Ñwed Mbon Efisọs 2

Adimaana Ndu Uwem ke Krais

1Amaado ndufo, emaekpañña ke ntak ndiọiñkpọ ye ndudue ndufo, 2a-ndufo ekenamma ke adikikeene ndʌk mme usʌñ ederimbod ami, ye adikeene andida ukara ubọọñ ke ikpeghe afịm, sịbidịd a-anamma utom idahami ke idem mbon ntreutọñ. 3Ini keed ko, afịd ñnyịn ikinyʌñ iba ke atu ammọ, inyʌñ idu uwem inọ adiyʌkkọ iwʌd abʌkidem ye adikeene mme udọñ ye mme akikere amọ. Kpa nte mbon mfen, tọọñọ ke emana ñnyịn ikidoñño ñkpọ iyadesịd Abasi. 4Ado ke ntak ekamba ima a-anye anieghe inọọ ñnyịn, Abasi a-mbọm amọ akponno, 5amaanam ñnyịn idu uwem ye Krais akpesʌkado ñnyịn imaikikpañña ke mme ukwañ ñkpọ, ado ato ke mfọn ke ndufo ebọọ adinyaaña. 6Ndin Abasi amaanam ñnyịn iset ye Krais anyʌñ anam ñnyịn itie ye anye ke mme ikpeghe abioubọọñ hefịn ke Krais Yisọs, 7nọ ato do ke mme isua a-adiidi, anye adiikan iwọt ananambid uwak mfọn amọ a-anye anamma nọ ikem ñnyịn ke mfọnido amọ ye ñnyịn ke Krais Yisọs. 8Sia ke mfọn ke inyaaña ndufo, ato mbuọdidem, ndin anye ami itooho ndufo, ado ado enọ a-atooho Abasi, 9idooho ke mme utom, mbaak awo ndomokeed adiduaak inua. 10Sia ñnyịn ido ubọkutom Abasi e-ekebotto ke Krais Yisọs ete inam nti utom, A-Abasi amaakebebem iso abeeñe anịm inọọ ñnyịn adinam.

Emem ke Ufọọd mme Yuu ye mme Gentile

11Ke ntoro, itoiyo ke ndufo e-ekedooho mme Gentile ke emana a-mbon “e-efọọrọke edʌd” ikootto ndufo “mbon i-imiifọọroke edʌd” (e-ekamake ubọk awo enam ke ikpọkidem) 12itoiyo ke ndufo emaediañña ekpọñ Krais, ikisịneke ke atu nditọ Isrel, ekenyʌñ edoñño isen ke abaña akaaña enwọñọ, enana idodanyen enyʌñ enana Abasi ke ederimbod. 13Ado idahami, ke Krais Yisọs, e-enam ndufo e-ekedaaha nsan-nsan esaña ekpere ke iyiib Krais.

14Sia anye ke idem amọ ado emem ñnyịn, a-amaakenam mme Yuu ye mme Gentile ekappa edo keed ndin amaanyʌñ abiat ñkpọ ubiọọñọ ye ndibene ubakka ye ndusuara 15ke adiben mbed ye mme ewʌhọ ye ndutʌm unañña ñkpọ mfep ke ikpọkidem amọ. Uduak amọ akedo adibot ke idem amọ ufa uduud awo keed, ñnyʌñ nsịn emem ke adinam ntoro. 16Ndin ke abʌkidem keed anye asịn emem ke ufọọd ammọ ye Abasi ato ke krọs a-anye adatta awot ndusuara ammọ. 17Anye amaadi adikwọrọ emem inọ ndufo e-ekebaaha ke anyan usʌñ anyʌñ akwọrọ emem anọ mbon e-ekebaaha ekpere. 18Sia ke anye afịd ñnyịn iminie ufañ adisaña ñkpere Abasi ke Sịbidịd keed.

19Ke ntoro ndufo idooho aba mme adidʌñ ye mme isenawo, ado ekeene edo mme amanaisọñ ye ikọd Abasi ye mbon esịd ufọk amọ, 20e-enịmme mme abọsịd ye mme prọfed nte itiad idakisọñ ye Krais Yisọs ke idem amọ nte etubom itiad inuuk. 21Ato ke anye afịd ufọk adiana keed anyʌñ akappa adisana tembịd ke Abọọñ. 22Ndin ke anye i-ibọp ndufo edian keed nọ ekappa itie idʌñ A-Abasi adʌññọ ke Sịbidịd amọ.

Currently Selected:

Ñwed Mbon Efisọs 2: ICB

Highlight

Copy

Compare