JUAN 2
QCHI04
2
Galileapi caj Caná pueblopi cazamiento boda tiyashcami
1Chaimanta quimsa punlla q'uipami Galileapi caj Caná pueblopica cazamiento boda tiyarca. Jesuspaj mamapish chaipimi carca. 2Jesuspish, paipaj yachacujcunapish cayashca cashpami chaiman rircacuna. 3Chai cazamiento bodapica vinomi tucurishca carca. Chaimi Jesuspaj mamaca:
–Vinoca ñami tucurin– nijpi,
4Jesusca:
–Mama, ¿ima nishpataj chashnaca ningui? Ñuca ruranata callarina horasca manaraj chayamushcachu– nirca.
5Chaimi paipaj mamaca servijcunataca:
–Pai tucui imalla nishcata ruraichij– nirca.
6Chaipica, yacuta churanapaj rumimanta rurashca sujta p'unducunami tiyarca. Chai p'unducunaca maijanca quimsa puñu, chuscu puñu yacutami apaj carca. Judiocunaca Taita Diospaj ñaupajpi alli ricuringapaj, maillaringapajmi chaipica yacuta charijcuna carca. 7Jesusca servijcunataca:
–Cai p'unducunapi yacuta jundachichij– nijpimi, paicunaca jundachircacuna. 8Ña jundachijpimi Jesusca servijcunataca:
–Cunanca ashata huishishpa, alhuajanoman cugrichij– nijpimi paicunaca cugrircacuna. 9Alhuajanoca, yacu vino tucushcata ashata ubyashpaca, maimanta apamushca cashcata mana yacharcachu. (Yacuta apamushpa p'undupi churaj servijcunallami yacharca). Chaimi noviota cayashpaca, 10cashna nirca:
–Tucuicunamari alli vinotaraj cuncuna. Ña achcata ubyashca q'uipamari chagrushca vinotaca cuncuna. Ashtahuanpish canca alli vinotarajmari q'uipapaj charicushcangui– nirca.
11Jesusca Galileapi caj Caná pueblopimi, milagrota ruranataca callarirca. Paica tucuita rurai tucuj cashcata chaipi ricuchijpimi, paipaj yachacujcunaca paita crircacuna.
12Chai q'uipami Jesusca, paipaj mamandij, huauquicunandij, yachacujcunandij, Capernaumman rishpa, asha punllacunata chaipi saquirircacuna.
Taita Diospaj huasipi c'atucujcunata Jesús llujshichishpa cachashcami
(Mt 21:12–13; Mr 11:15–18; Lc 19:45–46)
13Judiocunapaj Pascua fiesta ñalla chayamucujpimi, Jesusca Jerusalenman rirca. 14Taita Diospaj huasiman Jesús yaicushpaca huagracunata, ovejacunata, palomacunata c'atucujta, cullquita cambiacujcunapish chaipi cajtami japirca. 15Taita Diospaj huasi ucupi chaita ricushpaca, huascata azotinata rurashpami azotishpa tucuicunata ovejacunandij, huagracunandij canllaman llujshichirca. Cullquita cambiajcunapaj mizacunatapish t'angashpa shitashpami, tucui paicunapaj cullquitapish pambaman tsirapashpa shitarca. 16Palomacunata c'atujcunataca:
–¡Caicunata caimanta anchuchichij! ¡Ñuca Yayapaj huasitaca ama c'atuna, randina huasita ruraichijchu!– nircami.
17Chaita ricushpami paipaj yachacujcunaca: “Cambaj huasita llaquishcamanta huañucunimi” nishpa quillcashca tiyashcata yuyarircacuna. 18Jesús chashna rurajpimi judiocunaca:
–Canca ¿ima cani nishpataj chashnaca rurangui? Shinashpaca ima milagrota rurashpa ricuchiyari– nijpi,
19Jesusca:
–Cai Taita Diospaj huasita urmachichij. Q'uimsa punllapica shayachishallami– nirca.
20Chaimi judiocunaca:
–Cai Taita Diospaj huasica, chuscu chunga sujta huatapi shayachishcami carca. ¿Canca quimsa punllallapichu shayachisha ningui?– nircacuna.
21Ashtahuanpish Jesusca Taita Diospaj huasita chashna nishpaca, paipaj cuerpotami nicurca. 22Huañushcacunapaj chaupimanta causarijpimi paipaj yachacujcunaca, Jesús chashna nishcatapish, Taita Dios Quillcachishcatapish, Jesús rimashca Shimicunatapish yuyarishpa crircacuna.
Jesusca gentecunapaj shungu ima shina cashcataca yachanmi
23Jesusca Pascua fiestapi Jerusalenpi cashpa achca milagrocunata rurajta ricushpami, achcacuna paita crircacuna. 24Crinchijmi nijpipish paicunapaj shungu ima shina cashcata yachashcamantami Jesusca paicunahuanca mana apanacurca. 25Chai gentecunapaj shungu ima shina cashcataca pi mana huillajpipish Jesusca yacharcallami.

Texto Bíblico © Sociedades Bíblicas Unidas, 1989.

Dios Rimashca Shimicunami © Sociedades Bíblicas Unidas, 1989.

Texto: Biblia en Quichua Chimborazo, 1989

Learn More About Dios Rimashca Shimicunami