Emọs 8
8
Akpasa Ndad-ndad Mfịd
1Ami ado se Abọọñ Andikara akeñwọt miin: akpasa ndad-ndad mfịd. 2Anye amambịp miin, “Nsoo ke afo akịt, Emọs?”
Ami mmaabọọrọ, “Akpasa ndad-ndad mfịd.”
Akem Abọọñ amambo miin, “Ini akem anọ ikọd mmi Isrel; ami ndiiyaaha ammọ aba.
3“Ke usen ado,” Abọọñ Andikara atañ, “mme ikwọ ke tembịd eyaekappa ntuaña. Eyaetoomo uwak-uwak akpo awo eboon afịd itie! Ndopuyio!”
4Ikop ami, ndufo e-etʌkkọke mbon unana,
enyʌñ esọọn mme uweene ke isọñ,
5ndufo e-ebooho,
“Idaha akee ke Ufa Afiọñ adiiboiyo
nọ ñnyịn inyam abakpa,
ini akee ke Sabad adiikweeñe
nọ ñnyịn ikpiben wiid ika udua?”
E-enam udomoñkpọ yak asịb,
ado e-enam ekọmudua akpon,
e-enyʌñ etʌk awo ke ukwañ udomoñkpọ,
6e-edep mbon uweene ke silfa
ye mbon unana ke ukod ikpaukod iba,
e-enyam kpa mbio a-atooho wiid.
7 Abọọñ amaanwọñọ ke idem amọ, Asian Yekọb: “Tutu amama, ami ndiifreke ñkpọ ndomokeed a-ammọ enamma.
8“Nte isọñ idiinyeññe ke ntak ami,
ndin afịd mbon se idʌñ ke esịd efʌhọ?
Afịd isọñ ayaadakka ada nte akpa Nail;
anye ayaatịmede ndin aduọ
nte inyañ Iyib.
9“Ke usen ado,” Abọọñ Andikara atañ,
ami ñyaanam utịn asuuhọ ke ufọọd uweemeayio,
ñnyʌñ nnam ekịm afʌk isọñ ke ataa uweemeayio.
10Ami ñyaanam mme usọrọ ukpono abasi ndufo ekappa edo mfʌhọ,
ndin afịd ikwọ eyaekappa edo ntuaña.
Ñyaanam afịd nsiine ndufo edo ntaaha afọñ,
ñnyʌñ ikwaat ndufo ided ke iwuod.
Ñyaanam ini ado akappa ado mfʌhọ anọ ukweeñe ayịn keed,
ndin utịd amọ ado idod-idod usen.
11 Abọọñ Andikara atañ: “Mme usen esʌk edi
a-ami ndiidọñ akañ ke afịd isọñ;
idooho akañ ndidia mme nsaditọñ mmọọñ,
ado akañ ukop ikọ Abọọñ.
12Mme awo eyaeyooñ tọọñọ ke akpainyañ keed tutu esịm akpainyañ mfen,
enyʌñ esaaña tọọñọ ke adoro tutu ke usakkautịn
eyeem ikọ Abọọñ,
ado ammọ idiikịtte.
13“Ke usen ado
“mme mfọọn ubọikpa ye ñkpọsọñ ñkparawa
eyaekpa mba ke ntak nsaditọñ.
14Mbon e-enwọñọke ke idiọọkñkpọ Sameria;
e-ebooho, ‘Kpa naña abasi mfo adu uwem, Daan,’
me, ‘Kpa naña abasi Beeseba adu uwem’
ammọ eyaeduọññọ, idakkake ida aba ke nsi-nsi.”
Currently Selected:
Emọs 8: ICB
Highlight
Share
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
