Sakaraiya 1
1
Ikood Aditịmme Mbịne Abọọñ
1Ke ayọhọ afiọñ itiaita ke isua ukara ayọhọ iba Dariọs, uyio Abọọñ amaadisịm prọfed Sakaraiya ayịn Berekia, ayịn Iddo:
2“Abọọñ amaanekke ayat esịd ye mme eteete ndufo. 3Ke ntoro dọkkọ mbon awo bo: Se Abọọñ Andikponñkan atañ ado mi: ‘Itịmme imbịne miin,’ Abọọñ Andikponñkan atañ, ‘ndin ami ñyaatịmme ibịne ndufo ñko,’ Abọọñ Andikponñkan atañ. 4Ndufo ikiiba nte mme eteete ndufo, a-mme prọfed usen edem ekedọkkọke ebo: Se Abọọñ Andikponñkan atañ ado ami: ‘Iwọññọ ikpọñ mme ndiọi usʌñ ye mme ndiọi adinam ndufo.’ Ado ammọ ikiyemme ikop me adikpañ utọñ innọọ miin, ado Abọọñ atañ. 5Mme eteete ndufo eba ke mmọọ idahami? Ñko ye mme prọfed, nte ammọ edu uwem ke nsi-nsi? 6Ado nte mme uyio ye mme ewʌhọ mmi, ake ami ñkenọọhọ nditọufọk mmi mme prọfed, ikiyọhọke mme eteete ndufo idem?
“Akem ammọ emaekappa esịd enyʌñ etañ ete, ‘Abọọñ Andikponñkan a-anam ye ñnyịn nte adotto ye usʌñ ye edu adinam ñnyịn, kpa naña anye akebiide adinam.’ ”
Awo ke Atu mme Eto Meetel
7Ke ayọhọ usen edịb mme inaañ ke afiọñ duob mme keed, ke afiọñ Sebad, ke isua ubọọñ ayọhọ iba adidem Dariọs, ikọ Abọọñ amaawuọ prọfed Sakaraiya ayịn Berekia, ayịn Iddo idem.
8Ami mmaakịt ñkukịd ke akonayio, ndin do ke iso mmi ke ñkekịt awo nte adoro ke anyọñ ndad-ndad enañmbakara. Anye akeda ke atu mme eto meetel ke abedeñ. Mme ndad-ndad, ndana ye mfia enañmbakara emaedudak anye ke edem.
9Ami mmaabịp mbo, “Mme nsoo ñkpọ ido ami, abọọñ mmi?”
Enyere a-aketañña ikọ ye ami amaabọọrọ ate,
“Ami ñyauwọt fiin se ammọ edo.”
10Akema, awo a-akedaaha ke atu mme eto meetel amaanam anwaña ke, “Ammọ edo mbon se Abọọñ anọ abo edʌk ke afịd iso isọñ.”
11Ndin ammọ emaedọkkọ enyere Abọọñ a-akedaaha ke atu mme eto meetel ete, “Ñnyịn imisaaña ke afịd isọñ inyʌñ ikịt ke afịd ederimbod aba ke ifuuro ye emem.”
12Akem enyere Abọọñ amaabo, “Abọọñ Andikponñkan, adiikpeene die mbemiso afo awọt Yeruselem ye mme abio ke Yuda mbọm mfo, a-afo ayatta esịd ye ammọ ke afịd isua ata mme duob ami?” 13Akem Abọọñ amaatañ nti ikọ idọñesịd anọ enyere a-aketañña ikọ ye ami.
14Ndin enyere ado a-aketañña ikọ ye ami amaabo, “Tañ ikọ ami anwa-anwa: Se Abọọñ Andikponñkan atañ ado ami: ‘Ami mmenekke mfịbe akwa ufịb mbaña Yeruselem ye Saiyọn, 15ñko esịd a-anekke añyat abaña mme idịd e-ebaaha ke ifuuro. Ami ñkeyat esịd etək-etək, ado ammọ emia ammọ ufen ekan naña ñkeyem.’
16“Ke ntoro se Abọọñ atañ ado ami ‘Ami ñyaaben esịd mbọm mmaana mbịne Yeruselem, ñko do ke ediimaana ibọp ufọk mmi. Ndin eyaenyanna udʌk udomoñkpọ ke afịd Yeruselem,’ Abọọñ Andikponñkan atañ.
17“Maana tañ anwa-anwa: Se Abọọñ Andikponñkan atañ ado ami: ‘Uforo ayaamaana afiọrọ ke mme abio mmi, ndin Abọọñ ayaamaana adọñ Saiyọn esịd anyʌñ amek Yeruselem.’ ”
Nnʌk Inaañ ye Mme Adomusọ Inaañ
18Ndin ami ñkedịppe anyen ke anyọñ, se do ke iso mmi mme nnʌk inaañ. 19Ami mmaabịp enyere a-aketañña ikọ ye ami mbo, “Mme nsoo ido ami?”
Anye amambọọrọ ate, “Ammọ edo mme nnʌk e-ekesuanna Yuda, Isrel ye Yeruselem.”
20Akem Abọọñ amañwọt miin mme adomusọ inaañ. 21Ami mmaabịp nte, “Nsoo ke ammọ edi adinam?”
Anye amambọọrọ ate, “Ammọ edo mme nnʌk e-ekesuanna Yuda mbaak awo ndomokeed adikan adịppe iwuod, ado mme adomusọ ami edi adidịkke ammọ, ñnyʌñ ntoomo nnʌk mme idịd e-ekedịppeke nnʌk ammọ enwana ye isọñ Yuda enyʌñ esuan mbon#1:21 Ke mme ikpañwed Hibru ewet Sek 1:18-21 nte Sek 2:1-4. amọ.”
Currently Selected:
Sakaraiya 1: ICB
Highlight
Share
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
