JUAN 14
14
Jesusca Yayapajman pushaj ñanmi
1–Ñuca rigrini nijpipish ama mancharichijchu. Yaya Diostapish crichij, ñucatapish crichij. 2Ñuca Yayapaj huasipica, causanaca achcami tiyan. Mana tiyajpica cancunaman huillaimanmi carcani. Cunanca cancuna causanata allichingapajmi rigrini. 3Ñuca rishpa cancuna causanata allichishca q'uipaca cancunapish ñuca maipimi cani cancunapish chaipi cachun pushangapaj tigramushami. 4Ñuca maiman ricujtaca yachanguichijmi. Ñuca maipi canman rina ñantapish rijsinguichijmi– nijpimi,
5Tomasca:
–Mandaj Jesús, can maiman ricujtaca mana yachanchijchu. Ñantacarin ¿ima shinataj rijsishunri?– nirca.
6Chaimi Jesusca:
–Ñucamari ñan cani, mana llullapish, causaiyujpish cani. Yayapajmanca pi mana paillatajca chayai tucunchu. Ñucami Yayapajman chayachij ñan cani. 7Ñucata rijsishpaca, ñuca Yayatapish rijsinguichijmi. Cunanca ñucata ñami ricunguichij chaimanta Yayatapish ñami rijsinguichij– nircami.
8Chaimi Felipeca:
–Mandaj Jesús, Yayata ñucanchijman ricuchi. Chaillamari ñucanchijpajca yalli alli canga– nirca.
9Chaimi Jesusca:
–Unitami cancunahuan carcani. Felipe ¿manarajchu ñucataca rijsingui? Pipish ñucata rijsijca, ñuca Yayatapish ñami rijsin. ¿Ima nishpataj canca: “Yayata ñucanchijman ricuchi” ningui? 10Ñucaca Yayahuan, Yayaca ñucahuan shujlla cashcataca ¿manachu cringui? Cancunaman ñuca imalla nishca shimicunataca, mana ñuca yuyaillamantachu nircani. Ashtahuanpish ñucapi causaj Yayami, tucui imalla pai munashcacunata rurachicun. 11Ñucaca Yayahuan, Yayaca ñucahuan shujlla cashcataca crichigari. Mana cashpaca ñuca rurashcacunata ruracushpallapish crichigari.
12Maijanpish ñucata crijca, ñuca rurashca shinallatajmi paipish ruranga. Ñucaca ñuca Yayapajman rishcamanta chai ñuca rurashcacunata yallitapishmi ruranga. Chaica chashnatajmi canga. 13Tucui imatapish ñucamanta Yayata mañajpica paica ñucamanta jatunyachishca cachun tucui cancuna mañashcata cushami. 14Imatapish ñucamanta mañajpica, chaita rurashami.
Jesusca jucha illaj Espirituta cachasha nishcami
15Ñucata c'uyashpaca, ñuca mandashcacunata ruraichij. 16Shujtaj cushichijta cancunaman cuchun ñuca Yayata mañashami. Chai cushichijca huiñaitami cancunahuan canga. 17Chai Espirituca imatapish chaitataj yachachijmi. Chai Espiritutaca cai pachapaj cajcunaca mana ricushcamanta, mana rijsishcamanta mana chasqui tucunchu. Ashtahuanpish cancunaca paitaca cancunapi causashcamanta rijsinguichijmi. Paica cancunapica causacungallami.
18Cancunataca Yaya mama illajlla shinataca mana saquishachu. Cancunapajman tigramushami. 19Cai pachapaj cajcunaca ashacamallami ñucataca ricungacuna. Chai q'uipaca ña mana ashtahuan ricungacunachu. Cancunaca ñucataca ricunguichijmi. Ñuca causacushcamanta, cancunapish causacunguichijllami. 20Chai punllami ñucaca, ñuca Yayahuan, cancunapish ñucahuan, ñucapish cancunahuan shujlla cashcataca yachaj chayanguichij. 21Maijanpish ñuca mandashcacunata yachashpa chaitataj rurajmi ñucata c'uyajca. Ñucata c'uyajtaca, ñuca Yayapish c'uyangami. Ñucapish c'uyashami. Ñuca ima shina cashcapish ñuca c'uyashcapimi ricurisha– nijpimi,
22Judasca:
–Mandaj Jesús ¿ima shinataj ñucanchijllaman ricurishpa, cai pachapaj cajcunamanca mana ricurisha ninguiyari?– nirca. (Chashna nijca mana Judas Iscariotechu carca).
23Shina nijpi Jesusca, cashnami nirca:
–Ñucata c'uyajca, ñuca huillashca Shimitaca cazungami. Ñuca Yayaca paita c'uyangami. Paipajman shamushpa paihuan causashunmi. 24Maijanpish ñuca huillashca Shimicunata mana cazujca, ñucataca mana c'uyanchu. Cancuna uyashca Shimicunaca mana ñuca yuyaillamantachu, ñucata cachaj Yaya huillachijpimi huillacuni.
25Ñucaca cancunahuan cashparajmi, tucui chaicunataca chashna nini. 26Ñuca Yayaca cancunata Cushichij cachun, paipaj jucha illaj Espirituta ñucapaj randi cachangami. Paimi cancunataca tucuita yachachinga, ñuca cancunaman tucui imalla yachachishcatapish cutin yuyachingami.
27Cancunamanca ñuca sumaj causaitami cuni, sumajta causachunmi chaitaca saquini. Cai pachapaj cajcuna cushca shinaca mana cunichu. Chaimanta cancunapaj shungupica ama musparinguichijchu, ama mancharinguichijchu. 28“Ñucaca rigrinimi, cutin cancunapajman tigramushami” nijtaca ña uyarcanguichijmi. Ñucata c'uyashpatajca, ñuca Yayapajman rigrini nijta uyashpaca, cushicunguichijmanmi. Ñuca Yayaca ñucata yallimari. 29Cunanca cai nishcacuna chashna tucujpica cancuna crichunmi manaraj chashna tucujpi cancunamanca ña huillani. 30Cai pachata mandajca ñamari shamucun. Cancunahuanca ña mana ashtahuan rimashachu. Pai shamushpapish ñucataca mana mishangachu. 31Chashna cajpipish cai pachapi cajcunaca ñuca Yayata ñuca c'uyashcatapish, pai mandashca shina ruracushcatapish yachachunmi chashna tucugrini.
¡Jatarichij, caimanta jacuchij!
Currently Selected:
JUAN 14: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.