Ñwed Mbon Filipai 2

Adidubọiyọ Nsuukidem Krais

1Adieke adooho ndufo emesọọñọ ukod ke adidiana ye Krais, adieke ebọọhọ idọñesịd eto ima amọ, adieke enieghe ewuana ke Sịbidịd, adieke enieghe mmem-mmem esịd ye mbọm, 2inam inemesịd mmi ayọhọ ke ndufo adinie esịd keed, ke adinie ukem ima, ke adido keed ke Sịbidịd ye akikere. 3Ikiinam ñkpọ ndomokeed ke akpọsọñ ndomoidem me ñkokkoidem, ado ke nsuukidem idat nte ke mbon mfen e-efọn ikan ndufo. 4Ndufo keedekeed ikiiyem udʌk idem ndufo, ado iyem udʌk mbon mfen.

5Ke ewuana ndufo ye emọ-emọ inie ukem esịd unam ñkpọ nte ake Krais Yisọs:

6A-adooho ke ataa uduud amọ, anye ado Abasi,

ado ikikereke ke ido ñka ye Abasi, ñkpọ akpekedooho ke ufọn idem amọ;

7utu ke ado, anye amaasuuhọ idem amọ, akappa ado ñkaña ñkpọ,

atịmme amek itie ayịnufọk,

sia emaekenam anye ke mbid awo.

8Ndin sia ekekịtte anye nte awo,

anye amaasuuk idem

amọ anyʌñ asuuk iwuod tutu asịm ñkpa,

kpa ñkpa ke krọs.

9Ke ntoro, Abasi amaadịppe anye akesịm ñkoñ ñkan itie,

anyʌñ anọ anye anyịñ a-akoñño akan afịd anyịñ,

10nọ ato do, ke anyịñ Yisọs afịd edọñ editọọñọ,

ke anyọñ ye ke isọñ ye ke idak isọñ,

11ñko afịd edeme etañ ke Yisọs Krais ado Abọọñ,

ke ubọọñ Abasi Ete.

Ke Ndukuunọ Aba

12Ke ntoro, mme ndima ufan mmi, kpa naña ndufo esikop item afịd ini, idooho ke idaha a-ami mbaaha kpọd, ado akpan-akpan ke ini ami mmiibaaha, ika iso inam utom adinyaaña ukpọñ ke ndịk ye ñnyeñidem. 13Sia ado Abasi anam utom ke atu ndufo, mbaak ndufo ekan enam nọ asaña akekem ke uduak amọ ye se inem anye esịd.

14Inam afịd ñkpọ ke unana ndukuunọ ye mfaaña, 15nọ ndufo ediinana ndo, enyʌñ esana nte “nditọ Abasi, i-imiinieghe ndudue ke ukwañ idiọọk emana ami.” Ndin ndufo eyaeyamma ke atu ammọ nte ntantaafiọñ ke ikpaanyọñ, 16nte ndufo emʌmmọ ikọ uwem ami ekama. Ndin ami ñyaakan nnam asian ke usen Krais nte ke ami ñkifegheke, ñkinyʌññọ ñkpa utom ke ikpu-ikpu. 17Ado akpekọm ekpeñnwaanwañña miin eduọk nte ukọd uwa ke ñwaidem ye utom a-atooho mbuọdidem ndufo, ami mmenem esịd ñnyʌñ ndaara ye afịd ndufo. 18Ke ntoro, akpena ndufo ñko enem esịd enyʌñ edaara ye ami.

Timoti ye Epafrọditus

19Ami mmenie idodanyen ke Abọọñ Yisọs adidọñ Timoti ibịne ndufo usọp-usọp, nọ ami ñko ñkop inemesịd ke adikop ñkpọ ibaña ndufo. 20Ami nnieghe awo ndomokeed mfen a-abitte anye, a-adiinie eti akikere ibaña mme ñkpọ se ifọn ye ndufo. 21Sia afịd awo esʌk eyem udod ammọ ikpọọñ, iyemme ake Yisọs Krais. 22Ado ndufo emediọọñọ ke Timoti ibaaha ntoro, sia kpa naña ayịn anam utom ye ete ke anye anam utom eti etob ye ami. 23Mmekere adidọñ anye usọp-usọp ke mmadọdiọọñọ naña ñkpọ abono ye ami. 24Ndin mmedot anyen ke Abọọñ ke ami ke idem mmi ñyaadi ke ini imiidiikpeeneke.

25Ado ami mmekere ke a-adot ami adimaana ndọñ Epafrọditus, ayịneka mmi, inọọ ndufo, anye a-adooho nsaña utom ye emọ-emọ awo ekọñ, a-anyʌññọ ado isʌñutom ndufo, a-ndufo ekedọññọ ebo adise ñkpọ ambaña miin. 26Sia anye a-anie udọñ adikpikịt afịd ndufo, ndin anye afʌhọ ke ndufo adikikop ke idem imọ ikisọññọ. 27Anye amaadọñọ ke akpanikọ akpere ñkpa. Ado Abasi amaanie mbọm abaña anye, ikinieghe inọ anye ikpọọñ, ado amaanie annọ miin mbaak ndiben mfʌhọ ndian ke mfʌhọ. 28Ke ntoro, ami mmenekke nnie udọñ adidọñ anye inọọ ndufo, nọ ato do ndufo imaimaana ikịt anye, ndufo ekop inemesịd, ñko ami ñnyʌññọ nnie mbʌññọesịd aba. 29Idaara anye ke Abọọñ ye ekamba idaara, inyʌñ ikpono mme awo e-ebaaha nte anye, 30sia anye amaakpere ñkpa ke ntak utom Krais, utuanyen anye adiduọọk uwem amọ ke abaña unwam a-ndufo imiikikanna innọ miin.

Currently Selected:

Ñwed Mbon Filipai 2: ICB

Highlight

Copy

Compare