ISAÍAS 3
3
Judatapish Jerusalentapish llaquichinata huillashcami
1Tucuita Mandaj Jatun Diosca Jerusalenpi, Judapi allicunata cujta, tucuita rurai tucujta anchuchingami.
Micunatapish, anchuchingami.
Yacutapish anchuchingami.
2C'ari c'ari runatapish, alli macanacuj runatapish, jueztapish, profetatapish, adivinotapish, cunaj yuyajtapish,
3pichca chunga soldadocunata mandajtapish, alli nishca runatapish, cunajtapish, imatapish ruranata yachajtapish, alli rimanata yachajtapish anchuchigrinmi.
4Q'uipa huiñaicunallatami paicunata mandaj cachun churasha.
Huambracunallami paicunata mandajcuna canga.
5Cancunapurapica yallitaj jatun llaquimi tiyanga.
Caishuj chaishujmi llaquichinacunga.
C'uchullapi causajcunahuanmi llaquichinacunga.
Q'uipa huiñaicunapish yuyajcunata llaquichingapajmi jataringacuna.
Yanga runacunami alli nishca runacunata llaquichingapaj jataringacuna.
6Chashna yallitaj jatun llaqui cajpimi, paipaj yayapaj huasipi maijan shujtajta maquipi japishpaca: Canca churanata charinguimi.
Can ñucanchijta jatun mandaj tucui.
Cai llajta jatun llaqui tucushpa urmashcataca can allichi ninga.
7Shina nijpi chai llaqui punllaca chai runaca: “Ñucaca chai llaquicunataca imata mana rurai tucushachu.
Ñuca huasipipish micunapish mana tiyanchu, churanapish mana tiyanchu.
Ñucataca jatun mandaj cachunca ama churaichijchu” ningami.
8Jerusalenca ñuturishcami saquirishca.
Judaca urmashcamari.
Paicunapaj c'alluhuan, paicunapaj rurashcacunahuan, Mandaj Diosta p'iñachishcamanta, Mandaj Dios jatun mandaj cashcata yanganchishcamantami chashna tucushca.
9Paicunapaj ñahuillatajmi paicuna mana alli cashcataca ricuchin.
Paicunaca Sodomacuna shinallatajmi juchallishcatapish mana pingashpa huillanllacuna.
¡Aij paicunapaj causailla!
Paicunapaj llaquipajllatajmi montonacuncuna.
10Cashcata rurajtaca tucui imapipish allimi ringui ni.
Quiquin maquihuan rurashcatami micunga.
11¡Aij, yallitaj millaita rurajlla!
Tucui imapipish llaquicunallahuanmi ringa.
Paicunapaj quiquin maquihuan ima shina rurashca shinallatajmi pagashca canga.
12Ñuca agllashcacunata llaquichijcunaca huambracunallamari.
Ñuca agllashcacunata mandajcunaca huarmicunallamari.
Ñuca agllashcacunalla cancunataca pushajcunallatajmari umancuna.
Mana alli ñantamari pushancuna.
13Mandaj Diosca imalla rurashcata tapungapajmi ña shayacun.
Pai agllashcacuna ima shinalla cashcata ricuchishpami llaquichigrin.
14Mandaj Diosca pai agllashcacunata cunaj yuyajcunata, jatun mandajcunata, ima shina paicuna rurashcata ricuchishpa llaquichingapajmari shamugrin.
Cancunaca uva chagracunatamari millpurcanguichij.
Huajchacunata quichushcacunapish, cancunapaj huasicunapimari tiyacun.
15Ñuca agllashcacunataca ¿ima nishpataj sarushpa ñuturcanguichij?
Huajchacunataca ima nishpataj ñahuipi sarushpa chugrichircanguichij ninmi.
Tucuita Mandaj Jatun Diosca.
Sionpaj ushushicunata llaquichisha nishcami
16Mandaj Diosca cashnapishmi nin: “Sionpi causaj huarmicunaca jatun tucushcacunami.
Uma alzashca purijcunami.
Mana pingashpa purijcunami.
Bailashpa shina purijcunami.
Chaquicunapi churarishcacunahuan ch'ilin nichishpa purijcunami” ninmi.
17Chaimantami Jatun Diosca, Sionpaj ushushicunataca, lluchu umata saquinga.
Mandaj Diosca paicunapaj pinganayaj aichatapish, lluchullatami ruranga.
18Chai punllapica, Jatun Diosca chaquipi churarishca sumajcunatapish, umapi churarishca sumajcunatapish, ajchata charichina lunetacunatapish,
19huallcacunatapish, zarcillocunatapish brazaletecunatapish,
20umapi churashca linsocunatapish, changa uricunapi aparina sumajcunatapish, ajchata partina ñajchacunatapish, mishquijllata ashnaj aceitecunahuan aparishca uchijlla botellacunatapish, zarcillocunatapish,
21sortijascunatapish, singapi aparina sumajcunatapish,
22sumaj churanacunatapish, jahuata p'achallinacunatapish, ch'ungurina sumaj linsocunatapish, aisana muchilacunatapish,
23espejocunatapish, sumaj lino churanacunatapish, umapi churana linsocunatapish, umata huatarinacunatapishmi anchuchinga.
24Mishquijllata ashnacujhuan churarishca canapaj randica, millananata ashnacujmi tucungacuna.
Chumbipaj randica, huascahuanmi chumbilliringacuna.
Sumajta allichirishca ajcha canapaj randica, ajcha illaj lluchu umami tucungacuna.
Sumaj churanacunata churarishca canapaj randica, cañamazuta churarishcami cangacuna.
Alaja sumaj canapaj randica, ninapi rupashca alliyacuj shinami cangacuna.
25Cancunapaj c'aricunaca, espadapimi huañungacuna.
Fuerzasapacunaca jatun macanacuipimi huañungacuna.
26Paicunapaj pungucunapish llaquillami cangacuna.
Llaquilla cashcata ricuchij churanatami churaringacuna.
Puebloca shitashcami saquiringa.
Allpa pamballapimi tiyaringacuna.
Currently Selected:
ISAÍAS 3: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.