Esikeel 38
38
Akwa Adikan Abọọñ ke Atu mme Idịd
1Ikọ Abọọñ amaadinsịm miin ate: 2“Ayịn awo, nen iso mfo nọ ñkañ Kọk ke utịd ñkañ Makọk, a-adooho abọọñ ke atu nditọ ideen mbọọñ Mesek ye Tubal; tañ prọfesi baña anye 3nyʌñ bo: ‘Se Abọọñ Andikara atañ ado ami: Kọk, abọọñ ke atu nditọ ideen mbọọñ ke Mesek ye Tubal, ami mmenie ikọ ye afo. 4Ami ñyaukanna fiin nnịm, usịn fiin uwaam ke mbañ ñnyʌñ udʌt fiin nsio ndi ye afịd udịmekọñ mfo; mme enañmbakara mfo, mme awad enañmbakara mfo e-ekamake mme ñkpọ ekọñ, ye mme ikpọ uwak atu awo e-enieñeke mme ikpọ ye mme ntək atuekọñ, a-afịd ammọ ekamake mme akañkañ ammọ ke ubọk. 5Pesia, Kuus ye Pud eyaeba ye ammọ, afịd ammọ ye atuekọñ ye itamukwak, 6ñko Koma ye afịd udịmekọñ amọ, ye Bed Tokama e-etooho ataa esịd adoro ye afịd udịmekọñ amọ, mme uwak idịd e-ebaaha ye afo.’ ”
7Itịm idem; iba ke mbeeñeidem, ndufo ye afịd udịm awo u-ukannake fiin ekʌk, nyʌñ bọ uyio to ammọ. 8Ke uwak usen amaaboiyo eyaukoot fiin enọ ñkpọ ekọñ. Ke mme isua ke iso, afo ayaadʌk aben isọñ a-akebọkkọke ekọñ, e-ekekoonoke mbon ammọ eto nsio-nsio mme idịd ekebon ke mme ikpọabod Isrel, e-ekebaaha ke nsobo ke uwak isua. Ekesịññe ammọ ke mme idịd, ñko idahami afịd ammọ edʌñ ke ifuuro. 9Ndufo ye afịd mme udịmekọñ ndufo ye mme uwak idịd e-ebaaha ye ndufo eyaedọọk ke anyọñ, e-ebịmme nte ayobio; ndufo ediiba nte ntọñanyọñ afʌkkọ isọñ.
10“ ‘Ami ado se Abọọñ Andikara atañ: Ke usen ado akikere ayaudʌk fiin esịd ndin afo ayaaduak idiọọk uduak.’ ” 11Afo ayaabo, “Ami ñyaadʌk isọñ mme abio e-enanake ndibene; ami ñyaatịmede mbon e-etieghe ke ifuuro ye mbon e-etieghe ke ndueidem; afịd ammọ e-edʌñọke inieghe ndibene ye itịm ye eto usʌñ. 12Ami ñyaabịme mbịme ñnyʌñ ñwo ñwo ñnyʌñ ñwọññọ ubọk mmi nse ndoon e-emaanake edidʌñọ ye mbon e-ekoonoke eto mme idịd, e-emọinyọke ke ufene ye ke mme ñkpọ mfen, e-edʌñọke ke ufọọd isọñ#38:12 Ke Hibru udịmikọ ami awuọñọ akob isọñ. ado.” 13Seba ye Dedan ye mme anyam udua Taasis ye afịd mme abio amọ eyaubo fiin, “Nte afo amedi adibịme mbịme? Afo amekoono atu awo mfo adiwo ñwo, adiben silfa ye kold, adiben ufene ye mme inie ye adibọi mme mbịme?”
14“Ke ntoro, ayịn awo, tañ prọfesi nyʌñ bo Kọk: ‘Se Abọọñ Andikara atañ ado ami: Ke usen ado, ke ini Isrel mbon mmi edʌññọ ke ifuuro, nte afo uduukịtte? 15Afo ayaato itie mfo ke anyan adoro adi, afo ye uwak idịd mfen e-esañake ye afo, afịd ammọ ediiwat ke enañmbakara, ekamba atu awo ye mme asọñ idem mbon ekọñ. 16Afo ayaawuọ abịne mbon mmi Isrel nte ntọñanyọñ a-afʌkkọ isọñ. Kọk, ke mme usen ediighe ke iso, ami ñyaanam afo anwana ye mbon mmi, nọ ato do mme idịd endiọọñọ miin ke ini ami ndiiwọt idem nte adisana uto fiin ke anyen ammọ.
17“ ‘Ami ado se Abọọñ Andikara atañ: Afo ke ami ñketañ mbaña ke mme usen edem nto ke inua nditọufọk mmi e-edooho mme prọfed ke Isrel. Ke ini ado ammọ emaetañ prọfesi ke uwak isua ebo ke ami ñyaanam nọ ndufo etuaha ye ammọ. 18Ami ado se idiitịppe ke usen ado: Ke ini Kọk atuahake ye isọñ Isrel, ufiob iyadesịd mmi ayaadakka nduduai, Abọọñ Andikara atañ. 19Ke nsịnifịk mmi ye akpọsọñ iyadesịd mmi ami mmetañ mbo ke ini ado ekamba unyekisọñ ayaaba ke isọñ Isrel. 20Mme iyak ke akpainyañ, mme inuen ke ikpaanyọñ, mme unam ke ikọd, afịd ñkpọ se ebod e-esañake ke isọñ, ye afịd awo e-ebaaha ke unadod eyaenyeñ idem ke iso mmi. Mme ikpọabod eyaewuuro, mme ikpọ itiad eyaesuana, ñko afịd ndibene eyaeduọ ke isọñ. 21Abọọñ Andikara atañ: Ami ñyaadọñ akañkañ nnọ Kọk ke afịd ikpọabod mmi. Ayịneka awodeen ayaaben akañkañ akeene emọ-emọ ayịneka awodeen. 22Ami ndiidat idiọọk unọmọ ye uduọkiyiib ñkpe ikpe nnọ anye; ami ñyaanam ekamba edịm, edịmitiad ye ikañ adep anọ anye ye mme udịm ammọ ye mme uwak idịd e-ebaaha ye anye. 23Ke ntoro ke ami ndiiwọt naña ami ñkpon ñnyʌñ nsana, ndin ami ñyaanam nọ endiọọñọ miin ke uwak mme idịd. Ndin ammọ eyaediọọñọ ke ami ndo Abọọñ.’ ”
Currently Selected:
Esikeel 38: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
