Utom 8
8
1Sọọd amaaba ke itie ado anyʌñ anyịmme ate ewot Stifịn.
Ukọbọ ye adisuan ufọkabasi
Ke usen ado ataa ekamba ukọbọ amaatọọñọ abaña ufọkabasi ke Yerusedem, ndin afịd awo kebeehe mme abọsịd emaesuana edʌk ukañ Yudia ye Sameria. 2Mme nti awo emaekeben Stifịn ebuuk enyʌñ efʌghọ anye eti-eti. 3Ado Sọọd amaatọọñọ akọbọ ufọkabasi, adʌk ke ufọk ke ufọk, amuum ibaan ye ideen adọñ ke ñkpakọb.
Fidib ke Sameria
4Mbon e-ekefeeñeke emaekwọrọ ikọ Abasi ke itie mme itie a-ammọ ekekaiyake. 5Ndin Fidib amaaka abio Sameria keed akekwọrọ eti etob Krais ke udo. 6Ke ini mme atu awo emaekekop ikọ Fidib enyʌñ ekịt mme utom idiọọñọ a-anye akenamma, ammọ emaenekke ekpañ utọñ ekop se anye akekwọrọ. 7Mme ndedeghe sịbidịd emaetuaha, ewuọọñọ mme awo ke idem; mbon akpaubeñ ye mbʌñọ emaenyʌñ ekop nsọñidem. 8Ndin ekandịk idaara amaaba ke abio ado.
Saimọn a-akekamake ndiọi sịbidịd anam utịbe ñkpọ
9Ke ñkpọ nte ufañ ini ifañ, amaaba awo a-akekereke Saimọn, a-akesikamake ndedehe sịbidịd anañña mme utịbe ñkpọ nọ idem akpaña afịd awo ke abio Sameria. Anye amaasiwọk inua ke imọ iminekke inie se ido, 10ndin afịd awo, ikpọ ye ntək, emaenịm anye ke akpanikọ enyʌñ ebo ete, “Asʌk adot se ekood awo ami Akwa Adudu Abasi.” 11Umiañ mbon awo emaekeene anye sia mme utịbe ñkpọ amọ amaasikpa ammọ idem eti-eti. 12Ado ke ini ammọ emaekenịm eti etob abio ubọọñ Abasi ye anyịñ Yisọs Krais, a-Fidib akekwọrọke ke akpanikọ, ammọ emaebọ uduọkmmọọñ, ideen ye ibaan. 13Saimọn ke idem amọ amaanịm ke akpanikọ anyʌñ abọ uduọkmmọọñ. Anye amaakeene Fidib aka afịd itie, idem amaanyʌñ ikpa anye ke adikịt mme ikpọ utom idiọọñọ ye utịbe ñkpọ e-ekedatta itie.
14Mme abọsịd e-ekebaaha ke Yerusedem emaakekop ke abio Sameria emaebọ ikọ Abasi, ammọ emaenọ Bita ye Yọọn eka udo. 15Ke ammọ emaekekewuọ udo, ammọ emaebọñ akam enọ ufa mme andinịm Abasi ke akpanikọ ma ammọ ebọ Adisana Sịbidịd, 16sia Adisana Sịbidịd ikisọiyọke idoro awo ndomokeed do dion, sia adooho ekenịm ammọ uduọkmmọọñ ke anyịñ Abọọñ Yisọs ikpọọñ. 17Bita ye Yọọn emaedot ammọ ubọk, ndin ammọ ebọ Adisana Sịbidịd.
18Saimọn akekịt ke aketo ke mme abọsịd adidot mme awo ubọk ke ammọ mbon Sameria ekebọ Adisana Sịbidịd, anye amaanyịmme adikpe mme abọsịd akʌk, 19anyʌñ abo ate, “Innọ miin ukem adudu ami ñko nọ awo ake ami ndot ubọk abọ Adisana Sịbidịd.”
20Bita amaabọọrọ anye ate, “Yak akʌk mfo atak ye afo, sia afo akere abo ke imikeme idep enọ Abasi ke akʌk! 21Afo unieeghe itie me udeme ke iso utom ami, sia esịd mfo inenne ke iso Abasi. 22Kappa esịd kpọñ ibak uwem ami nyʌñ bọñ akam nọ Abọọñ. Akeme ido anye ayaafeen unọ fiin ke afo adinie utọ idiọọk akikere ado ke esịd mfo. 23Sia ami mmekịt ke afo aba ke ukad idiọọkesịd ye idiọọkñkpọ.”
24Ndin Saimọn amaabọọrọ ate, “Bọñ akam nnọ Abọọñ nnọ miin mbaak ñkpọ ndomokeed ke atu se atañ ami aditịppe innọ.”
25Ke ini ammọ emaekemaana inọ ikọ ntiense ibaña Yisọs inyʌñ ikwọrọ ikọ Abọọñ ima, Bita ye Yọọn emaetịmme eka Yerusedem, ekekwọrọ eti etob ke umiañ esịd idʌñ Sameria.
Fidib ye awo Etiopia
26Ndin enyere Abọọñ amaabo Fidib, “Kaa ke usuuk usʌñ akpautatan a-atooho Yerusedem akewuọ Kasa.” 27Fidib amaadakka isañ, ndin ke usʌñ anye amaakịt awo itọ a-aketooho Etiopia. Anye akedo akwa akamautom a-akeseehe ñkpọ abaña afịd akʌk anọ Kandake, abọọñ anwaan Etiopia. Awo itọ ami akeka adikpono Abasi ke Yerusedem, 28ndin ke unyọñọ ufọk anye aketie ke ukpadñkpọ amọ asʌk akood ñwed brọfed Aisaya. 29Ndin Sịbidịd Abasi amaabo Fidib, “Saña kpere ukpadñkpọ ako nyʌñ ke da diana anye.”
30Naña Fidib akefegheke abịne ukpadñkpọ, anye amaakop nte anye awo Etiopia asʌk akood brọfed Aisaya. Fidip amaabịp anye abo, “Se afo akood unwaña?”
31Anye amaabọọrọ, “Ami ñkeme die adidiọọñọ, ibọhọke awo anam nọ añnwaña?” Do ndin ke anye akebo Fidib adʌk aditie ye imọ.
32Itie ñwed Abasi a-anye akekoodo ado ami:
“Ekedʌt anye nte edọñ eka itie uwot unam,
nte ñnyịn edọñ a-ammiisiooho uyo ke iso mme andikwaad anye ided,
anye ikikʌppọke inua.
33Emaebọ anye unen enyʌñ esuenne anye.
Anie awo ikeme itañ mbaña nditọ-nditọ amọ?
Sia emaekekpịkke uwem amọ ke nsek isio ke ederimbod.”
34Awo itọ Etiopia ami amaabịp Fidib abo, “Mbọk tañ nnọ ise, anie awo ke brọfed ami atañ abaña, idem amọ me awo mfen?” 35Ndin Fidib amaatọọñọ ke itie ñwed Abasi ado anyʌñ akwọrọ eti etob Yisọs anọ anye.
36Naña ammọ ekesʌkkọ eka ke usʌñ isañ ado, ammọ emaediwuọ itie mmọọñ keed, ndin itọ ado amaabo, “Kap se mmọọñ mi, nso-o ikeme adiñkpan miin adibọ uduọkmmọọñ?”
37Fidib amaabo anye, “Amekeme, akpedo amenịm ke afịd esịd mfo.”
Awo itọ amaabọọrọ ate, “Ami mmenịm ke akpanikọ nte ke Yisọs ado Ayịn Abasi.” 38Ndin anye amaabo awad ukpadñkpọ amọ asọñ ada. Do ndin Fidib ye itọ emaesọiyọ edọọñọ mmọọñ, Fidib anyʌñ anịm anye uduọkmmọọñ. 39Ado ammọ ekewuọọñọ ke mmọọñ edi, Sịbidịd Abọọñ amaaben Fidib adakka, awo itọ ami ikinyʌññọ ikịt Fidib aba, ado amaanyọñ ke idaara. 40Ado Fidib akedikịt idem amọ ke Asotus, anyʌñ aka iso ke isañ amọ akwọrọ eti etob ke afịd idʌñ tutu akesịm Siseria.
Currently Selected:
Utom 8: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
