2 SAMUEL 24
24
Israelcuna mashna cashcata yachangapaj David yupashcami
(1 Cr 21.1-27)
1Mandaj Diosca israelcunahuan cutinllataj nina sindirij shina p'iñarishpami, Davidmanca israelcunapish, judacunapish mashna cashcata yupana yuyaita curca. 2Jatun mandajca paihuan caj soldadocunata mandaj Joabtaca:
–Tucui israelcuna mashna cashcata ñuca yachangapaj, Dan pueblomanta callarishpa, Beersebacama rishpa tucui Israel aillucunata yupamugri– nircami.
3Chaimi Joabca jatun mandajtaca:
–Jatun mandaj ñuca amito ¿imapajtaj israelcuna mashna cashcataca yachana yuyai tucurcanguiyari? Cambaj jatun mandaj Diosca pai agllashcacunataca cunan cashcamanta patsaj cutinhuan mirachishca alli canman. Jatun mandaj ñuca amoca chaita ricungacama causashca canguiman– nircami.
4Ashtahuanpish jatun mandajca mana uyashpami Joabtapish, soldadocunata mandajcunatapish chaitaca ruranatajmi canguichij nirca. Joabca soldadocunata mandajcunandij, jatun mandajpaj ñaupajmanta llujshishpaca, tucui israelcunata yupangapaj quillcanamanmi rircacuna. 5Paicunaca Jordán yacuta ch'imbashpaca, Gad pugru pambapi tiyaj Aroer uranijpi caj, Jazer pueblo c'uchupimi tiyarircacuna. 6Chai q'uipaca Galaadman rishpami, ucu ladoman caj Hodsi pueblomanpish rircacuna. Chaimantaca Dan-jaanman, Sidón muyundij llajtacunamanpishmi rircacuna. 7Chai q'uipaca sinchi pircayuj Tiro puebloman, heveocunapaj, cananeocunapaj tucui pueblocunamanpish rishpami, Judapi caj Neguev pamba Beerseba puebloman llujshircacuna. 8Paicunaca iscun quilla, ishqui chunga punllacunata tucui Israel llajtata purishca q'uipami Jerusalenman tigrarcacuna. 9Joabca tucui Israel llajtapi causajcunata quillcashpa yupashcatami jatun mandajman curca. Israelcunaca 800.000 runacunami carca. Paicunaca tucuicunami espadahuan macanacunalla c'ari c'aricuna carca. Judá aillupish, 500.000 runacunami carca.
10Tucui israelcunata quillcashpa yupashca q'uipami Davidca, mana allita rurashcata paipaj shungupi yuyarishpa Mandaj Diostaca:
–Cashna rurashpaca yallitaj mana allitami rurashcani. Mandaj Dioslla cambajta ruraj ñuca juchallishcata anchuchipailla nishpami rogani. Ñucaca upa shinami chashna rurashcani– nirca.
11Tutamanta David ña jatarishca cajpimi, Dios huillachishcata Davidman huillaj Gad runaman Mandaj Diosca cai shimicunata cashna nishpa huillachirca: 12“Davidpajman rishpa Mandaj Diosca cashnami nin nigri: Cambajca quimsatami rurasha nini. Chaicunamanta can shujta agllai. Chaita ñuca rurangapaj” nircami. 13Gad runa Davidpajman rishpa yachaj chayachishpaca:
–¿Cambaj llajtapi canchis huatacunapaj yaricai shamuchunchu munangui? ¿Mana cashpaca canta p'iñajcuna catirashpa llaquichijpi quimsa quillacunata miticushpa purinatachu munangui? ¿Mana cashpaca, quimsa punllacunata cambaj llajtapi jatun ungüi tiyachunchu munangui? Cunanca alli yuyari. Can imata agllashcatami ñucata cambajman cachajmanca huillagrisha– nirca.
14Chaimi Davidca, Gad runataca:
–Jatun llaquipimari cani. Mandaj Diosca yallitaj c'uyaj cashcamanta paipaj maquipi urmanatami munani. Runacunapaj maquipica mana urmasha ninichu– nirca. 15Shina nijpimi Mandaj Diosca, chai tutamantamanta callarishpa pai llaquichisha nishca punllacama israelcunapajmanca jatun ungüita cacharca. Chaimi Danmanta callarishpa Beerseba pueblocama 70.000 runacuna huañurca. 16Llaquichichun pai cachashca ángel Jerusalentapish chingachingapaj maquita chutagrijpica, Mandaj Diosca llaquichingapaj cachashcamanta llaquirishpami, chai runacunata huañuchicuj angeltaca: “Ña chailla, saqui” nirca.
Mandaj Diospaj angelca, jebuseo Arauna runapaj parba c'uchupimi carca. 17Gentecunata chingachicuj angelta ricushpami, Davidca Mandaj Diostaca:
–¡Ñucamari juchallircani. Ñucamari millaita rurarcani! Cai ovejacunaca ¿imatataj rurarcacunari? ¡Paicunata llaquichinapaj randica ñucata, ñuca yayapaj huasi ucupuracunata llaquichiyari!– nirca.
Diospaj altarta David rurashcami
(1 Cr 21.18-27)
18Chai punllallatajmi Gad runa Davidpajman shamushpaca:
–Jebuseo Arauna runapaj parba c'uchuman huichiyashpa chaipi Mandaj Diospaj shuj altarta rurai– nirca. 19Davidca Gad runaman Mandaj Dios ima shina huillachishca shinallatajmi huichi rirca. 20Arauna runaca jatun mandajpish paipajta rurajcunapish pai maipi canman shamucujtami ricurca. Chaita Arauna runa ricushpa tupanaman llujshishpaca jatun mandajpaj ñaupajpi cungurishpami pambaman tupajta cumurirca. 21Chaipimi paica:
–Jatun mandaj ñuca amito cambajta rurajpajmanca ¿imapajtaj shamurcanguiyari?– nijpi Davidca:
–Israelcuna jatun llaquicunata apacushca tucurichun cambaj trillana pambata randishpa chaipi Mandaj Diospaj shuj altarta rurangapajmari shamurcani– nirca.
22Chaimi Arauna runaca Davidtaca:
–Japilla. Can jatun mandaj ñuca amopi ima shinami alli chaita rurailla. Mandaj Diosman cushpa tucui rupachingapaj huagracunapish shayacunmi. Yantapajpish trillana caspicunandij, yugondij japishpa Mandaj Diosman cushpa rupachilla. 23Jatun mandajlla Arauna runaca tucui chaicunatami can jatun mandajmanca cuni– nircami.
Arauna runaca jatun mandajtaca:
–Mandaj Diosca canhuan p'iña cashcamanta alli tucungapishchari– nircapishmi.
24Shina nijpipish jatun mandajca Arauna runataca:
–Mashna valishcahuan mana randishpa shujtaj ñucaman cushcallataca Mandaj Diosman cushpa tucui rupachinataca mana rurasha ninichu. Chaimanta mashna valishcataca pagashataj ninimi– nishpami, Davidca trillana pambatapish huagracunatapish pichca chunga siclo cullquihuan randirca. 25Chaipimi Davidca Mandaj Diospaj shuj altarta rurashpa, Diosman cushpa tucui rupachinatapish, Mandaj Dioshuan alli cangapaj cuna cashcatapish cushpa rupachirca. Chaimi Mandaj Diosca, cai pachamanta mañashcata uyashpa, israelcunata llaquichicun llaquitaca chaillapi parachirca.
Currently Selected:
2 SAMUEL 24: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.