Ñwed Mbon Kalesia 1
1
Ekọọm Pọọl
1Ado ami Pọọl abọsịd e-esioho edọñ, idooho mme awo inyʌññọ ido awo ndomokeed andọñ, ado Yisọs Krais ye Abasi Ete, a-akenamma anye aset ke ñkpa, 2ye afịd mme nditọeka#1:2 Ke usem Greek adelfọi a-adaaha anọ nditọeka ideen me ibaananyʌñ ada anọ ideen ye ibaan e-enịmme Krais ke akpanikọ, ke atu ubon Abasi; se ñko ke Kalesia 1:11; Kalesia 3:15; Kalesia 4:12, 28, 31; Kalesia 5:11, 13; Kalesia 6:1, 18 ke Krais e-ebaaha ye ami, inọọ ñwed ami esọk mme ufọkabasi ke Kalesia.
3Mfọn ye emem a-atooho Abasi Ete ye Abọọñ ñnyịn Yisọs Krais aba ye ndufo. 4Anye a-akeyaaha idem amọ anọ ke ntak mme idiọọkñkpọ ñnyịn nọ inyaaña ñnyịn esio ke idiọọk ayio emana ami, nte asañake akekem ke uduak Abasi Ete. 5Ubọọñ anie anye ke nsi-nsi, nsi-nsi. Amen.
Eti Etob Mfen Ibaaha
6Añkpa miin idem eti-eti ke ndufo emesọsọp esịn anye a-akikoodo ndufo ke mfọn Krais ndin ekappa ekpañ utọñ enọ etob mfen, 7i-imiidooho eti etob ke baaba usʌñ ndomokeed. Ami mmediọọñọ ke abañña mme awo e-edisịnne ndutịme ke esịd ndufo, sia ammọ enwana adibiabiat eti etob Krais. 8Ado ñkọm akpedo ñnyịn, me enyere akpeto hefịn adikwọrọ eti etob mfen i-imiidooho se ñnyịn ikikwọrọ inọọ ndufo, yak ammọ eba ke isuuñọ Abasi! 9Naña ñnyịn imaikitatañ, kpa ntoro ke ami mmaana ntañ: Adieke awo ndomokeed akwọrọke eti etob a-awuọhọ akpọñ se ndufo emaekenyịmme, yak ammọ eba ke isuuñọ Abasi!
10Idahado me ami ñnwana adinem mme awo esịd me Abasi? Me ami ñnwana adinam esịd anem mme awo? Akpekedo ami ñkenwana adinem mme awo esịd, ami ñkpidooho isʌñutom Krais.
Abasi Ado Andikoot Pọọl
11Nditọeka ke Krais, ami ñyem ndufo ediọọñọ ke eti etob a-ami ñkekwọrọke itooho awo. 12Ami ñkibọọhọ anye nto awo ndomokeed, inyʌññọ ido nte ekeñkpeekpeep; ado ami ñkebọ anye nto adiyaara Yisọs Krais.
13Sia ndufo emekop ebaña akaan eduuwem mmi ke idak edu ukpono Abasi mme Yuu, naña ami ñkesikọbọ ufọkabasi afai-afai ke afịd usʌñ ye naña ñkenwana adibiat anye. 14Ami mmaadọọk ke idaha ke edu ukpono Abasi mme Yuu ñkan uwak mme Yuu e-ekedooho ubọk ñka mmi, ñnyʌñ nsịn idem eti-eti ke adisaña ke ndutʌm uwem mme eteete mmi. 15Ado ke ini Abasi a-akensioho miin asaña-asaña anịm tọọñọ ke emana mmi, a-akenyʌññọ añkoot ke mfọn amọ, akenemme esịd 16adiyaara Ayịn amọ ke idem mmi nọ ato do ami ñkwọrọ anye ke atu mme Gentile, ibọọrọ mmi akedo aditre adineme ye awo ndomokeed. 17Ami ñkikaaha Yeruselem ñkekịt mbon e-ekembemme miin iso edo mme abọsịd, ado ñkesọọsọp ñkaa Arebia. Akema ami mmatịmme ñnyọñ Damaskọs.
18Ke isua ita amaakeboiyo ami mmaadọọk ñkaa Yeruselem ñkediọọñọ Kefas#1:18 Kefas awuọñọ Pita ñnyʌñ ntie ye anye usen duob mme ition. 19Ami ñkikịtte mme abọsịd mbon ñko, ibọhọke Yems, ayịneka Abọọñ ñnyịn. 20Ami mmenwọñọ ke iso Abasi mbo ke afịd se ñwed ndomokeed idooho nsu.
21Akema, mmaadika Siria ye Silisia. 22Mme ufọkabasi ke Yudia e-ebaaha ke Krais ikindiọọñọke. 23Ammọ ekekop etob kpọd, ete ke: “Awo a-akesikọbọke ñnyịn, idahami adikwọrọ mbuọdidem a-anye akenwanake adisobo.” 24Ndin ammọ emaetooro Abasi ke ntak mmi.
Currently Selected:
Ñwed Mbon Kalesia 1: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
