Yọna 1
1
Yọna Afeghe Akpọñ Iso Abọọñ
1Ikọ Abọọñ amaadisịm Yọna ayịn Amitai ate: 2“Kaa akwa abio Ninife nyʌñ ke kwọrọ ikọ baña anye, sia ibak amọ adinsịm miin.”
3Ado Yọna amaafeghe akpọñ iso Abasi adakka akaa Taasis. Anye amaakaa Yopa, do anye amaakekịt nsʌñikañ keed a-akeyemme adika Taasis. Ke anye amaakekpe akʌk ukpeusʌñ ima, anye amaaboiyo adʌk esịd nsʌñikañ anyʌñ adakka Taasis nọ ato do anye afeghe akpọñ iso Abọọñ.
4Ndin Abọọñ amaadọñ ekamba afịm utom ke akpainyañ, ndin ekamba ayobio amaafịme tutu aba nte nsʌñikañ ayaasakka. 5Afịd mme awad nsʌñikañ emaekop ndịk enyʌñ etua ekoot abasi ammọ. Ndin ammọ emaesịññe mme mbiomo ke nsʌñikañ etoomo edọñ ke inyañ nọ ato do amaana afeere.
Ado Yọna amaasọiyọ adʌk idak isọñ nsʌñikañ, akesuuk anaa adaiya se ekoot idab. 6Etubom nsʌñikañ amaabịne anye akebo, “Afo akpenanam die adaiya utọ idab ami? Dakka da koot abasi mfo! Akemeido anye ayaase ñkpọ ibaña ñnyịn mbaak ñnyịn iditak.”
7Ndin mme awad nsʌñikañ emaebo emọ-emọ ete, “Idi, yak ñnyịn isịn afia idiọọñọ me anie awo inam nọ idiọọkñkpọ ami atịppe inọ ñnyịn.” Ammọ emaesịn afia ndin afia amaatịp Yọna. 8Ndin ammọ emaebịp anye ete, “Tañ inọ ñnyịn, anie awo inam nọ afịd mfịna ami isịm ñnyịn? Nsoo utọ utom ke afo anam? Afo ato uke? Idịd mfo ado uke? Afo ado awo uke?”
9Anye amaabọọrọ ate, “Ami ndo ayịn Hibru ñnyʌñ ñkpono Abọọñ, Abasi anyọñ, a-akenamma akpainyañ ye nsaad isọñ.”
10Ñkpọ ami amaanam ammọ ndịk eti-eti, ndin ammọ emaebịp ete, “Nsoo ke afo anam?” (Ammọ emaediọọñọ ke anye akefeefeghe akpọñ iso Abọọñ, sia anye amaadọdọkkọ ammọ ntoro.)
11Ayobio amaanenekke asọñ itak. Anam ammọ emaebịp anye ete, “Nsoo ke ñnyịn ikpunam fiin nọ ato do inyañ asuuhọ inọ ñnyịn?”
12Anye amaabọọrọ ate, “Ndufo imben miin itop isịn ke inyañ, ndin inyañ ayaadobo. Mmediọọñọ ke ndudue mmi anam ekamba ayobio ami adisịm ndufo.”
13Utu ke ado, ideen ado emaedomo afịd ukeme ammọ adiwat ntịmme edem ñkewuọ abod. Ado ammọ ikikanna, sia inyañ amaatọtʌm adamma akan naña akedo. 14Ndin ammọ emaebọñ ekoot Abọọñ ete, “Mbọk, Abọọñ, kuuyak ñnyịn ikpa ke ntak adidat uwem awo ami. Kuudot ñnyịn iyiib awo i-imiidueghe ke iwuod, sia afo, Abọọñ, amenam naña unemme fiin.” 15Akem ammọ emaeben Yọna etop esio ke ubom, ndin akpainyañ a-akedammake amaadop. 16Ntom ke ammọ ekebaak Abọọñ eti-eti, ndin ammọ emaewa uwa enọ Abọọñ enyʌñ ekaaña akaaña enọ anye.
Akam Yọna
17Ndin Abọọñ amaanịm ataa ekamba iyak nọ aben Yọna amen, ndin anye amaanyʌñ asịne ke idịb iyak ado uweemeayio ita ye akonayio ita.
Currently Selected:
Yọna 1: ICB
Highlight
Share
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
