusta entregasha nishcami
(Mr 14.10-11; Lc 22.3-6)
14Chai q'uipami, chunga ishqui yachacujcunapuramanta Judas Iscarioteca, curacunata mandajcunapajman rishpaca: 15“Jesusta huañuchichun ñuca entregajpica ¿imatataj cusha ninguichij?” nijpi paicunaca, quimsa chunga cullquitami cushun nishpa curcacuna. 16Chai pachamantami Jesusta ima shina entregana yuyailla carca.
Mandaj Jesusca pai huañuna cashcata yuyarishpa micushcami
(Mr 14.12-25; Lc 22.7-23; Jn 13.21-30; 1 Co 11.23-26)
17Levadura illaj tandata micuna fiesta callari punllapimi, yachacujcuna Jesuspajman c'uchuyashpaca:
–Pascua fiestapi micunapajca ¿maipitaj allichichun ningui?– nijpi,
18Jesusca:
–Puebloman richij. Chaipi shuj runataca: “Yachachijca: Ñuca huañuna punllaca ñami chayamugrin. Cambaj huasipimi ñuca yachacujcunandij, Pascua fiestata yuyarishpa micugrini ninmi” nigrichij– nircami.
19Yachacujcunaca, Jesús mandashca shinallatajmi, Pascua fiestata allichircacuna.
20Ña tutayajpi, chunga ishqui yachacujcunandij Jesusca micungapaj tiyarishpa, 21micucushpami Jesusca:
–Cancunapuramanta shujmi, ñucataca huañuchichun entregagrin. Chashnatajmi canga– nirca.
22Chaimi achcata llaquirishpa shuj, shuj Jesustaca:
–¿Amito, ñucachu cani? ¿Ñucachu cani?– nishpa tapunacucujpimi, 23Jesusca:
–Ñucahuan platopi maquita satij, chaimi ñucataca huañuchichun entreganga. 24Runa Aichayujca, Quillcachishcapi nishca shinallatajmi huañugrin. ¡Aij, Runa Aichayujta huañuchichun entregaj runalla! Chai runaca mana huacharishca cashpachari, alli canman carca– nircami.
25Chaimi paita huañuchichun entregangapaj caj Judasca:
–Yachachij, ¿ñucachu cani?– nijpi, Jesusca:
–Canllataj ninguica– nirca.
26Ña micucushpami Jesusca, tandata japishpa, Diosta pagui nirca. Chaita chaupishpa, paipaj yachacujcunaman cushpaca:
–Japichij, micuichij, caica ñuca cuerpomi– nishpami curca.
27Copata japishpapish, Diosta pagui nishpami:
–Cai copamanta tucuicuna ubyaichij nishpa cushpaca, 28caica achcacunapaj juchacunata perdonangapaj mushuj ruranata callarichishcata ricuchij ñuca jichana yahuarmi. 29Cancunataca cashnami nini. Ñuca Yaya mandacujpi mushujta ubyangacama, uvasmanta capishca vinotaca cunanmanta pacha mana cancunahuan ubyashachu– nircami.
Pedroca Jesusta mana rijsinichu nina cashcata Jesús huillashcami
(Mr 14.26-31; Lc 22.31-34; Jn 13.36-38)
30Himnota cantashca q'uipa chaimanta llujshishpaca, Olivocuna tiyan urcumanmi rircacuna. 31Chaipimi Jesusca:
–Quillcachishcapica: “Michijtaca huañuchishami, oveja canllaca caita chaitami ringacuna” ninmi. Chaipi nishca shinallatajmi cunan tutallataj ñucata caticushcata saquishpa tucuicuna urata janajta ringuichij. 32Ashtahuanpish ñuca causarishca q'uipaca, cancunapaj ñaupami Galileaman risha– nijpimi,
33Pedroca:
–Canta caticushcata saquishpa tucuicuna rijpipish, ñucatajca manataj saquishachu– nirca.
34Chaimi Jesusca:
–Cunan tutallataj gallo manaraj cantajpimi, ñucataca quimsa cutin mana rijsinichu ningui. Chashnatajmi canga– nijpipish,
35Pedroca:
–Canhuan huañuna cajpipish, ñucaca manataj chashna nishachu– nijpica, caishuj yachacujcunapish tucuicunami chashnallataj nircacuna.
Jesusca Getsemanipi Diosta mañashcami
(Mr 14.32-42; Lc 22.39-46)
36Chai q'uipami Jesusca paipaj yachacujcunandij, Getsemaní shuti huertaman chayashpaca:
–Chainijllapi Diosta ñuca mañangacama, cancunaca caillapi tiyacuichij– nircami.
37Chaimanta Pedrota, Zebedeopaj ishqui churicunatapish pushashpa ricushpami, Jesusca yallitaj llaquiri callarishpa,
38–Ñuca almaca, huañunalla achca llaquillami. Cancunaca caipi saquirishpa, ñuca shinallataj ama dormishpa yuyaihuan caichij– nircami.
39Chaimanta ashallata rishpami, Jesusca cungurishpa cumurishpaca: “Ñuca Yayitu. Ima shinamanta jayajta ubyana shina llaquita mana apana cajpica, ñucamanta cai llaquita anchuchipai. Ñuca chashna nijpipish ama ñuca munashca shinaca rurapaichu, ashtahuanpish can munashca shina rurapai” nishpami Diosta mañarca.
40Yachacujcunapajman tigrashpa paicunata dormicujta japishpami, Pedrotaca cashna nirca:
–¿Manachu ñuca shinallataj shuj horasllatapish rijcharishca cai tucunguichij?
41Llaquicunata mishangapaj chaparaichij, mañaraichij. Espirituca mañanata yuyanmi, ashtahuanpish aichaca shaicushcami– nircami.
42Cutin rishpaca: “Ñuca Yayitu, ima shinamanta jayaj ubyana shina cai llaquita ñuca apanallataj cajpica, cambaj munaita rurapai” nishpami, caihuanca ishqui cutin Diosta mañarca.
43Cutin tigramushpapish, dormicujtami japirca. Paicunapaj ñahuicunaca yallitaj dorminaihuanmi carca. 44Paicunataca chaillapitaj saquishpami cutin rirca. Caihuanca, quimsa cutinmi chai shinallataj shimicunahuan Diosta mañarca. 45Chaimanta paipaj yachacujcunapajman c'uchuyashpaca:
–¡Cancunaca dormicuichijlla, samaricuichijlla! Runa Aichayujta juchayujcunapaj maquipi entreganaca, ñami pajtashca. 46¡Jatarichij, jacuchij! Riquichigari, ñucata huañuchichun entregajca ñami c'uchuyamucun– nircami.
Jesusta prezu japishcami
(Mr 14.43-50; Lc 22.47-53; Jn 18.2-11)
47Jesús chashna rimacujpirajmi, chunga ishquipuramanta caj Judasca ña chayamurca. Paihuanca curacunata mandajcuna, israelcunapaj cunaj yuyajcunapish cachashca achca runacunami espadacunahuan, caspicunahuan shamurcacuna. 48Jesusta japichij Judasca: “Maijantami ñuca muchani, chaimi canga. Paita japinguichij” nishpami, yachachishca carca. 49Jesuspajman c'uchuyamushcahuanmi:
–Yachachij, ¿allillachu cangui?– nishpa mucharca. 50Chaimi Jesusca:
–Amigo, imata rurangapaj shamushca cashpaca rurailla– nicujpica, chai shamujcunaca Jesuspajman c'uchuyashcahuan ñapish huaicashpa japircallacuna. 51Ashtahuanpish Jesushuan cajcunamanta shujca, espadata surcushcahuan, curacunata mandajpajta rurajtaca, rinrinta p'itijpimi, 52Jesusca:
–Cambaj espadata huaquichinapi huaquichi. Espadahuan macanacujcunataca, espadallahuantaj huañuchishcami canga. 53Ñuca Yayata mañajpica, huaranga huaranga angelcunata cunanllataj cachana cashcataca ¿manachu yachangui? 54Chashna mitsarijpica, ¿ima shinataj Quillcachishcapi nishca shinaca pajtangari? Chaica pajtanatajmi can– nircami.
55Chaipimi Jesusca, paita japijcunataca cashna nirca:
–¿Shuhuata shinachu espadacunahuan, caspicunahuan japinaman shamushcanguichij? Ñucaca Diospaj huasipica punllantami yachachishpa cancunallahuantaj carcani. Chaipica mana japircanguichijchu. 56Profetacuna Quillcashca pajtachunmi, tucui caicunaca pajtashca– nircami.
Yachacujcunaca tucuicunami Jesusta saquishpa miticushpa rircacuna.
Jesusca mandajcunapuralla tandanacushcapaj ñaupajpimi
(Mr 14.53-65; Lc 22.54-55, 63-71; Jn 18.12-14, 19-24)
57Jesusta japijcunaca, curacunata mandaj Caifaspajmanmi pusharcacuna. Chaipica mandashcacunata quillcajcuna, cunaj yuyajcunapishmi tandanacushca carca. 58Jesusta pushajpica Pedroca, huasha huashalla catishpami, curacunata mandajpaj huasi canllaman yaicurca. Chaipica, Jesusta imata rurajta ricungapajmi huasita cuidajcunahuan tiyarirca. 59Curacunata mandajcuna, cunaj yuyajcunapish, tucui mandajcunapuralla tandanacushcacunapish tandanacushpami, Jesusta huañunami cangui ningapaj Jesusmanta llullashpa huillachun mashcarcacuna. 60Jesusmanta achcacuna llullashpa huillajpipish, huañuchinapaj shinataca mana imata japircacunachu. Chaicunapaj q'uipa ishqui llullashpa huillaj runacuna shamushpami: 61–Caica: “Diospaj huasita urmachishpa, quimsa punllapica cutin shayachishallami” nircami– nishpami huillarcacuna.
62Chaimi curacunata mandaj shayarishpaca, Jesustaca:
–Canta caicuna juchachicujpipish ¿manachu imata cutichingui?– nishpa tapurca.
63Ashtahuanpish Jesusca imata mana nijpimi curacunata mandajca:
–Causaj Diospaj shutipimi nini. ¿Canca Diospaj Churi, Cristotajchu cangui? ñucanchijman huillaiyari– nircami.
64Chaimi Jesusca:
–Ari, canllataj ña chashna ninguica. Caitapishmi huillasha nini: Cunanmanta pacha Runa Aichayujtaca, poderyuj Diospaj alli ladopi tiyacujtami ricunguichij. Cutin jahua pachamanta p'uyupi shamucujtapishmi ricunguichij– nircami.
65Chaipica curacunata mandajca, yallitaj p'iñarishpami paipaj churanacunata lliquirishpaca:
–¡Diostamari c'amin! ¿Imapajtaj ashtahuan huillajcunata tapucushunchijlla? Dios tucushpa rimarijtaca cancunallataj ña uyanguichijmi. 66Cancunaca ¿imatataj yuyanguichij?– nijpi, paicunaca:
–¡Paica huañunatajmi can!– nircacunami.
67Chashna nishpaca, ñahuipi ch'ucashpami huajtarcacuna. Maijancunaca, ñahuipi chajyachishpami, 68cashna nircacuna:
–Maijanta huajtanchij Cristo cashpaca, pi huajtashcata huillayari– nircacunami.
Pedroca Jesusta mana rijsinichu nishcami
(Mr 14.66-72; Lc 22.56-62; Jn 18.15-18, 25-27)
69Chaipica Pedro huasi canllapimi tiyacujpimi, shuj servij huarmi c'uchuyashpaca:
–Canpish Galileamanta Jesushuanmi carcangui– nijpi,
70Pedroca, tucuicunapaj ñaupajpimi:
–Can pimanta rimacushcatapish mana entendinichu– nirca.
71Chashna nishpa huasi canllaman yaicuna punguta Pedro llujshicujpimi, shujtaj servij huarmi ricushpaca chaipi cajcunamanca:
–Cai runapish Nazaretmanta Jesushuanmi carca– nirca.
72Chaipipish cutinllatajmi Pedroca:
–¡Dios ricucunmi chai runataca manataj rijsinichu!– nirca.
73Chai asha q'uipaca, chaipi cajcuna Pedropajman c'uchuyamushpaca:
–Canpish paicunapurallatajmi cangui. Paicuna shinallatajmi rimangui– nircacunami.
74Chaimi Pedroca:
–¡Ñuca llullajpica Dios llaquichichun. Chai runataca mana rijsinichu!– nicujpica, galloca cantarcallami. 75Chaimi Pedroca: “Gallo manaraj cantajpimi ñucataca, quimsa cutin mana rijsinichu ningui” nishpa, Jesús nishcata yuyarishpa canllaman llujshishpaca, achcata llaquirishpa huacarca.
Currently Selected:
MATEO 26: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.