Ñwed Mbon Filipai 4
4
Ke Abaña Nsọọñọnda ye Adidiana Keed
1Ke ntoro, nditọeka ke Krais, ndufo a-ami mmaaha ñnyʌñ nnie udọñ nnọ, inemesịd mmi ye anyanya mmi, ado naña ndufo ekpesọọñọ eda ke Abọọñ, mme ndima ufan mmi!
2Ami mmekpeiye Eyudia ye Sintike nte enie esịd keed ke Abọọñ. 3Mmenyʌñ ibeeñe ndufo, mme nsaña utom mmi nte enwam ibaan ami, sia ammọ ekedaaha ye ami ke adinam utom eti etob, ye Klemen ye afịd mbon ñko e-eñkeeneke enam utom, a-adooho anyịñ ammọ mmọdo ke ñwed uwem.
Akpatre Ikọitem
4Idaara ke Abọọñ afịd ini, yak nsʌk mmaana ntañ, idaara! 5Yak afịd awo ekịt ke emenie ifuuro-ifuuro uwem. Abọọñ a-akpere. 6Ikiiyak mfịna ndomokeed ifịna ndufo, ado ke afịd ñkpọ, ke akam ye ebeeñe ye ekọọm, iben mme ebeeñe ndufo inịm Abasi ke iso. 7Ndin emem Abasi a-akanna afịd ifiọk, ayaakpeme esịd ndufo ye akikere ndufo ke Krais Yisọs.
8Ke akpatre, nditọeka ke Krais, ñkpọ akeedodo a-adooho akpanikọ, ñkpọ akeedodo a-anieghe ukpono, ñkpọ akeedodo a-anenne, ñkpọ akeedodo a-asanake, ñkpọ akeedodo a-ayaiyake, ñkpọ akeedodo a-adooho se ema, adieke ñkpọ adooho se etooro, ikere ibaña mme ñkpọ ado. 9Se adodo a-ndufo emaekekpeep me ebọbọ me ekokop ento miin, me ekekịt ke idem mmi, isịn mme ñkpọ ado ke adinam. Ndin Abasi emem ayaaba ye ndufo.
Pọọl Akọọm Mbon Filipai ke Enọ Ammọ
10Ami mmenem esịd eti-eti ke Abọọñ sia ke akpatre udọñ ndufo adise ñkpọ imbaña miin amaana ademme. Ke akpanikọ, ndufo emaenie udọñ adise ñkpọ imbaña miin, ado ikinieghe ufañ ye ifed adinam ntoro. 11Ami ntañña ami ke ntak a-adooho mmeyem unwam, sia ami mmaakpeep adiyʌkkọ ke naña akpebaba. 12Ami mmediọọñọ naña aba awo adiba ke unana, mmenyʌñ ndiọọñọ naña aba adinie uwak. Ami mmekpeep ndedịbe ifiọk a-abaaha ke adiyʌkkọ ke itie akeedodo ye ke afịd idaha a-ami ñkịtte idem mmi, me mmedia ñyʌkkọ me nsaña abiọọñ, me mba ke eduek me ke unana. 13Ami mmekeme adinam afịd ñkpọ ato ke anye annọọhọ miin adudu.
14Kpayeado, amaafọn ndufo adikeene ñwuana ke mme ukuud mmi. 15Mfen ñko, nte ndufo mbon Filipai ediọọñọke, ke mme akpa ini a-ndufo ekediọọñọke eti etob, ke ini a-ami ñketọọñọke isañ nto ke Masidonia, ufọkabasi ndomokeed ikiwanake ye ami ke adinọ me adibọ, ibọhọke ndufo ikpọọñ. 16Sia ke idem ini a-ami ñkebaaha ke Tesalọnika, ndufo emaemaana enọ unwam ensọk, emaana enọ ensọk ke ini ñkpọ akesọññọ ye ami. 17Idooho nte ami ñyeyem enọ ndufo, ado ntañ mbaña se ediidat iwet isịn ke ñwed ibad ndufo. 18Ami mmebọ afịd se akenaa eñkpe me se ikakan ado. Ennọ miin ñkpọ mfọn-mfọn, akpan-akpan idahami a-adooho mmaakebọi nto Ebafrọditus mme enọ a-ndufo ekenọọhọ ensọk. Ammọ edo mme anemufịk enọ, uwa a-adotto, a-anemme Abasi esịd. 19Ndin Abasi mmi ayainọ ndufo afịd se ndufo eyem nte asañake akekem ke mme inie ubọọñ amọ ke Krais Yisọs.
20Yak ubọọñ anie Abasi ye Ete ñnyịn ke nsi-nsi nsi-nsi. Amen.
Akpatre Ekọọm
21Ikọọm afịd ikọd Abasi ke Krais Yisọs.
Nditọeka ke Krais e-ebaaha ye ami e-enọ ekọọm.
22Afịd ikọd Abasi e-ebaaha mi edọñ ekọọm inọ ndufo, akpan-akpan mbon ufọk Sisa.
23Yak mfọn Abọọñ Yisọs Krais asʌhọ ye Sịbidịd ndufo. Amen.#4:23 Usʌk mme ikpañwed inieghe Amen
Currently Selected:
Ñwed Mbon Filipai 4: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
