3 JUAN 1
1
Allillachu canguichij nishcami
1Cunaj yuyaj ñucami, ñuca tucui shunguhuan c'uyashca Gayoman quillcani.
2C'uyashca huauqui, cantaca imapipish alli cachun, Diosta alli caticushca shinallataj cambaj aichapipish alli cachunmi munani. 3Huauquicuna shamushpa, mana llullapi can ima shina puricujta, ima shina cashcatataj huillajpimi, ñucaca achcata cushicurcani. 4Ñuca huahuacuna mana llullapi nishca shina puricun nijta uyashpami, tucuimanta yalli jatunta cushicuni.
Gayo pozachij cajpi alli nishcami
5C'uyashca huauqui, imatapish caishuj crijcunapaj allita rurashpaca, allitatajmari ruracungui. Ashtahuantajca shujtaj llajtamanta chayamujcunapajmi allita ruracungui. 6Can chashna c'uyaj cashcataca paicunaca tandanacushca crijcunapaj ñaupajpimi huillarcacuna. Diospajta rurana yuyailla paicuna ashtahuan rurashpa purichunca, ima illashcata cushpa allita rurapangui. 7Paicunaca Jesusta c'uyashcamantami, paimanta huillanaman llujshircacuna. Chaimi paicunaca mana judiocunaman huillashpaca imata mana japishpa huillacuncuna. 8Mana llullata ashtahuan huillachunca, ñucanchijmari paicunamanca imatapish cuna canchij. Chashna rurashpami tucuicuna huaicashpa huillacujcuna cashun.
Diospajta rurajcunata Diótrefes jarcashcami
9Ñucaca tandanacushca crijcunamanmi quillcarcani. Ashtahuanpish Diotrefesca, paicunapurapi pai mandaj canata munashcamantami, ñucanchij quillcashpa mandashcataca mana chasquin. 10Ñuca chaiman rishpaca, ñucanchijta mana alli nishpa rimashcatami paitaca cayashpa tapusha. Paica mana chaillatachu ruran, shujtaj huauquicuna chaiman chayajpipish mana chasquinchu. Maijancuna paicunapaj huasipi chasquisha nijpipish ama chasquichijchu nishpami jarcan. Chasquijcunataca tandanacushca crijcunamanta llujshichishpami cachan.
Demetrioca allicunata rurajmi cashca
11C'uyashca huauqui, millaita rurajtaca ama catishpa rurangui. Ashtahuanpish allita rurangui. Maijanpish allita rurajca Diospajmi, maijanpish millaita rurajca Diostaca manaraj ricushcachu.
12Demetriotaca, tucuicunami alli cashcata huillancuna. Pai ima shina causashcapish shujtajcuna allimi nishca shinallatatajmi ricuchin. Ñucanchijpish pai ima shina cashcata mana llullashpa huillashcataca cancunallataj yachanguichijmi.
Alli cashca canguichij nishpa tucuchishcami
13Ñucaca, achca quillcanatami cambajca charini. Chashna cashpapish tintahuan plumallahuanca mana quillcashpa cachasha ninichu. 14Chaipaj randica, ñahui ñahui parlanacungapajmi, utca ricunata shuyacuni.
15Sumaj causaica canhuan cachun. Cambaj rijsishcacunapish cantaca alli cashca cachun nincunami. Canpish ñucanchij rijsishcacunataca cada quiquinta alli cashca cachun nipangui.
Currently Selected:
3 JUAN 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.