Matiu 20
20
Ñke Mme Anam Utom ke Inwañ Fain
1 “Abioubọọñ hefịn aba nte anie inwañ a-akewuọhọ ke ufọk ataa ubakusen adikidat mbon utom nọ edinam utom ke inwañ fain amọ. 2Anye amaanyịmme ikpe mbon utom ado denarius#20:2 denarius keed akesido akʌk utom usen debra keed ke usen, anyʌñ anọ ammọ ekaiya utom ke inwañ fain amọ.
3 “Anye amaamaana awuọ ke ñkpọ nte ñkanika usʌkkeed ubakusen, ke ñkpọ nte awa ita amaakeboiyo, anyʌñ akekịt mbon utom mfen naña eda ke anwa udua, inamma ñkpọ ndomokeed. 4Ndin anye amaabo ammọ ate, ‘Ndufo ñko ikeene ikaa inwañ fain mmi ikinam utom, ndin ami ñyaikpe ndufo akʌk se inen.’ 5Ammọ emaenyʌñ ekaiya.
“Ñkpọ nte awa ita emaekeboiyo, ke ñkpọ nte ñkanika duob mme iba uweemeayio, anye amaamana anam ukem-ukem ñkpọ ado. 6Ñko ke ñkanika ition uweemeayio anye amaamana awuọ anyʌñ akekịt mbon mfen nte eda, ndin anye amaabịp ammọ ate, ‘Nsoo ido nọ ndufo eda mi inamma ñkpọ ndomokeed?’
7 “Ammọ emaebọọrọ ete, ‘Sia awo ndomokeed ikpeeghe ñnyịn utom.’
“Anye amaabo ammọ ate, ‘Ndufo ñko ikaa ke inwañ utom mmi ñko.’
8 “Ke ndubiayio, anie inwañ fain amaabo akamautom amọ ate, ‘Koot mme anam utom nyʌñ kpe ammọ akʌk ammọ, tọọñọ ke mbon e-ekediighe akpatre tutu akesịm mbon e-ekediighe akpa.
9 “Ke ntoro, mbon e-ekediighe utom ke ñkanika ition emaewuọ ekebọ denarius keedekeed. 10Ke ini mbon e-eketooho edi utom emaekedi ammọ emaekere edibọ ñkan ado, ado ammọ ñko ekebọ ukem denarius keedekeed. 11Ke ammọ emaekebọ, ammọ emaedukuunọ ye anie inwañ ete, 12‘Mbon e-ekediighe edem ekenam utom awa keed kpọd ndin afo akpe ammọ ukem-ukem naña ikpe ñnyịn, akpesʌkado ñnyịn imaikibọ ufen afịd usen inyʌñ inam utom ke idak ufiob ayio.’
13 “Anye amaabọọrọ keed ke atu ammọ ate, ‘Ufan mmi, ami utʌkkọ fiin; nte ñnyịn ikinyịmmeke denarius keed ke usen? 14Ben akʌk mfo nyọñ. Ami ñnyʌñ mma adikpe akpatre awo naña ukpe fiin. 15Nte ami nnieghe unen adinam se mma ye akʌk mmi? Ntak afo akpediọọhọ esịd sia ami mmefọn ido-o?’
16 “Ke ntoro, akpatre awo ayaakappa ado akpa, ndin akpa ayaanyʌñ akappa ado akpatre.”
Yisọs Atañ Abaña Ñkpa Amọ Ayọhọ Akañ Ita
17Yisọs akeka Yeruselem, ndin ke usʌñ anye amaakoot mme mbed amọ duob mme iba asịkke ada anyʌñ abo ammọ ate, 18“Ñnyịn ika Yeruselem, ndin eyaeyaak Ayịn Awo esịn ke ubọk mme ñkpoon aku ye mme andikpeeb mbed. Ammọ eyaebiere ikpe ñkpa enọ anye. 19Eyaenyʌñ eyaak anye esịn ke ubọk mme Gentile nọ edọọñ anye ndọk, emia anye, enyʌñ ekọñ anye ke krọs. Ke ayọhọ usen ita anye ayaaset ke ñkpa adʌk ke uwem.”
Ebeeñe Eka Nditọ Sebidi
20Akema eka nditọ Sebidi amaadi ye nditọ ideen amọ aditọọñọ edọñ anyʌñ anịm anye ebeeñe ke iso.
21Ndin Yisọs amaabịp anye ate, “Nsoo ke ayem?”
Ndin anye amaabo ate, “Nwọñọ bo ke nditọ ideen mmi iba ami eyautie fiin ke ubọk nnasia ye ke ufiin ke abioubọọñ mfo.”
22Yisọs amaabo ammọ, “Ndufo idiọọñọke se ndufo ebeeñe. Ndufo eyaekan enwọñ kọọb a-ami ndiinwọñ?”
Ammọ emaebọọrọ ete, “Ñnyịn imikan.”
23Anye amaabo ammọ ate, “Afọn, eyaenwọñ eto kọọb mmi, ado amaado aditie ke ubọk nnasia me ke ubọk ufiin mmi, idooho ami nnie adinọ. Mme itie ado anie mbon e-Ete mmi akebeeñeke anịm anọ.”
24Ke ini mme mbed duob ako ekekoppo ñkpọ ami, ammọ emaeyat esịd eti-eti ye nditọeka Sebidi iba ami. 25Ndin Yisọs amaakoot ammọ abok ate, “Ndufo emediọọñọ ebo ke atu mme Gentile mme adaukara efọfʌnnọ ammọ, ndin mme ñkpisọñ ammọ ewọt adudu a-ammọ edatta ekaara ammọ. 26Inaaha utọ ñkpọ ami atịppe ke atu ndufo. Iyoo, ado awo a-ayemme adikpon ke atu ndufo ana ado ayịnufọk ndufo, 27ndin awo a-anyʌññọ ayem adido akpa ke atu ndufo ana ado afʌn ndufo, 28kpa naña Ayịn Awo imiikidieghe ibo edinam ñkpọ enọ anye, ado akedi nọ adinam ñkpọ anọ ubon awo, anyʌñ ayaak uwem amọ nte ñkpọufak anọ mme awo.”
Mme Nnan Iba Emọọnọ Usʌñ
29Nte Yisọs ye mme mbed amọ ekekpọññọ Yeriko, ekamba atu awo emaekeene anye. 30Nnan iba e-eketieghe ke mben usʌñ, ekekop ke Yisọs asʌk adiboiyo, ammọ emaebọñ ñkpo ete, “Abọọñ, Ayịn Defid, nie mbọm ibaña ñnyịn.”
31Ndin mme atu awo emaesua enọ ammọ, ebo yak ammọ ekʌp inua, ado ammọ emaenenekke ebọñ, “Abọọñ! Ayịn Defid, tua ñnyịn mbọm.”
32Yisọs amaatuak ada, akoot ammọ anyʌñ abịp ate, “Nsoo ke eyem nnam inọ ndufo?”
33Ammọ emaebo anye ete, “Abọọñ, ñnyịn iyem ikịt usʌñ.”
34Yisọs amaatua ammọ mbọm anyʌñ atuuk ammọ anyen, ndin ammọ emaemaana ekịt ñkpọ kpa idahado, enyʌñ edakka ekeene anye.
Currently Selected:
Matiu 20: ICB
Highlight
Share
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
