Yenesis 24
24
Aisik ye Ribeka
1Idaha ntoro, Ebraham amaanekke asọñ, ndin Abọọñ amaadiọñ anye ke afịd usʌñ. 2Ebraham amaabo ekamba ayịnufọk ke atu nditọufọk amọ, anye a-akekarake afịd se anye akenie, “Sịn ubọk mfo ke idak ifʌkkọ mmi. 3Ami ñyem nọ afo anwọñọ ke anyịñ Abọọñ, a-adooho Abasi anyọñ ye Abasi isọñ, ke afo uduukuyemme anwaan unọ ayịn mmi ke atu nditọ ibaan mbon Kenan, a-ami ndʌññọ ke atu ammọ, 4ado ke ayaakaa abio mmi ke atu mbon ekpək mmi anyʌñ akeyem anwaan anọ Aisik ayịn mmi.”
5Ayịnufọk amaabịp anye, “Akpedo awonwaan ado inyịmmeke iñkeene miin ndi abio ami-e? A-ado se ami mmaana mben ayịn mfo ñka abio a-afo aketooho adi?”
6Ebraham amaabo, “Kịt bo ke afo uduubenne ayịn mmi utịmme ukaa do.” 7“Abọọñ, Abasi anyọñ, a-akensioho miin ke ufọk ete mmi ye ke atu mbon ekpək mmi ye anye a-aketañña ikọ ye ami a-anam unwọñọ abo, ‘Nditọ mfo ke ami ndiinọ isọñ ami,’ ayaadọñ enyere amọ ubem fiin iso akesịm nọ afo akịt anwaan anọ ayịn mmi ke udo. 8Akpedo anam awonwaan ado imaaha ukeene fiin ndi umi, afo ayaabọkkọ unwọñọ mmi ami. Ado kuuben ayịn mmi ukaa udo.” 9Ndin ayịnufọk ado amaasịn ubọk ke ñkpatiañ ukod Ebraham eteufọk amọ anyʌñ anwọñọ unwọñọ anọ anye ke abaña ñkpọ ami.
10Akema, ayịnufọk ado amaaben kamel eteufọk amọ duob adọñ nsio-nsio ñkpọ se eteufọk akenọọ anye adakka isañ. Anye amaakaa Aram Naharaim#24:10 A-adooho Adoro usobutịn Mesopotemia anyʌñ anam isañ akewuọ abio Nahọ. 11Ke ndubiayio, idaha ibaan esikikoiyo mmọọñ ke ube, anye amaanam mme kamel ado etọọñọ edọñ ke ñkpere ube mmọọñ ke edem abio ado.
12Ndin anye amaabọñ akam abo, “Abọọñ, Abasi eteufọk mmi Ebraham, nam nnie mfọniso mfịn, nyʌñ wọt eteufọk mmi Ebraham mfọn. 13Se ami ndaaha mi ke mben mmọọñ, ndin nditọ ibaan abio ami esʌk ewuọ edi edikoi mmọọñ. 14Yak ado ke ami mmaabo abọikpa, ‘Mbọk biommo abañ mfo nnọ mmọọñ ñnwọñ,’ anye abo, ‘Nwọñ, nyʌñ yak nnọ mme kamel mfo mmọọñ ñko,’ yak anye ado anwaan a-afo amekke anọọ ayịnufọk mfo Aisik. Ukpunam ami ñyaadiọọñọ ke afo amefọn mfọn ye eteufọk mmi.”
15Mbemiso anye abọñ akam ami ama, Ribeka amaadot abañ ke afara asaña adi. Anye akedo ayịn Betuel a-akedooho ayịn Milka, a-akedooho anwaan Nahọ ayịneka awodeen Ebraham. 16Anye amaanekke ayaiya, idiọọñọke awodeen kpaanam; sia akenam awodeen ibaaha ye anye. Anye amaatịkke akaa mben mmọọñ, akekoi mmọọñ amaana adidọọk.
17Ayịnufọk ado amaafeghe abịne anye akebo, “Mbọk tọkkọ etək mmọọñ ke abañ mfo nnọ ñnwọñ.”
18Anye amaabo, “Abọọñ mmi nwọñ,” anyʌñ asọp idem abiommo abañ akama ke ubọk anọ anye mmọọñ.
19Anye amaakenọ anye mmọọñ ama, anye amaabo, “Ami ñyaakoi mmọọñ nnọ mme kamel mfo ñko, nọ ammọ enwọñ yak ayʌkkọ.” 20Ke ntoro anye amaasọsọp anwañña mmọọñ ke atu amọ adọñ ke akwa, atịmme afeghe akaa ube mmọọñ akekoi mmọọñ se ikem afịd mme kamel amọ. 21Ayịnufọk Ebraham amaadop ada, ase anye usʌk-usʌk nọ adiọọñọ me Abọọñ a-anam me inamma isañ imọ afọn.
22Ke ini mme kamel emaekenwọñ mmọọñ ema, ete ado amaasio ñkpannuun kold e-esisịneke ke iwuo ake udob amọ akedooho beka#24:22 Ñkpọ nte kram 5.7 keed ye ñkpaha ubọk kold iba ake udob amọ akedooho sekel#24:22 Ñkpọ nte kram 115 duob. 23Ndin anye amaabịp anye ate, “Afo ado ayịn anie? Mbọk ndọkkọ miin, ubeed aba ke ufọk ete mfo se ñnyịn ikpinaa akonayio ami?”
24Anye amaabọọrọ, “Ami ndo ayịn Betuel, a-adooho ayịn Milka akemanna anọ Nahọ.” 25Anye amaadian do abo, “Ñnyịn iminie uwak ñnyanyaha ye ikịm se enọ ufene, dian ye ubeed se afo anaa akonayio ami.”
26Awodeen ado amaanyuuk iwuod anọ Abọọñ ukpono, 27anyʌñ abo, “Itooro anie Abọọñ, Abasi eteufọk mmi Ebraham, i-imiifreke mfọn ye akpanikọ amọ ye Ebraham eteufọk mmi. Amaado ami, Abọọñ andat miin usʌñ ke isañ mmi adiwuọ ufọk awo ekpək mme eteufọk mmi.” 28Akema, abọikpa ado amaafeghe akedọkkọ mbon ufọk eka amọ mme ñkpọ ami. 29Ndin Ribeka amaanie ayịneka awodeen a-akekereke Leban, ndin anye amaasọp awuọ abịne awo ado ke mben idịm. 30Ke ini anye akekịtte ñkpannuun iwuo ye ñkpahaubọk ado ke ubọk ayịneka amọ, anyʌññọ akop se Ribeka akebo naña ete ado aketañ ye imọ, anye amaawuọ abịne ete ado anyʌñ akekịt anye naña ada akpere mme kamel ke ñkpere mben idịm. 31Anye amaabo, “Di, afo A-Abọọñ amaakediọñ. Ntaha afo adaaha do ntoro-o? Ami mmetʌm ufọk ye itie nnọ mme kamel mfo.”
32Ke ntoro, ete ado amaakeene akaa ufọk, emaenyʌñ edooño mbiomo ke anyọñ kamel ebon. Emaeben ñnyanyaha ye ikịm esọk mme kamel, ndin emaenọ anye ye ideen e-ekesañake ye anye mmọọñ nọ eyie ukod. 33Ndin emaenọ anye ndidia, ado anye amaabo, “Ami ndiidiaha ñkpọ tutu ami udọkkọ fiin se nnie aditañ.”
Leban amaabo, “Idọkkọ ñnyịn.”
34Anye amaabo, “Ami ndo ayịnufọk Ebraham. 35Abọọñ a-anekke adiọñ eteufọk mmi, ndin anye akappa ado imọawo. Abọọñ a-anọ anye mme edọñ ye enañ, silfa ye kold, nditọufọk ideen ye ibaan, mme kamel ye mme dọñki. 36Sera anwaan eteufọk mmi amaaman ayịn awodeen anọ anye ke ayio usọñ amọ, ndin afịd se anye anie ayaak anọ ayịn ado. 37Ndin eteufọk mmi amaanam ami ndat unwọñọ, amaanyʌñ abo, ‘Inaaha afo adọ anwaan ke atu ibaan Kenan anọ ayịn mmi, 38ado kaa ke ekpək ete mmi ye ke ubon mmi, nyʌñ kedọ anwaan nọ ayịn mmi.’ ”
39“Ndin ami mmaabịp eteufọk mmi, ‘Awonwaan ado imiimaaha iñkeene miin ñnyọñ-ọ?’ ”
40“Anye amaabọọrọ, ‘Abọọñ a-ami nsañake ke iso amọ ke ataa akpanikọ, ayaadọñ enyere amọ nọ asaña ye afo anyʌñ anam usʌñisañ mfo afọn, nọ ato do afo akan akịt anwaan anọ ayịn mmi ke ubon mmi ye ke ekpək ete mmi. 41Afo ayaabọkkọ unwọñọ mmi adieke adooho afo akeka ubon mmi, ammọ esịn ediyaak awonwaan ado unọọ fiin.’
42“Mfịn ami ñkediwuọ mben idịm, ami mmaabo, ‘Abọọñ Abasi eteufọk mmi Ebraham, akpunem fiin esịd, mbọk nnọ miin mfọniso ke isañ a-ami ndiighe mi. 43Se ami ndaaha mi ke mben idịm. Abọikpa ndomokeed akpedi adikoi mmọọñ ami ñyaabo anye, “mbọk nnọ miin etək mmọọñ ke abañ mfo nọ ñnwọñ,” 44ndin anye akpembo miin, “Nwọñ, yak ñnyʌñ ñkoi nnọ mme kamel mfo,” yak anye ado anwaan A-Abọọñ amekke anọ ayịn eteufọk mmi.’
45“Mbemiso ami mbọñ akam mma ke esịd mmi, Ribeka amaawuọ adi, adot abañ ke afara. Anye amaatịkke akaa usuuk idịm akekoi mmọọñ, ndin ami mmaabo anye, ‘Mbọk nnọ mmọọñ ñnwọñ.’
46“Usọp-usọp, anye amaabiommo abañ amọ anịm anyʌñ abo, ‘Nwọñ, ndin ñyaanyʌñ nnọ mme kamel mfo enwọñ.’ Ami mmaanwọñ ndin anye amaanyʌñ anọ mme kamel mmi mmọọñ.
47“Ami mmaabịp anye, ‘Afo ado ayịn anie?’
“Anye amaabọọrọ, ‘Ayịn Betuel a-adooho ayịn Nahọ, a-Milka akemanna anọ anye.’
“Ndin ami mmaasịn anye ñkpannuun iwuo ye ñkpahaubọk ke ubọk, 48ñko ami mmaatuak iwuod ñkpono Abọọñ. Ami mmaakọọm Abọọñ, Abasi eteufọk mmi Ebraham, a-akendatta miin nọ nsaña nnen-nnen usʌñ ñkekịt ayeyịn ayịneka eteufọk mmi nte anwaan nnọ ayịn eteufọk mmi. 49Idahami, adieke ndufo ediiwọt eteufọk mmi mfọn ye akpanikọ, indọkkọ miin; imiidooho ntoro, indọkkọ miin, nọ ami ndiọọñọ ubeñ nte nda.”
50Leban ye Betuel emaebo, “Anye ami ato Abọọñ; ñnyịn idiikanna itañ ñkpọ ndomokeed isịn ke se ñnyịn ikop ami. 51Se Ribeka adaaha mmi; ben anye kaa, yak anye anyʌñ akedo anwaan ayịn eteufọk mfo, kpa naña Abọọñ akudat usʌñ.”
52Ke ayịnufọk Ebraham akekoppo se ammọ eketañ, anye amaatuak iwuod ke isọñ anọ Abọọñ. 53Ayịnufọk ado amaasịññe mme ñkpọ mbanaidem e-enamma ke kold ye silfa, mme ñkpọ se esịne ke idem ayaak anọ Ribeka. Anye amaanyʌñ anọ eka ye ayịneka awodeen amọ mme nsọñudua enọ. 54Ndin anye ye mbon se ikisaña ye anye emaetie edia ñkpọ, enyʌñ enwọñ ñkpọ, enyʌñ eba do tutu ayio asiere.
Ammọ emaekedemme idab ubakusen, anye amaabo, “Nsio miin unyọñ nọ mbịne eteufọk mmi.”
55Ado ayịneka Ribeka awodeen ye eka amọ emaebọọrọ ete, “Yak abọikpa ami atie etək ye ñnyịn ke ñkpọ nte usen duob; ndin ndufo emekeme adinyọñ.”
56Ado anye amaabo ammọ, “Ikimmʌm miin inịm, idaha Abọọñ amaakenam nọ ñkịt unen ke usʌñisañ mmi do. Insio miin unyọñ nọ ami ñka mbịne eteufọk mmi.”
57Ammọ emaebo, yak ikoot idem abọikpa ikop ito anye se anye ayem enam. 58Ndin ammọ emaekoot Ribeka ebịp, “Afo ayaakeene ete ami anyọñ?”
Anye amaabọọrọ, “Ami ñyaakeene.”
59Ke ntoro, ammọ emaeyaak Ribeka ayịneka awonwaan ammọ akeene, dian adeb amọ ye nditọufọk Ebraham ye ideen amọ. 60Ndin ammọ emaediọñ Ribeka enyʌñ ebo anye,
“Ayịneka ñnyịn, afo ayaatọt
ke tọsịn ke tọsịn;
yak nditọ mfo edat
mme abio mme asua ammọ enie.”
61Ndin Ribeka ye mme adeb amọ emaebeeñe idem edọọk kamel ekeene ete ado enyọñ. Ndin ayịnufọk Ebraham amaaben Ribeka anyọñ.
62Idaha ini ntom, Aisik amaato Bee Lahai Rọi adi, sia anye akedʌñ ke Nekef. 63Ndubiayio usen keed, Aisik amaawuọ akaa inwañ adikibọñ akam, ndin anye akedịppe iso, anye amaakịt nte mme kamel edi. 64Ribeka ñko amaabenne anyen akịt Aisik, ndin anye amaatịkke ke kamel amọ 65anyʌñ abịp ayịnufọk ado abo, “Anie awodeen ido ako ke inwañ a-asañake ibịne ñnyịn?”
Ayịnufọk amaabọọrọ, “Anye ado eteufọk mmi.” Ribeka amaaben afọñ ufʌkidem amọ afʌk idem amọ.
66Akema ayịnufọk amaadọkkọ Aisik afịd se anye akenam. 67Aisik amaaben Ribeka adʌk atayad eka amọ Sera, ndin Ribeka amaakappa ado anwaan amọ. Aisik amaanyʌñ ama anye, anyʌñ akop ndọñesịd ke ñkpa eka amọ.
Currently Selected:
Yenesis 24: ICB
Highlight
Share
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
