MATEO 22
22
Cazamento bodamanta yuyachishpa parlashcami
1Jesusca yuyachij parlocunallahuantajmi, ashtahuan cashna nishpa cutichirca:
2“Jahua pachamanta mandacunca, shuj jatun mandaj paipaj churita cazarachicushpa bodata ruraj shinami. 3Chai mandajca bodaman cayashcacunata pushamuchunmi, paipajta rurajcunata cacharca. Ashtahuanpish paicunaca mana shamushun nircacunachu. 4Mana shamushun nijpimi, jatun mandajca paipajta ruraj shujtajcunata, cashna nishpa cutin cacharca. Cayashcacunamanca cashna nigrichij: “Micuicunataca ñami allichishca. Huagracunatapish, huira animalcunatapish ñami huañuchichini. Tucuimi ña allichishca, bodaman shamuichij nishpa pushamugrichij” nircami. 5Ashtahuanpish chai cayashcacunaca, mana uyashpami: Shujca paipaj chagra ruraiman, caishujca paipaj c'atunaman rirca. 6Maijancunaca cachashca servijcunata japishpa, macashpami huañuchircacuna. 7Chaita jatun mandaj uyashpaca p'iñarishpami, chai huañuchijcunata huañuchichun, paicunapaj pueblotapish rupachichun, paipaj soldadocunata cacharca. 8Chaimi paipajta rurajcunataca cashna nirca: “Bodaca ña allichishcatajmi. Ashtahuanpish cayashcacunallatajmi bodaman shamunapajca mana cashcacunata ricuchincuna. 9Paicuna mana shamujpica, cunanca jatun ñan llujshincunaman rishpa, mashna ricurijcunata bodaman cayamugrichij” nircami. 10Chaimi paipajta rurajcuna ñancunaman rishpaca, tucui ricurijcunatami, allicunatapish, mana allicunatapish tandachimujpi shamujcunaca boda huasipi jundarcacuna.
11Cayashcacunata jatun mandaj ricunaman yaicushpaca, bodaman rina churanahuan mana caj shuj runatami ricurca. 12Paitaca: “Amigo, ¿ima shinataj bodaman shamuna churanahuan mana cashpapish, caimanca yaicumurcangui?” nijpi, paica imata mana ni tucurcachu. 13Jatun mandajca, paipajta rurajcunataca cai runataca: “Chaquita, maquita huatashpa, canlla amsaman shitaichij. Chaipica jatunta huacana, quirucuna canirinapishmi canga”. 14Cayashcacunaca achcacunami ashtahuanpish agllashcacunaca ashallami” nircami.
Tributomanta tapushcami
(Mr 12.13-17; Lc 20.20-26)
15Chai q'uipami fariseocuna rishpaca, Jesús ima mana allita nijpica, juchachingapaj nishpa parlanacushpaca, 16paicunapaj yachacujcunataca, Herodespura caj maijancunandij cashna nichun cacharcacuna:
–Yachachij, canca imatapish ima shina cashcatataj yachachijmi cangui. Diosta ima shina cazunatapish chaitataj yachachijmi cangui. Pita mana manchashpa paicunapi alli ricuringa raicullaca mana yachachijchu cangui. 17Chaimantami caita tapushun ninchij: Cesarman tributota cunaca mandashcapi nishca shinaca ¿allichu canga, imashi? ¿Canca ima ninguitaj?– nishpami tapurcacuna.
18Jesusca, paicuna millai shunguhuan nicujta yachashpami, cashna nirca:
–Mishqui shimi jayaj shungucuna, ¿ima nishpataj ñucataca umashun nicunguichij? 19Tributopaj cullquita ricuchichij– nijpica, shuj denario cullquitami ricuchircacuna. 20Chaimi Jesusca:
–¿Pipaj ñahuitaj, pipaj shutitaj?– nishpa tapujpi,
21paicunaca:
–Cesarpajmi– nijpi Jesusca:
–Cesarpajtaca paiman cuichij, Diospajtaca Diosman cuichij– nircami.
22Chaita uyashpaca mancharinacushpa rircallacunami.
Huañushcacuna causarinamanta tapushcami
(Mr 12.18-27; Lc 20.27-40)
23Chai punllallatajmi, huañushcacunaca mana causaringachu nij saduceocuna Jesusta tapunaman shamushpaca:
24–Yachachij, maijan manaraj huahuata charishpa huañujpica, chai viuda huarmihuanca huañujpaj huauqui cazarashpa, huauquipaj randi huahuacunata charichun nishpami Moisesca yachachishca. 25Chaipi nishca shinallatajmi ñucanchijpurapica, canchis huauquindij tiyarca. Punta huauquimi cazararca. Paica huahuacunata manaraj charishpami huañurca. Chai viuda huarmihuanca q'uipa huauquimi cazararca. 26Q'uipa huauquipish, chaipaj cati huauquipish canchis huauquindijtajmi mana huahuacunata charishpa huañurcacuna. 27Tucuicunapaj q'uipaca, chai viuda huarmipish huañurcami. 28Chai huarmica huañushcacuna causarimui punllapica, chai canchishuantaj cazarashca cashcamantaca ¿maijanpajshi canga?– nircacunami.
29Chaimi Jesusca:
–Cancunaca Quillcachishcacunatapish mana yachashcamanta, Diosca tucuita rurai tucuj cashcatapish mana entendishcamantami pandaricunguichij. 30Huañushcacuna causari punllapica, mana cazarangacunachu, cazarachinapish mana tiyangachu. Ashtahuanpish paicunaca, jahua pachapi caj Diospaj angelcuna shinami cangacuna. 31Huañushcacuna causarinamanta Dios ima nishcataca ¿manachu rezarcanguichij? Paica cashnami nirca: 32“Ñucaca Abrahampaj Dios, Isaacpaj Dios, Jacobpaj Diosmi cani” nircami. Chaimanta Diosca mana huañushcacunapaj Dioschu, ashtahuanpish causajcunapaj Diosmi– nircami.
33Jesús yachachishcata uyashpaca gentecunaca achcatami mancharircacuna.
Mandashcacunamantaca maijantaj ashtahuan yalli alli nishcami
(Mr 12.28-34)
34Jesús cutichishpaca saduceocunata upallachishcata uyashpami fariseocunaca tandanacurcacuna. 35Fariseocunapuramanta Mandashca ima nisha nishcata shuj yachachijmi, Jesusta pandachingapaj cashna nishpa tapurca:
36–Yachachij, Mandashcacunamantaca ¿maijantaj ashtahuan yalli alli?– nijpimi,
37Jesusca:
–“Cambaj Mandaj Taita Diosta tucui shunguhuan, tucui almahuan, tucui yuyaihuan c'uyangui” ninmi. 38Cai mandashcami tucuimanta ashtahuan yalli allica. 39Q'uipa mandashcapipish: “Can quiquinta shinallataj shujtajcunatapish c'uyangui” ninmi. 40Mandashcacunapipish, profetacuna huillashcacunapipish cai ishqui mandashcacunami tucuimanta yalli alli– nircami.
¿Cristoca pipaj churitaj?
(Mr 12.35-37; Lc 20.41-44)
41Tandanacushca fariseocunatami Jesusca: 42–Cristomantaca ¿imatataj yuyanguichij? ¿Pipaj Churitaj canga?– nishpa tapujpi, paicunaca:
–Davidmantami– nircacunami.
43Chaimi Jesusca:
–Shinashpaca ¿ima nishpataj Davidca, Diospaj Espíritu yuyaita cujpi Cristotaca, Mandajmi nishpa cashna nirca?:
44“Jatun Diosca, ñucata Mandajtaca:
Canta p'iñajcunata cambaj chaqui sarunapi churangacama, ñuca alli ladoman tiyarilla” nircami.
45Davidllataj ñucata Mandaj nijpica ¿ima shinataj Cristoca paipaj churica cangari?– nijpica,
46pi mana imata ni tucurcacunachu. Chai punllamanta pi mana ashtahuan imata tapurcacunachu.
Currently Selected:
MATEO 22: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.