JUECES 8
8
Gedeonca madianitacunata jatun mandajcunata prezu japishcami
1Efrainpaj ailluca Gedeontaca:
–Madianitacunahuan macanacunaman ricushpa ñucanchijta mana cayashpaca, ñucanchijtaca ¿imatataj rurashcanguichu imamí?– nishpami sinchita rimarcacuna.
2Chaimi Gedeonca:
–Cancuna rurashcahuan ch'imbapurashpa ricujpica ¿ima mana allitataj rurashcani? Efrainpaj aillu ch'alamushcaca ¿manachu Abiezer cozichashcata yalli alli? 3Madianitacunata jatun mandaj Orebta, Zeebtaca Jatun Diosmi cancunapaj maquipi churashca. Cancuna rurashcahuan ch'imbapurajpica, ima allita mana rurai tucushcanichu– nircami.
Gedeón chai shimicunata chashna rimajpica, Efraín aillu runacunaca paihuan p'iña cashca cashpapish alli tucurcallacunami.
4Chaimantaca Gedeonca paihuan caj, 300 runacunandijmi Jordán yacu c'uchuman shamushpa Jordán yacuta ch'imbarcacuna. Paicunaca shaicushca cashpapish ashtahuanmi madianitacunata catishpa rircacuna. 5Sucot pueblopi causajcunataca Gedeonca:
–Ñucami madianitacunata mandaj Zeba, Zalmuna jatun mandajcunata llaquichingapaj caticuni. Ñucahuan shamujcunami achca shaicushca, paicunaman asha micunata carapaichij– nircami.
6Sucot pueblota mandajcunaca:
–Cambaj soldadocunaman micunata carangapajca Zeba, Zalmuna jatun mandajcunataca ¿ñachari cambaj maquipi charicungui?– nircacunami.
7Chaimi Gedeonca:
–Zebatapish, Zalmunatapish Mandaj Dios ñuca maquipi ña churajpica, paicunapaj aichataca shitashca pambapi tiyaj cashacunahuan abrojo cashacunahuanmi trillasha– nircami.
8Chaimanta rishpaca Gedeonca, Peniel puebloman huichiyashpapish micunata carahuaichij nishpami mañarca. Chai pueblopi causajcunapish Sucotpi causajcuna shinallatajmi rimashpa mana cararcacuna. 9Penielpi causajcunatapish Gedeonca:
–Macanacuita mishashpa ñuca tigramushpaca, cai jatun torretaca urmachishami– nircami.
10Zeba, Zalmuna jatun mandajcunaca, Carcor pambapimi inti llujshin llajtamanta caj 15.000 soldadocunahuan tiyacurcacuna. Paicunapuramanta 120.000 soldadocunata israelcuna huañuchijpimi chaicunalla saquirircacuna. 11Chaimantaca Gedeonca Noba, Jogbeha pueblocunamanta inti llujshin ladoman carpa huasicunapi causacujcunapaj ñanta huichiyashpami paicunata llaquichirca. Paicunapaj soldadocuna mana cuidacushcamantami chashna rurarca. 12Chaimi Zeba, Zalmuna jatun mandajcunaca miticungapaj callparcacuna. Gedeonca madianitacunata ishqui jatun mandaj Zeba, Zalmunata japingacama catishpa prezu japijpimi, chai soldadocunaca yallitaj mancharircacuna.
13Joaspaj churi Gedeonca manaraj inti llujshijpi chai macanacuimanta tigracushpami, 14Sucot pueblopi causajcunapaj shuj huambrata japishpa callarishpa tapurca. Chai huambraca Sucot pueblota mandajcunapaj, cunaj yuyajcunapaj, shuticunataca canchis chunga canchistami quillcashpa curca.
15Gedeonca Sucot puebloman yaicushpami chaipi causajcunataca:
–Canmanpish, canhuan caj shaicushca runacunamanpish carachunca Zebatapish, Zalmunatapish ¿ñachari cambaj maquipi charicunguiyari? nishpami, asishpa mana cararcanguichij. Cunanca Zebatapish, Zalmunatapish ñami apamuni, caipimi– nircami.
16Chaipimi Gedeonca, Sucot pueblopaj cunaj yuyajcunataca, cashacunata japishpa, shitashca pambapi tiyaj abrojo cashacunatapish japishpa llaquichirca. 17Peniel pueblopi tiyaj jatun torretapish urmachishpa, chai pueblopi causajcunatapish huañuchircami.
18Chai q'uipami Gedeonca Zebatapish, Zalmunatapish:
–Tabor urcupi cancuna huañuchishca runacunaca ¿ima shina runacunataj carca?– nijpi paicunaca:
–Can shinallatajmi carca. Paicunaca jatun mandajpaj churicuna shinami carca– nircacuna.
19Chaimi Gedeonca:
–Ñuca mamapaj churicuna, ñuca huauquicunamari carca. ¡Causaj Mandaj Diospaj ñaupajpimi nini, paicunata cancuna mana huañuchishca cajpica, ñucapish cancunataca mana huañuchimanchu carcani!– nirca.
20Chaimi Gedeonca, paipaj punta churi Jetertaca:
–Jatari, caicunata huañuchi– nirca.
Ashtahuanpish paipaj churica huambraraj cashcamantami, paipaj espadata huaquichinamanta llujshichinata mancharca.
21Chaimi Zebapish, Zalmunapish Gedeontaca:
–Canllataj jatarishpa ñucanchijtaca huañuchiyari. Imatapish rurajpimi c'ari c'ari cashcataca ricun– nijpimi Gedeonca, jatarishcahuan Zebatapish, Zalmunatapish huañuchishpa paicunapaj camellocunapaj cungacunapi huarcushca lunatajlla sumajcunatapish japirca.
22Israelcunapish Gedeontaca:
–Madianitacunapaj maquimanta ñucanchijta quishpichishcamantaca canmi ñucanchijta mandaj cangui. Cambaj churipish, cambaj nietopish mandajmi canga– nircacuna.
23Chaimi Gedeonca:
–Ñucapish, ñuca churipish tucui cancunata mandajca mana cashunchu. Mandaj Diosmi tucui cancunata mandajca canga– nirca.
24Gedeonca cashnapishmi nirca:
–Cancunataca caillatami mañani. Ismaelitacuna aparishca cashca curi zarcillocunata cancuna apamushcacunata tucuicuna ñucaman cuchunllami mañani– nircami.
25Israelcunaca:
–Ñucanchijca tucui shunguhuan cushunllami– nishpami, linsota pambapi mantashpa, paicuna quichumushca zarcillocunataca tucuicuna churarcacuna.
26Chai curi zarcillocunaca, 1.700 siclotami pezarca. Chaita cushca jahuami madianitacunata jatun mandajcunata quichushca lunatajlla sumajcunatapish, tucui laya achca valij charinacunatapish, pucajlla sumaj linsocunatapish, camellocunapaj cungapi aparishca huallcacunatapish curcacuna. 27Gedeonca chai curihuanca shuj efodta rurashpami, pai causacun Ofra pueblollapitaj huaquichichirca. Israelcunaca chaihuan huainayashpami, Mandaj Diosmanta anchurircacuna. Chashnami chai efodca Gedeonpajpish, paipaj huasi ucupuracunapajpish ñitcana tucurca.
28Chaimanta pachami madianitacunaca israelcuna mandashca causashpa, cutinca mana umata alzai tucurcacuna. Gedeón causai punllacunapica, Israelpica chuscu chunga huatacunatami sumajta causarcacuna.
Gedeón huañushcami
29Joaspaj churi Jerobaal nishca Gedeonca, paipaj quiquin huasipimi causagrirca. 30Gedeonca achca huarmicunayuj cashpami, canchis chunga churicunata charirca. Gedeonpaj huahua huahuacunaca achcacunami carca. 31Siquem pueblopi charishca caishuj huarmihuanpish Gedeonca shuj churitami charirca. Chaitaca Abimelectami shutichirca.
32Joaspaj churi Gedeón ña yallitaj yuyaj cashpa huañujpica, abiezeritacunapaj Ofra pueblollapitajmi paipaj yaya Joasta churashca jutcullapitaj churarcacuna.
33Gedeón huañushca q'uipaca, israelcunaca cutinllatajmi Baal nishca dioscunahuan huainayarcacuna. Paicunapaj dios cachunca, Baal-berit diostami agllarcacuna. 34Israelcunaca paicunapaj muyundij llajtacunapi causajcuna p'iñashpa llaquichicujpi, paicunapaj Mandaj Dios quishpichishcataca mana yuyarircacunachu. 35Israelcunaca Jerobaal nishca Gedeón paicunapaj imalla allicunata rurashca shinaca, paipaj huahua huahuacunamanca pagui nishcataca mana ricuchircacunachu.
Currently Selected:
JUECES 8: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.