Yerimaiya 46
46
Etob A-abañake Iyib
1Ami ado ikọ Abọọñ a-akedisịmme prọfed Yerimaiya abaña mme idịd:
2Ke abaña Iyib:
Ami ado etob a-abañake mbon ekọñ Fero Neko adidem Iyib, a-Nebukadnesa adidem Babilọn akekanna ke ekọñ ke Kaakemis ke mben Inyañ Yufretis ke ayọhọ isua inaañ ke ukara Yehoiyakịm ayịn Yosaiya adidem Yuda:
3“Ibeeñe mbọbọekọñ ndufo, ikpọ ye ntək,
inyʌñ isaña iwuọ ikaa ekọñ!
4Ibọbọ mme enañmbakara mbọbọ,
idọọk mme enañ ekọñ idoro!
Idat mme itie ndufo
ye uyadiwuod!
Itʌk mme eduad ndufo,
isịne mme mbọbọekọñ ndufo!
5Nsoo ke ami ñkịt?
Ammọ ekop ndịk,
ammọ etịmme edem,
e-ekan mbon uko ammọ.
Ammọ efeeñe usọp-usọp
inyʌññọ ise edem,
ndin akpọsọñ ndịk aba ke afịd itie,” Abọọñ atañ.
6“Mbon se isọp idem ikanna ifeghe,
mbon adudu ikanna ibọkkọ.
Ke adoro ukañ Inyañ Yufretis,
ammọ etuak ukod enyʌñ eduọññọ.
7“Anie awo ido ami a-adakkake nte Inyañ Nail,
nte mbufịd mmọọñ inyañ?
8Iyib adakka nte Inyañ Nail,
nte mbufịd mmọọñ inyañ.
Anye ate, ‘Ami ñyaadakka ñnyʌñ mfʌk ederimbod;
ami ñyaasobo mme abio ye mbon ammọ.’
9Idịppe idem, ndufo mme enañmbakara!
Iwat ke iyadesịd, ndufo mme andiwad sariọd!
Isaña ikaa, ndufo mbon ekọñ,
ideen Kuus ye Pud e-ekamake mme atuekọñ,
ideen Lidia e-edʌttọ utịgha.
10Ado usen ado anie Abọọñ, Abọọñ Andikponñkan,
usen usio usiene, usiene ye mme asua amọ.
Akañkañ ayaadia tutu akop uyʌkkọ,
tutu anye asuuk nsaditọñ amọ ye iyiib.
Sia Abọọñ, Abọọñ Andikponñkan, ayaanọ uwa
ke isọñ adoro a-adianake ye Inyañ Yufretis.
11“Dọọk kaa ke Kilied ke dat baam,
Adiaha Abọikpa Iyib.
Ado afo amedomo uwak ibọk ufọn ibaaha;
ukọk ibaaha unọ fiin.
12Mme idịd eyaekop ebaña ndọk mfo;
ntuaña mfo ayaayọhọ unadod.
Awo ekọñ keed ayaaduọ adoro ke awo ekọñ mfen;
ammọ naña iba eyaeduọññọ keed.”
13Ami ado etob se Abọọñ aketañ anọ prọfed Yerimaiya abaña adidi Nebukadnesa adidem Babilọn adinwana Iyib:
14“Isian etob ami ke Iyib, inyʌñ inam ediọọñọ anye ke Mikdol;
inyʌñ inam ediọọñọ anye ke Memfis ye Tapanes:
‘Idat itie ndufo inyʌñ ibeeñe idem,
sia akañkañ adia mbon e-ebaaha ye afo.’
15Nsoo inam nọ esuuhọ mbon uko ndufo enịm?
Ammọ ikanna ida, sia Abọọñ ayaanək ammọ aduọọk.
16Ammọ eyaeduọññọ uwak-uwak ini;
ammọ eyaeduọññọ edudotto emọ-emọ.
Ammọ eyaebo, ‘Idakka ida, yak ñnyịn itịmme ika
ibịne ataa ubon ñnyịn ye mme ntịppe isọñ ñnyịn,
ikpọñ akañkañ mme afiikawo.’
17Do ammọ eyaebọọñ ete,
‘Fero adidem Iyib ado akpọsọñ uyom kpọd;
ini amọ aboiyo.’
18“Ke akpanikọ naña ami ndu uwem,” Adidem abo,
a-anyịñ amọ adooho Abọọñ Andikponñkan,
“keed ayaadi adiiba nte Tabọ ke atu mme ikpọabod,
nte Kamel ke mben akpainyañ.
19Ikoono mme ñkpoduoho ndufo ibeeñe idem edika asenidịd,
ndufo e-edʌññọ ke Iyib,
sia eyaenam Memfis anaa ukpọk
anyʌñ awuudo, inieghe mme andidʌñ ke esịd.
20“Iyib ado uyaiya ñyịn enañ,
ado nsʌñ utañkpọ asʌk adi,
ato adoro abịne anye.
21Mbon ekọñ e-ekpeeghekpe ke atu udịmekọñ amọ,
eba nte mme enañ ñkuuhọ.
Ammọ ñko eyaewọññọ edem enyʌñ efeeñe udịm keed,
ammọ idiikanna isọọñọ ida ñkpad iba,
sia usen nsobo asʌk adi abịne ammọ,
ini akem se emia ammọ ufen.
22Iyib ayaasiama nte udʌkikọd a-afegheke
naña mbon usua esaña ekpere ke adudu;
ammọ eyaedi ebịne anye ye mme ekịd,
nte ideen e-ekpịkkeke mme eto.
23Ammọ eyaekpeeñe mme akai ammọ enịm ke isọñ,” Abọọñ atañ,
“akpesʌkado anye ayọhọ.
Ammọ ewak ekan ñkukuñkpọyọriyọ,
awo ikemeke adibat ammọ.
24Eyaesịn Adiaha Iyib ke abuud,
eyaak anye esịn mbon adoro ke ubọk.”
25 Abọọñ Andikponñkan, Abasi Isrel, abo ate: “Ami mmebeeñe idem adiben ufen ndot Amọn, abasi Tebes ke idem, ndot Fero, ye Iyib ye mme abasi amọ ye ndidem amọ, ñko ye mbon e-edotto anyen ke Fero. 26Ami ñyaaben ammọ nsịn ke ubọk mbon e-eyemme adiwot ammọ, Nebukadnesa adidem Babilọn ye mme adaaha amọ. Ado amaaboiyo, eyaedʌñ ke Iyib nte naña akedo akpa,” Abọọñ atañ.
27“Yekọb ayịnufọk mmi, kuukop ndịk;
Isrel, kuuyak idem unyeñ.
Ke akpanikọ ami ñyaunyaaña fiin nsio nto ke anyan itie,
ntịppe ubon mfo nsio ke isọñ ufʌn.
Yekọb ayaamaana anie emem ye ukpeme,
ndin ibaaha awo ndomokeed a-adiinam anye akop ndịk.
28Yekọb ayịnufọk mmi, kuukop ndịk,
sia ami mmọdo mba ye afo,”
Abọọñ atañ.
“Akpesʌkado ami mmesobo afịd mme idịd ukeed-ukeed
ke atu ammọ ami isuan ndufo,
ami ndiisoboke ndufo ataa afịd-afịd.
Ami ñyaitʌnọ ndufo ado ke ayọhọ udomo;
ami ndiiyakka ndufo enyọñ afịd-afịd ke imiibọọhọ ufen.”
Currently Selected:
Yerimaiya 46: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
