2 SAMUEL 3
3
1Saulpaj familiahuan Davidpaj familiahuanca macanacucujllami carca. Davidmi ashtahuan ashtahuan mishashpa catirca. Saulpaj familiaca debilyashpami catirca.
Hebronpi huacharishca Davidpaj churicunami
(1 Cr 3.1-4)
2Davidpaj churicunaca Hebronpimi huacharirca. Paipaj punta churica Amnonmi carca. Paitaca Jezreel pueblomanta caj Ahinoam huarmimi huacharca. 3Q'uipa churica Quileabmi carca. Paitaca Carmel pueblomanta Nabalpaj huarmi cashca Abigailmi huacharca. Chai ishquipaj q'uipa churica Absalonmi carca. Paitaca Gesur pueblota jatun mandaj Talmaipaj ushushi Maacami huacharca. 4Quimsapaj q'uipaca Haguit shuti huarmimi Adonías churita huacharca. Chuscupaj q'uipa churitaca, Abital huarmimi Sefatías churita huacharca. 5Pichcapaj q'uipa Itream churitaca, Egla shuti Davidpaj huarmillatajmi huacharca. Davidpaj tucui chai churicunami Hebronpi huacharirca.
Abnerca Davidhuan tandanacushcami
6Saulpaj familiahuan Davidpaj familiahuanca macanacushpa caticurcallami. Saulpaj familiataca Abnerllami yuyaita cushpa mandashpa catirca. 7Saulca, Rizpa shuti caishuj huarmitami charirca. Paica Aja runapaj ushushimi carca. Is-bosetca Abnertaca:
–¿Ima nishpataj ñuca yayapaj caishuj huarmipi chayarircangui?– nishpami rimarca.
8Is-boset chashna nijpica, Abnerca achcata p'iñarishpami:
–¿Ñucaca Judá llajtapi causajcunapajca allcu shina yangallachari causashari? Ashtahuanpish ñucaca cambaj yaya Saulpaj huasi ucupurataca caicamaca achcatamari llaquicuni. Cambaj huauquicunatapish, canhuan alli apanacujcunatapish Davidpaj maquipica mana churarcanichu. Chai jahuamari cunanca chai huarmipi chayarishpa juchallishcangui nishpa juchachingui. 9Chaimanta cunanca Mandaj Dios Davidman imallata cusha nishca shina ñuca mana rurashpa, 10Saulpaj huasi familiata mandanataca David tucui israelcunata tucui Judá llajtata Dan pueblomanta, Beerseba pueblocama David mandachun ñuca mana pasachijpica, Taita Dios ñucata jatunta llaquichichun– nircami.
11Abner chashna nijpica, manchashcamantami Is-bosetca imata mana cutichi tucurca. 12Chashna nishpami Abnerca paipaj randi huillachun huillajcunata Davidpajman cachacushpaca: “Cai llajta pipaj cashcataca yachanguimi”. Ashtahuanca ñucahuan ari ninacushun. Chashna rurajpica ñuca quiquintajmi tucui israelcunata can mandana ucuman tigrachisha ninmi nichunmi cacharca.
13Chaimi Davidca: “Allimi, canhuan ari ninacushunllami. Shina cajpipish caitami mañani: Ñucata ricunaman shamushpaca, Saulpaj ushushi Micaltaraj ñucapajman mana apamushpaca, ñuca ñaupajpica ama ricuringui” nircami.
14Chai q'uipami Davidca, Saulpaj churi Is-bosetmanpish: “Ñuca huarmi Micalta tigrachi. Paimantaca patsaj filisteocunapaj charishca aicha mirga caracunata cushpami japircani” nishpa huillachun huillajcunata cacharca.
15Chaimi Is-bosetca, Mical huarmita quichumuchun, Micalpaj cusa Paltielpajman cacharca. Chai runaca Laispaj churimi carca. 16Paipaj cusaca huarmita catishpa huacaihuan Bahurimcama rijpimi, Abnerca: “Tigrashpa rilla” nijpi, paica tigrarca.
17Abnerca, israelcunata cunaj yuyajcunataca: “David cancunata jatun mandaj cachun churanataca saruncunamantami yuyaricurcanguichijlla. 18Cunanca jatun mandaj cachun churaichijlla. Mandaj Diosca Davidmanca cashnami rimashca: Ñucapajta ruraj Davidhuanmi ñuca israelcunataca filisteocunapaj maquimantapish, tucui paicunata p'iñajcunapaj maquimantapish llujshichisha” nircami.
19Abnerca, Benjaminpaj aillumanpish chashnallatajmi parlarca. Chai parlashcataca israelcunapaj, Benjamín aillupaj imalla alli cana cajta parlashcatami Abnerca Davidman huillangapaj Hebronman rirca. 20Abnerca ishqui chunga runacunandijmi David maipi can Hebronmanca chayarca. Chaipica Davidca Abnerhuanpish, paihuan shamujcunahuanpish shuj jatun micuitami rurarca. 21Chaipimi Abnerca Davidtaca:
–Ñuca amo jatun mandajpajman tucui israelcunata tandachingapajmi rigrini. Paicunata ari nichishpami, can jatun mandajca cambaj shungu yuyashca shina mandangui– nijpimi Davidca Abnertaca minchacama nirca. Abnerpish cushicuihuan rircallami.
Abnerta Joab huañuchishcami
22Joabpish, Davidpajta rurajcunapish macanacuimanta quichumushcacunahuan Hebronman chayamunapajca Abnerca ña mana Davidhuanchu cashca carca. Davidca Abnertaca cayaminchacama nishpa cachajpimi, paica imata mana manchashpa rishcalla carca. 23Joabpish paihuan caj soldadocunapish Davidpajman chayamuncami, Nerpaj churi Abner jatun mandajpajman shamushcatapish, Davidca cayaminchacama nishpa cachashcatapish, Abnerca imata mana manchashpa rishcatapish, Joabmanca huillarcacuna. 24Chaimi jatun mandajpajman Joab rishpaca:
–¿Imatataj rurarcangui? Abner cambajman shamujpica ¿ima nishpataj richun saquircanguilla? 25Nerpaj churi Abner ima shina cashcataca canllataj yachanguimi. Paica ¿manachu umangapajlla shamushca canga? Paica can maillaman llujshijta maita tigrajta, tucui can imalla ruracujta ricungaraicullamari shamushca canga– nirca.
26Davidpajmanta Joab llujshishpaca, David mana yachajllapimi, Abnerta mashcagrichun huillashpa purijcunata cacharca. Paicunaca Abnertaca, Sirapi tiyaj pugyu chaimantami tigrachimurcacuna. 27Hebronman Abner tigrajpica, Joabca paillahuan parlasha nishpami puebloman yaicuna pungu c'uchuman pusharca. Chaipimi paipaj huauqui Asaelta huañuchishcamantaca paitapish pechopi lanzahuan satijpi huañurca. 28Q'uipata David chaita yachashpaca: “Nerpaj churi Abnerpaj yahuarmantaca ñucapish, ñuca mandacunpish Mandaj Diospaj ñaupajpica, huiñaipaj ima juchachina illajllami canchij. 29Chaica Joabpaj paipaj yayapaj familiapaj jahuallapitaj urmashca cachun. Chaimanta Joabpaj huasipica yahuar cachariricujcunapish, lepra ungüihuan cajcunapish, taunallahuan purijcunapish, espadapi huañujcunapish, yaricaihuan cajcunapish amataj illachun” nircami.
30Cashnami Joabca paipaj huauqui Abisaindij tucushpa Abnertaca huañuchirca. Paicunapaj huauqui Asaelta Gabaón macanacuipi huañuchishcamantami paitapish huañuchircacuna.
31Davidca Joabtapish, tucui paihuan cajcunatapish: “Cancunapaj churanacunata lliquirichij, cañamazuta chumbillirishpa Abnerpaj ñaupajpi llaquilla cashcata ricuchichij” nircami. Chashna nishpaca, jatun mandajca Abnerta huandushcata catishpa rircallami. 32Hebronpi caj pambana jutcupi Abnerta churashpaca, jatun mandajca Abnerta churashca jutcu c'uchullapitajmi jatunta huacarca. Tucui israelcunapish huacarcacunami. 33Jatun mandajca Abnermantaca tononchishpami cashna huacarca:
“Abnerlla, ¿ima nishpataj huañuchij runa shinaca huañuna carcanguiyari?
34Canca maquicunatapish mana huatashca carcanguica.
Chaquicunatapish mana grillocunahuan tsagnashca carcanguica.
Millai runacunapaj ñaupajpi urmajcuna shinamari urmashcangui” nircami.
Chaipica tucuicunami Abnermantaca cutinllataj huacarcacuna. 35Chaipimi manaraj punlla tucurijpi micui ningapaj tucuicuna Davidpajman shamurcacuna. Paicunataca Davidca:
–Manaraj inti huashicujpi tandata, mana cashpaca ima shujtajta ñuca micujpica, Taita Dios ñucata jatunta llaquichichun– nishpami manataj micusha nirca
36Tucuicuna chaita yachajpica, paicuna munashca shinami tucuicunapi ricurirca. Jatun mandaj imalla ruracushcaca tucuicunapimi alli ricurirca. 37Tucuicuna tucui israelcunapish, chai punllallatajmi, Nerpaj churi Abnertaca jatun mandajca mana huañuchichun nishca cashcata entendircacuna.
38Jatun mandajca, paipajta rurajcunataca cashnapishmi nirca:
–Israelpica jatun pushaj, jatun alli nishca cunan punlla urmashcataca ¿manachu yachanguichij? 39Jatun mandaj cachun Taita Dios churashca cashpapish, ñucaca mana imata ruraipajmi cani. Sarviapaj churicunaca ñucapajca yallitaj sinchi llaquichijcunami. Paicuna chashna rurashcamantaca ima shina mana allita rurashca shinallataj Mandaj Dios paicunataca llaquichichun– nircami.
Currently Selected:
2 SAMUEL 3: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.