Yenesis 31
31
Yekọb Afeghe Akpọñ Leban
1Yekọb amaakop ke nditọ ideen Leban ekebo, “Yekọb akoono afịd ñkpọ se ete ñnyịn akenie anyʌñ anie inie ato ñkpọ se ete ñnyịn akenie.” 2Yekọb amaanyʌñ akịt ke iso Leban ikinekkeke aba ye imọ nte naña akesiba.
3Akema Abọọñ amaabo Yekọb, “Tịmme nyọñ kaa isọñ mme ete mfo ye ufọk emana mfo, ami ñyaaba ye afo.”
4Ndin Yekọb amaadọñ ekekoot Ratiel ye Lia ate ammọ ewuọñọ edi esịd inwañ ke itie u-ufene amọ ekebaaha. 5Anye amaabo ammọ, “Ami mmekịt ke iso ete ndufo inekkeke ye ami aba nte ini akpa, ado Abasi ete mmi mmọdo ye ami. 6Ndufo emediọọñọ ke mmaanam utom nnọ ete ndufo ke afịd adudu mmi, 7ado ete ndufo antʌk miin ke anye adikpəho akʌk utom mmi akañ duob. Kpayeado, Abasi iyakka anye annam miin ibak. 8Adieke anye akebooho ate, ‘Mme anie ntọi ufene eyaedo utịb mfo,’ afịd ufene emaeman nditọ ye ntọi; ndin adieke anye akebooho ate, ‘Mme anie ñkem ufene eyaedo utịb mfo,’ afịd ufene emaeman nditọ ye ñkem. 9Ndin Abasi amaaben afịd ufene ete ndufo akappa annọ miin.
10“Ke ini mme ufene ekeyommoke idịb ami mmaadappa ndab akañ keed, ndin ke ndab ado ami mmaabenne anyen ke anyọñ ñnyʌñ ñkịt ke mme akpoebod e-ekewereke udịm, eweere ñkem ye mme anie ntọi ekedọọk mme ufene. 11Akema enyere Abasi amandọkkọ miin ke ndab abo, ‘Yekọb.’ Ami mmaabọọrọ, ‘Se miin mi.’ 12Ndin anye amaabo, ‘Dịppe anyen mfo se ke afịd akpoebod se idọọk mme ufene edoñño mme awere udịm, ñkem ye ntọi, sia ami mmaakịt afịd se Leban akenam ye afo. 13Ami ndo Abasi Beteel, itie a-afo akeyette adaaha adan anyʌñ anam akaaña annọ miin. Idahami kpọñ itie ami inikeed nyʌñ tịmme nyọñ isọñ emana mfo.’ ”
14Akema Ratiel ye Lia emaebọọrọ anye ete, “Nte ñnyịn isʌk inie udeeme ke udeemeñkpọ a-atooho ufọk ete ñnyịn? 15Nte anye idatta ñnyịn nte mme adidʌñ? Idooho ke adinyam ñnyịn ikpọọñ, ado anye amaadia afịd se ekekpe anye ke iwuod ñnyịn. 16Ke ataa akpanikọ, afịd inie se Abasi asio akpọñ ubọk ete ñnyịn ado ñnyịn inie ye nditọ ñnyịn. Ke ntoro nam se adodo A-Abasi abooho afo anam.”
17Akema Yekọb amaatañ nditọ ye ibaan amọ adoot ke mme kamel, 18ndin anye amaanyʌñ asịññe afịd mme ufene asịn ke iso, diana ye afịd inie se anye akenie ke Padan Aram,#31:18 A-adooho Adoro usobutịn Mesopotemia anyọñ abịne ete amọ Aisik ke isọñ Kenan.
19Ke ini Leban amaakekaa adifat mme ufene ided, Ratiel amaayịp mme abasi ufọk ete amọ. 20Mfen-mfen, Yekọb amaabiaña Leban awo Aram ke anye adikitre aditañ nnọọ anye ke imọ iyaifeghe inyọñ. 21Ndin anye amaafeghe ye afịd se anye akenie, akaaña inyañ Yufretis, akọñ iso ase idịd abod Kilied.
Leban Abịne Yekọb
22Ke ayọhọ usen ita, emaekedọkkọ Leban ke Yekọb amaafeghe. 23Anye amaadat nditọete amọ adian idem, anyʌñ abịne Yekọb ke usen itiaba tutu akesịme anye ke idịd abod Kilied. 24Akema, Abasi amaabo Leban awo Aram akonayio ke ndab ate, “Tịm kpeme, kuutañ ikọ ndomokeed ye Yekọb, adooho eti me idiọọk.”
25Yekọb amaawuuk atayad amọ ke abod-abod idʌñ Kilied ke ini Leban akebọhọke anye akaa iso, ndin Leban ye nditọete amọ emaebono ke ndo ñko. 26Akema Leban amaabo Yekọb, “Nsoo inam afo anam ntom? Afo amembiaña miin, anyʌñ akoono nditọ ibaan mmi anyọñ nte mbon e-emʌmmọ ke ekọñ. 27Nsoo ido ntak afo akefegheke anyọñ ke ndịbe anyʌñ ambiaña miin? Nsoo inam afo undọkkọke miin, nọ ami ñkpusio fiin unyọñ ke idaara ye ikwọ ñkeene mbiiñe mme ibịdubọk ye mme ndidoudʌk? 28Afo ukuyakka ami ntʌm nditọ ayeyịn mmi ye nditọ ibaan mmi inua ñnyʌñ mbo ammọ esañasʌñ. Afo amenam ndisịme ñkpọ. 29Ami mmenie adudu adunọmọ fiin; ado akonayio ñkpọñ a-akeboiyoke Abasi ete mfo amambo miin ate, ‘Tʌm kpeme, kuutañ ikọ ndomokeed ye Yekọb, adooho eti me idiọọk.’ 30Idahami afo amenyọñ sia itọñ aditịmme ñnyọñ ufọk ete mfo amaudọñ fiin ke anyan ini. Ado nsoo ido nọ afo ayịp mme abasi mmi?”
31Yekọb amaabọọrọ Leban abo, “Ndịk akennam miin, sia ñkekere ke afo amekeme adimbọi nditọ ibaan mfo ke adudu. 32Ado adieke afo akịtte awo ndomokeed a-akebenne mme abasi mfo, utọ awo ado idiiduuho uwem. Ke iso nditọete ñnyịn, se ke idem mfo me aba ñkpọ a-adooho ake mfo a-abaaha ye ami. Adieke adooho ntoro, dat anye.” Idaha ntoro Yekọb ikidiọọñọke ke Ratiel amaayịp mme abasi Leban.
33Ndin Leban amaadʌk akaa atayad Yekọb ye atayad Lia ye atayad nditọufọk ibaan ammọ, ado anye ikikịtte ñkpọ ndomokeed. Ke anye amaakewuọ ke atayad Lia, anye amaadʌk atayad Ratiel. 34Ado Ratiel amaaben mme abasi ufọk ete amọ asịn ke edem kamel anyʌñ adọọk atie. Leban amaayeem afịd ñkpọ ke atayad, ado ikikịtte mme abasi ufọk amọ.
35Ndin Ratiel amaabo ete amọ, “Abọọñ mmi, kuuyat esịd ubo ke ami ñkanna ndakka nda ke iso mfo, sia ami mba ke itieisọñ.” Ndin anye amaayem ado ikiikịte mme abasi ufọk amo.
36Yekọb amaayat esịd anyʌñ atọhọ ye Leban. Ndin anye amaabịp Leban. “Nsoo ido idiọọkñkpọ mmi? Die ke ami udue fiin a-anamma afo ambịne miin ikañ-ikañ ntom? 37Idahami, a-afo amaakeyeem afịd ñkpọ mmi, nsoo ke afo akịt a-adooho ñkpọ ufọk mfo? Nịm anye mi ke iso mbon mfo ye ake mmi, nyʌñ yak ammọ ekpe ikpe inọ ñnyịn awo iba.
38“Ami mmedʌñ ye afo ke isua edịb idahami. Edọñ mfo ye ebod mfo ibʌññọke idịb akpa, ñko kpaanam ami ntaaha mme akukịmedọñ e-etooho udịmedọñ mfo. 39Ami ñkidatta mme unam se ndiọi unamikọd ewai usọk fiin; mmaayọ ntakudua ado ke idem mmi ikpọọñ. Ndin afo amaasinam nọ ami ukpe fiin ekọmudua ke se ekeyịp ke uweemeayio me ke akonayio. 40Ami akedo se ikiñwọọñọ miin: Ufiob amamfọp miin ke uweemeayio, ye atueb ke akonayio, idab anyʌñ afeghe akpọñ anyen mmi. 41Akeba ntom ke isua edịb a-ami ñkebaaha ke ufọk mfo. Ami mmaanam utom unọ fiin ke isua duob mme inaañ ke nditọ ibaan mfo iba ye isua itiokeed ke ufene mfo, ndin afo amaakpəho akʌk utom mmi akañ duob. 42Adieke Abasi ete mmi, Abasi Ebraham ye Mbaak Aisik, imiikpikibaaha ye ami, ke akpanikọ afo akpaakensio miin unyọñ ñkaña ubọk. Ado Abasi amaakịt nsịnifịk mmi ye akpọsọñ utom mmi, ndin akonayio ñkpọñ anye amaasua unọ fiin ke adinam mfo.”
43Leban amaabọọrọ Yekọb ate, “Ibaan ami edoñño nditọ ibaan mmi, nditọ ami edoñño nditọ mmi, udịmedọñ ami edoñño udịmedọñ mmi. Afịd se afo akịt ami edoñño ake mmi. Ndin nsoo ke ami ñkeme adinam mfịn mbaña nditọ ibaan mmi, me nditọ a-ammọ emanna? 44Di idahami, yak ñnyịn inam edioomo, afo ye ami, ndin yak ami atie nte ntiense ke ufọọd ñnyịn.”
45Ndin Yekọb amaaben itiad awuuk nte adaaha. 46Yekọb amaadọkkọ nditọete amọ ate, “Ikoono mme itiad ibok.” Ndin ammọ emaekoono itiad ekọọk ke eboho, emaenyʌñ edia ñkpọ ke mben eboho itiad ado. 47Leban amaakoot itie ado Yeka Sahaduta,#31:47 Yeka Sahaduta ye Kaleed ke usem Hibru awuọñọ abod ntiense. ndin Yekọb amaanyʌñ akoot anye Kaleed.
48Leban amaabo ate, “Eboho itiad ami ado ntiense ke ufọọd mfo ye ami mfịn ami.” Ami ado ntak e-ekoodo anye Kaleed. 49Ekenyʌñ ekoot anye Mispa,#31:49 Mispa awuọñọ itieukpeme sia anye akebooho, “Abọọñ akpekap ukpeme fiin ye ami ke ini ñnyịn idukpọññọke idem ñnyịn. 50Adieke afo adiọọhọ ido ye nditọ mmi ibaan me adieke afo adọọhọ ibaan mfen akọrọ ye nditọ mmi ibaan, akpesʌkado awo ndomokeed imiibaaha ye ñnyịn, toiyo bo ke Abasi ado ntiense ke ufọọd ami ye afo.”
51Leban amaanyʌñ abo Yekọb, “Se eboho ami, tịmme se adaaha a-ami ñkewuuhọ ke ufọọd mmi ye afo. 52Eboho ami ado ntiense, adaaha ami anyʌñ ado ntiense, ke ami ndiibọhọke eboho ami ndi ukañ mfo ndunam fiin idiọọk, ndin ke afo uduubọhọke eboho ami ye adaaha ami udi ukañ mmi udunnam miin idiọọk. 53Abasi Ebraham ye Abasi Nahọ, Abasi ete ammọ, ayaakpe ikpe ke ufọọd ñnyịn.”
Ndin Yekọb amaata unwọñọ ke anyịñ Mbaak ete amọ Aisik.
54Yekọb amaawa uwa ke abod abio, amaanyʌñ akoot nditọ ete amọ edi ndidia. Ke ammọ emaekedia ñkpọ ema, ammọ emaedaiya ke akonayio ke itie ado.
55Ke usiere ubakusen Leban amaatʌm nditọ ayeyịn amọ inua ye nditọ ibaan amọ anyʌñ adiọñ ammọ. Akema anye amaakpọñ do atịmme anyọñ idʌñ amọ.#31:55 Ke ikpañwed ake mbon Hibru Yenesis 31:55 ewet nte Yenesis 32:1
Currently Selected:
Yenesis 31: ICB
Highlight
Share
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
