Yerimaiya 40
40
Esaana Yerimaiya Eyaak
1Ikọ Abọọñ amaadisịm Yerimaiya ke ini Nebusaradan adaiso ekọñ adidem amaakesaana anye ayaak ke Rama. Anye amaakịt naña edọñ Yerimaiya ñkpọnọ ukwak etem ke atu afịd mme ifʌn se ekemʌm ke Yeruselem ye Yuda e-ekebenne enyọñ Babilọn. 2Idaha a-adaiso ekọñ akekịtte Yerimaiya, anye amaabo anye ate, “Abọọñ Abasi mfo akebiide nsobo ami anọ itie ami. 3Ndin idahami Abọọñ anam nọ anye awuọ asu; anye anam naña anye akeduak adinam. Afịd ñkpọ ami eketịppe sia ndufo emaenam idiọọkñkpọ ye Abọọñ, ikinyʌññọ ikop uyio amọ. 4Ado mfịn ami mmutat fiin ñkpọnọ nsio ke itọñubọk. Ñkeene miin kaa Babilọn, adieke afo amaaha, ndin ami ñyaase ñkpọ ubaña fiin; ado adieke afo umuumaaha, kuudi. Se, afịd abio una fiin ke iso; amenie unen adika nte afo amama.” 5Kpayeado, mbemiso Yerimaiya akanna anekke iso adidakka ñnyọñ, Nebusaradan amaadian abo, “Tịmme bịne Kedalia ayịn Ahikam, ayịn Safan, a-adidem Babilọn akemekke abo ase ñkpọ abaña mme abio Yuda, nyʌñ dʌñ ye anye ke atu ammọ, imiidooho kaa itie nte afo amama.”
Akema etubom ekọñ amaanọ anye mme ñkpọ ndidia adian enọ mfen anyʌñ asaana anye ayaak nọ anyọñ. 6Ndin Yerimaiya amaakaa abịne Kedalia ayịn Ahikam ke Mispa anyʌñ akeba do ye anye ye mbon awo se ekeyaak esʌhọ ke isọñ ado.
Ewot Kedalia
7Ke idaha a-afịd mme etubom ekọñ ye mbon ekọñ ammọ e-ekesʌkkọ eba ke anwa abio ekekoppo ke adidem Babilọn amaamek Kedalia ayịn Ahikam nte adaukara ke idʌñ ndin ke amaanyʌñ anọ anye unen ke iwuod afịd ideen, ibaan ye ntəkayịn, kpa mbon ekedooho mme akpọikpọi uweene ke abio, a-adooho awo ikikoonoke nte ifʌn ika asenidịd ke Babilọn, 8Ismeel ayịn Netania, Yohanan ye Yọnatan nditọ ideen Kare, Seraiya ayịn Tanumed, nditọ ideen Efai awo Netofa, ye Yaasania#40:8 Ke Hibru Yesaniaasʌk ado Yaasania. ayịn Maakad, ye mme ideen ammọ, emaekaa ebịne Kedalia ke Mispa. 9Kedalia ayịn Ahikam, ayịn Safan, amaadat unwọñọ adisọọñọ ammọ ye ideen ammọ idem. Anye amaabo ammọ, “Ikiikop ndịk adinam ñkpọ nnọọ mbon Babilọn. Isuuk ibono ke isọñ inyʌñ inam ñkpọ inọ adidem Babilọn, ndin ayaafọn ye ndufo. 10Ami ke idem mmi ndiiba ke Mispa adida ke iwuod ndufo ke iso mbon Babilọn ediighe ibịne ñnyịn, ado ana nte ndufo eben ukọd, mfịd ndaayio ye adan ọlif, enyʌñ edọñ ammọ ke abañ unịm ñkpọ ndufo, enyʌñ edʌñ ke isọñ a-ndufo edatta enie.”
11Ndin ke ini afịd mme Yuu ke Mọb, Amọn, Edọm ye afịd mme idịd mfen emaekekop ke adidem Babilọn amaanịm nsʌhọ ke Yuda ndin ke amaanyʌñ amek Kedalia ayịn Ahikam, ayịn Safan, nte andikara afịd ammọ, 12afịd ammọ emaeto edi isọñ Yuda, edi ebịne Kedalia ke Mispa, eto ke afịd mme idịd se ekesuan ammọ. Ndin ammọ emaenie ataa uwak ukọd ye mfịd inwañ ndaayio.
13Yohanan ayịn Kare ye afịd mme adaaha ekọñ ekesʌkkọ ebaba ke anwa abio emaedi ebịne Kedalia ke Mispa 14enyʌñ ekebo anye ete, “Ado nte afo udiọọñọke ke Baalis adidem mbon Amọn adọñ Ismeel ayịn Netania abo aduwot fiin?” Ado Kedalia ayịn Ahikam ikinịmme ammọ ke akpanikọ.
15Akem Yohanan ayịn Kare amaatañ ke ndedịbe anọ Kedalia ke Mispa ate, “Yak ami ñka ñkewot Ismeel ayịn Netania, ndin ibaaha awo ndomokeed se idiidiọọñọ. Nsoo inam nọ anye ayem aduwot fiin anyʌñ anam nọ afịd mme Yuu e-ebaaha ukanna fiin esuana ndin nọ mme nsʌhọ ufọk Yuda etak?”
16Ado Kedalia ayịn Ahikam amaabo Yohanan ayịn Kare ate, “Kuunam uto ñkpọ ado! Se afo atañ abaña Ismeel idooho akpanikọ.”
Currently Selected:
Yerimaiya 40: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
