Matiu 23
23
Ndʌdutọñ ke Abaña Mbubịk
1Ndin Yisọs amaatañ ikọ anọ mme atu awo ye mme mbed amọ: 2“Mme andikpeeb mbed ye mme Farisi etie ke ñkpọitie Moses. 3Ke ntoro ana ndufo etʌm ese enyʌñ enam se ammọ idọkkọ ndufo, ado ikiiyak se ammọ enam ado uwọdñkpọ inọ ndufo, sia ammọ inamma se ammọ ekwọrọ. 4Ammọ ebọp udob mbiomo edot mbon mfen ke afara, ado ammọ ke idem ammọ ibeeñeke idem adidịppe nnuun ubọk ammọ keed adinam mme ñkpọ ado.
5 “Afịd ñkpọ se ammọ enam ado nọ ato do mme awo ekịt; nte filakteri, adoho adiwet ikọ Abasi ndian ke akpọiso # 23:5 Ntək akebe se ewet mme ufañ ikọ Abasi edian ke akpọisio ye ke ubọk ñnyʌñ nnam ñkpoon afọñ ubọñ akam ammọ anyọọñ; 6ammọ ema itie ukpono ke mme itie usọrọ ye mme ñwuọnda ñkpọitie ke mme sinakọk; 7ammọ ema nọ mme awo ekọọm ammọ ke edu ukpono ke mme anwa udua ye adikoot ammọ, ‘Andikpeeb.’
8 “Ndufo ikiiyak awo ikoot ndufo ‘Andikpeeb,’ sia ndufo enie Andikpeeb keed kpọd, afịd ndufo enyʌñ edo nditọeka. 9Ndufo inaaha ekoot awo ndomokeed ke isọñ ‘ete,’ sia ndufo enie Ete keed kpọd, ndin anye aba ke hefịn. 10Ikiinyʌñ iyak awo ikoot ndufo mme ‘anọitem’ sia ndufo enie Anọitem keed kpọd, a-adooho Krais. 11Andikpon ñkan ke atu ndufo ana ado ayịnufọk ndufo. 12Awo akeedodo a-akokkoke idem amọ eyaesuuhọ anye, ñko awo a-asuuhọke idem amọ eyaebenne anye.
Isuuñọ Itiaba a-Asịmme mme Akpeeb Mbed ye mme Farisi
13 “Adọdiọọk inọ ndufo mme ntaifiọk mbed ye mme Farisi, ndufo mbon mbubịk! Ndufo emekʌk udọk abioubọọñ hefịn ebaha mbon awo. Ndufo ke idem ndufo idʌkkọ, inyʌññọ iyak mbon mfen e-eyemme edidʌk eboiyo edʌk. [14Adọdiọọk inọ ndufo mme akpeeb mbed ye mme Farisi, ndufo mbon mbubịk! Ndufo ema adifiik mme ebekpa mbọọ ufọk, enyʌñ ewọt idem ke adibọñ ñnyan akam. Ke ntoro, ndufo eyaenekke ebọ akpọsọñ ufen.]#23:14 Usʌk mme ikpañwed esịn mme ikọ se iba ke Maak 12:40 ye Luk 20:47.
15 “Adọdiọọk inọ ndufo mme akpeeb mbed ye mme Farisi, ndufo mbon mbubịk! Ndufo esaaña ke mmọọñ ye ke abod eyem ukpọk awo keed se enam nọ akappa esịd ikeene ndufo, ado awo amaakappa esịd, ndufo e-enam anye adọdiọọk ñkemba adot se adʌk ikañ nsi-nsi nte ndufo ke idem ndufo.
16 “Adọdiọọk inọ ndufo mme nnan adadusʌñ! Ndufo esibo, ‘Awo akpenwọñọ unwọñọ ke tembịd ke iwuọñọke ñkpọ ndomokeed, ado akpenwọñọ ke kold a-tembịd, ke unwọñọ ado abọp anye.’ 17Ndufo mme ndisịme ye mme nnan! Akee akpon ekọmudua akan: kold me tembịd a-anamma kold ado adisana? 18Ndufo emaana ebo, ‘Adieke awo anwọñọke unwọñọ ke itie uwa, ado iwuọñọke ñkpọ ndomokeed, ado awo ndomokeed a-anwọñọke ñkpọ ke enọ a-adoroke ke itie uwa, unwọñọ ado abọp anye.’ 19Ndufo mme nnan! Akee akpon akan; enọ me itie uwa a-anamma nọ enọ ado adisana? 20Ke ntoro, awo akeedodo anwọñọke ke anyịñ itie uwa, anwọñọ ye afịd ñkpọ se idoro ke anye. 21Ñko, awo akeedodo anwọñọke ke anyịñ tembịd anwọñọ ke tembịd ado ye anye a-adʌññọ do. 22Ñko awo akeedodo anwọñọke ke hefịn, anwọñọ ke ebekpo Abasi ye anye a-atieghe do.
23 “Adọdiọọk inọ ndufo, mme akpeeb mbed ye mme Farisi, ndufo mbon mbubịk! Ndufo esikpe utịb tembịd mbakka keed ke itie duob ekewuọ ataa akpatre mfañ ke inwañ, ado etre ataa akpan ñkpọ ke mbed a-abañake unen, mbọm ye mbuọdidem. Akpena ndufo ekpe utịb tembịd, ado ikpinaaha etre edinam mme ñkpọ se ikap ikpokpon ikan ami. 24Ndufo mme nnan adadusʌñ! Ndufo emedʌkkọ nsʌñ esio ke ukọd, ado eben kamel emen.
25 “Adọdiọọk inọ ndufo mme akpeeb mbed ye mme Farisi, ndufo mbon mbubịk! Ndufo eyet edem kọọb ye edem usan ndufo asana ado eyaak esịd ayọhọ ye idiọọkitọñ ye adinọ idem ndufo inemesịd. 26Nnan Farisi! To yet esịd kọọb ye esịd usan, ndin edem ayaanyʌñ asana.
27 “Adọdiọọk inọ ndufo mme akpeeb mbed ye mme Farisi, ndufo mbon mbubịk, ndufo eba nte mme itiad udi edeppeke, a-adoro ayaiyake, ado esịd ayọhọ ye akpọ mme akpañkpa ye afịd mme ndedeghe ñkpọ. 28Ke ukem usʌñ ami ke ido ndufo ke anwa abit mme ndinen awo, ado esịd ndufo eyọhọ ye mbubịk ye ibak.
29 “Adọdiọọk inọ ndufo mme akpeeb mbed ye mme Farisi, ndufo mbon mbubịk, ndufo ebọp mme itiad udi enọ mme prọfed enyʌñ ebana mme itiad udi ndinen awo. 30Ndin ndufo ebo, ‘Ñnyịn ikpikikeeneke iwuana ke uduọk iyiib mme prọfed akpedo ñnyịn imaiba ke ayio mme eteete ñnyịn.’ 31Ke ndufo editie ntiense ntom, ndufo emebiom idem ndufo ikpe nte ke edoñño nditọ mbon e-ekewotto mme prọfed. 32Ika iso ndin, inyʌñ inam ndiọi ubọkutom a-mme eteete ndufo eketọọñọke ima!
33 “Ndufo mme udʌkikọd! Ndufo mme nditọ udʌkikọd! Ediinam die ibọkkọ ubiomikpe nsi-nsi ikañ? 34Ke ntak ado ke ami ndọñ mme prọfed, ntaifiọk ye mme andikpeeb inọọ ndufo. Ubaak ammọ ndufo eyaewoot enyʌñ ekọọñ ke eto; usʌk ndufo eyaemia ke mme sinakọk ndufo enyʌñ edubịnne usʌk ke abio ke abio. 35Ndin afịd iyiib mme ndinen awo se eduọk ke ederimbod eyaidoro ndufo ke iwuod, tọọñọ ke iyiib Ebeel, a-akedooho adinen awo tutu asịm iyiib Sakaraiya, ayịn Berekia, a-ndufo ekewotto ke ufọọd tembịd ye itie uwa. 36Ami ntañ akpanikọ inọ ndufo, afịd ñkpọ ami adiidoro emana ami ke iwuod.
37 “O Yeruselem, O Yeruselem, ndufo e-ewotto mme prọfed enyʌñ etọọñ mbon e-enọọhọ isọk ndufo ke itiad, akañ ifañ ke ami ñyem adikoot nditọ ndufo mbok itie keed, nte eka unen abok nditọ ke idak mba amọ, ado ndufo inyịmmeke. 38Sese, eyaak ñwuudo ufọk ndufo inọ ndufo. 39Sia ami ntañ inọ ndufo, ndufo idiñkịtte miin aba tutu ndufo ebo, ‘Afọfọn anọ anye a-adiighe ke anyịñ Abọọñ.’ ”
Currently Selected:
Matiu 23: ICB
Highlight
Share
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
