DEUTERONOMIO 34
34
Moisés huañujpi pambashcami
1Moisesca Moab llajtapi caj shitashca pambamantaca, Pisga urcuman rishpami Nebo urcu jahuaman huichiyarca. Chai urcuca Jericó ch'imbapurapimi. Chaimantami Mandaj Diosca paimanca, tucui Galaad llajtata Danpaj llajtacama ricuchirca. 2Neftalipaj, Efrainpaj, Manasespaj Judapaj tucui llajtacunatami, inti huashicun ladopi caj mama cuchacama ricuchirca. 3Neguev shitashca pambatapish, Jericó pueblo muyundij pugru pambacunatapish, palmera yuracuna tiyan pueblotapish Zoar pueblocamami ricuchirca. 4Mandaj Diosca Moisestaca:
“Abrahamman, Isaacman, Jacobmanca: Cai llajtatami cambaj huahua huahuacunamanca cusha” nircani. Chai llajtaman yaicuchun mana saquishpapish cambaj quiquin ñahuihuan ricuchunmi saquini nircami. 5Chai Moab llajtapimi Mandaj Diospajta ruraj Moisesca, Mandaj Dios nishca shinallataj huañurca. 6Paitaca Moab llajtallapitajmi, Bet-peor pueblo ch'imbapurapi caj pugru pambapi pambarca. Paita maipi pambashcataca cunancama pi mana yachancunachu. 7Moisesca 120 huatacunata charishpami huañurca. Huañuna punllacama paipaj ñahuicunaca allimi ricurca. Paica chairaj sinchi runami carca.
8Israelcunaca Moisés huañujpica, quimsa chunga punllacunatami Moab shitashca pambapi huacarcacuna. Chashnami Moisés huañushcamanta huacashpa llaquirina punllacunataca pajtachircacuna. 9Nunpaj churi Josueca, paipaj uma jahuapi Moisés paipaj maquita churashcamantami Diospaj espirituhuanpish, alli yachaihuanpish junda carca. Tucui israelcunaca, Mandaj Dios Moisesta mandashca shinallatajmi Josueta cazurcacuna.
10Chaimanta pachami Mandaj Dioshuan Moisés shina ñahui ñahui rimaj profetaca israelpurapica nunca mana tiyan. 11Tucui señalcunata, jatun mancharinacunata Egiptopi rurachun Mandaj Dios cachajpi Moisés rurashca shinaca pi mana rurashcachu. Chaicunataca faraonpaj ñaupajpi, tucui paipajta rurajcunapaj ñaupajpi, tucui paicunapaj llajtapimi chashna rurarca. 12Moisesca pipish mana ruraipajta, jatun mancharinacunatami tucui israelcuna ricucunpi rurarca.
Currently Selected:
DEUTERONOMIO 34: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.